ຂ່າວຫຼ້າສຸດ

ລັດຖະມົນຕີ ຖວທ ຢ້ຽມຢາມໃຫ້ກຳລັງໃຈນັກທ່ອງທ່ຽວຊາວຈີນທີ່ເກີດອຸບັດເຫດ

780 22 ສ.ຫ. 2019 ຂ່າວໜ້າ​ໜຶ່ງ
ລັດຖະມົນຕີ ຖວທ ຢ້ຽມຢາມໃຫ້ກຳລັງໃຈນັກທ່ອງທ່ຽວຊາວຈີນທີ່ເກີດອຸບັດເຫດ

    ວັນ​ທີ 21 ສິງ­ຫາ 2019 ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ​ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ພ້ອມ​ຄະ­ນະ ຢ້ຽມ­ຢາມ ແລະ ໃຫ້​ກຳ­ລັງ​ໃຈ​ນັກ​ທ່ອງ​ທ່ຽວ​ຊາວ​ຈີນ​ທີ່​ໄດ້​ຮັບ​ອຸ­ບັດ­ເຫດ​ລົດ​ປີ້ນ ຢູ່​ເຂດ​ບ້ານ​ນາ​ເມືອງ ເສັ້ນ­ທາງ​ກາ­ສີ-ເມືອງ​ນານ ແຂວງ​ຫຼວງ​ພະ​ບາງ ທີ່​ນອນ​ປິ່ນ­ປົວ​ຢູ່​ໂຮງ­ໝໍ 103 ນະ­ຄອນ­ຫຼວງ​ວຽງ​ຈັນ ເພື່ອ​ຕິດ­ຕາມ​ອາ­ການ​ຜູ້​ທີ່​ໄດ້​ຮັບ​ບາດ­ເຈັບ.

    ທ່ານ ພັນ​ເອກ ຈັນ­ທະ​ພອນ ອຸ­ດົມ​ສຸກ ຮອງ​ຜູ້­ອຳ­ນວຍ­ການ​ໂຮງ­ໝໍ 103 ກ່າວ​ວ່າ: ເບື້ອງ​ຕົ້ນ (ວັນ​ທີ 20 ສິງ­ຫາ 2019) ມີ​ຄົນ​ເຈັບ 22 ຄົນ​ເຂົ້າ​ມາ​ປິ່ນ­ປົວ​ຢູ່​ໂຮງ­ໝໍ​ແຫ່ງ​ນີ້ ແຕ່​ມາ​ຮອດ​ວັນ​ທີ 21 ສິງ­ຫາ 2019 ມີ​ຄົນ​ເຈັບ​ກຳ­ລັງ​ປິ່ນ­ປົວ 20 ຄົນ ໃນ​ນີ້ ຢູ່​ພະ​ແນກ​ກະ­ທົບ​ກະ­ດູກ 12 ຄົນ ພະ​ແນກ​ໂຜ້ງ​ເອິກ 5 ຄົນ ພະ​ແນກ​ໂຜ້ງ​ທ້ອງ 2 ຄົນ ພະ​ແນກ ICU 1 ຄົນ ສ່ວນ​ອີກ 2 ຄົນ ແມ່ນ​ອາ­ການ​ບໍ່​ຮ້າຍ​ແຮງ ແລະ ສາ­ມາດ​ກັບ​ບ້ານ​ໄດ້​ແລ້ວ.

    ທ່ານ​ລັດ­ຖະ­ມົນ­ຕີ ໄດ້​ສະ­ແດງ​ຄວາມ​ເຫັນ­ໃຈ​ຕໍ່​ສະ­ພາບ​ເຫດ­ການ​ທີ່​ເກີດ​ຂຶ້ນ ພ້ອມ​ທັງ​ຮຽກ­ຮ້ອງ​ໃຫ້​ພາກ ສ່ວນ​ກ່ຽວ­ຂ້ອງ​ເອົາ­ໃຈ­ໃສ່​ດູ​ແລ​ເບິ່ງ­ແຍງ​ຜູ້​ປະ­ສົບ​ເຫດ­ການ​ດັ່ງ­ກ່າວ​ເປັນ​ພິ­ເສດ ແລະ ໃຫ້­ການ​ຊ່ວຍ­ເຫຼືອ​ຢ່າງ​ເຕັມ­ທີ່ ເພື່ອ​ເຮັດ​ໃຫ້​ຮ່າງ­ກາຍ ແລະ ຈິດ­ໃຈ​ຂອງ​ເຂົາ­ເຈົ້າ​ກັບ​ຄືນ​ສູ່​ສະ­ພາບ​ເປັນ​ປົກ­ກະ­ຕິ.

    ອີງ​ຕາມ​ຂໍ້​ມູນ​ຈາກ​ພາກ­ສ່ວນ​ກ່ຽວ­ຂ້ອງ​ລາຍ​ງານ​ໄດ້​ໃຫ້​ຮູ້​ວ່າ: ເວ­ລາ​ປະ­ມານ 15:30 ໂມງ ວັນ​ທີ 19 ສິງ­ຫາ 2019 ໄດ້​ມີ​ລົດ­ເມ​ຮັບ​ສົ່ງ​ນັກ​ທ່ອງ​ທ່ຽວ 46 ຄົນ ຍິງ 24 ຄົນ ໃນ​ນີ້ ສັນ­ຊາດ​ຈີນ 44 ຄົນ ຍິງ 23 ຄົນ ແລະ ສັນ­ຊາດ​ລາວ 2 ຄົນ ຍິງ 1 ຄົນ (ໄກ້​ນຳ​ທ່ຽວ ແລະ ຄົນ​ຂັບ​ລົດ) ເຊິ່ງ​ນັກ​ທ່ອງ​ທ່ຽວ​ດັ່ງ­ກ່າວ ໄດ້​ອອກ​ຈາກ​ນະ­ຄອນ­ຫຼວງ​ວຽງ​ຈັນ ເພື່ອ​ເດີນ­ທາງ​ໄປ​ແຫຼ່ງ​ທ່ອງ​ທ່ຽວ​ຢູ່​ພາກ​ເໜືອ ພໍ​ມາ​ຮອດ​ຈຸດ​ຂົວ​ນ້ຳ​ງາວ (ກາຍ​ພູ 9 ຫຼັກ) ເຂດ​ບ້ານ​ນາ​ເມືອງ ເມືອງ​ນານ ແຂວງ​ຫຼວງ​ພະ​ບາງ ລົດ​ຄັນ​ດັ່ງ­ກ່າວ​ໄດ້​ເສຍ​ຫຼັກ​ປີ້ນ​ຕົກ­ລົງ​ເຫວ ເລິກ​ປະ­ມານ 80 ແມັດ ເຮັດ​ໃຫ້​ມີ​ຜູ້​ເສຍ​ຊີ­ວິດ​ຄາ​ທີ່ 13 ສົບ ບາດ­ເຈັບ 23 ຄົນ ໃນ​ນີ້ ບາດ­ເຈັບ​ສາ­ຫັດ 3 ຄົນ ເຫຼືອ​ນັ້ນ​ແມ່ນ​ບາດ­ເຈັບ​ເລັກ​ໜ້ອຍ ເຊິ່ງ​ໃນ​ເບື້ອງ​ຕົ້ນ​ຜູ້​ບາດ­ເຈັບ​ຈຳ­ນວນ​ໜຶ່ງ​ໄດ້​ນຳ​ສົ່ງ​ໄປ​ປີ່ນ​ປົວ​ຢູ່​ໂຮງ­ໝໍ​ເມືອງ​ນານ ໂຮງ­ໝໍ​ແຂວງ​ຫຼວງ​ພະ​ບາງ ແລະ ຢູ່​ໂຮງ­ໝໍ 103.

    ເຫດ­ການ​ດັ່ງ­ກ່າວ ອົງ​ການ­ຈັດ­ຕັ້ງ​ສັງ­ຄົມ ໂດຍ​ສະ­ເພາະ ອົງ­ການ​ປົກ­ຄອງ​ແຂວງ​ຫຼວງ​ພະ​ບາງ ໄດ້​ສົ່ງ​ກຳ­ລັງ​ທະ­ຫານ ຕຳ­ຫຼວດ ແລະ ຊາວ​ໜຸ່ມ​ບ້ານ ທີ່­ຢູ່​ໃກ້​ຈຸດ​ເກີດ​ເຫດ​ເຂົ້າ​ໃຫ້­ການ​ຊ່ວຍ­ເຫຼືອ​ເອົາ​ຜູ້​ບາດ­ເຈັບ ແລະ ຜູ້​ເສຍ​ຊີ­ວິດ​ອອກ​ຈາກ​ລົດ​ຄັນ​ດັ່ງ­ກ່າວ ປັດ­ຈຸ­ບັນ​ທີມ​ແພດ​ທະ­ຫານ​ຂອງ​ຈີນ​ສົມ­ທົບ​ກັບ​ແພດ​ລາວ ໄດ້​ສຸມ​ກຳ­ລັງ​ເພື່ອ​ໃຫ້­ການ​ຊ່ວຍ­ເຫຼືອ​ປິ່ນ­ປົວ​ຜູ້​ທີ່​ໄດ້​ຮັບ​ບາດ­ເຈັບ​ດັ່ງ­ກ່າວ.

ຂ່າວທີ່ກ່ຽວຂ້ອງ