ຂ່າວຫຼ້າສຸດ

ເຜີຍແຜ່ກົດໝາຍວ່າດ້ວຍສຳນັກງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ

882 21 ສ.ຫ. 2019 ຂ່າວໜ້າ​ໜຶ່ງ

    ກະ­ຊວງ​ການ​ຕ່າງ­ປະ­ເທດ ຈັດ​ກອງ​ປະ­ຊຸມ​ເຜີຍ­ແຜ່​ກົດ­ໝາຍ​ວ່າ​ດ້ວຍ ສຳ­ນັກ­ງານ​ຜູ້­ຕາງ­ໜ້າ ສປປ ລາວ ປະ­ຈຳ​ຢູ່​ຕ່າງ­ປະ­ເທດ​ໃຫ້​ບັນ­ດາ​ກະ­ຊວງ ອົງ​ການ­ຈັດ­ຕັ້ງ​ທຽບ​ເທົ່າ ແລະ ອົງ​ການ­ຈັດ­ຕັ້ງ​ຕ່າງໆ​ອ້ອມ​ຂ້າງ​ສູນ​ກາງ ຂຶ້ນ​ວັນ​ທີ 20 ສິງ­ຫາ 2019 ຢູ່​ສູນ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ ໂດຍ​ການ​ເຜີຍ­ແຜ່​ຂອງ​ທ່ານ​ນາງ ຄຳ​ເພົາ ເອີນ​ລາ​ວັນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ.

    ເພື່ອ​ສ້າງ​ຄວາມ​ຮັບ​ຮູ້ ແລະ ຄວາມ​ເຂົ້າ­ໃຈ​ເປັນ​ເອ­ກະ​ພາບ​ກ່ຽວ​ກັບ​ທີ່​ຕັ້ງ ພາ­ລະ​ບົດ­ບາດ ສິດ ແລະ ໜ້າ­ທີ່​ຂອງ​ສຳ­ນັກ­ງານ​ຜູ້­ຕາງ­ໜ້າ ລວມ​ທັງ​ສິດ ໜ້າ­ທີ່ ແລະ ພັນ­ທະ​ຂອງ​ສະ­ມາ­ຊິກ​ຂອງ​ສຳ­ນັກ­ງານ​ຜູ້­ຕາງ­ໜ້າ ແນ­ໃສ່​ຮັບ­ປະ­ກັນ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ສຳ­ນັກ­ງານ​ຜູ້­ຕາງ­ໜ້າ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ໃຫ້​ຖືກ­ຕ້ອງ ເຊິ່ງ​ກົດ­ໝາຍ​ດັ່ງ­ກ່າວ​ໄດ້​ຜ່ານ​ການ​ຮັບ­ຮອງ​ຢູ່​ກອງ​ປະ­ຊຸມ​ສະ­ພາ​ແຫ່ງ​ຊາດ ວັນ​ທີ 11 ທັນ­ວາ 2018 ມີ​ຜົນ​ສັກ­ສິດ​ນັບ​ແຕ່​ວັນ​ທີ 3 ກໍ­ລະ­ກົດ 2019 ເປັນ­ຕົ້ນ​ມາ ເປັນ​ກົດ­ໝາຍ​ສະ­ບັບ​ທີ​ສອງ​ຂອງ​ຂະ­ແໜງ­ການ​ຕ່າງ­ປະ­ເທດ ແລະ ຖື​ເປັນ​ບາດ­ກ້າວ​ສຳ­ຄັນ​ໃນ​ການ​ພັດ­ທະ­ນາ​ລະ­ບົບ​ນິ­ຕິ​ກຳ​ຂອງ​ຂະ­ແໜງ­ການ​ຕ່າງ­ປະ­ເທດ ໃຫ້​ເປັນ​ລະ­ບົບ​ຄົບ​ຊຸດ ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ ກໍ​ຄື​ເປົ້າ​ໝາຍ​ຂອງ​ການ​ສ້າງ​ລັດ​ຄຸ້ມ​ຄອງ​ດ້ວຍ​ກົດ­ໝາຍ ໂດຍ​ສອດ­ຄ່ອງ​ກັບ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ ສປປ ລາວ ແຕ່​ລະ​ໄລ­ຍະ.

    ປັດ­ຈຸ­ບັນ ສປປ ລາວ ມີ​ສາຍ​ພົວ­ພັນ​ການ​ທູດ​ກັບ 141 ປະ­ເທດ ແລະ ມີ​ສຳ­ນັກ­ງານ​ຜູ້­ຕາງ­ໜ້າ​ປະ­ຈຳ​ຢູ່​ຕ່າງ­ປະ­ເທດ 40 ແຫ່ງ ການ​ຮັບ­ຮອງ​ເອົາ​ກົດ­ໝາຍ​ດັ່ງ­ກ່າວ​ຖື​ເປັນ​ການ​ເພີ່ມ​ທະ­ວີ ແລະ ສ້າງ​ຄວາມ​ເຂັ້ມ­ແຂງ​ໃຫ້​ການ­ເຄື່ອນ­ໄຫວ​ຂອງ​ສຳ­ນັກ­ງານ​ຜູ້­ຕາງ­ໜ້າ ໃນ​ການ​ສົ່ງ­ເສີມ​ວຽກ​ງານ​ການ​ພົວ­ພັນ​ຮ່ວມ​ມື​ດ້ານ​ການ­ເມືອງ ປ້ອງ​ກັນ​ປະ­ເທດ ຄວາມ​ໝັ້ນ­ຄົງ ການ​ຮັບ​ໃຊ້​ການ​ພັດ­ທະ­ນາ​ເສດ­ຖະ­ກິດ​ແຫ່ງ​ຊາດ ສົ່ງ­ເສີມ​ການ​ຮ່ວມ​ມື​ດ້ານ​ວັດ­ທະ­ນະ­ທຳ ສົ່ງ​ອອກ­ແຮງ​ງານ ການ​ລົງ­ທຶນ ທ່ອງ​ທ່ຽວ ການ​ຄ້າ ວິ­ທະ­ຍາ­ສາດ ເຕັກ​ໂນ​ໂລ​ຊີ ສິ່ງ­ແວ­ດລ້ອມ ແລະ ການ​ຮ່ວມ​ມື​ຂະ­ແໜງ­ການ​ອື່ນໆ ລະ­ຫວ່າງ ສປປ ລາວ ກັບ​ປະ­ເທດ​ທີ່​ຮັບ ແລະ ອົງ​ການ­ຈັດ­ຕັ້ງ​ສາ­ກົນ ລວມ​ທັງ​ການ​ປະ­ຕິ­ບັດ​ວຽກ​ງານ​ກົງ​ສູນ ແລະ ພົວ­ພັນ​ເຊື້ອ​ຊາດ​ລາວ​ຢູ່​ຕ່າງ­ປະ­ເທດ​ໃຫ້​ນັບ​ມື້​ໄດ້​ຮັບ​ໝາກ­ຜົນ​ດີ​ກວ່າ​ເກົ່າ ແນ­ໃສ່​ສ້າງ​ສະ­ພາບ​ແວດ​ລ້ອມ​ພາຍ​ນອກ​ທີ່​ອຳ­ນວຍ​ໃຫ້­ການ​ເສີມ​ຂະ­ຫຍາຍ​ການ​ຮ່ວມ​ມື​ກັບ​ຕ່າງ­ປະ­ເທດ ການ​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ທັງ​ເປັນ​ການ​ຍາດ​ແຍ່ງ​ການ​ຊ່ວຍ­ເຫຼືອ ແລະ ດຶງ​ດູດ​ການ​ລົງ­ທຶນ​ຈາກ​ຕ່າງ­ປະ­ເທດ ອີກ​ດ້ວຍ.

ຂ່າວທີ່ກ່ຽວຂ້ອງ