ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 21-08-2019

629 21 ສ.ຫ. 2019 ຫົວຂໍ້ຂ່າວອື່ນໆ

    ຄໍ​ລຳ​ສຳ­ລັບ​ວັນ​ນີ້ ມີ​ສອງ​ຂ່າວ​ກ່ຽວ​ກັບ​ມາດ​ຕະ­ການ​ຈຳ­ກັດ​ນັກ​ທ່ອງ​ທ່ຽວ​ເຂົ້າ​ຊົມ​ກຳ­ແພງ​ໃຫຍ່​ເມືອງ​ຈີນ ແລະ ເງື່ອນ­ໄຂ​ການ​ຮັບ​ຊາວ​ໜຸ່ມ​ເຂົ້າ​ເປັນ​ທະ­ຫານ ສຸດ​ທ້າຍ ແມ່ນ​ນະ­ໂຍ­ບາຍ​ໃໝ່​ຂອງ​ທະ­ນາ­ຄານ​ຫວຽດ­ນາມ ກ່ຽວ​ກັບ​ການ​ປ່ອຍ​ເງິນ​ກູ້.

    ທີ່ ສປ ຈີນ: ສະ­ຖານ­ທີ່​ກຳ­ແພງ​ເມືອງ​ຈີນ ຊຶ່ງ​ມີ​ບາງ​ຄົນ​ເອີ້ນ​ວ່າ “ກຳ­ແພງ​ຍັກ” ນັ້ນ ແມ່ນ​ຈຸດ​ໂດດ​ເດັ່ນ​ລະ­ດັບ​ໂລກ​ສຳ­ລັບ​ນັກ​ທ່ອງ​ທ່ຽວ​ຕ່າງ­ປະ­ເທດ ແລະ ພາຍ​ໃນ​ຈີນ​ເອງ ເຖິງ​ຂັ້ນ​ມີ​ປະ­ໂຫຍກ​ເດັດໆ​ອອກ​ມາ​ວ່າ “ໄປ​ເມືອງ​ຈີນ ຖ້າ​ບໍ່​ເຫັນ​ກຳ­ແພງ​ເມືອງ​ຈີນ ກໍ​ສ່ຳ​ວ່າ​ບໍ່​ໄດ້​ໄປ​ຈີນ” ແຕ່​ໃນ​ໄລ­ຍະ​ຫຼັງໆ​ມາ​ນີ້ ທາງ​ການ​ຈີນ​ເອງ​ກໍ​ເກີດ​ມີ​ຄວາມ​ກັງ­ວົນ​ໃຈ​ກ່ຽວ​ກັບ​ຄວາມ​ຍືນ​ຍົງ​ຂອງ​ກຳ­ແພງ​ໃຫຍ່​ແຫ່ງ​ນີ້ ຍ້ອນ​ຖືກ​ຜົນ​ກະ­ທົບ​ຈາກ​ການ​ປ່ຽນ­ແປງ​ຂອງ​ອາ­ກາດ ຈາກ​ຄວາມ​ເກົ່າ​ແກ່​ເຫິງ​ນານ ຈາກ​ນ້ຳ­ມື​ຂອງ​ຄົນ​ທີ່​ຊອກ​ຜົນ​ປະ­ໂຫຍດ​ສ່ວນ​ຕົວ​ຈາກ​ກຳ­ແພງ ແລະ ຈາກ​ການ​ກະ­ທຳ​ຂອງ​ນັກ​ທ່ອງ​ທ່ຽວ ທີ່​ຂາດ​ຄວາມ​ຮັບ­ຜິດ­ຊອບ ໃນ​ຕົ້ນ​ເດືອນ​ກໍ­ລະ­ກົດ​ປີ​ນີ້ ໄດ້​ມີ​ຂ່າວ​ຈາກ​ເຈົ້າ​ໜ້າ­ທີ່​ຈີນ ທີ່​ບອກ​ວ່າ ກຳ­ແພງ​ໃຫຍ່​ເມືອງ​ຈີນ​ໃນ​ບາງ​ຍ່ານ​ທີ່​ຖືກ­ເສຍ​ຫາຍ​ຈາກ​ຜົນ​ກະ­ທົບ​ທາງ​ທຳ​ມະ​ຊາດ ແລະ ຈາກ​ການ​ກະ­ທຳ​ຂອງ​ມະ­ນຸດ​ນັ້ນ ພວມ​ຢູ່​ໃນ​ໄລ­ຍະ​ບູ­ລະ­ນະ​ໃຫ້​ຄືນ​ສູ່​ສະ­ພາບ​ເດີມ ດັ່ງ­ນັ້ນ ຈຶ່ງ​ມີ​ການ​ຈຳ­ກັດ​ຈຳ­ນວນ​ຄົນ​ເຂົ້າ​ຊົມ​ບໍ່​ໃຫ້​ເກີນ 65.000 ຄົນ​ຕໍ່​ວັນ ພ້ອມ​ທັງ​ໄດ້​ກຳ­ນົດ​ໃຫ້​ຜູ້​ຕ້ອງ­ການ​ຢ້ຽມ​ຊົມ​ຈອງ​ປີ້​ລ່ວງ​ໜ້າ​ທາງ​ອອນ​ລາຍ​ຂອງ​ທາງ​ການ ແນ­ໃສ່​ຫຼີກ​ລ່ຽງ​ສະ­ພາບ​ແອ​ອັດ ກໍ​ຄື ເພື່ອ​ປ້ອງ​ກັນ​ຄວາມ​ປອດ​ໄພ​ຂອງ​ບັນ­ດາ​ນັກ​ທ່ອງ​ທ່ຽວ​ເອງ ບົດ­ຮຽນ​ນີ້​ຊີ້​ໃຫ້​ເຫັນ​ວ່າ ຄວາມ​ສາ­ມາດ​ໃນ​ການ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ຊົມ​ສະ­ຖານ­ທີ່​ໃດ​ໜຶ່ງ​ໄດ້​ເປັນ​ຈຳ­ນວນ​ຫຼວງ­ຫຼາຍ​ນັ້ນ ເປັນ​ເລື່ອງ​ດີ ແຕ່​ກໍ​ມີ​ຄວາມ​ທ້າ​ທາຍ​ເປັນ​ເງົາ​ຕາມ​ຕົວ ຖ້າ​ບໍ່​ມີ​ລະ­ບົບ​ບໍ­ລິ­ການ ຫຼື ການ​ຄຸ້ມ​ຄອງ​ທີ່​ດີ ເພາະ​ມັນ​ອາດ​ຈະ​ສ້າງ​ຄວາມ​ເສຍ​ຫາຍ​ໃຫ້​ສະ­ຖານ­ທີ່​ທ່ອງ​ທ່ຽວ​ກໍ​ເປັນ​ໄດ້.

    ອີກ​ຂ່າວ​ໜຶ່ງ​ຈາກ​ຈີນ ແມ່ນ​ເລື່ອງ​ການ​ຮັບ​ຊາວ​ໜຸ່ມ​ເຂົ້າ​ເປັນ​ທະ­ຫານ ກ່ອນ​ໜ້າ​ນີ້​ປະ­ມານ 5 ປີ ມີ​ຂ່າວ​ຈາກ​ໜັງ­ສື­ພິມ China Daily Asia week (20?26/6/2014) ທີ່​ໃຫ້​ຮູ້​ວ່າ ທາງ​ການ ສປ ຈີນ ໄດ້​ໂຍະ­ຍານ​ມາດ​ຕະ­ການ​ທາງ​ດ້ານ​ຮ່າງ­ກາຍ​ສຳ­ລັບ​ຊາວ​ໜຸ່ມ​ທີ່​ຈະ​ເຂົ້າ​ຮັບ​ໃຊ້​ໃນ​ກອງ­ທັບ ຕາມ​ມາດ­ຕະ­ຖານ​ເດີມ ຊາວ​ໜຸ່ມ​ຊາຍ​ທີ່​ຈະ​ເຂົ້າ​ເປັນ​ທະ­ຫານ​ນັ້ນ ຕ້ອງ​ມີ​ລວງ​ສູງ​ແຕ່ 1,60 ແມັດ ແຕ່​ໃນ​ປັດ­ຈຸ­ບັນ​ນີ້ ໄດ້​ໂຍະ­ຍານ​ລົງ​ເປັນ 1,60 ແມັດ ສຳ­ລັບ​ຜູ້​ຊາຍ ແລະ 1,58 ແມັດ ສຳ­ລັບ​ແມ່­ຍິງ ນອກ­ຈາກ​ມີ​ການ​ໂຍະ­ຍານ​ດ້ານ​ລວງ​ສູງ​ແລ້ວ ກໍ​ຍັງ​ມີ​ການ​ໂຍະ­ຍານ​ເລື່ອງ​ບັນ­ຫາ​ສາຍ­ຕາ​ສັ້ນ​ອີກ​ດ້ວຍ ເພາະ­ວ່າ​ນັກ­ຮຽນ​ຊັ້ນ​ສູງ ແລະ ນັກ​ສຶກ​ສາ​ມະ­ຫາ­ວິ­ທະ­ຍາ­ໄລ​ຂອງ​ຈີນ​ນັ້ນ ເກືອບ 70% ມີ​ບັນ­ຫາ​ສາຍ­ຕາ​ສັ້ນ ໃນ​ເມື່ອ​ກ່ອນ ຜູ້​ທີ່​ສັກ​ລິງ​ລາຍ​ຕາມ​ຮ່າງ­ກາຍ​ນັ້ນ​ບໍ່​ມີ​ສິດ​ເຂົ້າ​ເປັນ​ທະ­ຫານ ແຕ່​ໃນ​ປັດ­ຈຸ­ບັນ ຜູ້​ທີ່​ມີ​ລາຍ​ສັກ​ຂະ­ໜາດ​ບໍ່​ເກີນ 2 ຊັງ​ຕີ​ແມັດ ກໍ​ສາ­ມາດ​ຖືກ​ຮັບ​ເຂົ້າ​ເປັນ​ທະ­ຫານ​ໄດ້ ຂ່າວ​ບອກ​ວ່າ ການ​ຮັບ​ຊາວ​ໜຸ່ມ​ເຂົ້າ​ເປັນ​ທະ­ຫານ​ນັ້ນ​ທາງ​ການ​ໄດ້​ເນັ້ນ​ລະ­ດັບ​ການ​ສຶກ​ສາ​ເປັນ​ສຳ­ຄັນ.

    ທີ່ ຫວຽດ­ນາມ: ໜັງ­ສື­ພິມ​ວຽງ​ຈັນ​ທາມ (11/6/2019) ທີ່​ອ້າງ​ຕາມ​ແຫຼ່ງ​ຂ່າວ Vietnam News ໄດ້​ໃຫ້​ຮູ້​ວ່າ ທະ­ນາ­ຄານ​ກາງ­ຂອງ​ຫວຽດ­ນາມ ໄດ້​ຮ່າງ​ກົດ​ລະ­ບຽບ​ຂຶ້ນ​ສະ­ບັບ​ໜຶ່ງ ທີ່​ກຳ­ນົດ​ໃຫ້​ບັນ­ດາ​ທະ­ນາ­ຄານ​ຕີ​ລາ­ຄາ​ຄວາມ​ສ່ຽງ​ດ້ານ​ສິ່ງ­ແວ­ດລ້ອມ​ຢ່າງ​ລະ­ອຽດ ກ່ອນ​ຈະ​ປ່ອຍ​ເງິນ​ກູ້​ໃຫ້​ໂຄງ­ການ​ຂອງ​ຂະ­ແໜງ​ອຸດ­ສາ­ຫະ­ກຳ​ຈຳ­ນວນ​ໜຶ່ງ ເຊັ່ນ: ອຸດ­ສາ­ຫະ­ກຳ​ພະ­ລັງ­ງານ​ຄວາມ​ຮ້ອນ ອຸດ­ສາ­ຫະ­ກຳ​ຜະ­ລິດ​ເຫຍື້ອ​ເຈ້ຍ ຍ້ອມ​ສີ ແລະ ອາ­ຫານ​ທະ­ເລ ອຸດ­ສາ­ຫະ­ກຳ​ທີ່​ກ່າວ​ມາ​ຂ້າງ​ເທິງ​ນີ້ ມີ​ຄວາມ​ສ່ຽງ​ສ້າງ​ມົນ​ລະ​ພິດ​ສູງ ເປົ້າ​ໝາຍ​ຂອງ​ກົດ​ລະ­ບຽບ​ສະ­ບັບ​ນີ້ ແມ່ນ​ເພື່ອ​ສ້າງ​ຄວາມ​ຮັບ​ຮູ້ ແລະ ຄວາມ​ຮັບ­ຜິດ­ຊອບ​ຂອງ​ບັນ­ດາ​ທະ­ນາ­ຄານ​ການ​ຄ້າ​ກ່ຽວ​ກັບ​ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ​ດ້ວຍ​ຮູບ​ການ​ສົ່ງ­ເສີມ​ໂຄງ­ການ​ພັດ­ທະ­ນາ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ ພາຍ​ໃຕ້​ລະ­ບຽບ​ການ​ໃໝ່ ເຫຼົ່າ​ທະ­ນາ­ຄານ​ຈະ​ໄດ້​ເພີ່ມ​ສ່ວນ​ແບ່ງ​ຂອງ​ທຶນ​ກູ້​ຢືມ​ໃຫ້​ແກ່​ພາກ­ສ່ວນ​ອຸດ­ສາ­ຫະ­ກຳ ກໍ​ຄື ຂະ­ແໜງ­ການ​ສີ­ຂຽວ ທີ່​ມີ​ລະ­ບຽບ​ການ​ພາຍ​ໃນ ເພື່ອ​ຄຸ້ມ​ຄອງ​ສິ່ງ­ແວ­ດລ້ອມ ແລະ ຄວາມ​ສ່ຽງ​ທາງ​ສັງ­ຄົມ.

ຂ່າວທີ່ກ່ຽວຂ້ອງ