ຂ່າວຫຼ້າສຸດ

ຝົນຕົກຕິດຕໍ່ກັນຫຼາຍຊົ່ວໂມງ ເຮັດໃຫ້ນ້ຳຖ້ວມຫຼາຍພື້ນທີ່ຢູ່ນະຄອນຫຼວງ

503 22 ສ.ຫ. 2019 ຂ່າວໜ້າ​ໜຶ່ງ
ຝົນຕົກຕິດຕໍ່ກັນຫຼາຍຊົ່ວໂມງ ເຮັດໃຫ້ນ້ຳຖ້ວມຫຼາຍພື້ນທີ່ຢູ່ນະຄອນຫຼວງ

    ຈາກ​ສະ­ພາບ​ຝົນ­ຕົກ​ຕິດ­ຕໍ່​ກັນ​ຫຼາຍ​ຊົ່ວ­ໂມງ​ແຕ່​ຄືນ​ວັນ​ທີ 20-ເຊົ້າ​ວັນ​ທີ 21 ສິງ­ຫາ 2019 ເຮັດ​ໃຫ້​ຫຼາຍ​ເສັ້ນ­ທາງ ແລະ ຫຼາຍ​ຈຸດ​ທີ່​ເປັນ​ພື້ນ​ທີ່​ຕ່ຳ​ຢູ່​ນະ­ຄອນ­ຫຼວງ​ວຽງ​ຈັນ ຖືກ​ນ້ຳ​ຖ້ວມ​ຂັງ​ເປັນ​ເວ­ລາ​ຫຼາຍ​ຊົ່ວ­ໂມງ ເຊິ່ງ​ໄດ້​ສ້າງ​ຄວາມ​ຫຍຸ້ງ­ຍາກ​ແກ່​ການ​ສັນ­ຈອນ​ໄປ-ມາ ໂດຍ​ສະ­ເພາະ​ໄລ­ຍະ​ໂມງ​ເຂົ້າ​ການ ນອກ­ຈາກ​ຖ້ວມ​ຖະ­ໜົນ​ຫົນ­ທາງ​ແລ້ວ ຍັງ​ມີ​ສຳ­ນັກ­ງານ ອົງ­ການ ແລະ ເຮືອນ​ປະ­ຊາ­ຊົນ​ຈຳ­ນວນ​ໜຶ່ງ​ກໍ​ຖືກ​ນ້ຳ​ຖ້ວມ​ຂັງ​ເຊັ່ນ​ດຽວ​ກັນ ເຮັດ​ໃຫ້​ບາງ​ຄອບ­ຄົວ​ເອົາ​ເປົ໋າ​ຊາຍ​ກັ້ນ​ໄວ້ ເພື່ອ​ບໍ່​ໃຫ້​ນ້ຳ​ໄຫຼ​ເຂົ້າ​ບໍ­ລິ­ເວນ​ເຮືອນ ໃຊ້​ເຄື່ອງ​ຈັກ​ດູດ​ນ້ຳ​ອອກ​ເພື່ອ​ໃຫ້​ບົກ​ແຫ້ງ​ທັນ​ເວ­ລາ ຮັບ­ປະ­ກັນ​ບໍ່​ໃຫ້​ມີ​ຜົນ​ເສຍ​ຫາຍ ໂດຍ​ສະ­ເພາະ​ຊັບ​ສິນ ຜົນ­ລະ­ປູກ ແລະ ສັດ­ລ້ຽງ ແລະ ອື່ນໆ.

    ນອກ­ຈາກ​ສະ­ພາບ​ນ້ຳ​ຖ້ວມ​ໄລ­ຍະ​ສັ້ນ​ຕາມ​ເສັ້ນ­ທາງ​ຕ່າງໆ​ໃນ​ຕົວ​ເມືອງ​ແລ້ວ ສິ່ງ​ທີ່​ໜ້າ​ເປັນ​ຫ່ວງ​ແມ່ນ​ລະ­ບົບ​ລະ­ບາຍ​ນ້ຳ​ທີ່​ບໍ່​ຮັບ­ປະ­ກັນ ແລະ ການ​ລະ­ບາຍ​ນ້ຳ​ບໍ່​ທັນ​ເວ­ລາ ສາ­ເຫດ​ກໍ່​ອາດ​ເກີດ​ຈາກ​ການ​ຖົມ​ດິນ​ປຸກ​ສ້າງ​ທີ່­ຢູ່​ອາ­ໄສ​ຂອງ​ປະ­ຊາ­ຊົນ ບໍ­ລິ­ສັດ ແລະ ໂຄງ­ການ​ພັດ­ທະ­ນາ​ຕ່າງໆ​ທີ່​ບໍ່​ໄປ​ຕາມ​ແຜນ­ຜັງ ການ​ຖົມ​ໄດ້​ຕັນ​ເອົາ​ຫ້ວຍ­ຮ່ອງ​ຄອງ​ບຶງ ແລະ ສາຍ​ນ້ຳ ເຮັດ​ໃຫ້​ບ່ອນ​ຮອງ​ຮັບ​ນ້ຳ​ຝົນ​ຊົ່ວ­ຄາວ​ນັບ​ມື້​ມີ​ໜ້ອຍ​ລົງ ແລະ ອື່ນໆ.

    ສະ­ນັ້ນ ກ່ອນ​ຈະ​ຖົມ​ດິນ​ຢູ່​ສະ­ຖານ­ທີ່​ໃດ​ໜຶ່ງ ຕ້ອງ​ຄຳ­ນຶງ​ເຖິງ​ຜົນ​ກະ­ທົບ​ຕາມ​ມາ ໂດຍ​ສະ­ເພາະ​ບັນ­ຫາ​ລະ­ບົບ​ລະ­ບາຍ​ນ້ຳ​ຝົນ ນອກ​ນີ້ ກໍ​ຕ້ອງ​ພ້ອມ​ກັນ​ເຮັດ­ອະ­ນາ­ໄມ​ຫ້ວຍ­ຮ່ອງ​ຄອງ​ບຶງ ແລະ ຄອງ​ລະ­ບາຍ​ນ້ຳ​ຕາມ​ເສັ້ນ­ທາງ​ຕ່າງໆ​ເປັນ​ປະ­ຈຳ ເພື່ອ​ບໍ່​ໃຫ້​ມີ​ສິ່ງ​ອຸດ​ຕັນ ເປັນ­ຕົ້ນ ຊ່ອງ​ລະ­ບາຍ​ນ້ຳ​ຢູ່​ຕາມ​ແຄມ​ທາງ​ຕ້ອງ​ອະ­ນາ­ໄມ​ເປັນ​ປະ­ຈຳ ຢູ່​ໜ້າ​ເຮືອນ​ຜູ້​ໃດ​ຜູ້​ນັ້ນ​ຕ້ອງ​ເປັນ​ຕົວ​ຫຼັກ ເພື່ອ​ເຮັດ​ໃຫ້​ນ້ຳ​ໄຫຼ​ສະ­ດວກ ເວ­ລາ​ມີ​ຝົນ­ຕົກ​ກໍ​ຈະ​ເຮັດ​ໃຫ້​ນ້ຳ​ໄຫຼ​ໄປ​ຕາມ​ທຳ​ມະ​ຊາດ​ຂອງ​ມັນ ກໍ​ຄື ໄຫຼ​ແຕ່​ຫ້ວຍ­ຮ່ອງ​ຄອງ​ບຶງ​ນ້ອຍ​ໄປ​ສູ່​ຫ້ວຍ­ຮ່ອງ​ຄອງ​ບຶງ​ໃຫຍ່ ເປັນ­ຕົ້ນ ຮ່ອງ​ແຊງ ບຶງ​ທາດ­ຫຼວງ ໜອງ​ດ້ວງ ແລະ ຫ້ວຍ​ອື່ນໆ​ທີ່​ຮອງ​ຮັບ​ນ້ຳ​ຝົນ ແລະ ນ້ຳ​ອອກ​ຈາກ​ຄົວ​ເຮືອນ​ຂອງ​ປະ­ຊາ­ຊົນ​ຢູ່​ຕົວ​ເມືອງ​ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ