ພະຍາດໝາກ​ແດງ​ລະບາດ​ຢູ່​ໃນ ສປ ກົງ​ໂກ ​ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ພັນ​ຄົນ

222 20 ສ.ຫ. 2019 ຂ່າວຕ່າງປະເທດ
ພະຍາດໝາກ​ແດງ​ລະບາດ​ຢູ່​ໃນ ສປ ກົງ​ໂກ ​ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ພັນ​ຄົນ

    ແຫຼ່ງ​ຂ່າວ​ຈາກ​ທ້ອງຖິ່ນ ແຈ້ງ​ໃຫ້​ຮູ້ເມື່ອ​ວັນ​ທີ 17 ສິງຫາ​ນີ້​ວ່າ ພະຍາດໝາກແດງ​ລະບາດ​ຢູ່​ໃນ​ສາທາລະນະ​ລັດ ປະຊາທິປະໄຕ ກົງ​ໂກ (​ສປ ກົງ​ໂກ) ແຕ່​ເດືອນ​ມັງກອນ ຮອດ​ຕົ້ນ​ເດືອນ​ສິງຫາ 2019 ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 2.700 ກວ່າ​ຄົນ.

    ຕົວ​ແທນ​ຂອງ​ອົງການ​ທ່ານໝໍ​ບໍ່​ມີ​ພົມ​ແດນ (MSF) ປະຈຳ ​ສປ ກົງ​ໂກ ໃຫ້​ຮູ້​ວ່າ ພະຍາດ ໝາກ​ແດງ ທີ່​ໄດ້​ຮັບ​ການ​ປະກາດ​ຢ່າງ​ເປັນ​ທາງ​ການ​ເມື່ອ​ວັນ​ທີ 10 ມິຖຸນາ​ທີ່​ຜ່ານ​ມາ ວ່າ​ເປັນ​ພະຍາດ​ທີ່​ອັນຕະລາຍ​ທີ່​ສຸດ ຊຶ່ງ ​ສປ ກົງ​ໂກ ຕ້ອງ​ໄດ້​ປະ​ເຊີນ​ໜ້າ​ມາ​ຕັ້ງແຕ່​ປີ 2011-2012. ໃນ 7 ເດືອນ​ທີ່​ຜ່ານ​ມາ ມີ​ຜູ້​ຕິດ​ພະຍາດໝາກແດງ ຢູ່​ໃນ​ປະເທດ​ດັ່ງກ່າວ 145.000 ກວ່າ​ກໍລະນີ ແລະ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 2.758 ຄົນ.

    ປັດຈຸບັນ​ນີ້ ອົງການ​ທີ່​ມີ​ສ່ວນ​ກ່ຽວຂ້ອງ​ຂອງ ​ສປ ກົງ​ໂກ ຫາ​ກໍ​ໄດ້​ຮັບ​ເງິນ 2,5 ລ້ານ​ໂດ​ລາ​ສະຫະລັດ ຈາກ​ທີ່​ມີ​ຄວາມ​ຈຳເປັນ 8,9 ລ້ານ​ໂດ​ລາ​ສະຫະລັດ ໃຫ້​ແກ່​ແຜນການ​ຮອງ​ຮັບ​ການ​ລະບາດ​ຂອງ​ພະຍາດໝາກແດງ. MSF ພວມ​ໃຫ້​ຄວາມ​ຊ່ວຍເຫຼືອ​ອົງການ​ທີ່​ກ່ຽວຂ້ອງ​ຂອງ ​ສປ ກົງ​ໂກ ໃນ​ການ​ຮັບ​ມື​ກັບ​ພະຍາດ​ດັ່ງກ່າວ​ຢູ່​ໃນ 13 ແຂວງ ແລະ ນະຄອນ. ມາ​ຮອດ​ເວລາ​ນີ້ ມີ 23/26 ແຂວງ ແລະ ນະຄອນ ໃນ​ທົ່ວ​ປະເທດ ​ສປ ກົງ​ໂກ ໄດ້​ຢັ້ງຢືນ​ມີ​ກໍລະນີ​ຜູ້​ຕິດພະຍາດ​ດັ່ງກ່າວ.

    ອົງການ​ອະນາໄມ​ໂລກ (WHO) ມີ​ຄຳ​ແຈ້ງ​ເຕືອນ​ອອກ​ມາ​ເມື່ອ​ເດືອນ​ກໍລະກົດ 2019 ວ່າ​ພະຍາດໝາກແດງ​ຢູ່​ໃນ ​ສປ ກົງ​ໂກ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ ເທົ່າ​ກັບ​ຜູ້​ເສຍ​ຊີວິດ​ຍ້ອນ​ພະຍາດ​ອີ​ໂບ​ລາ ແລະ ພະຍາດ​ອະຫິ​ວາ ບວກ​ເຂົ້າກັນ.

ຂ່າວທີ່ກ່ຽວຂ້ອງ