ຂ່າວຫຼ້າສຸດ

ເຊີນເຂົ້າຮ່ວມຄາຣາວານລົດທ່ອງທ່ຽວ ສູ່ນ້ຳຕົກຕາດພູເຂົາຄວາຍ

1.595 22 ສ.ຫ. 2019 ຂ່າວໜ້າ​ໜຶ່ງ
ເຊີນເຂົ້າຮ່ວມຄາຣາວານລົດທ່ອງທ່ຽວ ສູ່ນ້ຳຕົກຕາດພູເຂົາຄວາຍ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ສົມ­ທົບ​ກັບ​ອົງ­ການ​ປົກ­ຄອງ​ເມືອງ​ໄຊ​ທາ­ນີ ນວ ຈະ​ຈັດ​ຄາ​ຣາ​ວານ​ລົດ​ທ່ອງ​ທ່ຽວ ສູ່​ແຫຼ່ງ​ທ່ອງ​ທ່ຽວ​ທາງ​ທຳ​ມະ​ຊາດ ນ້ຳ­ຕົກ­ຕາດ​ພູ­ເຂົາ​ຄວາຍ ກຸ່ມ​ບ້ານ​ຊ້າງ ເມືອງ​ໄຊ​ທາ­ນີ ໃນ​ວັນ​ທີ 23 ສິງ­ຫາ 2019 ໂດຍ​ຈະ​ເຕົ້າ­ໂຮມ​ຜູ້​ເຂົ້າ​ຮ່ວມ​ຢູ່​ເດີ່ນ​ສຳ­ນັກ­ງານ​ປົກ­ຄອງ​ເມືອງ​ໄຊ​ທາ­ນີ (ບ່ອນ​ຈະ​ສ້າງ​ໃໝ່) ເວ­ລາ 8:00-8:30 ໂມງ ແລະ ເລີ່ມ​ອອກ​ເດີນ­ທາງ​ແຕ່​ເວ­ລາ 9:00-11:30 ໂມງ ໄປ​ຕາມ​ເສັ້ນ­ທາງ​ເລກ​ທີ 10 ທ່າ​ງ່ອນ ເພື່ອ​ທ່ຽວ​ຊົມ​ສະ­ຖານ­ທີ່​ຕາດ​ສອຍ­ວອຍ ຮອຍ​ຕີນ​ພະ​ບາດ ນຳ​ຕົກ​ຕາດ​ຫ້ວຍ​ເທົາ ເວ­ລາ 11:30-11:50 ອອກ​ເດີນ­ທາງ​ຮອດ​ຕາດ​ຊາຍ​ຂາວ ແລະ ຮັບ​ປະ­ທານ​ອາ­ຫານ​ທ່ຽງ​ຢູ່​ຕາດ​ດັ່ງ­ກ່າວ ເວ­ລາ 14:00-14:30 ໂມງ ອອກ​ເດີນ­ທາງ​ໄປ​ທ່ຽວ​ຊົມ​ຕາດ​ວັງ​ຫຼວງ ເມືອງ​ປາກ​ງື່ມ ນວ ເວ­ລາ 16:00 ໂມງ ຈະ​ກັບ​ຄືນ​ສູ່ ນວ.

    ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ ຖວ​ທ ນວ ໃຫ້​ສຳ­ພາດ​ວັນ​ທີ 21 ສິງ­ຫາ 2019ວ່າ: ຄາ​ຣາ​ວານ​ລົດ​ທ່ອງ​ທ່ຽວ​ສູ່​ແຫຼ່ງ​ທ່ອງ​ທ່ຽວ​ທາງ​ທຳ​ມະ​ຊາດ​ນ້ຳ­ຕົກ­ຕາດ​ພູ­ເຂົາ​ຄວາຍ​ຄັ້ງ​ນີ້ ເປັນ​ໂຄງ­ການ​ໜຶ່ງ​ທີ່​ເປັນ​ການ​ຊຸກ­ຍູ້-ສົ່ງ­ເສີມ​ວຽກ​ງານ​ທ່ອງ​ທ່ຽວ ເຊິ່ງ​ແຫຼ່ງ​ທ່ອງ​ທ່ຽວ​ຢູ່ ນວ ຍັງ​ມີ​ຫຼາຍ​ຈຸດ​ທີ່​ໂດດ​ເດັ່ນ ແຕ່​ຍັງ​ມີ​ຫຼາຍ​ຄົນ​ບໍ່​ທັນ​ຮັບ​ຮູ້ ແລະ ບໍ່​ທັນ​ໄດ້​ໄປ​ສຳ­ຜັດ ພະ​ແນກ ຖວ​ທ ນວ ຈຶ່ງ​ໄດ້​ສົມ­ທົບ​ກັບ​ອົງ­ການ​ປົກ­ຄອງ​ເມືອງ​ໄຊ​ທາ­ນີ ຈັດ​ກິດ­ຈະ­ກຳ​ດັ່ງ­ກ່າວ​ຂຶ້ນ​ເພື່ອ​ໂຄ­ສະ­ນາ-ສົ່ງ­ເສີມ​ການ­ທ່ອງ­ທ່ຽວ​ໃຫ້​ປະ­ຊາ­ຊົນ​ຄົນ​ລາວ ໂດຍ​ສະ­ເພາະ​ຊາວ ນວ ແລະ ຕ່າງ​ແຂວງ​ໄດ້​ຮັບ​ຮູ້​ສະ­ຖານ­ທີ່​ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ທີ່​ສວຍ​ສົດ​ງົດ​ງາມ​ຂອງ​ພູ­ຜາ​ປ່າ­ໄມ້ ວັດ­ທະ­ນະ­ທຳ​ຂອງ​ປະ­ຊາ­ຊົນ​ບັນ­ດາ­ເຜົ່າ​ໃນ ນວ ເພື່ອ​ສົ່ງ­ເສີມ​ການ­ທ່ອງ­ທ່ຽວ​ລາວ ກໍ​ຄື ນວ ທ່ອງ​ທ່ຽວ ນວ ທັງ​ເປັນ​ການ​ລະ­ນຶກ​ເຖິງ​ວັນ​ຢຶດ​ອຳ­ນາດ 23 ສິງ­ຫາ ຄົບ­ຮອບ 44 ປີ ແລະ ເພື່ອ​ສ້າງ​ຂະ ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ເມືອງ ແລະ ພະ​ແນກ ຖວ​ທ ນວ ຕື່ມ​ອີກ.

    ຢູ່​ໃນ​ແຕ່​ລະ​ສະ­ຖານ­ທີ່​ທ່ອງ​ທ່ຽວ​ທີ່​ຈະ​ໄປ​ນັ້ນ ຜູ້​ເຂົ້າ​ຮ່ວມ​ຈະ​ໄດ້​ສຳ­ຜັດ​ກັບ​ນ້ຳ­ຕົກ­ຕາດ ການ​ບໍ­ລິ­ການ​ຫຼາຍ​ປະ­ເພດ ອັນ​ພົ້ນ​ເດັ່ນ​ແມ່ນ​ອາ­ຫານ​ເຄື່ອງ​ປ່າ​ຂອງ​ດົງ ແລະ ຜະ­ລິດ​ຕະ​ພັນ​ສີ­ໄມ້­ລາຍ­ມື​ຂອງ​ປະ­ຊາ­ຊົນ​ຢູ່​ໃກ້​ຄຽງ ທີ່​ໄດ້​ກະ­ກຽມ​ມາ​ໄວ້​ຈຳ­ໜ່າຍ ນອກ​ນີ້ ຍັງ​ຈະ​ໄດ້​ສຳ­ຜັດ​ກັບ​ທຳ​ມະ​ຊາດ​ທີ່​ສວຍ​ສົດ​ງົດ​ງາມ ແລະ ປະ­ຫວັດ­ສາດ ສະ­ນັ້ນ ຂໍ​ເຊີນ­ຊວນ​ປະ­ຊາ­ຊົນ​ລາວ ແຂກ​ພາຍ​ໃນ ແລະ ຕ່າງ­ປະ­ເທດ​ທີ່​ດຳ­ລົງ​ຊີ­ວິດ​ຢູ່ ນວ ທີ່​ມີ​ເງື່ອນ­ໄຂ ເຂົ້າ​ຮ່ວມ​ຄາ​ຣາ​ວານ​ຄັ້ງ​ນີ້ ໃນ​ກໍ­ລະ­ນີ​ບໍ່​ສາ­ມາດ​ເຂົ້າ​ຮ່ວມ​ພິ­ທີ​ທາງ​ການ ກໍ​ສາ­ມາດ​ໄປ​ລັດ​ຢູ່​ສະ­ຖານ­ທີ່​ທ່ອງ​ທ່ຽວ​ຕາມ​ເວ­ລາ​ທີ່​ກຳ­ນົດ​ໄວ້ ເພື່ອ​ຈະ​ໄດ້​ສຳ­ຜັດ​ກັບ​ແຫຼ່ງ​ທ່ອງ​ທ່ຽວ​ເຫຼົ່າ­ນັ້ນ ພ້ອມ​ທັງ​ໃຫ້​ມີ​ຄຳ​ຄິດ​ເຫັນ ເພື່ອ​ປັບ­ປຸງ​ແຫຼ່ງ​ທ່ອງ​ທ່ຽວ​ໃຫ້​ດີ​ຂຶ້ນ ແນ­ໃສ່​ດຶງ​ດູດ​ນັກ​ທ່ອງ​ທ່ຽວ​ໃຫ້​ໄປ​ທ່ຽວ​ຊົມ​ສະ­ຖານ­ທີ່​ດັ່ງ­ກ່າວ​ໃຫ້​ນັບ​ມື້​ເພີ່ມ​ຂຶ້ນ.

ຂ່າວທີ່ກ່ຽວຂ້ອງ