ຂ່າວຫຼ້າສຸດ

ກອງ​ປະ​ຊຸມສຸດ​ຍອດ SADC ​ຄັ້ງ​ທີ 39 ຮຽກ​ຮ້ອງ​ໃຫ້​ເພີ່ມ​ທະ​ວີ​ການ​ຮ່ວມ​ມື​ດ້ານ​ຄວາມ​ໝັ້ນ​ຄົງ​

635 21 ສ.ຫ. 2019 ຂ່າວຕ່າງປະເທດ
ກອງ​ປະ​ຊຸມສຸດ​ຍອດ SADC ​ຄັ້ງ​ທີ 39 ຮຽກ​ຮ້ອງ​ໃຫ້​ເພີ່ມ​ທະ​ວີ​ການ​ຮ່ວມ​ມື​ດ້ານ​ຄວາມ​ໝັ້ນ​ຄົງ​

    ຕາມ​ຂ່າວສານ​ຊີນ​ຮວາ ກອງ​ປະຊຸມ​ປະມຸກ​ລັດ​ປະຊາ​ຄົມ​ຮ່ວມ​ພັດທະນາ​ພາກ​ໃຕ້​ອາ​ຟຣິ​ກາ (SADC) ຄັ້ງ​ທີ 39 ທີ່​ໄດ້​ອັດ​ລົງ​ຢູ່ ນະຄອນ ດາ ແອ​​ສ ຊາ​ລາມ (Dar es Salaam) ຂອງ​ຕັງ​ຊາ​ນີ ເມື່ອ ວັນ​ທີ 18 ສິງຫາ​ນີ້ ຫຼັງ​ຈາກ​ທີ່​ໄດ້​ດຳເນີນ​ງານ​ມາ​ເປັນ​ເວລາ 2 ວັນ ນັ້ນ ໄດ້​ອອກ​ຖະແຫຼງການ ໂດຍ​ຮຽກຮ້ອງ​ໃຫ້​ບັນດາ​ປະເທດ​ໃນ​ປະຊາ​ຄົມ​ດັ່ງກ່າວ ເພີ່ມ​ທະວີ​ການ​ຮ່ວມ​ມື​ກັນ​ຕື່ມ​ອີກ ແລະ ພ້ອມ​ກັນ​ຮັບ​ມື​ກັບ​ສິ່ງ​ທ້າ​ທາຍ​ດ້ານ​ຄວາມ​ໝັ້ນຄົງ​ຂອງ​ພາກ​ພື້ນ.

    ຖະແຫຼງການ​ລະບຸ​ວ່າ ຜູ້ນຳ​ຂອງ​ບັນດາ​ປະເທດ​ສະມາຊິກ SADC ຮັບ​ຮູ້​ວ່າ ບັນຫາ​ຄວາມ​ໝັ້ນຄົງ​ຂອງ​ພາກ​ພື້ນ ໂດຍ​ສະເພາະ​ແມ່ນ​ລັດທິ​ກໍ່​ການ​ຮ້າຍ ແລະ ການ​ອາ​ຊະ​ຍາ​ກຳ​ຂ້າມ​ຊາດ ປັດຈຸບັນ​ໄດ້​ກາຍເປັນ​ໜຶ່ງ​ໃນ​ບັນຫາ​ສຳຄັນ​ທີ່​ກະທົບ​ເຖິງ​ການ​ພັດທະນາ​ຂອງ​ພາກ​ພື້ນ. ດັ່ງນັ້ນ ປະເທດ​ຕ່າງໆ ຈຶ່ງ​ຄວນ​ເອົາໃຈໃສ່​ເພີ່ມ​ທະວີ​ການ​ຮ່ວມ​ມື​ໃນ​ຂົງເຂດ​ຄວາມ​ໝັ້ນຄົງ ວາງ​ຍຸດ​ທະ​ສາດ​ຕ້ານ​ການ​ກໍ່​ການ​ຮ້າຍ​ແລະ ແຜນການ​ດຳເນີນ​ງານ​ໃນ​ພາກ​ພື້ນ ແລະ ຕ້ອງ​ເລັ່ງ​ລັດ​ການ​ປະຕິບັດ​ໂດຍ​ດ່ວນ.

    ປະເທດ​ຕ່າງໆ ຍິນ​ດີ​ເພີ່ມ​ທະວີ​ການ​ຮ່ວມ​ມື ເພື່ອ​ຮັບ​ມື​ກັບ​ການເຄື່ອນໄຫວ​ຂ້າມ​ຊາດ​ທີ່​ຜິດ​ກົດໝາຍ​ຕ່າງໆ ເຊັ່ນ ການ​ກໍ່​ອາ​ຊະ​ຍາ​ກຳ​ທາງ​ທະເລ ການ​ຄ້າຂາຍ​ເຖື່ອນ​ຢາ​ເສບ​ຕິດ ກໍ​ຄື​ການ​ຄ້າຂາຍ​ອາວຸດ​ທາງ​ທະເລ​ດັ່ງນີ້​ເປັນຕົ້ນ.

ຂ່າວທີ່ກ່ຽວຂ້ອງ