ສະພາ​ການ​ທະຫານ ​ແລະ ​ ຝ່າຍ​ຝ່າຍ​ຄ້ານ​ໃນ​ຊູ​ດານ​ລົງ​ນາມ​ຂໍ້​ຕົກລົງ

    ເມື່ອ​ວັນ​ທີ 17 ສິງຫາ​ນີ້ ສະພາ​ການ​ທະຫານ​ຂ້າມ​ຜ່ານ (TMC) ແລະ ຫົວໜ້າ​ຝ່າຍ​ຜູ້​ປະ​ທ້ວງ​ຢູ່​ໃນ​ຊູ​ດານ ໄດ້​ຮ່ວມ​ກັນ​ລົງ​ນາມ​ຂໍ້​ຕົກລົງ​ທີ່​ເອີ້ນ​ວ່າ “ຖະແຫຼງການ​ລັດ​ຖະ​ທຳ​ມະນູນ ໂດຍ​ຜ່ານ​ນັ້ນ​ກໍ​ເປັນ​ການ​ເປີດ​ທາງ ໃຫ້​ແກ່​ການ​ຖ່າຍ​ໂອນ​ອຳນາດ​ໃຫ້​ແກ່​ອຳນາດ​ການ​ປົກຄອງ​ຝ່າຍ​ພົນ​ລະ​ເຮືອນ. ມີ​ປະມຸກ​ລັດ ແລະ ຫົວໜ້າ​ລັດຖະບານ ຈາກ​ຫຼາຍ​ປະເທດ ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ​ໃນ​ພິທີ​ລົງ​ນາມ​ຂໍ້​ຕົກລົງ​ດັ່ງກ່າວ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ​ຄາ​ຕູມ (ປະເທດ​ຊູ​ດານ).

    ນາຍ​ພົນ ຮາມ​ດານ ດັກ​ໂລ ຮອງ​ປະທານ TMC ແລະ ທ່ານ ອາ​ເມັດ ອາ​​ລ-ຣາ​ບີ​ເອ ຊຶ່ງ​ເປັນ​ຕົວ​ແທນ​ໃຫ້​ແກ່​ສະຫະພາບ​ເພື່ອ​ເສລີພາບ ແລະ ການ​ປ່ຽນແປງ (FFC) ເປັນ​ຜູ້​ຮ່ວມ​ລົງ​ນາມ​ໃນ​ຂໍ້​ຕົກລົງ​ດັ່ງກ່າວ. ກ່ອນ​ໜ້າ​ນັ້ນ TMC ແລະ  FFC ໄດ້​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ຖະແຫຼງການ​ລັດ​ຖະ​ທຳ​ມະນູນ ທີ່​ເປັນ​ການ​ເປີດ​ທາງ​ໃຫ້​ແກ່​ຂະ​ບວນ​ການ​ຖ່າຍ​ໂອນ​ອຳນາດ​ໃຫ້​ແກ່​ອຳນາດ​ການ​ປົກຄອງ​ຝ່າຍ​ພົນ​ລະ​ເຮືອນ.

    ຖະແຫຼງ​ການ​​ດັ່ງ​ກ່າວ ໄດ້​ຮັບ​ການ​ສ້າງຕັ້ງ​ຂຶ້ນ​ມາ ໂດຍ​ອີງໃສ່​ຂໍ້​ຕົກລົງ​ອັນ​ເປັນ​ຂໍ​ກຸນແຈ ກ່ຽວ​ກັບ​ການ​ແບ່ງປັນ​ອຳນາດ ຊຶ່ງ​ສອງ​ຝ່າຍ​ບັນລຸ​ໄດ້​ເມື່ອ​ວັນ​ທີ 17 ກໍລະກົດ​ທີ່​ຜ່ານ​ມາ ແລະ ມຸ່ງ​ໄປ​ສູ່​ສະພາ​ການ​ນຳ​ປະສົມ ອັນ​ປະກອບ​ດ້ວຍ​ຕົວ​ແທນ​ຝ່າຍ​ການ​ທະຫານ ແລະ ຝ່າຍ​ພົນ​ລະ​ເຮືອນ ເພື່ອ​ຕິດຕາມ​ກວດກາ​ການ​ສ້າງຕັ້ງ​ລັດຖະບານ​ຝ່າຍ​ພົນ​ລະ​ເຮືອນ ແລະ ສະພາ​ແຫ່ງ​ຊາດ ເພື່ອ​ບໍລິຫານ​ປະເທດ ໃນ​ໄລຍະ​ຂ້າມ​ຜ່ານ​ແກ່ຍາວ​ເປັນ​ເວລາ 3 ປີ.