ເກີດເຫດການຈີ້ລົດໂດຍສານຢູ່ໃນບຣາຊີລ

565 22 ສ.ຫ. 2019 ຂ່າວຕ່າງປະເທດ
ເກີດເຫດການຈີ້ລົດໂດຍສານຢູ່ໃນບຣາຊີລ

   ເຈົ້າ​ໜ້າທີ່ ແລະ ສື່ສານ​ໃນ​ບຣາ​ຊີ​​ລ ແຈ້ງ​ໃຫ້​ຮູ້ເມື່ອ​ວັນ​ທີ 20 ສິງຫາ​ນີ້​ວ່າ ມື​ປືນ​ທີ່​ຈີ້​ລົດ​ບັດ ໂດຍສານ​ຄັນ​ໜຶ່ງ ຊຶ່ງ​ບັນທຸກ​ຜູ້ໂດຍສານ​ຫຼາຍ​ສິບ​ຄົນ ຢູ່​ໃນ​ນະຄອນ ຣີ​ໂອ ເດີ ຈາ​ເນ​ໂຣ ນັ້ນ​ໄດ້​ຖືກ ຕຳຫຼວດ​ຈັບ​ຕາຍ​ແລ້ວ. ໜັງສືພິມ Globo News ອ້າງ​ຕາມ​ແຫຼ່ງ​ຂ່າວ​ຈາກ ເຈົ້າ​ໜ້າທີ່​ຕຳຫຼວດ ແລະ ຜູ້​ເຫັນ​ເຫດການ ຊີ້​ແຈງ​ວ່າ ຕຳຫຼວດ​ໄດ້​ຍິງ​ປືນ ແລະ ເບິ່ງ​ຄື​ວ່າ​ເປົ້າ​ໝາຍ​ທີ່​ກໍ່​ເຫດ​ນັ້ນ​ໄດ້​ເສຍ​ຊີວິດ.

    ຂ່າວສານ Reuters ລາຍ​ງານ​ວ່າ ມື​ປືນ​ດັ່ງກ່າວ ໄດ້​ຈັບ​ຜູ້ໂດຍສານ 37 ຄົນ ໄວ້​ເທິງ​ລົດ​ບັດ​ເພື່ອ​ເປັນ​ຕົວ​ປະກັນ ກ່ອນ​ທີ່​ຈະ​ປ່ອຍ​ຕົວ​ອອກ​ມາ 6 ຄົນ. ໃນ​ຂະນະ​ດຽວ​ກັນ ຂ່າວສານ AFP ລາຍ​ງານ​ວ່າ ມີ​ຜູ້​ຖືກ​ຈັບ​ຕົວ​ໄວ້​ເປັນ​ຕົວ​ປະກັນ​ຢ່າງ​ໜ້ອຍ 16 ຄົນ ຫຼັງ​ຈາກ​ທີ່​ມື​ປືນ​ຄົນ​ໜຶ່ງ ຈີ້​ລົດ​ບັດ​ໂດຍສານ​ໃນ​ເວລາ​ທີ່​ແລ່ນ​ຢູ່​ເທິງ​ຂົວ​ແຫ່ງ​ໜຶ່ງ ທີ່​ເຊື່ອມ​ຕໍ່​ນະຄອນ ຣີ​ໂອ ເດີ ຈາ​ເນ​ໂຣ ກັບ​ນະຄອນ ນີ​ເຕ​ຣອຍ.

    ຢ້ອນ​ຄືນ​ຫຼັງ ເມື່ອ​ປີ 2000 ກໍ​ມີ​ມື​ປືນ​ຜູ້​ໜຶ່ງ​ໂຈມ​ຕີ​ລົດ​ບັດ​ຄັນ​ໜຶ່ງ ຢູ່​ໃນ​ເຂດ​ຊຸມ​ຊົນ ທີ່​ເປັນ​ຄົນ​ຊັ້ນ​ສູງ. ເຫດການ​ນີ້​ໄດ້ແກ່​ຍາວ​ເປັນ​ເວລາ​ຫຼາຍ​ຊົ່ວໂມງ ແລະ ຫຼັງ​ຈາກ​ນັ້ນ​ກໍ​ໄດ້​ຖືກ​ສ້າງ ເປັນ​ເນື້ອ​ໃນ​ຂອງ​ຮູບເງົາ​ເອກະສານ ໂດຍ​ໄດ້​ຮັບ​ລາງວັນ​ໃນ​ການ​ປະ​ກວດ.

ຂ່າວທີ່ກ່ຽວຂ້ອງ