UNICEF ຮຽຮ້ອງຄວາມຊ່ວຍເຫຼືອມະນຸດສະທຳໃຫ້ແກ່ເດັກນ້ອຍເວເນຊູເອລາ

587 22 ສ.ຫ. 2019 ຂ່າວຕ່າງປະເທດ
UNICEF ຮຽຮ້ອງຄວາມຊ່ວຍເຫຼືອມະນຸດສະທຳໃຫ້ແກ່ເດັກນ້ອຍເວເນຊູເອລາ

    ວັນ​ທີ 20 ສິງຫາ​ນີ້ ກອງ​ທຶນ​ສຳລັບ​ເດັກນ້ອຍ​ຂອງ​ສະຫະ​ປະຊາ​ຊາດ (UNICEF) ໄດ້​ຮຽກຮ້ອງ​ຄວາມ​ຊ່ວຍເຫຼືອ​ມະນຸດສະທຳ ເປັນ​ມູນ​ຄ່າ ກວ່າ 70 ລ້ານ​ໂດ​ລາ​ສະຫະລັດ ເພື່ອ​ນຳໄປ​ຊ່ວຍເຫຼືອ​ເດັກນ້ອຍ 900.000 ຄົນ ໃນ​ທົ່ວ​ປະເທດ​ເວ​ເນ​ຊູ​ເອ​ລາ ພາຍ​ໃນ​ທ້າຍ​ປີ​ນີ້.

    ທ່ານ ເຮນ​ຣີ​ເອດ​ຕາ ຟໍ ຜູ້ອຳນວຍການ​ຝ່າຍ​ບໍລິຫານ​ຂອງ UNICEF ເວົ້າ​ວ່າ ເດັກນ້ອຍ​ປະມານ 3,2 ລ້ານ​ຄົນ ຢູ່​ໃນ​ເວ​ເນ​ຊູ​ເອ​ລາ ຕ້ອງການ​ຄວາມ​ຊ່ວຍເຫຼືອ​ມະນຸດສະທຳ ທ່າມກາງ​ທີ່​ເງື່ອນໄຂ​ຕ່າງໆ​ຢູ່​ໃນ​ທົ່ວ​ປະເທດ ສືບຕໍ່​ຂີ້ຮ້າຍ​ລົງ​ໄປ. ຈຳນວນ​ເງິນ ໃຫ້​ຄວາມ​ຊ່ວຍເຫຼືອ​ໃໝ່ ພາຍ​ໃນ​ຫຼາຍ​ອາທິດ​ຕໍ່ໜ້າ​ນັ້ນ ມີ​ຄວາມ​ຈຳເປັນ​ຢ່າງ​ຍິ່ງ​ໃຫ້​ແກ່  UNICEF ແລະ ບັນດາ​ຄູ່​ຮ່ວມ ເພື່ອ​ຕອບ​ສະໜອງ​ຕໍ່​ຄວາມ​ຕ້ອງການ​ດ້ານ​ມະນຸດສະທຳ​ທີ່​ສຳຄັນ ຂອງ​ເດັກນ້ອຍ ແລະ ຄອບຄົວ ຢູ່​ໃນ ເວ​ເນ​ຊູ​ເອ​ລາ.

    ປັດຈຸບັນ​ນີ້ ມີ​ຢ່າງ​ໜ້ອຍ 4,3 ລ້ານ​ຄົນ ໃນ​ທົ່ວ​ປະເທດ​ເວ​ເນ​ຊູ​ເອ​ລາ ບໍ່​ມີ​ນ້ຳ​ດື່ມ​ທີ່​ປອດ​ໄພ ປະກອບ​ກັບ​ພະຍາດ​ຕ່າງໆ​ທີ່​ສາມາດ​ປ້ອງ​ກັນ​ໄດ້​ດ້ວຍ​ວັກ​ແຊງ ໃນ​ນັ້ນ​ມີ​ພະຍາດໝາກແດງ ໄດ້​ກັບ​ມາ​ປະກົດ​ຕົວ ໃນ​ຂະນະ​ທີ່​ໄຂ້​ຜີວ​ໜັງ​ເຫຼືອງ ແລະ ໄຂ້​ມາລາ​ເຣຍ ພວມ​ເພີ່ມ​ຂຶ້ນ. ໃນ​ຂະນະ​ດຽວ​ກັນ ຄາດ​ວ່າ​ມີ​ເດັກນ້ອຍ ແລະ ຊາວ​ໜຸ່ມ​ເຍົາວະ​ຊົນ ປະມານ 1,3 ລ້ານ​ຄົນ ຢູ່​ໃນ​ເວ​ເນ​ຊູ​ເອ​ລາ ມີ​ຄວາມ​ຕ້ອງການ​ບັນດາ​ການ​ບໍລິການ ໃນ​ການ​ປ້ອງ​ກັນ  ໃນ​ຂະນະ​ທີ່​ມີ​ເດັກນ້ອຍ 1 ລ້ານ​ກວ່າ​ຄົນ ບໍ່​ໄດ້​ໄປ​ເຂົ້າ​ໂຮງຮຽນ.

    ນັບ​ແຕ່​ປີ 2018 ເປັນຕົ້ນ​ມາ UNICEF ໄດ້​ສົ່ງ​ເຄື່ອງມື​ການ​ແພດ ສານ​ບຳລຸງ ອຸປະກອນ​ການ​ສຶກ​ສາ ນ້ຳ ອຸປະກອນ​ອະນາໄມ​ຂັ້ນ​ພື້ນຖານ ລວມ​ນ້ຳໜັກ​ເກືອບ 200 ໂຕນ ໄປ​ໃຫ້ ເວ​ເນ​ຊູ​ເອ​ລາ. ມາ​ຮອດ​ປັດຈຸບັນ​ນີ້ UNICEF ແລະ ບັນດາ​ຄູ່​ຮ່ວມ ໄດ້​ໃຫ້​ຄວາມ​ຊ່ວຍເຫຼືອ ປະຊາຊົນ​ເວ​ເນ​ຊູ​ເອ​ລາ 180.000 ກວ່າ​ຄົນ ໃຫ້​ສາມາດ​ເຂົ້າ​ຫາ​ນ້ຳ​ດື່ມ​ທີ່​ປອດ​ໄພ ພ້ອມ​ທັງ​ຊ່ວຍເຫຼືອ ເດັກນ້ອຍ 60.000 ກວ່າ​ຄົນ ໄດ້​ເຂົ້າ​ຫາ​ເອກະສານ​ການ​ຮ່ຳຮຽນ ແລະ ສະໜອງ​ອາຫານ ເສີມ​ໃຫ້​ແກ່​ເດັກນ້ອຍ 76.000 ຄົນ ທີ່ຢູ່​ໃນ​ໄວ​ຕ່ຳ​ກວ່າ 5 ປີ ກໍ​ຄື​ແມ່ຍິງ​ຖືພາ​ມານ ແລະ ໃຫ້​ລູກ​ດື່ມ​ນົມ.

ຂ່າວທີ່ກ່ຽວຂ້ອງ