ຂ່າວຫຼ້າສຸດ

ເສີມຂະຫຍາຍມູນເຊື້ອ 23 ສິງຫາ ເຂົ້າສູ່ຊີວິດຕົວຈິງ

794 22 ສ.ຫ. 2019 ຂ່າວໜ້າ​ໜຶ່ງ
ເສີມຂະຫຍາຍມູນເຊື້ອ 23 ສິງຫາ ເຂົ້າສູ່ຊີວິດຕົວຈິງ

    ທ່ານ ເຂັມ​ເພັດ ແພງ​ດວງ​ຈັນ ຄະ­ນະ​ພັກ ນວ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 20 ສິງ­ຫາ 2019 ວ່າ: ວັນ​ຢຶດ​ອຳ­ນາດ 23 ສິງ­ຫາ ເປັນ​ວັນ​ປະ­ຫວັດ­ສາດ​ຂອງ​ຊາດ​ລາວ ໃນ​ນາມ​ເປັນ​ປະ­ຊາ­ຊົນ​ລາວ ແລະ ເປັນ​ສະ­ມາ­ຊິກ​ພັກ ຕົນ​ຮູ້­ສຶກ​ປິ​ຕິ​ຊົມ­ຊື່ນ​ຢ່າງ​ຍິ່ງ​ທີ່​ໄດ້​ຮັບ​ຮູ້ ແລະ ເຫັນ​ປະ­ຫວັດ­ສາດ​ຂອງ​ຊາດ​ລາວ ພາຍ​ໃຕ້​ການ​ນຳ­ພາ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ດຳ­ເນີນ​ການ​ຕໍ່­ສູ້​ກູ້​ຊາດ​ນັບ​ແຕ່​ພັກ​ໄດ້​ສ້າງ­ຕັ້ງ​ຂຶ້ນ ວັນ​ທີ 22 ມີ­ນາ 1955 ໄດ້​ນຳ­ພາ​ກອງ­ທັບ ແລະ ປະ­ຊາ­ຊົນ​ລາວ​ຕໍ່­ສູ້​ຕ້ານ​ຈັກ­ກະ­ພັດ​ຜູ້​ຮຸກ​ຮານ ເຊິ່ງ​ແມ່ນ​ຈັກ­ກະ­ພັດ​ທີ່​ໃຫຍ່​ໂຕ ແລະ ທັນ​ສະ­ໄໝ​ໃຫ້​ປະ​ລາ​ໄຊ ແລ້ວ​ລົບ​ລ້າງ​ລະ­ບອບ​ສັກ​ດີ​ນາ​ຫົວ​ເມືອງ​ຂຶ້ນ ສ້າງ­ຕັ້ງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ​ລາວ ຂຶ້ນ​ແທນ ໃນ​ວັນ​ທີ 2 ທັນ­ວາ 1975 ເຊິ່ງ​ແມ່ນ​ເຫດ­ການ​ປະ­ຫວັດ­ສາດ​ທີ່​ບໍ່​ເຄີຍ​ມີ​ມາ​ກ່ອນ​ໃນ​ປະ­ຫວັດ­ສາດ​ຂອງ​ຊາດ ຕົນ​ຮູ້­ສຶກ​ຮູ້​ບຸນ­ຄຸນ​ອັນ​ໃຫຍ່​ຫຼວງ​ຂອງ​ການ​ນຳ​ພັກ-ລັດ​ທີ່​ໄດ້​ອຸ­ທິດ​ເຫື່ອ­ແຮງ ສະ­ຕິ​ປັນ­ຍາ​ນຳ­ພາ​ປະ­ຊາ­ຊົນ​ບັນ­ດາ­ເຜົ່າ​ລຸກ ຂຶ້ນ​ຕໍ່­ສູ້​ຕ້ານ​ສັດ­ຕູ​ຜູ້​ຮຸກ​ຮານ ແລະ ລູກ­ແຫຼ້ງ​ຕີນ​ມື​ຂາຍ​ຊາດ ຍາດ​ໄດ້​ອຳ­ນາດ​ການ​ປົກ­ຄອງ​ມາ­ສູ່​ກຳ­ມື​ຂອງ​ປະ­ຊາ­ຊົນ ນັບ​ແຕ່​ນັ້ນ​ມາ​ປະ­ເທດ​ລາວ ເວົ້າ​ສະ­ເພາະ ນວ ໄດ້​ມີ​ການ​ພັດ­ທະ­ນາ​ເປັນ​ກ້າວໆ.

    40 ກວ່າ​ປີ ພາຍ​ໃຕ້​ການ​ນຳ­ພາ​ຂອງ​ພັກ ແລະ ອົງ­ຄະ​ນະ​ພັກ ນວ ໄດ້​ມີ​ໃບ​ໜ້າ​ໃໝ່ ມີ​ການ​ພັດ­ທະ­ນາ​ຂຶ້ນ​ວ່ອງ­ໄວ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໄດ້​ຮັບ​ການ​ພັດ­ທະ­ນາ​ໃນ​ທຸກ​ດ້ານ ໂດຍ​ສະ­ເພາະ​ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ເຮັດ​ໃຫ້​ປະ­ເທດ​ຊາດ​ສືບ­ຕໍ່​ມີ​ຄວາມ​ໝັ້ນ­ຄົງ ມີ​ສະ­ຖຽນ​ລະ​ພາບ​ດ້ານ​ການ­ເມືອງ​ໜັກ​ແໜ້ນ ພວກ​ເຮົາ​ຕ້ອງ​ປົກ​ປັກ​ຮັກ­ສາ ແລະ ເສີມ​ຂະ­ຫຍາຍ​ມູນ­ເຊື້ອ​ດັ່ງ­ກ່າວ​ເຂົ້າ​ໃນ​ການ​ບູ­ລະ­ນະ ພັດ­ທະ­ນາ ນວ ໃຫ້​ທຽບ​ທັນ​ກັບ​ບັນ­ດາ​ນະ­ຄອນ­ຫຼວງ​ປະ­ເທດ​ໃກ້​ຄຽງ.

ຂ່າວທີ່ກ່ຽວຂ້ອງ