ຂ່າວຫຼ້າສຸດ

ຄວາມສາມັກຄີເປັນເອກະພາບພາຍໃນພັກ

3.011 21 ສ.ຫ. 2019 ນານາສາລະ

    ພາຍ­ຫຼັງ​ທີ່​ຄໍ​ລຳ​ເຮົາ​ລົງ​ພິມ​ບາງ​ເນື້ອ​ໃນ​ສຳ­ຄັນ​ຂອງ​ເອ­ກະ­ສານ​ໃນ​ການ​ກະ­ກຽມ​ດຳ­ເນີນ​ກອງ​ປະ­ຊຸມ​ໃຫຍ່ 3 ຂັ້ນ ໄດ້​ມີ​ເພື່ອນ​ຜູ້​ອ່ານ​ສ່ອງ​ແສງ​ມາ​ວ່າ: ຢາກ​ໃຫ້​ລົງ​ບາງ​ຈຸດ​ສຳ­ຄັນ​ໃນ​ເອ­ກະ­ສານ​ບົດ​ທີ​ໜຶ່ງ ແລະ ບົດ​ທີ​ສາມ​ຕື່ມ​ອີກ ວ່າ​ຊັ້ນ !.

    ຕອບ​ສະ­ໜອງ​ຄວາມ​ຕ້ອງ­ການ​ດ້ານ​ຂໍ້​ມູນ ຄໍ​ລຳ​ພວກ​ເຮົາ​ຂໍ​ນຳ​ສະ­ເໜີ​ເປັນ​ສອງ​ບົດ​ຕິດ­ຕໍ່​ກັນ ເພື່ອ​ໃຫ້​ເພື່ອນ​ຜູ້​ອ່ານ​ກຳ​ໄດ້​ໃນ​ບາງ​ຈຸດ​ສຳ­ຄັນ ດັ່ງ­ນີ້:

    ບົດ​ທີ 1: ເວົ້າ​ເຖິງ​ການ​ເສີມ​ຂະ­ຫຍາຍ​ມູນ­ເຊື້ອ ແລະ ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ ໃນ​ບົດ​ນີ້​ຢາກ​ລົງ​ເລິກ​ເຖິງ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ ທິດ​ທາງ ວິ­ທີ​ການ​ເສີມ​ຂະ­ຫຍາຍ​ມູນ­ເຊື້ອ​ຂອງ​ພັກ ແລະ ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ.

    + ຄວາມ​ໝາຍ-ຄວາມ​ສຳ­ຄັນ​ກ່ຽວ​ກັບ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ.

    - ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ ແມ່ນ​ເນື້ອ​ໃນ​ຕົ້ນ­ຕໍ​ອັນ​ໜຶ່ງ​ໃນ​ການ​ສ້າງ​ພັກ​ໃຫ້​ມີ​ຄວາມ​ໜັກ​ແໜ້ນ​ທາງ​ດ້ານ​ການ­ຈັດ­ຕັ້ງ ແມ່ນ​ມູນ­ເຊື້ອ​ອັນ​ດີ­ງາມ ແລະ ບົດ­ຮຽນ​ອັນ​ປະ­ເສີດ​ຂອງ​ພັກ​ເຮົາ ທັງ​ເປັນ​ຫຼັກ​ແຫຼ່ງ​ໃຫ້​ແກ່​ຄວາມ​ສາ­ມັກ­ຄີ​ທົ່ວ​ປວງ​ຊົນ​ລາວ​ທັງ​ຊາດ​ໃຫ້​ແໜ້ນ​ແຟ້ນ.

    - ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ ເປັນ​ປັດ​ໄຈ​ສຳ­ຄັນ​ຄ້ຳ­ປະ­ກັນ​ການ​ຄົງ​ຕົວ ແລະ ຂະ­ຫຍາຍ­ຕົວ​ຂອງ​ພັກ​ເຮົາ.

    + ທິດ​ທາງ ວິ­ທີ​ການ​ເສີມ​ຂະ­ຫຍາຍ​ມູນ­ເຊື້ອ​ຂອງ​ພັກ ແລະ ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ.

    1. ທິດ​ທາງ​ເສີມ​ຂະ­ຫຍາຍ​ມູນ­ເຊື້ອ​ຂອງ​ພັກ.

    1. ສືບ­ຕໍ່​ສ້າງ ແລະ ປັບ­ປຸງ​ພັກ​ເຮົາ​ໃຫ້​ປອດ​ໃສ ເຂັ້ມ­ແຂງ ໜັກ​ແໜ້ນ 5 ດ້ານ ເຊິ່ງ​ແຕ່​ລະ​ດ້ານ​ມີ​ເນື້ອ​ໃນ​ດັ່ງ­ນີ້:

    1. ດ້ານ​ການ­ເມືອງ.

    - ຄະ­ນະ​ໜ່ວຍ​ພັກ ສະ­ມາ­ຊິກ​ພັກ ຕ້ອງ​ຮ່ຳ­ຮຽນ ເຊື່ອມ​ຊຶມ​ແນວ­ທາງ ແຜນ​ນະ­ໂຍ­ບາຍ ມະ­ຕິ ຄຳ​ສັ່ງ ກົດ​ລະ­ບຽບ​ຂອງ​ພັກ ກົດ­ໝາຍ ແລະ ລະ­ບຽບ​ການ​ຕ່າງໆ​ຂອງ​ລັດ​ຢ່າງ​ທົ່ວ​ເຖິງ ແລະ ຄົບ​ຖ້ວນ.

    - ໜ່ວຍ​ພັກ​ຕ້ອງ​ກຳ​ແໜ້ນ​ສະ­ພາ­ວະ​ຄວາມ​ເປັນ​ຈິງ​ຂອງ​ຮາກ​ຖານ​ຕົນ ເພື່ອ​ຫັນ​ແນວ­ທາງ ແຜນ​ນະ­ໂຍ­ບາຍ​ຂອງ​ພັກ ແລະ ມະ­ຕິ​ຂອງ​ຄະ­ນະ​ພັກ​ຂັ້ນ​ເທິງ​ເປັນ​ແຜນ­ການ​ຂອງ​ຕົນ​ໃຫ້​ສອດ­ຄ່ອງ​ກັບ​ຄວາມ​ຮັບ­ຜິດ­ຊອບ ແລະ ໜ້າ­ທີ່​ການ­ເມືອງ​ຂອງ​ຕົນ ພ້ອມ​ທັງ​ຊີ້​ນຳ-ນຳ­ພາ​ຈັດ​ຕັ້ງ​ປະ­ຕິ­ບັດ​ໃຫ້​ເປັນ​ຈິງ ແລະ ມີ​ປະ​ສິດ­ທິ​ຜົນ​ສູງ.

    - ສ້າງ​ສະ­ມາ­ຊິກ​ພັກ​ໃຫ້​ມີ​ຄຸນ​ທາດ​ການ­ເມືອງ​ໜັກ​ແໜ້ນ ມີ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ທີ່​ຖືກ­ຕ້ອງ ມີ​ຄວາມ​ຈົງ​ຮັກ​ພັກ­ດີ​ຕໍ່​ອຸ­ດົມ​ການ​ຂອງ​ພັກ ມິ​ນ້ຳ­ໃຈ​ເສຍ­ສະ­ຫຼະ ຮັບ​ໃຊ້​ຊາດ ຮັບ​ໃຊ້​ປະ­ຊາ­ຊົນ​ດ້ວຍ​ຄວາມ​ບໍ­ລິ­ສຸດ​ໃຈ.

    2. ດ້ານ​ແນວ​ຄິດ.

    - ຄະ­ນະ​ໜ່ວຍ​ພັກ ສະ­ມາ­ຊິກ​ພັກ ຕ້ອງ​ມີ​ຄວາມ​ເປັນ​ເອ­ກະ​ພາບ​ສູງ​ກັບ​ແນວ­ທາງ​ປ່ຽນ​ໃໝ່​ຂອງ​ພັກ ຢຶດ​ໝັ້ນ​ຈຸດ­ໝາຍ​ສັງ­ຄົມ​ນິ­ຍົມ​ຢ່າງ​ສະ­ເໝີ​ຕົ້ນ ສະ­ເໝີ​ປາຍ.

    - ຈຳ­ແນກ​ມິດ-ສັດ­ຕູ ໄດ້​ຢ່າງ​ຈະ­ແຈ້ງ ບໍ່​ຫວັ່ນ­ໄຫວ​ຄອນ​ແຄນ​ຕໍ່​ສະ­ພາບ​ການ​ຕ່າງໆ​ທີ່​ເກີດ​ຂຶ້ນ ເດັດ­ດ່ຽວ​ຕໍ່­ສູ້​ຕ້ານ​ທຸກ​ກົນ­ອຸ­ບາຍ​ມ້າງ­ເພ​ທຳ­ລາຍ​ຂອງ​ສັດ­ຕູ ແລະ ກຸ່ມ​ຄົນ​ບໍ່​ດີ.

    - ເປັນ​ເຈົ້າ​ການ​ປົກ​ປ້ອງ​ແນວ­ທາງ ອຸ­ດົມ​ການ​ຂອງ​ພັກ ເດັດ­ດ່ຽວ​ຕອບ​ຕ້ານ​ສິ່ງ​ຫຍໍ້­ທໍ້​ຕ່າງໆ​ທີ່​ເກີດ​ຂຶ້ນ​ຢູ່​ພາຍ​ໃນ​ພັກ ແລະ ໃນ​ສັງ­ຄົມ ຕ້ານ​ແນວ​ຄິດ​ສວຍ­ໂອ­ກາດ ສວຍ​ໃຊ້​ໜ້າ­ທີ່​ຕຳ­ແໜ່ງ ພະ­ຍາດ​ອາດ­ຍາ​ສິດ ເອ­ກະ​ຊົນ ສໍ້​ລາດ​ບັງ​ຫຼວງ ຫຼິ້ນ​ກິນ​ຟູມ​ເຟືອຍ ແລະ ຂາດ​ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ວຽກ​ງານ​ທີ່​ໄດ້​ຮັບ​ມອບ​ໝາຍ.

    - ພາຍ​ໃນ​ພັກ​ຕ້ອງ​ຮັກ­ສາ​ໄດ້​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ສູງ ຕ້ານ​ແນວ​ຄິດ​ຫຼາຍ​ພັກ ຫຼາຍ​ເຄົ້າ ຈຸ້ມ​ເຈື້ອ​ພັກ​ພວກ ແລະ ກຸ່ມ​ກ້ອນ​ຢູ່​ໃນ​ການ­ຈັດ­ຕັ້ງ​ພັກ.

    3. ດ້ານ​ການ­ຈັດ­ຕັ້ງ.

    - ຢຶດ​ໝັ້ນ ແລະ ປະ­ຕິ­ບັດ 5 ຫຼັກ­ການ 3 ທິດ​ນຳ ໃນ​ການ​ກໍ່­ສ້າງ ແລະ ປັບ­ປຸງ​ພັກ​ຢ່າງ​ເຂັ້ມ​ງວດ ການ​ດຳ­ເນີນ​ຊີ­ວິດ​ການ­ເມືອງ​ຂອງ​ໜ່ວຍ​ພັກ ຕ້ອງ​ຮັບ­ປະ­ກັນ ແລະ ເສີມ​ຂະ­ຫຍາຍ​ລັກ­ສະ­ນະ​ນຳ­ພາ ລັກ­ສະ­ນະ​ສຶກ​ສາ​ອົບ­ຮົມ ແລະ ລັກ­ສະ­ນະ​ຕໍ່­ສູ້​ພາຍ​ໃນ​ພັກ​ໃຫ້​ໄດ້.

    - ຄະ­ນະ​ໜ່ວຍ​ພັກ ສະ­ມາ­ຊິກ​ພັກ ຕ້ອງ​ມີ​ສະ­ຕິ​ເຄົາ­ລົບ ແລະ ປະ­ຕິ­ບັດ​ກົດ​ລະ­ບຽບ​ຂອງ​ພັກ ກົດ­ໝາຍ ແລະ ລະ­ບຽບ​ການ​ຕ່າງໆ​ຂອງ​ລັດ​ຢ່າງ​ເຂັ້ມ​ງວດ ເປັນ​ແບບ­ຢ່າງ​ທີ່​ດີ​ໃນ​ການ­ເຄື່ອນ­ໄຫວ ດຳ­ລົງ​ຊີ­ວິດ​ດ້ວຍ​ຄວາມ​ປອດ​ໃສ ບໍ່​ໃຫ້​ມີ​ປາ­ກົດ­ການ​ຫຍໍ້­ທໍ້​ຢູ່​ພາຍ​ໃນ​ໜ່ວຍ​ພັກ ຫຼື ຖ້າ​ມີ​ກໍ​ຕ້ອງ​ເດັດ­ຂາດ​ແກ້​ໄຂ​ໃຫ້​ທັນ​ການ.

    - ຄຸ້ມ​ຄອງ ຕີ​ລາ­ຄາ​ຄຸນ​ນະ​ພາບ​ຂອງ​ສະ­ມາ­ຊິກ​ພັກ ແລະ ໜ່ວຍ​ພັກ​ເປັນ​ປົກ­ກະ­ຕິ ປະ­ຕິ­ບັດ​ການ​ຍ້ອງ­ຍໍ​ສະ­ມາ­ຊິກ​ພັກ​ຜູ້​ທີ່​ດີ­ເດັ່ນ​ຢ່າງ​ຖືກ­ຕ້ອງ ດຳ­ເນີນ​ມາດ​ຕະ­ການ​ທາງ​ດ້ານ​ວິ­ໄນ​ຕໍ່​ຜູ້​ລະ­ເມີດ​ກົດ​ລະ­ບຽບ​ຂອງ​ພັກ ກົດ­ໝາຍ ແລະ ລະ­ບຽບ​ການ​ຕ່າງໆ​ຂອງ​ລັດ​ຢ່າງ​ເຂັ້ມ​ງວດ.

    - ການ​ຂະ­ຫຍາຍ​ມະ­ຫາ­ຊົນ​ເຂົ້າ​ພັກ ຕ້ອງ​ຖື​ຄຸນ​ນະ​ພາບ​ເປັນ​ກົກ ບົນ​ພື້ນ­ຖານ​ປະ­ຕິ­ບັດ​ຕາມ​ມາດ­ຕະ­ຖານ ເງື່ອນ­ໄຂ ບາດ­ກ້າວ ຂັ້ນ​ຕອນ​ຂອງ​ການ​ຂະ­ຫຍາຍ​ພັກ ທີ່​ໄດ້​ກຳ­ນົດ​ໄວ້​ໃນ​ກົດ​ລະ­ບຽບ​ພັກ​ຢ່າງ​ເຂັ້ມ​ງວດ.

    - ການ​ປະ­ກອບ​ບຸ​ຄະ­ລາ​ກອນ​ເຂົ້າ​ໃນ​ຄະ­ນະ​ໜ່ວຍ​ພັກ ຕ້ອງ​ຮັບ­ປະ­ກັນ​ຄວາມ​ຖືກ­ຕ້ອງ​ຕາມ​ມາດ­ຕະ­ຖານ ເງື່ອນ­ໄຂ​ທີ່​ໄດ້​ກຳ­ນົດ​ໄວ້​ໃນ​ກົດ​ລະ­ບຽບ​ຂອງ​ພັກ​ຢ່າງ​ຄົບ​ຖ້ວນ.

    4. ດ້ານ​ແບບ­ແຜນ​ການ​ນຳ­ພາ.

    - ຄະ­ນະ​ໜ່ວຍ​ພັກ ສະ­ມາ­ຊິກ​ພັກ ຕ້ອງ​ຢຶດ​ໝັ້ນ​ປະ­ຕິ­ບັດ​ຫຼັກ­ການ​ລວມ​ສູນ​ປະ­ຊາ­ທິ­ປະ­ໄຕ​ຢ່າງ​ເຂັ້ມ​ງວດ ນຳ­ພາ​ເປັນ​ໝູ່​ຄະ­ນະ ແບ່ງ​ວຽກ​ງານ​ໃຫ້​ບຸກ­ຄົນ​ຮັບ­ຜິດ­ຊອບ ສຽງ​ສ່ວນ​ໜ້ອຍ​ຂຶ້ນ​ກັບ​ສຽງ​ສ່ວນ​ຫຼາຍ ຂັ້ນ​ລຸ່ມ​ປະ­ຕິ­ບັດ​ຕາມ​ຂັ້ນ​ເທິງ.

    - ການ​ຄົ້ນ­ຄວ້າ​ຕົກ­ລົງ​ບັນ­ຫາ​ສຳ­ຄັນ​ຍຸດ​ທະ​ສາດ ຕ້ອງ​ເປັນ​ໝູ່​ຄະ­ນະ ເວົ້າ ແລະ ປະ­ຕິ­ບັດ​ຕາມ​ມະ­ຕິ ກົດ​ລະ­ບຽບ​ຂອງ​ພັກ ແລະ ກົດ­ໝາຍ​ຂອງ​ລັດ ເຮັດ​ວຽກ​ມີ​ແຜນ­ການ ມີ​ໂຄງ­ການ ມີ​ການ​ຊຸກ­ຍູ້ ຕິດ­ຕາມ ກວດ­ກາ ແລະ ສະ­ຫຼຸບ​ຖອດ​ຖອນ​ບົດ­ຮຽນ ປະ­ຕິ­ບັດ​ລະ­ບອບ​ປະ­ຊຸມ ແລະ ລາຍ​ງານ​ສ່ອງ​ແສງ​ເປັນ​ປົກ­ກະ­ຕິ.

    - ປະ­ສານ​ສົມ­ທົບ​ລະ­ຫວ່າງ​ການ​ນຳ­ພາ​ຂອງ​ພັກ ກັບ​ການ​ເສີມ​ຂະ­ຫຍາຍ​ບົດ­ບາດ ໜ້າ­ທີ່ ສິດ ການ​ຄຸ້ມ​ຄອງ​ຂອງ​ອົງ­ການ​ປົກ­ຄອງ ແລະ ຄວາມ​ເປັນ​ເຈົ້າ​ການ​ຂອງ​ອົງ​ການ­ຈັດ­ຕັ້ງ​ມະ­ຫາ­ຊົນ​ຢ່າງ​ກົມ­ກຽວ.

    ຢຶດ​ໝັ້ນ ແລະ ເສີມ​ຂະ­ຫຍາຍ​ແບບ­ແຜນ​ນຳ­ພາ​ທີ່​ເປັນ​ມູນ­ເຊື້ອ​ອັນ​ດີ­ງາມ​ຂອງ​ພັກ ແບບ­ແຜນ​ນຳ­ພາ​ຕິດ​ແທດ​ຮາກ​ຖານ ແທດ​ກັບ​ຕົວ​ຈິງ ມີ​ປະ­ຊາ­ທິ­ປະ­ໄຕ ເປັນ​ເຈົ້າ​ການ​ຕ້ານ​ພະ­ຍາດ​ອາດ­ຍາ​ສິດ ລັດ­ທິ​ເອ­ກະ​ຊົນ ສໍ້​ລາດ​ບັງ​ຫຼວງ ແລະ ເຮັດ​ວຽກ​ແບບ​ຜິວ​ເຜີນ.

   5. ນຳ­ພາ​ປະ­ຕິ­ບັດ​ໜ້າ­ທີ່​ການ­ເມືອງ.

    - ຄະ­ນະ​ໜ່ວຍ​ພັກ ສະ­ມາ­ຊິກ​ພັກ ຕ້ອງ​ປະ­ຕິ­ບັດ​ໜ້າ­ທີ່​ການ­ເມືອງ​ຂອງ​ຕົນ​ໃຫ້​ມີ​ປະ­ສິດ­ທິ­ພາບ​ສູງ​ໃນ​ການ​ນຳ­ພາ​ດ້ານ​ການ­ເມືອງ ແນວ​ຄິດ ການ­ຈັດ­ຕັ້ງ ວິ­ຊາ​ສະ­ເພາະ ການ​ພັດ­ທະ­ນາ​ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ປະ­ຕິ­ບັດ​ນະ­ໂຍ­ບາຍ​ຊົນ­ເຜົ່າ ແລະ ນະ­ໂຍ­ບາຍ​ການ​ຕ່າງ­ປະ­ເທດ​ຂອງ​ພັກ​ຢູ່​ໃນ​ຂອບ​ເຂດ​ການ​ນຳ­ພາ​ຂອງ​ໜ່ວຍ​ພັກ​ຕົນ.

    - ນຳ­ພາ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ ເພື່ອ​ສ້າງ​ບ້ານ​ໃຫ້​ກາຍ­ເປັນ​ບ້ານ​ພັດ­ທະ­ນາ ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ສະ­ມາ­ຊິກ​ພັກ ພະ­ນັກ­ງານ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ​ໄດ້​ຮັບ​ການ​ປັບ­ປຸງ​ນັບ​ມື້​ດີ​ຂຶ້ນ ຄອບ­ຄົວ​ທຸກ​ຍາກ​ໄດ້​ຮັບ​ການ​ແກ້​ໄຂ.

    - ນຳ­ພາ​ປັບ­ປຸງ​ບູ­ລະ­ນະ​ອົງ­ການ​ປົກ­ຄອງ ອົງ­ການ​ແນວ​ລາວ​ສ້າງ​ຊາດ ອົງ​ການ­ຈັດ­ຕັ້ງ​ມະ­ຫາ­ຊົນ ແລະ ອົງ​ການ­ຈັດ­ຕັ້ງ​ສັງ­ຄົມ​ອື່ນໆ ທີ່­ຢູ່​ໃນ​ຂອບ​ເຂດ​ການ​ນຳ­ພາ​ຂອງ​ຕົນ​ໃຫ້​ເຄື່ອນ​ໄຫວ​ຕາມ​ພາ­ລະ​ບົດ­ບາດ​ຂອງ​ແຕ່​ລະ​ອົງ­ການ​ໄດ້​ດີ ສ້າງ​ໃຫ້​ອົງ­ການ​ເຫຼົ່າ­ນັ້ນ​ມີ​ຄວາມ​ເຂັ້ມ­ແຂງ ເປັນ​ກຳ­ລັງ​ແຮງ​ໃນ​ການ­ຈັດ­ຕັ້ງ​ປະ­ຕິ­ບັດ​ແນວ­ທາງ ແຜນ​ນະ­ໂຍ­ບາຍ​ຂອງ​ພັກ ກົດ­ໝາຍ ແລະ ລະ­ບຽບ​ການ​ຕ່າງໆ ຢູ່​ຂັ້ນ​ຮາກ​ຖານ​ໃຫ້​ມີ​ຜົນ­ສຳ­ເລັດ.

    - ນຳ­ພາ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ເຮັດ​ໃຫ້​ສຳ­ນັກ­ງານ-ອົງ­ການ ກົມ ກອງ ບ້ານ​ມີ​ຄວາມ​ສະ­ຫງົບ ປອດ​ໄພ ແລະ ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ.

    ສ່ວນ​ວິ­ທີ​ການ​ເສີມ​ຂະ­ຫຍາຍ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ​ນັ້ນ ມີ​ບາງ​ຈຸດ​ສຳ­ຄັນ​ດັ່ງ­ນີ້:

    1. ສະ­ກັດ​ກັ້ນ​ບັນ­ດາ​ປາ­ກົດ­ການ​ແບ່ງ​ພັກ ແຍກ​ພວກ ລັດ­ທິ​ເອ­ກະ​ຊົນ ແລະ ລັດ­ທິ​ສວຍ­ໂອ­ກາດ​ຢ່າງ​ເດັດ­ຂາດ.

    2. ປະ­ຕິ­ບັດ​ປະ­ຊາ­ທິ­ປະ­ໄຕ​ພາຍ​ໃນ​ພັກ​ຢ່າງ​ຖືກ­ຕ້ອງ ແລະ ກວ້າງ­ຂວາງ ດຳ­ເນີນ​ການ​ຕິ​ຊົມ​ຕົນ​ເອງ ແລະ ຕິ​ຊົມ​ກັນ​ຢ່າງ​ແຂງ­ແຮງ​ເປັນ​ປະ­ຈຳ.

    3. ປະ­ຕິ­ບັດ​ລະ­ບຽບ​ວິ­ໄນ​ຂອງ​ພັກ ແລະ ຫຼັກ­ການ​ລວມ​ສູນ​ປະ­ຊາ­ທິ­ປະ­ໄຕ​ຢ່າງ​ເຄັ່ງ​ຄັດ.

    ທັງ​ໝົດ​ນັ້ນ​ຄື​ບາງ​ເນື້ອ​ໃນ​ຈຸດ​ສຳ­ຄັນ​ໃນ​ບົດ​ທີ 1 ທີ່​ຢາກ​ໃຫ້​ກຳ­ນົດ​ໄດ້​ນໍ ?.

ແນວ​ລາວ

ຂ່າວທີ່ກ່ຽວຂ້ອງ