ຂ່າວຫຼ້າສຸດ

ສົ່ງເສີມການມີວຽກເຮັດງານທຳແບບມີຄຸນຄ່າ

800 22 ສ.ຫ. 2019 ຂ່າວໜ້າ​ໜຶ່ງ

    ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ (ຮສສ ນວ) ຈັດ​ສຳ​ມະ​ນາ ຫົວ­ຂໍ້ “ສົ່ງ­ເສີມ​ການ​ມີ​ວຽກ​ເຮັດ​ງານ​ທຳ​ແບບ​ມີ​ຄຸນ­ຄ່າ” ຂຶ້ນ​ວັນ​ທີ 19 ສິງ­ຫາ 2019 ຢູ່​ພະ​ແນກ​ດັ່ງ­ກ່າວ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ພະ­ແນກ­ການ​ອ້ອມ​ຂ້າງ ຮອງ​ເຈົ້າ­ເມືອງ ຫ້ອງ­ການ ຮສສ ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ ຮສສ ນວ ກ່າວ​ວ່າ: ວຽກ​ງານ​ພັດ­ທະ­ນາ​ສີ­ມື​ແຮງ​ງານ ໄດ້​ປະ­ສານ​ສົມ­ທົບ​ກັບ​ບັນ­ດາ​ສະ​ຖາ​ບັນ​ພັດ­ທະ­ນາ​ສີ­ມື​ແຮງ​ງານ ໂຮງ­ງານ ສູນ​ເຝິກ​ວິ­ຊາ​ຊີບ​ທັງ​ພາກ​ລັດ ເອ­ກະ​ຊົນ ແລະ ຫົວ­ໜ່ວຍ​ແຮງ​ງານ ຈັດ​ຕັ້ງ​ພັດ­ທະ­ນາ​ສີ­ມື​ແຮງ​ງານ ຈັດ​ເຝິກ­ອົບ­ຮົມ​ເຄື່ອນ​ທີ່​ໃຫ້​ຊາວ​ໜຸ່ມ​ຜູ້​ດ້ອຍ​ໂອ­ກາດ ສ້າງ​ມາດ­ຕະ­ຖານ​ສີ­ມື​ແຮງ​ງານ ໂດຍ​ການ​ທົດ​ສອບ ແລະ ອອກ​ໃບ­ຢັ້ງ­ຢືນ​ສີ­ມື​ແຮງ​ງານ​ມາດ­ຕະ­ຖານ (ສີ­ມື​ແຮງ​ງານ​ລະ­ດັບ 1) ຈັດ​ເຝິກ­ອົບ­ຮົມ​ການ​ປະ­ສານ​ງານ​ທີ່​ມີ​ປະ​ສິດ­ທິ​ຜົນ ແລະ ການ​ສ້າງ​ບໍ­ລິ­ການ​ທີ່​ປະ​ທັບ​ໃຈ​ໃຫ້​ພະ­ນັກ­ງານ-ລັດ­ຖະ­ກອນ ສ່ວນ​ວຽກ​ງານ​ຈັດ​ຫາ​ງານ​ໄດ້​ເອົາ­ໃຈ­ໃສ່​ປະ­ສານ​ສົມ ທົບ​ກັບ​ບໍ­ລິ­ສັດ​ຈັດ​ຫາ​ງານ ແລະ ຫົວ­ໜ່ວຍ​ທຸ­ລະ​ກິດ ໃນ​ການ​ສະ­ໜອງ​ແຮງ​ງານ​ເຂົ້າ​ສູ່​ຕະ­ຫຼາດ​ແຮງ​ງານ ຂຶ້ນ​ທະ­ບຽນ​ຜູ້​ຕ້ອງ­ການ​ວຽກ​ເຮັດ​ງານ​ທຳ ຈັດ​ງານ​ຕະ­ຫຼາດ­ນັດ​ພົບ​ແຮງ​ງານ ເກັບ​ກຳ​ຕຳ­ແໜ່ງ​ວ່າງ ພ້ອມ​ທັງ​ຂຶ້ນ​ທະ­ບຽນ​ໃໝ່​ໃຫ້​ແຮງ​ງານ​ຕ່າງ­ປະ­ເທດ​ຖືກ­ຕ້ອງ​ຕາມ​ກົດ­ໝາຍ.

    ທ່ານ ສີ​ຫຸນ ສິດ­ທິ​ລື​ໄຊ ໄດ້​ເນັ້ນ​ໃຫ້​ພາກ­ສ່ວນ​ກ່ຽວ­ຂ້ອງ​ພ້ອມ​ກັນ​ເອົາ­ໃຈ­ໃສ່​ສຶກ​ສາ​ອົບ­ຮົມ​ການ­ເມືອງ-ແນວ​ຄິດ ແລະ ຍົກ​ລະ­ດັບ​ຄວາມ​ຮູ້​ວິ­ຊາ​ສະ­ເພາະ​ໃນ​ຖັນ​ແຖວ​ສະ­ມາ­ຊິກ​ພັກ ພະ­ນັກ­ງານ-ລັດ­ຖະ­ກອນ ບຳ­ລຸງ​ກໍ່­ສ້າງ​ພະ­ນັກ­ງານ-ລັດ­ຖະ­ກອນ ໃຫ້​ມີ​ຄວາມ​ຮູ້-ຄວາມ​ສາ­ມາດ​ດ້ານ​ວຽກ​ງານ​ວິ­ຊາ​ສະ­ເພາະ​ກັບ​ຕຳ­ແໜ່ງ​ງານ ສືບ­ຕໍ່​ແກ້​ໄຂ​ບັນ­ຫາ​ວຽກ​ເຮັດ​ງານ​ທຳ​ໃຫ້​ດີ​ຂຶ້ນ ພັດ­ທະ­ນາ​ສີ­ມື​ແຮງ​ງານ​ລາວ ໃຫ້​ໄດ້​ທັງ​ປະ­ລິ­ມານ ແລະ ຄຸນ​ນະ​ພາບ ປັບ­ປຸງ​ໂຄງ​ລ່າງ​ພື້ນ­ຖານ ແລະ ກົນ​ໄກ​ພັດ­ທະ­ນາ​ສີ­ມື​ແຮງ​ງານ ໂດຍ​ການ​ມີ​ສ່ວນ​ຮ່ວມ​ລະ­ຫວ່າງ​ພາກ​ລັດ ເອ­ກະ​ຊົນ ແລະ ຫົວ­ໜ່ວຍ​ແຮງ​ງານ ສ້າງ ແລະ ພັດ­ທະ­ນາ​ຖານ​ຂໍ້​ມູນ​ຂ່າວ­ສານ​ແຮງ​ງານ​ເປັນ​ລະ­ບົບ ປັບ­ປຸງ ແລະ ຂະ­ຫຍາຍ​ຈຸດ​ບໍ­ລິ­ການ​ຈັດ​ຫາ​ງານ ປົກ​ປ້ອງ​ສິດ ແລະ ຜົນ​ປະ­ໂຫຍດ​ຂອງ​ຜູ້​ອອກ­ແຮງ​ງານ ແລະ ຜູ້​ໃຊ້​ແຮງ​ງານ ຄຸ້ມ​ຄອງ​ແຮງ​ງານ​ລາວ ແລະ ແຮງ​ງານ​ຕ່າງ­ປະ­ເທດ​ທີ່​ເຮັດ​ວຽກ​ຢູ່ ນວ.

ຂ່າວທີ່ກ່ຽວຂ້ອງ