ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 22-08-2019

981 22 ສ.ຫ. 2019 ຫົວຂໍ້ຂ່າວອື່ນໆ

    ບົດ​ປະ­ຈຳ​ວັນ​ນີ້ ເລີ່ມ​ຈາກ​ເລື່ອງ​ທາງ​ການ​ຫວຽດ­ນາມ ສຶກ​ສາ​ກ່ຽວ​ກັບ​ບັນ­ຫາ​ການ​ແຕ່ງ­ດອງ​ລະ­ຫວ່າງ​ຄົນ​ຫວຽດ­ນາມ​ກັບ​ຄົນ​ຕ່າງ­ປະ­ເທດ ແລະ ປິດ​ທ້າຍ​ກັບ​ເລື່ອງ​ທັດ­ສະ­ນະ​ຂອງ​ຄົນ​ໄທ ກ່ຽວ​ກັບ​ບັນ­ຫາ​ການ­ທ່ອງ­ທ່ຽວ.

    ທີ່ ຫວຽດ­ນາມ: ບັນ­ຫາ​ການ​ແຕ່ງ­ດອງ​ລະ­ຫວ່າງ​ຄົນ​ຫວຽດ­ນາມ​ກັບ​ຄົນ​ຕ່າງ­ປະ­ເທດ ແມ່ນ​ເລື່ອງ​ໜຶ່ງ​ທີ່​ສັງ­ຄົມ​ຫວຽດ­ນາມ​ໃຫ້​ຄວາມ​ສົນ­ໃຈ​ເປັນ​ຢ່າງ​ສູງ ເພາະ​ມັນ​ພົວ­ພັນ​ກັບ​ກຽດ​ສັກ​ສີ ແລະ ການ​ປົກ​ປ້ອງ​ແມ່­ຍິງ​ຫວຽດ­ນາມ ບໍ່​ໃຫ້​ຕົກ​ເປັນ​ເຫຍື່ອ​ຂອງ​ການ​ຄ້າ​ມະ­ນຸດ ໃນ​ກາງ​ປີ 2015 ຢູ່ ບາ​ເຣຍ ຫວຸງ​ເຕົ່າ ທາງ​ການ​ຫວຽດ­ນາມ ໄດ້​ຈັດ​ໃຫ້​ມີ​ກອງ​ປະ­ຊຸມ​ລະ­ດົມ​ຄວາມ​ຄິດ​ເຫັນ​ກ່ຽວ​ກັບ​ຄວາມ​ຈຳ­ເປັນ​ທີ່​ຕ້ອງ​ໄດ້​ປັບ­ປຸງ​ລະ­ບຽບ​ການ​ກ່ຽວ​ກັບ​ການ​ແຕ່ງ­ດອງ​ລະ­ຫວ່າງ​ຄົນ​ຫວຽດ­ນາມ ກັບ​ຄົນ​ຕ່າງ­ປະ­ເທດ ກອງ​ປະ­ຊຸມ​ດັ່ງ­ກ່າວ​ຈັດ​ຂຶ້ນ​ໂດຍ​ກະ­ຊວງ​ຍຸ­ຕິ​ທຳ​ຫວຽດ­ນາມ ຮ່ວມ​ກັບ​ຫ້ອງ­ການ​ຍຸ­ຕິ​ທຳ​ແຂວງ​ບາ​ເຣຍ ຫວຸງ​ເຕົ່າ ເພື່ອ​ທົບ​ທວນ­ຄືນ​ໝາກ­ຜົນ​ການ​ປະ­ຕິ­ບັດ​ລະ­ບຽບ​ກົດ­ໝາຍ​ວ່າ​ດ້ວຍ​ການ​ແຕ່ງ­ດອງ​ຂອງ​ຄົນ​ຫວຽດ­ນາມ ກັບ​ຊາວ​ຕ່າງ­ປະ­ເທດ ແລະ ກຳ­ນົດ​ທິດ​ທາງ​ສົ່ງ­ເສີມ​ການ​ໃຫ້​ຄຳ​ປຶກ­ສາ​ຫາ­ລື​ແກ່​ຜູ້​ທີ່​ຈະ​ແຕ່ງ­ດອງ​ກັບ​ຄົນ​ຕ່າງ­ປະ­ເທດ ສະ­ຖິ­ຕິ​ເກົ່າໆ ແຕ່​ປີ 2011-2014 ຊີ້​ອອກ​ວ່າ ຄົນ​ຫວຽດ­ນາມ​ທີ່​ແຕ່ງ­ດອງ​ກັບ​ຊາວ​ຕ່າງ­ປະ­ເທດ ແລະ ກັບ​ຄົນ​ຫວຽດ­ນາມ​ພື້ນ​ທະ­ເລ​ນັ້ນ​ມີ​ຫຼາຍ​ກວ່າ 50.000 ຄົນ ໃນ​ນັ້ນ ເປັນ​ແມ່­ຍິງ 80% ຊາວ​ຕ່າງ­ປະ­ເທດ​ທີ່​ແຕ່ງ­ດອງ​ກັບ​ຍິງ​ຫວຽດ­ນາມ​ນັ້ນ ສ່ວນ​ໃຫຍ່​ແມ່ນ​ຄົນ ສ ເກົາ­ຫຼີ ແລະ ຄົນ​ເກາະ​ໄຕ້​ຫວັນ ຄຳ​ຄິດ​ເຫັນ​ທີ່​ໄດ້​ຈາກ​ກອງ​ປະ­ຊຸມ​ຄັ້ງ​ນັ້ນ ລວມ​ມີ ຂໍ້​ສະ­ເໜີ​ໃຫ້​ພາກ­ສ່ວນ​ການ­ຈັດ­ຕັ້ງ​ທີ່​ກ່ຽວ­ຂ້ອງ ເອົາ­ໃຈ­ໃສ່​ຍົກ​ສູງ​ລະ­ດັບ​ການ​ສຶກ​ສາ ສ້າງ​ຄວາມ​ຮັບ​ຮູ້​ໃນ​ກຸ່ມ​ແມ່­ຍິງ​ກ່ຽວ​ກັບ​ການ​ແຕ່ງ­ດອງ​ທີ່​ຜິດ​ກົດ­ໝາຍ ການ​ສ້າງ​ວຽກ​ເຮັດ​ງານ​ທຳ​ໃຫ້​ແມ່­ຍິງ​ໃນ​ເຂດ​ຊົນ­ນະ­ບົດ​ຫ່າງ​ໄກ​ສອກ­ຫຼີກ ກໍ​ຄື ແມ່­ຍິງ​ທີ່​ກັບ​ຄືນ​ຖິ່ນ​ຖານ​ເດີມ ພາຍ ຫຼັງ​ປະ­ສົບ​ກັບ​ຄວາມ​ຜິດ​ຫວັງ​ໃນ​ການ​ແຕ່ງ­ດອງ​ກັບ​ຊາຍ​ຕ່າງ­ປະ­ເທດ ພ້ອມ​ດຽວ​ກັນ ກໍ​ມີ​ຂໍ້​ສະ­ເໜີ​ໃຫ້​ທາງ​ການ​ກ່ຽວ­ຂ້ອງ ເພີ່ມ​ທະ­ວີ​ປະ­ສິດ­ທິ­ພາບ​ໃນ​ການ​ປະ­ຕິ­ບັດ​ລະ­ບຽບ​ກົດ­ໝາຍ ກ່ຽວ​ກັບ​ບັນ­ຫາ​ການ​ແຕ່ງ­ດອງ​ລະ­ຫວ່າງ​ຄົນ​ຫວຽດ­ນາມ​ກັບ​ຊາວ​ຕ່າງ­ປະ­ເທດ ແນ­ໃສ່​ປ້ອງ​ກັນ​ບໍ່​ໃຫ້​ເຫດ­ການ​ບໍ່​ເພິ່ງ​ປາ­ຖະ­ໜາ​ເກີດ​ຂຶ້ນ.

    ທີ່ ປະ­ເທດ​ໄທ: ບາງ​ຂໍ້​ຄິດ​ຂອງ​ນັກ­ວິ­ຊາ­ການ​ໄທ ກ່ຽວ​ກັບ​ການ­ທ່ອງ­ທ່ຽວ​ນີ້ ຖອດ​ມາ​ຈາກ​ໜັງ­ສື­ພິມ The Nation ສະ­ບັບ​ວັນ​ທີ 15 ເມ­ສາ 2018 ເຈົ້າ​ຂອງ​ຂໍ້​ຄິດ​ເຫັນ​ທີ່​ຂຽນ​ຫາ​ໜັງ­ສື­ພິມ​ດັ່ງ­ກ່າວ​ໃສ່​ຊື່­ວ່າ ບູ​ຣິນ ຄັນ­ທະ​ບຸດ ຜູ້­ກ່ຽວ​ບອກ​ວ່າ ບໍ່​ເຫັນ​ພ້ອມ​ກັບ​ການ​ເກັບ​ຄ່າ​ບໍ­ລິ­ການ​ທີ່​ບໍ່​ຍຸ­ຕິ​ທຳ​ກັບ​ນັກ​ທ່ອງ​ທ່ຽວ​ຕ່າງ­ປະ­ເທດ ຄື: ເກັບ​ແພງ​ກວ່າ​ເກັບ​ນຳ​ຄົນ​ໄທ ຜູ້­ກ່ຽວ​ໄດ້​ຍົກ​ຕົວ­ຢ່າງ​ຄ່າ​ອາ­ຫານ​ບຸບ​ເຟ ຢູ່​ຮ້ານ​ອາ­ຫານ​ຊື່​ດັງ​ຢູ່​ເມືອງ​ພັດ​ທະ​ຍາ ທີ່​ເກັບ​ນຳ​ຄົນ​ຕ່າງ­ປະ­ເທດ 600 ບາດ/ຄົນ ທຽບ​ກັບ 400 ບາດ/ຄົນ ສຳ­ລັບ​ຄົນ​ໄທ ທັງໆ​ທີ່​ກິນ​ສ່ຳ​ກັນ ອາ­ຫານ​ກໍ​ແນວ​ດຽວ​ກັນ ເຈົ້າ​ຂອງ​ຄຳ​ຄິດ​ເຫັນ​ບອກ​ວ່າ ການ​ຈຳ­ແນກ​ດັ່ງ­ກ່າວ​ເກີດ​ມາ​ຈາກ​ທັດ­ສະ­ນະ​ເດີມໆ​ທີ່​ຖື​ວ່າ ຄົນ​ຕ່າງ­ປະ­ເທດ​ນັ້ນ​ລ້ຳ​ລວຍ ມີ​ເງິນ​ຫຼາຍ​ກວ່າ​ຄົນ​ໄທ ທັງໆ​ທີ່​ຕົວ​ຈິງ​ບໍ່​ເປັນ​ເຊັ່ນ​ນັ້ນ ລາຍ​ຮັບ​ແຫ່ງ​ຊາດ (Gross National Income) ຂອງ​ປະ­ເທດ​ບູ​ຣຸນ​ດິ (ອາ​ຟຣິ​ກາ) ສະ­ເລ່ຍ​ໃສ່​ຫົວ​ຄົນ ມີ​ພຽງ 280 ໂດ​ລາ​ຕໍ່​ປີ/ຄົນ ສ່ວນ​ປະ­ເທດ​ນອກ​ແວ​ນັ້ນ ແມ່ນ 82.390 ໂດ​ລາ​ຕໍ່​ຄົນ/ປີ ການ​ເກັບ​ຄ່າ​ບໍ­ລິ­ການ​ແບບ​ຈຳ­ແນກ​ລະ­ຫວ່າງ​ຄົນ​ໄທ​ກັບ​ຄົນ​ຕ່າງ­ປະ­ເທດ​ນີ້ ​ໄດ້​ສ້າງ​ຄວາມ​ບໍ່​ພໍ­ໃຈ​ໃຫ້​ຄົນ​ຕ່າງ­ປະ­ເທດ ເຮັດ​ໃຫ້​ພວກ​ເຂົາ­ເຈົ້າ​ຫຼາບ​ບໍ່​ຢາກ​ມາ​ທ່ຽວ​ປະ­ເທດ​ໄທ​ຊ້ຳ​ອີກ ນີ້​ກໍ​ເປັນ​ຂໍ້​ຄິດ​ໜຶ່ງ​ທີ່​ພວກ​ເຮົາ​ຄວນ​ພິ­ຈາ­ລະ­ນາ​ກ່ຽວ​ກັບ​ການ​ເກັບ​ຄ່າ​ບໍ­ລິ­ການ​ຕ່າງໆ​ກັບ​ຄົນ​ຕ່າງ­ປະ­ເທດ ຢູ່​ລາວ​ພວກ​ເຮົາ (ເພາະ​ຖ້າ​ບໍ່​ຍຸ­ຕິ​ທຳ ມີ​ການ​ຈຳ­ແນກ​ແລ້ວ ກໍ​ຍາກ​ທີ່​ພວກ​ເຂົາ​ຈະ​ຢາກ​ມາ​ທ່ຽວ​ບ້ານ​ເຮົາ​ຊ້ຳ​ອີກ.

ຂ່າວທີ່ກ່ຽວຂ້ອງ