ຂ່າວຫຼ້າສຸດ

ມູນນິທິເຟຣດໂຮໂລ ໃຫ້ທຶນສະໜັບສະໜູນການບໍລິການສຸຂະພາບ

694 21 ສ.ຫ. 2019 ຂ່າວໜ້າ​ໜຶ່ງ
ມູນນິທິເຟຣດໂຮໂລ ໃຫ້ທຶນສະໜັບສະໜູນການບໍລິການສຸຂະພາບ

    ພິ­ທີ​ເຊັນ​ບົດ​ບັນ­ທຶກ​ຂໍ້​ຕົກ­ລົງ​ກ່ຽວ​ກັບ​ການ​ສຶກ​ສາ​ຕົ້ນ​ທຶນ​ການ​ບໍ­ລິ­ການ​ສຸ­ຂະ­ພາບ ໃນ ສປປ ລາວ ລະ­ຫວ່າງ ທ່ານ ບຸນ​ແຝງ ພູມ​ມະ​ໄລ​ສິດ ຫົວ­ໜ້າ​ຫ້ອງ­ການ​ປະ­ກັນ​ສັງ­ຄົມ​ແຫ່ງ​ຊາດ ແລະ ທ່ານ ຟຸກ​ຫງຽນ​ຕັນ (Phuc Huynh Tan) ຜູ້­ອຳ­ນວຍ­ການ​ມູນ​ນິ­ທິ​ເຟຣດ​ໂຮ​ໂລ (Fred Hollows Foundation) ປະ­ຈຳ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້ ຈັດ​ຂຶ້ນ​ຢູ່​ກະ­ຊວງ​ສາ­ທາ­ລະ­ນະ​ສຸກ ເມື່ອ​ບໍ່​ດົນ​ຜ່ານ​ມາ ໂດຍ​ມີ​ທ່ານ ຄຳ​ພອນ ພຸດ​ທະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

    ມູນ​ນິ­ທິ​ເຟຣດ​ໂຮ​ໂລ ແມ່ນ​ອົງ­ການ​ພັດ­ທະ­ນາ​ສາ­ກົນ ທີ່​ບໍ່​ຫວັງ​ຜົນ​ກຳ­ໄລ ສ້າງ­ຕັ້ງ​ແຕ່​ປີ 1992 ເຊິ່ງ​ມີ​ສຳ­ນັກ­ງານ​ໃຫຍ່​ຢູ່​ປະ­ເທດ​ອົດ​ສະ​ຕຣາ​ລີ ສ່ວນ​ຫ້ອງ­ການ​ຢູ່ ສປປ ລາວ ບ້ານ​ໜອງ​ດ້ວງ​ເໜືອ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ໂດຍ​ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ​ລັດ­ຖະ­ບານ​ອົດ​ສະ​ຕຣາ​ລີ ແລະ ການ​ບໍ­ລິ­ຈາກ​ຂອງ​ປະ­ຊາ­ຊົນ​ຜູ້​ໃຈ​ບຸນ ແລະ ຄູ່​ຮ່ວມ​ງານ​ທີ່​ເປັນ​ບໍ­ລິ­ສັດ​ນິ­ຕິ­ບຸກ­ຄົນ​ຕ່າງໆ ມູນ​ນິ­ທິ​ດັ່ງ­ກ່າວ​ເຮັດ​ວຽກ​ຢູ່​ຫຼາຍ​ກວ່າ 25 ປະ­ເທດ​ໃນ​ທົ່ວ​ໂລກ ເພື່ອ​ຫຼຸດ­ຜ່ອນ​ພະ­ຍາດ​ຕາ­ບອດ ແລະ ສາຍ­ຕາ​ພິ­ການ​ທີ່​ຫຼີກ​ລ້ຽງ​ໄດ້ ຊ່ວຍ​ໃນ​ການ​ອົບ­ຮົມ ແລະ ຍົກ​ລະ­ດັບ​ທາງ​ດ້ານ​ວິ­ຊາ​ການ​ໃຫ້​ແກ່​ແພດ​ໝໍ​ປົວ​ຕາ​ຢູ່​ຂັ້ນ​ພື້ນ­ຖານ ລວມ​ທັງ​ພະ­ຍາ­ບານ ພະ­ນັກ­ງານ​ສາ­ທາ­ລະ­ນະ​ສຸກ ແນ­ໃສ່​ສ້າງ​ລະ­ບົບ​ການ​ປິ່ນ­ປົວ​ໃຫ້​ມີ​ຄວາມ​ຍືນ​ຍົງ ແລະ ແທດ­ເໝາະ​ກັບ​ຄວາມ​ຈຳ­ເປັນ​ຂອງ​ຊຸມ​ຊົນ.

    ມູນ​ນິ­ທິ​ເຟຣດ​ໂຮ​ໂລ ໄດ້​ເຂົ້າ​ມາ​ເຮັດ​ວຽກ​ຢູ່​ລາວ​ໃນ​ປີ 2008 ໂດຍ​ປະ­ຕິ­ບັດ​ໜ້າ­ທີ່​ຕາມ​ເປົ້າ​ໜາຍ​ຂອງ​ມູນ​ນິ­ທິ ຈາກ​ຜົນ­ງານ​ໃນ​ການ​ປະ­ຕິ­ບັດ​ວຽກ​ງານ​ດັ່ງ­ກ່າວ ໃນ ສປປ ລາວ ເຫັນ​ວ່າ​ຍັງ​ມີ​ຫຼາຍ​ຢ່າງ​ຍັງ​ຈະ​ຕ້ອງ​ສືບ­ຕໍ່​ຈັດ​ຕັ້ງ​ປະ­ຕິ­ບັດ ຈຶ່ງ​ໄດ້​ສືບ­ຕໍ່​ໂຄງ­ການ ເຊິ່ງ​ກິດ­ຈະ­ກຳ​ການ​ສຶກ​ສາ​ຕົ້ນ​ທຶນ​ການ​ບໍ­ລິ­ການ​ສຸ­ຂະ­ພາບ ໃນ ສປປ ລາວ ແມ່ນ​ເພື່ອ​ໃຫ້​ໄດ້​ຂໍ້​ມູນ​ເບື້ອງ​ຕົ້ນ​ກ່ຽວ​ກັບ​ສິ່ງ​ທີ່​ຈະ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ງົບ­ປະ­ມານ​ຂອງ​ລັດ­ຖະ­ບານ ຈາກ​ລະ­ບົບ​ປະ­ກັນ​ສຸ­ຂະ­ພາບ ແລະ ລາຍ​ຮັບ​ຂອງ​ສະ­ຖານ­ທີ່​ບໍ­ລິ­ການ ພາຍ​ໃນ​ປີ​ງົບ­ປະ­ມານ 2020 ເພື່ອ​ປະ­ກອບ​ເຂົ້າ​ໃນ​ການ​ກະ­ກຽມ​ແຜນ​ພັດ­ທະ­ນາ​ຂະ­ແໜງ­ການ​ສາ­ທາ­ລະ­ນະ​ສຸກ​ແຫ່ງ​ຊາດ​ຄັ້ງ​ທີ 9 (2021-2025) ເພື່ອ​ເປັນ​ພື້ນ­ຖານ​ໃຫ້​ແກ່​ການ​ກຳ­ນົດ​ອັດ­ຕາ​ການ​ຈ່າຍ​ເງິນ​ໃຫ້​ຜູ້​ສະ­ໜອງ​ບໍ­ລິ­ການ ສຳ­ລັບ​ຜົນ​ປະ­ໂຫຍດ​ປະ­ກັນ​ສຸ­ຂະ­ພາບ (ລວມ​ທັງ​ການ­ຜ່າ­ຕັດ​ແກ່ນ​ຕາ​ຂຸ້ນ) ແລະ ເປັນ​ພື້ນ­ຖານ​ໃນ​ການ​ສ້າງ​ອັດ­ຕາ​ການ​ເກັບ​ຄ່າ​ແບບ​ມາດ­ຕະ­ຖານ ເງິນ​ສົມ­ທົບ​ປະ­ກັນ​ສຸ­ຂະ­ພາບ​ທີ່​ເປັນ​ໄປ​ໄດ້ ສຳ­ລັບ​ການ​ບໍ­ລິ­ການ​ສຸ­ຂະ­ພາບ ຢູ່​ສະ­ຖານ­ທີ່​ບໍ­ລິ­ການ​ຂອງ​ລັດ ແລະ ອາດ​ລວມ​ທັງ​ສະ­ຖານ­ທີ່​ບໍ­ລິ­ການ​ສຸ­ຂະ­ພາບ​ເອ­ກະ​ຊົນ.

    ສະ­ຖານ­ທີ່​ດຳ­ເນີນ​ກິດ­ຈະ­ກຳ ການ​ເກັບ​ກຳ​ຂໍ້​ມູນ ແມ່ນ​ຢູ່​ໂຮງ­ໝໍ​ສູນ​ກາງ 5 ແຫ່ງ (ໂຮງ­ໝໍ​ມະ­ໂຫ­ສົດ ໄຊ​ເສດ​ຖາ​ທິ​ລາດ ມິດ­ຕະ­ພາບ ແມ່ ແລະ ເດັກ​ເກີດ​ໃໝ່ ແລະ ໂຮງ­ໝໍ​ເດັກ) ສູນ​ປິ່ນ­ປົວ​ສະ­ເພາະ 3 ແຫ່ງ (ສູນ​ຮັກ­ສາ​ສຸ­ຂະ­ພາບ​ຕາ ຜີວ​ໜັງ ແລະ ສູນ​ການ​ແພດ​ຟື້ນ​ຟູ​ໜ້າ­ທີ່​ການ) ຢູ່​ແຂວງ​ສະ­ຫວັນ​ນະ​ເຂດ ຢູ່ 3 ໂຮງ­ໝໍ​ເມືອງ ແລະ 4 ສຸກ­ສາ­ລາ ແລະ ແຂວງ​ອຸ­ດົມ​ໄຊ ຢູ່​ໂຮງ­ໝໍ​ແຂວງ ໂຮງ­ໝໍ​ເມືອງ 1 ແຫ່ງ ແລະ 2 ສຸກ­ສາ­ລາ ສ່ວນ​ໂຮງ­ໝໍ​ເອ­ກະ​ຊົນ ມີ​ໂຮງ­ໝໍ​ໄຊ​ມັງ­ກອນ ແຂວງ​ອຸ­ດົມ​ໄຊ ແລະ ໂຮງ­ໝໍ​ລາວ-ຫວຽດ ນະ­ຄອນ­ຫຼວງ​ວຽງ​ຈັນ ໄລ­ຍະ​ເວ­ລາ​ຂອງ​ໂຄງ­ການ​ເລີ່ມ​ແຕ່​ມື້​ລົງ​ລາຍ​ເຊັນ ຈົນ​ເຖິງ​ເດືອນ​ກຸມ­ພາ 2020 ໃຊ້​ງົບ­ປະ­ມານ​ທັງ​ໝົດ 432 ລ້ານ​ກວ່າ​ກີບ ຫຼື 50.000 ໂດ​ລາ​ສະ­ຫະ­ລັດ.

ຂ່າວທີ່ກ່ຽວຂ້ອງ