ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 20-08-2019

659 20 ສ.ຫ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ປະ­ກອບ​ດ້ວຍ​ບົດ​ກ່ຽວ​ກັບ​ນະ­ໂຍ­ບາຍ​ນຳ​ເຂົ້າ​ແຮງ​ງານ​ຕ່າງ­ປະ­ເທດ​ຂອງ​ຍີ່­ປຸ່ນ ແຜນ​ເກັບ​ພາ­ສີ​ບໍ­ລິ­ສັດ​ເຕັກ​ໂນ​ໂລ​ຊີ​ຂ້າມ​ຊາດ​ຢູ່​ຝຣັ່ງ.

    ທີ່​ຍີ່­ປຸ່ນ: ໃນ​ໄລ­ຍະ​ຫຼັງໆ​ມາ​ນີ້ ມີ​ຂ່າວ​ອອກ​ມາ​ຈາກ​ຍີ່­ປຸ່ນ​ບໍ່​ຂາດ​ສາຍ ກ່ຽວ​ກັບ​ບັນ­ຫາ​ຂາດ­ແຄນ​ແຮງ​ງານ​ຂອງ​ປະ­ເທດ​ນີ້ ຍ້ອນ​ບັນ­ຫາ​ຄົນ​ເຖົ້າ​ເພີ່ມ​ຂຶ້ນ ແຕ່​ການ​ເກີດ​ຂອງ​ເດັກ​ຜັດ​ຍ່າງ​ລົງ​ຄ້ອຍ ເຮັດ​ໃຫ້​ຍີ່­ປຸ່ນ​ຕ້ອງ​ທົບ​ທວນ­ຄືນ​ນະ­ໂຍ­ບາຍ​ນຳ​ເຂົ້າ​ແຮງ​ງານ​ຕ່າງ­ປະ­ເທດ ແລະ ເປີດ​ກວ້າງ​ຂະ­ແໜງ​ອາ­ຊີບ​ທີ່​ອະ­ນຸ­ຍາດ​ໃຫ້​ຄົນ​ຕ່າງ­ປະ­ເທດ​ເຮັດ​ໄດ້ ດັ່ງ​ທີ່​ເປັນ​ຂ່າວ​ວ່າ ໃນ​ວັນ​ທີ 1 ເມ­ສາ​ປີ​ນີ້ ທາງ​ການ​ຍີ່­ປຸ່ນ ໄດ້​ເລີ່ມ​ນຳ​ໃຊ້​ວີ​ຊາ 2 ປະ­ເພດ ເພື່ອ​ນຳ​ເຂົ້າ​ແຮງ​ງານ​ຕ່າງ­ປະ­ເທດ ສຳ­ລັບ 14 ຂະ­ແໜງ​ວຽກ ຊຶ່ງ​ລວມ​ມີ​ວຽກ​ເບິ່ງ­ແຍງ​ສຸ­ຂະ­ພາບ ວຽກ​ບໍ­ລິ­ການ​ຕາມ​ຮ້ານ​ອາ­ຫານ ແລະ ການ​ກໍ່­ສ້າງ-ວີ​ຊາ​ສຳ­ລັບ​ແຮງ​ງານ​ຕ່າງ­ປະ­ເທດ​ໃນ​ຂະ­ແໜງ­ການ​ທີ່​ກ່າວ​ມາ​ນີ້ ມີ​ອາ­ຍຸ​ສູງ​ເຖິງ 5 ປີ ເອີ້ນ​ວ່າ ວີ​ຊາ​ແຮງ​ງານ​ຊຳ­ນານ​ສະ­ເພາະ ຜູ້​ຖື​ວີ​ຊາ​ນີ້​ສາ­ມາດ​ຢູ່​ອອກ­ແຮງ​ງານ​ໃນ​ຍີ່­ປຸ່ນ​ໄດ້​ເຖິງ 5 ປີ ແຕ່​ບໍ່​ສາ­ມາດ​ເອົາ​ສະ­ມາ­ຊິກ​ຄອບ­ຄົວ​ໄປ​ຢູ່​ນຳ​ໄດ້ ວີ​ຊາ​ປະ­ເພດ​ທີ 2 ຕໍ່​ໄປ​ແມ່ນ​ສຳ­ລັບ​ແຮງ​ງານ​ຕ່າງ­ປະ­ເທດ​ທີ່​ຊຳ­ນານ​ງານ​ກວ່າ​ປະ­ເພດ​ທີ 1 ຜູ້​ຖື​ວີ​ຊາ​ນີ້​ສາ­ມາດ​ຢູ່​ອອກ­ແຮງ​ງານ​ໄດ້​ຍາວ​ກວ່າ ແລະ ສາ­ມາດ​ເອົາ​ສະ­ມາ­ຊິກ​ຄອບ­ຄົວ​ໄປ​ຢູ່​ນຳ​ໄດ້ ຂ່າວ​ບອກ​ວ່າ ວີ​ຊາ​ທັງ 2 ປະ­ເພດ​ນີ້ ຈະ​ຊ່ວຍ​ໄຂ​ປະ­ຕູ​ຮັບ​ເອົາ​ແຮງ​ງານ​ຕີນ-ມື​ຕ່າງ­ປະ­ເທດ​ເຂົ້າ​ຍີ່­ປຸ່ນ​ໄດ້​ສູງ​ເຖິງ 345.500 ຄົນ ພາຍ​ໃນ 5 ປີ​ຂ້າງ​ໜ້າ ໂດຍ​ພູດ​ໃຫຍ່​ຈະ​ເປັນ​ຂອງ​ແຮງ​ງານ​ຈາກ​ຫວຽດ­ນາມ ສະ­ຖິ­ຕິ​ໃນ​ທ້າຍ​ປີ 2018 ໃຫ້​ຮູ້​ວ່າ ຢູ່​ຍີ່­ປຸ່ນ ມີ­ແຮງ​ງານ​ເຝິກ​ງານ​ຈາກ​ຕ່າງ­ປະ­ເທດ​ທັງ​ໝົດ 328.000 ຄົນ ໃນ​ນັ້ນ ຈາກ​ຫວຽດ­ນາມ​ກວມ​ເອົາ​ປະ­ມານ 50% ສປ ຈີນ 24% ຟີ​ລິບ​ປິນ 9% ແລະ ອິນ​ໂດ​ເນ​ເຊຍ 8% ໃນ​ປີ 2018 ຫວຽດ­ນາມ​ສົ່ງ​ແຮງ​ງານ​ໄປ​ຍີ່­ປຸ່ນ​ກວ່າ 68.000 ຄົນ ໄປ​ໄຕ້​ຫວັນ ປະ­ມານ 60.000 ຄົນ ຫວຽດ­ນາມ​ມີ­ແຮງ​ງານ​ຈຳ­ນວນ 142.860 ຄົນ ທີ່​ພວມ​ເຮັດ​ວຽກ​ຢູ່​ຫຼາຍ​ກວ່າ 140 ປະ­ເທດ​ໃນ​ທົ່ວ​ໂລກ.

    ທີ່​ຝຣັ່ງ: ມີ​ຂ່າວ​ວ່າ​ທາງ​ການ​ຝຣັ່ງ ຕັ້ງ​ເປົ້າ​ໝາຍ​ເກັບ​ລາຍ​ຮັບ​ຈາກ​ພາ­ສີ​ບໍ­ລິ­ສັດ​ເຕັກ​ໂນ​ໂລ​ຊີ​ຂ້າມ​ຊາດ​ໄດ້​ປະ­ມານ 400 ລ້ານ​ເອີ​ໂຣ ໃນ​ປີ 2019 ນີ້ ບໍ­ລິ­ສັດ​ເຕັກ​ໂນ​ໂລ​ຊີ​ຂ້າມ​ຊາດ​ທີ່​ເປັນ​ເປົ້າ​ໝາຍ​ເກັບ​ພາ­ສີ​ນັ້ນ ຕ້ອງ​ເປັນ​ບໍ­ລິ­ສັດ​ຂະ­ໜາດ​ໃຫຍ່​ທີ່​ເຂົ້າ​ໄປ​ຕັ້ງ​ສຳ­ນັກ­ງານ​ຢູ່​ປະ­ເທດ​ຝຣັ່ງ ໂດຍ​ໄດ້​ຕັ້ງ​ອັດ­ຕາ​ພາ­ສີ​ຂັ້ນ​ຕ່ຳ​ໃນ​ລຳ­ດັບ 3% ສຳ­ລັບ​ລາຍ​ໄດ້​ຂອງ​ບໍ ລິ​ສັດ​ທີ່​ມີ​ຮອບ​ວຽນ​ຢ່າງ​ໜ້ອຍ 25 ລ້ານ​ເອີ​ໂຣ ແລະ ສູງ​ກວ່າ 750 ລ້ານ​ເອີ​ໂຣ ໃນ​ຕະ­ຫຼາດ​ໂລກ ຂ່າວ​ບອກ​ວ່າ ຈະ​ມີ​ການ​ເກັບ​ພາ­ສີ​ຢ້ອນ​ຫຼັງ ນັບ​ແຕ່​ປີ​ນີ້ ຂ່າວ​ໜຶ່ງ​ອີກ​ທີ່​ໜ້າ​ສົນ­ໃຈ​ກ່ຽວ​ກັບ​ຝຣັ່ງ ແມ່ນ​ເລື່ອງ​ກະ­ຊວງ​ສິ່ງ­ແວ­ດລ້ອມ​ຂອງ​ປະ­ເທດ​ນີ້ ໄດ້​ອອກ​ຄຳ​ສັ່ງ​ຫ້າມ​ນຳ​ໃຊ້​ສານ​ປຸງ​ແຕ່ງ­ອາ­ຫານ​ທີ່​ເປັນ​ສີ ນັບ​ແຕ່​ປີ 2020 ເປັນ­ຕົ້ນ​ໄປ ສານ​ເປັນ​ສີ​ດັ່ງ­ກ່າວ​ນິ­ຍົມ​ໃຊ້​ເພື່ອ​ເຮັດ​ໃຫ້​ອາ­ຫານ​ມີ​ສີ­ສັນ​ງົດ​ງາມ ໜ້າ​ກິນ ແຕ່​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ​ຂອງ​ຜູ້​ບໍ­ລິ­ໂພກ ເພາະ​ມັນ​ສາ­ມາດ​ດູດ​ຊຶມ​ເຂົ້າ​ສູ່​ອະ​ໄວ​ຍະ​ວະ​ຕ່າງໆ​ໃນ​ຮ່າງ­ກາຍ ອາ­ຫານ​ປົນ​ສານ​ຊະ­ນິດ​ນີ້ (E 171) ມັກ​ຈະ​ພົບ​ໃນ​ເຂົ້າ­ໜົມ​ອົມ ຊິງ​ໂກມ (ໝາກ​ຝຣັ່ງ) ກະ​ແລມ ເຄື່ອງ​ສຳ­ອາງ ຢາ​ປົວ​ພະ­ຍາດ ແລະ ອື່ນໆ.

ຂ່າວທີ່ກ່ຽວຂ້ອງ