ຂ່າວຫຼ້າສຸດ

ອາຣາບີ ຊາອຸດິດ ເລີ່ມຍົກເລີກການຈຳກັດຕໍ່ແມ່ຍິງ

820 22 ສ.ຫ. 2019 ຂ່າວຕ່າງປະເທດ
ອາຣາບີ ຊາອຸດິດ ເລີ່ມຍົກເລີກການຈຳກັດຕໍ່ແມ່ຍິງ

    ອາ​ຣາ​ບີ ຊາ​ອຸ​ດິດ ໄດ້​ເລີ່ມ​ອະນຸຍາດ​ໃຫ້​ແມ່ຍິງ​ໃນ​ໄວ​ຜູ້​ໃຫຍ່ ສາມາດ​ເດີນທາງ​ໄປ​ມາ ໄດ້​ຢ່າງ​ເສລີ ໂດຍ​ທີ່​ບໍ່​ຈຳເປັນ​ຕ້ອງ​ຂໍອະນຸຍາດ ພ້ອມ​ກັນ​ນັ້ນ​ກໍ​ມີ​ສິດທິ​ຫຼາຍ​ຂຶ້ນ ຢູ່​ໃນ​ບັນດາ​ບັນຫາ ພາຍ​ໃນ​ຄອບຄົວ ຫຼັງ​ຈາກ​ທີ່​ມີ​ດຳລັດ​ຂອງ​ລາດ​ຊະ​ວົງ​ອອກ​ມາ​ຫຼາຍ​ສະບັບ ທີ່​ເປັນ​ການ​ອະນຸຍາດ ໃຫ້​ມີ​ການ​ປ່ຽນແປງ​ດັ່ງກ່າວ.

    ໃນ​ຊຸມ​ປີ​ທີ່​ຜ່ານ​ມາ ທາງ​ການ​ອາ​ຣາ​ບີ ຊາ​ອຸ​ດິດ ໄດ້​ຍົກເລີກ​ການ​ຈຳກັດ​ຕໍ່​ແມ່ນ​ຍິງ ໄປ​ເທື່ອ​ລະ​ກ້າວ ອັນ​ປະກອບ​ດ້ວຍ​ການ​ຢຸດຕິ​ຂໍ້​ກຳນົດ​ກ່ຽວ​ກັບ​ການ​ຫ້າມ​ແມ່ຍິງ​ຂັບ​ລົດ ນັບ​ແຕ່​ປີ 2018 ເປັນຕົ້ນ​ໄປ. ດຳລັດ​ຂອງ​ລາດ​ຊະ​ວົງ​ອີກ​ຫຼາຍ​ສະບັບ ກໍ​ໄດ້​ນຳ​ອອກ​ມາ​ເມື່ອ​ຕົ້ນ​ເດືອນ​ນີ້ ເພື່ອ​ຍົກເລີກ ການ​ຈຳກັດ​ຕ່າງໆ​ຕໍ່​ແມ່ຍິງ ໃນ​ນັ້ນ​ປະກອບ​ມີ​ຂໍ້​ກຳນົດ​ກ່ຽວ​ກັບ​ໜັງສືຜ່ານແດນ ໃຫ້​ແກ່​ພົນລະເມືອງ ອາ​ຣາ​ບີ ຊາ​ອຸ​ດິດ ຈະ​ໄດ້​ອອກ​ໃຫ້​ພົນລະເມືອງ​ຜູ້​ໃດ​ກໍ​ຕາມ​ທີ່​ມີ​ຄຳ​ຮ້ອງ​ສະເໜີ ແລະ ຜູ້​ໃດ​ກໍ​ຕາມ ທີ່​ມີ​ອາຍຸ 21 ປີ​ຂຶ້ນ​ໄປ ຕ່າງ​ກໍ​ບໍ່​ຈຳເປັນ​ທີ່​ຈະ​ມີ​ການ​ໃຫ້​ອະນຸຍາດ ຈຶ່ງ​ຈະ​ເດີນທາງ​ໄປ​ມາ​ໄດ້.

    ການ​ປ່ຽນແປງ​ຕ່າງໆ​ດັ່ງກ່າວ ກໍ​ເປັນ​ເທື່ອ​ທຳ​ອິດ ທີ່​ໃຫ້​ສິດທິ​ແກ່​ແມ່ຍິງ ໃນ​ການ​ລົງທະບຽນ ເກີດ​ລູກ ແຕ່ງດອງ ຫຼື​ຢ່າ​ຮ້າງ ແລະ ມີ​ສິດ​ເປັນ​ຜູ້​ອຸປະກາລະ​ຕໍ່​ລູກ ໃນ​ເວລາ​ທີ່​ອາຍຸ​ຍັງ​ບໍ່​ເຖິງ​ກະສຽນ.

ມີ​ແມ່ຍິງ​ກວ່າ 1.000 ຄົນ ຢູ່​ໃນ​ແຂວງ​ທາງ​ທິດຕາເວັນອອກ​ຂອງ​ອາ​ຣາ​ບີ ຊາ​ອຸ​ດິດ ໄດ້​ເດີນທາງ​ອອກ​ຈາກ ອາ​ຣາ​ບີ ຊາ​ອຸ​ດິດ ໃນ​ວັນ​ທີ 19 ສິງຫາ​ນີ້ ໂດຍ​ທີ່​ບໍ່​ຈຳເປັນ​ຕ້ອງ​ໄດ້ ຮັບ​ອະນຸຍາດ​ຈາກ​ຜູ້​ອຸປະກາລະ.

ຂ່າວທີ່ກ່ຽວຂ້ອງ