ຂ່າວຫຼ້າສຸດ

ທີມງານກູ້ໄພ ແລະ ປະຊາຊົນສອງບ້ານ ສືບຕໍ່ຄົ້ນຫາທ້າວ ບີ່

565 22 ສ.ຫ. 2019 ຂ່າວໜ້າ​ໜຶ່ງ
ທີມງານກູ້ໄພ ແລະ ປະຊາຊົນສອງບ້ານ ສືບຕໍ່ຄົ້ນຫາທ້າວ ບີ່

    ເຫດ­ການ​ເດັກ­ນ້ອຍ​ອາ­ຍຸ 3 ປີ ຕົກ​ນ້ຳ​ຢູ່​ຂົວ​ລະ­ຫວ່າງ​ບ້ານ​ວຽງ​ຈະ­ເລີນ-ບ້ານ​ໂພນ​ພະ​ເນົາ ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 17 ສິງ­ຫາ 2019 ມາ​ຮອດ​ວັນ​ທີ 21 ສິງ­ຫາ 2019 ຍັງ​ບໍ່​ທັນ​ພົບ.

    ທ່ານ ຊາຍ​ທະ​ນົງ ອຸ່ນ​ສີ­ດາ ນາຍ­ບ້ານ​ວຽງ​ຈະ­ເລີນ ໃຫ້​ສຳ­ພາດ​ວັນ​ທີ 21 ສິງ­ຫາ 2019 ວ່າ: ເວ­ລາ​ປະ ມານ 22:25 ໂມງ ວັນ​ທີ 17 ສິງ­ຫາ 2019 ຄອບ­ຄົວ​ທ້າວ ຍົມ​ມະ​ລາ ຫຼວງ​ລາດ ອາ­ຍຸ 42 ປີ ອາ­ຊີບ​ກຳ­ມະ­ກອນ ຢູ່​ບ້ານ​ໂພນ​ພະ​ເນົາ ໄດ້​ຂີ່​ລົດ­ຈັກ​ກັບ​ບ້ານ​ພາຍ­ຫຼັງ​ທີ່​ໄດ້​ໄປ​ຮ່ວມ​ພິ­ທີ​ຜູກ​ແຂນ​ເຮືອນ​ພີ່­ນ້ອງ​ຢູ່​ບ້ານ​ໂຊກ​ຄຳ ເມືອງ​ໄຊ​ເສດ​ຖາ ໂດຍ​ຜ່ານ​ບ້ານ​ວຽງ​ຈະ­ເລີນ ແລະ ຂົວ​ຂ້າມ​ເບ​ເລ​ຮ່ອງ​ແຊງ ລະ­ຫວ່າງ​ບ້ານ​ວຽງ​ຈະ ເລີນ-ບ້ານ​ໂພນ​ພະ​ເນົາ ເຊິ່ງ​ຂີ່​ມາ​ນຳ​ກັນ 4 ຄົນ ມີ​ພໍ່​ແມ່ ລູກ​ສາວ​ຊື່ ສົ້ມ­ໂອ ອາ­ຍຸ 6 ປີ ແລະ ລູກ​ຊາຍ​ຊື່ ກຸ­ລາ​ບີ (ບີ່) ອາ­ຍຸ 3 ປີ ຜູ້​ຂັບ​ຊື່​ນາງ ສຸດ​ໃຈ ຫຼວງ​ລາດ (ແມ່) ອາ­ຍຸ 38 ປີ ລູກ​ສາວ​ນັ່ງ​ທາງ​ໜ້າ​ແມ່ ລູກ​ຊາຍ​ນັ່ງ​ທາງ​ຫຼັງ​ແມ່ ພໍ່​ນັ່ງ​ຫຼັງ​ສຸດ ເມື່ອ​ມາ​ຮອດ​ຂົວ​ດັ່ງ­ກ່າວ ໄດ້​ມີ​ຝົນ­ຕົກ ສະ­ພາບ​ຂົວ​ເປ່​ເພ ບວກ​ກັບ​ຄວາມ​ມືດ ເຮັດ​ໃຫ້​ລົດ­ຈັກ​ລົ້ມ ແລະ ທ້າວ ບີ່ ໄດ້​ຕົກ­ລົງ​ນ້ຳ​ຮ່ອງ​ແຊງ ເວ­ລາ​ນັ້ນ​ລະ­ດັບ​ນ້ຳ​ຮ່ອງ​ແຊງ ແມ່ນ​ຂຶ້ນ​ສູງ ແລະ ໄຫຼ​ແຮງ ຈຶ່ງ​ບໍ່​ສາ­ມາດ​ຊ່ວຍ­ເຫຼືອ​ໄດ້.

    ຈາກ​ນັ້ນ ປະ­ຊາ­ຊົນ​ຜູ້​ຢູ່​ໃກ້​ຄຽງ ຈຶ່ງ​ໄດ້​ໂທ​ແຈ້ງ​ສະ­ມາ­ຄົມ​ອາ­ສາ​ກູ້​ໄພ​ນະ­ຄອນ­ຫຼວງ​ວຽງ​ຈັນ 1624 ເພື່ອ​ຂໍ​ຄວາມ​ຊ່ວຍ­ເຫຼືອ ເຊິ່ງ​ໜ່ວຍ​ກູ້​ໄພ​ກໍ​ໄດ້​ມາ​ທີ່​ເກີດ​ເຫດ ແລະ ດຳ​ນ້ຳ​ເພື່ອ​ຊອກ​ຫາ​ທ້າວ ບີ່ ຈົນ​ຮອດ​ຕອນ​ເຊົ້າ​ວັນ​ທີ 18 ສິງ­ຫາ 2019 ກໍ​ຍັງ​ບໍ່​ພົບ ໃນ​ວັນ​ດຽວ​ກັນ​ນັ້ນ ອົງ­ການ​ປົກ­ຄອງ​ບ້ານ​ວຽງ​ຈະ­ເລີນ ແລະ ບ້ານ​ໂພນ​ພະ​ເນົາ​ໄດ້​ປະ­ສານ​ສົມ­ທົບ​ໃນ​ການ​ຊອກ​ຫາ ຮ່ວມ​ກັບ​ໜ່ວຍ​ກູ້​ໄພ ນອກ​ນີ້ ມີ​ກຳ­ລັງ​ທະ­ຫານ​ເມືອງ​ໄຊ​ເສດ​ຖາ 5 ຄົນ​ກໍ​ໄດ້​ເຂົ້າ​ຮ່ວມ​ຊ່ວຍ­ເຫຼືອ ວັນ​ທີ 19 ສິງ­ຫາ 2019 ມູນ​ນິ­ທິ​ກູ້​ໄພ​ນາ​ຂ່າ ໄດ້​ເອົາ​ເຮືອ 2  ລຳ ມາ​ສົມ­ທົບ​ຕື່ມ ນອກ​ນີ້ ຍັງ​ມີ​ຮ້ານ​ບີ​ບີ​ໂອ​ໂຕ​ຊັອບ ເອົາ​ເຮືອ 1 ລຳ ມາ​ຊ່ວຍ ວັນ​ທີ 20 ສິງ­ຫາ 2019 ໄດ້​ເອົາ​ມາ​ເສີມ​ອີກ 2 ລຳ ລວມ​ເປັນ 5 ລຳ ເພື່ອ​ຊອກ​ຫາ​ທ້າວ ບີ່ ມາ​ຮອດ​ວັນ​ທີ 21 ສິງ­ຫາ ພາ­ລະ­ກິດ​ການ​ຊອກ​ຄົ້ນ​ຫາ ທ້າວ ບີ່ ຍັງ​ບໍ່​ທັນ​ພົບ ແລະ ລະ­ດັບ​ນ້ຳ​ກໍ​ສູງ​ຂຶ້ນ​ຕື່ມ​ອີກ ປັດ­ຈຸ­ບັນ​ທີມ​ງານ​ໜ່ວຍ​ກູ້​ໄພ ແລະ ປະ­ຊາ­ຊົນ​ສອງ​ບ້ານ​ໄດ້​ຂຸ້ນ­ຂ້ຽວ​ສືບ­ຕໍ່​ຄົ້ນ​ຫາ.

    ທ່ານ ສັງ​ທອງ ຄຸນ​ຈຳ​ລົງ ຄູ​ເຝິກ​ທີມ​ງານ​ໜ່ວຍ​ກູ້​ໄພ 1624 ໃຫ້​ສຳ­ພາດ​ວ່າ: ພາຍ­ຫຼັງ​ໄດ້​ຮັບ​ແຈ້ງ​ຂ່າວ​ທີມ​ງານ​ກູ້​ໄພ​ໄດ້​ມາ​ປະ­ຕິ­ບັດ​ໜ້າ­ທີ່ ໂດຍ​ໃຊ້​ກຳ­ລັງ 35 ຄົນ ຜັດ­ປ່ຽນ​ກັນ​ປະ­ຈຳ​ທັງ​ເວັນ​ທັງ​ຄືນ ແບ່ງ​ເປັນ 3 ຈຸດ​ຄື: ຈຸດ​ທີ 1 ແມ່ນ​ຢູ່​ຈຸດ​ເກີດ​ເຫດ ຈຸດ​ທີ 2 ຢູ່​ບ້ານ​ໜອງ​ໜ່ຽງ ຈຸດ​ທີ 3 ຢູ່​ຫຼັງ​ວັດ​ບ້ານ​ວັງ​ຊາຍ ການ​ຄົ້ນ​ຫາ​ແມ່ນ​ເລີ່ມ​ຈາກ​ຈຸດ​ເກີດ​ເຫດ-ບ້ານ​ຮ່ອງ​ສຸ­ພາບ ໂດຍ​ມື້​ທຳ​ອິດ​ໄດ້​ຄົ້ນ​ຫາ​ໃຕ້​ນ້ຳ ມື້​ທີ​ສອງ​ໄດ້​ຄົ້ນ​ຫາ​ເທິງ​ໜ້າ­ນ້ຳ ໂດຍ​ເບິ່ງ​ຕາມ​ຜັກ​ຕົບ ຕາມ​ແຄມ​ຮ່ອງ­ນ້ຳ ເຊິ່ງ​ການ​ຄົ້ນ​ຫາ​ມີ​ຄວາມ​ຫຍຸ້ງ­ຍາກ ຍ້ອນ​ລະ­ດັບ​ນ້ຳ​ສູງ ໄຫຼ​ແຮງ ຕໍ​ໄມ້ ແລະ ສອງ​ຟາກ​ຂອງ​ຮ່ອງ­ນ້ຳ​ມີ​ຄວາມ​ຮົກ­ເຮື້ອ ແຕ່​ພວກ​ເຮົາ​ຍັງ​ຈະ​ສືບ­ຕໍ່​ຄົ້ນ​ຫາ​ຕໍ່​ໄປ ແລະ ຂໍ​ສະ­ແດງ​ຄວາມ​ຂອບ­ໃຈ​ມາ​ຍັງ​ປະ­ຊາ­ຊົນ​ບ້ານ​ໃກ້​ຄຽງ ແລະ ໝູ່­ຄູ່​ພະ­ນັກ­ງານ​ກູ້​ໄພ ແລະ ເພື່ອນ​ເຟ​ສ​ບຸກ​ທີ່​ໃຫ້­ການ​ສະ­ໜັບ­ສະ­ໜູນ​ເຄື່ອງ​ບໍ­ລິ­ໂພກ​ໃຫ້​ທີມ​ງານ​ກູ້​ໄພ​ປະ­ຕິ­ບັດ​ໜ້າ­ທີ່​ຄັ້ງ​ນີ້ ແລະ ເຊີນ­ຊວນ​ຜູ້​ທີ່​ມີ​ເງື່ອນ­ໄຂ​ຢາກ​ປະ­ກອບ ສ່ວນ​ຊ່ວຍ­ເຫຼືອ​ເຄື່ອງ​ບໍ­ລິ­ໂພກ ສາ­ມາດ​ປະ­ກອບ­ສ່ວນ​ໄດ້​ຕາມ​ແຕ່​ລະ​ຈຸດ​ທີ່​ກູ້​ໄພ​ປະ­ຈຳ​ຢູ່.

ຂ່າວທີ່ກ່ຽວຂ້ອງ