ຂ່າວຫຼ້າສຸດ

ປາ​ແລັດ​ສະຕິ​ນ ປະ​ເຊີນ​ກັບ​ວິ​ກິດ​ການ​ການ​ເງິນ

706 21 ສ.ຫ. 2019 ຂ່າວຕ່າງປະເທດ
ປາ​ແລັດ​ສະຕິ​ນ ປະ​ເຊີນ​ກັບ​ວິ​ກິດ​ການ​ການ​ເງິນ

    ສຳນັກ​ຂ່າວສານ WAFA ຂອງ​ທາງ​ການ​ປາ​ແລັດ​ສະ​ຕິນ ອ້າງ​ຕາມ​ແຈ້ງ​ການ​ຂອງ​ຫ້ອງ​ວ່າການ​ປະທານາທິບໍດີ ໃຫ້​ຮູ້​ວ່າ ປະທານາທິບໍດີ​ປາ​ແລັດ​ສະ​ຕິນ ມາ​ມຸດ ອັບ​ບາ​​ສ ຖະແຫຼງ​ເມື່ອ​ວັນ​ທີ 19 ສິງຫາ​ນີ້ ເຖິງ​ການ​ປົດ​ບັນດາ​ທີ່​ປຶກສາ​ທັງ​ໝົດ​ຂອງ​ປະທານາທິບໍດີ.

    ການ​ຕັດ​ຫຼຸດ​ບຸກ​ຄະລາ​ກອນ​ໃນ​ງວດ​ນີ້ ມີ​ລວມ​ເຖິງ​ການ​ງົດ​ສິດທິ​ພິເສດ​ຫຼາຍ​ລາຍການ ກໍ​ຄື​ຜົນ​ປະໂຫຍດ ດ້ານ​ການ​ເງິນ​ຂອງ​ບັນດາ​ທີ່​ປຶກສາ. ເຖິງ​ຢ່າງໃດ​ກໍ​ຕາມ ຫ້ອງ​ວ່າການ​ປະທານາທິບໍດີ ບໍ່​ໄດ້​ຊີ້​ແຈງ​ເຖິງ​ຈຳນວນ​ທີ່​ປຶກສາ​ທີ່​ຖືກ​ປົດ ກໍ​ຄື​ຄ່າ​ໃຊ້​ຈ່າຍ​ທີ່​ກ່ຽວຂ້ອງ.

    ອຳນາດ​ການ​ປົກຄອງ​ປາ​ແລັດ​ສະ​ຕິນ (PA) ພວມ​ປະ​ເຊີນ​ກັບ​ວິ​ກິດ​ການ​ການ​ເງິນ​ຢ່າງ​ຮ້າຍ​ແຮງ ນັບ​ແຕ່​ເດືອ​ນອກຸມ​ພາ​ປີ​ນີ້​ເປັນຕົ້ນ​ມາ ເມື່ອ​ອິດ​ສະ​ຣາ​ແອນ ປະກາດ​ຫັກ 5% (ເທົ່າ​ກັບ​ປະມານ 10 ລ້ານ​ໂດ​ລາ​ສະຫະລັດ) ຂອງ​ລາຍ​ຮັບ​ປະຈຳ​ເດືອນ ໃຫ້​ແກ່ PA ທີ່​ມາ​ຈາກ​ລາຍ​ຮັບ​ຈາກ​ການ​ເກັບ​ພາສີ​ສິນຄ້າ​ນຳ​ເຂົ້າ​ໄປ​ໃນ​ເຂດ​ຝັ່ງ​ຕາເວັນຕົກ ແລະ ແຫຼມ​ກາ​ຊາ ໂດຍ​ຜ່ານ​ບັນດາ​ທ່າ​ກຳປັ່ນ​ຂອງ​ອິດ​ສະ​ຣາ​ແອນ.

    ອຳນາດ​ການ​ປົກຄອງ​ອິດ​ສະ​ຣາ​ແອນ ກັງວົນ​ວ່າ ການ​ຊຳລະ​ເງິນ​ດັ່ງກ່າວ​ທັງ​ໝົດ ຈະ​ຍິ່ງ​ເປັນ​ການ​ສົ່ງເສີມ​ຄວາມ​ຮຸນ​ແຮງ ເພາະວ່າ PA ອາດ​ຈະ​ໃຊ້​ແຫຼ່ງ​ເງິນ​ນີ້ ເພື່ອ​ຊຳລະ​ໃຫ້​ແກ່​ບັນດາ​ຄອບຄົວ​ທີ່​ມີ​ຄົນ​ຖືກ​ອິດ​ສະ​ຣາ​ແອນ​ຈັບ​ກຸມ ຫຼື ເສຍ​ຊີວິດ ໃນ​ເວລາ​ທີ່​ດຳເນີນ​ການ​ໂຈມ​ຕີ ໂດຍ​ແນໃສ່​ລັດ​ຢີວ.

     ຂໍ້​ຕົກລົງ​ເມື່ອ​ປີ 1994 ລະບຸ​ວ່າ ອິດ​ສະ​ຣາ​ແອນ ມີ​ລາຍ​ຮັບ​ປະມານ 190 ລ້ານ​ໂດ​ລາ​ສະຫະລັດ/ເດືອນ ຈາກ​ບ້ວງ​ພາສີ​ໃນ​ດ່ານ​ພາສີ ທີ່​ເກັບ​ກັບ​ສິນຄ້າ​ໄປ​ຈາກ​ທ່າ​ກຳປັ່ນ​ຂອງ​ອິດ​ສະ​ຣາ​ແອນ ເພື່ອ​ເຂົ້າ​ໄປ​ໃນ​ປາ​ແລັດ​ສະ​ຕິນ. ຫຼັງ​ຈາກ​ນັ້ນ ທາງ​ການ​ອິດ​ສະ​ຣາ​ແອນ ກໍ​ສົ່ງ​ເງິນ​ຈຳນວນ​ດັ່ງກ່າວ ໄປ​ໃຫ້ PA. ບົດ​ລາຍ​ງານ​ຂອງ​ກະຊວງ​ການ​ເງິນ​ປາ​ແລັດ​ສະ​ຕິນ ໃຫ້​ຮູ້​ວ່າ ບ້ວງ​ເງິນ​ຊ່ວຍ​ເກັບ​ພາສີ​ໃຫ້​ນັ້ນ ກວມ​ເອົາ​ເກືອບ 50% ຂອງ​ຄັງ​ເງິນ​ຂອງ PA. PA ໄດ້​ຫຼຸດ 50% ຂອງ​ເງິນເດືອນ​ຫຼາຍ​ຄົນ ຢູ່​ໃນ​ຈຳນວນ​ຫຼາຍ​ໝື່ນ​ຄົນ ທີ່​ເປັນ​ເຈົ້າ​ໜ້າທີ່ ທັງ​ນີ້​ກໍ​ເພື່ອ​ຄົງ​ໄວ້​ຊຶ່ງ​ການເຄື່ອນໄຫວ​ຂອງ​ອຳນາດ​ການ​ປົກຄອງ.

ຂ່າວທີ່ກ່ຽວຂ້ອງ