ເດັກ​ຍິງ​ອາຍຸ 11 ປີ ຊະນະ​ໃນ​ການ​ຍື່ນ​ຟ້ອງ​ກ່ຽວ​ກັບ​ຄວາມ​ສະ​ເໝີ​ພາບ​ລະຫວ່າງ​ເພດ

573 22 ສ.ຫ. 2019 ຂ່າວຕ່າງປະເທດ
ເດັກ​ຍິງ​ອາຍຸ 11 ປີ ຊະນະ​ໃນ​ການ​ຍື່ນ​ຟ້ອງ​ກ່ຽວ​ກັບ​ຄວາມ​ສະ​ເໝີ​ພາບ​ລະຫວ່າງ​ເພດ

    ສານ​ລັດ​ຖະ​ທຳ​ມະນູນ​ຂອງ​ໂກ​ລົມ​ບີ ໄດ້​ມີ​ຄຳ​ຕັດສິນ​ຄັ້ງ​ປະຫວັດສາດ​ອອກ​ມາ​ເມື່ອ​ບໍ່​ດົນ​ມາ​ນີ້ ສຳລັບ​ການ​ປົກ​ປ້ອງ​ສິດ​ສະເໝີພາບ​ລະຫວ່າງ​ເພດ​ຂອງ​ເດັກນ້ອຍ ໃນ​ເມື່ອ​ສານ​ດັ່ງກ່າວ ອອກ​ຄຳ​ສັ່ງ​ໄປ​ຍັງ​ຄະນະ​ຈັດ​ຕັ້ງ​ຂອງ​ການ​ແຂ່ງຂັນ​ບານເຕະ​ເຍົາວະ​ຊົນ ໃຫ້​ຍອມຮັບ​ເດັກ​ຍິງ​ຄົນ​ໜຶ່ງ ພ້ອມ​ດ້ວຍ​ທິມ​ບານເຕະ​ຂອງ​ນາງ ໃນ​ການ​ໄດ້​ເຂົ້າ​ຮ່ວມ​ການ​ແຂ່ງຂັນ ທີ່​ຈັດ​ໃຫ້​ແກ່​ນັກຮຽນ​ເພດ​ຊາຍ ຫຼັງ​ຈາກ​ທີ່​ທິມ​ດັ່ງກ່າວ​ຖືກ​ເຂ່ຍ​ອອກ​ໄປ ດ້ວຍ​ເຫດຜົນ​ທີ່​ວ່າ​ມີ​ເດັກ​ຍິງ​ຄົນ​ໜຶ່ງ ເຂົ້າ​ຮ່ວມ​ຢູ່​ໃນ​ທິມ​ບານເຕະ​ເພດ​ຊາຍ ນັ້ນ​ເປັນ​ເລື່ອງ​ທີ່ “ບໍ່​ປົກກະຕິ.”

    ຕາມ​ການ​ຕັດສິນ​ຂອງ​ສານ​ດັ່ງກ່າວ​ແລ້ວ ການ​ເຂ່ຍ​ເດັກ​ຍິງ​ຄົນ​ໜຶ່ງ​ອອກ​ຈາກ​ການ​ແຂ່ງຂັນ ເປັນ​ການ​ກະທຳ​ທີ່​ຕັດຂາດ​ສິດທິ​ອັນ​ພື້ນຖານ ໃນ​ການ​ບັນເທີງ​ເບົາ​ສະໝອງ ແລະ ການ​ກິລາ​ຂອງ​ເດັກ​ຍິງ ແລະ ທິມ​ບານເຕະ​ຂອງ​ນາງ ກໍ​ຄື​ເປັນ​ການ​ສະກັດ​ກັ້ນ​ໂອກາດ​ການ​ໄດ້​ສືບຕໍ່​ຍົກ​ສູງ​ຂີດ​ຄວາມ​ສາມາດ ແລະ ທັກ​ສະ​ຂອງ​ເດັກ​ຍິງ​ຄົນ​ນີ້. ໃນ​ຂະນະ​ດຽວ​ກັນ ການ​ຕັດສິນ​ຂອງ​ສານ ກໍ​ລະບຸ​ວ່າ ນີ້​ຍັງ​ເປັນ​ການເຄື່ອນໄຫວ​ຈຳແນກ​ເພດ ແລະ ຈຳແນກ​ການ​ປະພຶດ​ຢູ່​ໃນ​ກິລາ.

    ສານ​ລັດ​ຖະ​ທຳ​ມະນູນ​ຂອງ​ໂກ​ລົມ​ບີ ຍັງ​ໄດ້​ປະຕິເສດ​ຕໍ່​ການ​ແກ້ຄວາມ​ຂອງ​ບັນດາ​ຜູ້​ຖືກ​ຫາ ອັນ​ປະກອບ​ມີ​ຄະນະ​ຈັດ​ຕັ້ງ​ການ​ແຂ່ງຂັນ​ບານເຕະ​ສະໝັກ​ຫຼິ້ນ​ຂອງ​ໂກ​ລົມ​ບີ ແລະ ສະຫະພັນ​ບານເຕະ ໂບ​ໂກ​ຕາ ເມື່ອ​ເຫັນ​ວ່າການ​ສ້າງຕັ້ງ​ທິມ​ບານເຕະ “ປະສົມ” (ປະກອບ​ມີ​ເພດ​ຊາຍ ແລະ ເພດ​ຍິງ) ເປັນ​ການ​ລະເມີດ​ຕໍ່​ກົດໝາຍ ຂອງ​ສະຫະພັນ​ບານເຕະ​ສາກົນ (FIFA).

    ກ່ອນ​ໜ້າ​ນັ້ນ ສານ​ລັດ​ຖະ​ທຳ​ມະນູນ​ໂກ​ລົມ​ບີ ໄດ້​ຮັບ​ເອົາ​ຄຳ​ຮ້ອງ​ຟ້ອງ ຂອງ​ທ່ານ ອາ​ລວາ​ໂຣ ມໍ​ຣາ ຣີ​​ອົສ ຜູ້​ເປັນ​ພໍ່​ຂອງ​ເດັກ​ຍິງ ມາ​ເຣຍ ປາ​​ສ ມໍ​ຣາ ຊິ​ລວາ ອາຍຸ 11 ປີ ໂດຍ​ໄດ້​ກ່າວ​ປະນາມ​ຕໍ່​ການ​ທີ່​ບັນດາ​ຜູ້​ຈັດ​ຕັ້ງ​ການ​ແຂ່ງຂັນ​ຊີງ​ຊະນະ​ເລີດ​ບານເຕະ​ເຍົາວະ​ຊົນ ລີ​ກາ ໂປ​ນີ ຟຸດ​​ບອລ (Liga Pony Futbol) ຢູ່​ໃນ​ນະຄອນຫຼວງ​ໂບ​ໂກ​ຕາ ໄດ້​ເຂ່ຍ​ທິມ​ບານເຕະ​ທີ່​ມາ​ເຣຍ ປາ​​ສ ສັງກັດ​ຢູ່ ນັ້ນ​ອອກ​ໄປ​ຈາກ​ການ​ແຂ່ງຂັນ ໂດຍ​ບໍ່​ເອົາ​ຫົວຊາ​ຕໍ່​ການ​ທີ່​ທິມ​ບານເຕະ​ນີ້ ໄດ້​ແຂ່ງຂັນ 3 ນັດ ຮ່ວມ​ກັບ​ນັກ​ກິລາ​ເພດ​ຍິງ​ຕົວ​ນ້ອຍໆ​ຄົນ​ນີ້​ຜ່ານ​ໄປ. ເດັກ​ຍິງ ມາ​ເຣຍ ປາ​​ສ ເຂົ້າ​ສູ່​ວົງ​ການ​ກິລາ​ບານເຕະ ຕັ້ງແຕ່​ອາຍຸ 3 ປີ ໂດຍ​ນາງ​ຫຼິ້ນ​ຢູ່​ໃນ​ຕຳແໜ່ງ​ຜູ້​ຮັກສາ​ປະຕູ ແລະ ຄູ​ຝຶກ​ຂອງ​ທິມ​ເວົ້າ​ວ່າ ເດັກ​ຍິງ​ຄົນ​ນີ້​ໄດ້​ຮັບ​ການ​ຄັດ​ເລືອກ ເພາະວ່າ​ເປັນ​ຜູ້​ດີເດັ່ນ​ທີ່​ສຸດ ຢູ່​ໃນ​ຕຳແໜ່ງ​ຂອງ​ຕົນ ສຳລັບ​ທິມ​ດັ່ງກ່າວ.

 

ຂ່າວທີ່ກ່ຽວຂ້ອງ