ຂ່າວຫຼ້າສຸດ

ສະຫາຍເລຂາທິການໃຫຍ່ ຕ້ອນຮັບຄະນະຜູ້ແທນຫວຽດນາມ

556 19 ສ.ຫ. 2019 ຂ່າວໜ້າ​ໜຶ່ງ
ສະຫາຍເລຂາທິການໃຫຍ່ ຕ້ອນຮັບຄະນະຜູ້ແທນຫວຽດນາມ

    ວັນ​ທີ 16 ສິງ­ຫາ 2019 ທີ່​ຫ້ອງ​ວ່າ­ການ​ສູນ​ກາງ​ພັກ (ຫຼັກ 6) ສະ­ຫາຍ ບຸນ​ຍັງ  ວໍ­ລະ​ຈິດ ເລ­ຂາ​ທິການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ສະ­ຫາຍ  ຫງວ​ຽນ ວັນ​ເນນ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຫ້ອງ​ວ່າ­ການ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ພ້ອມ​ດ້ວຍ​ຄະ­ນະ ໃນ​ໂອ­ກາດ​ທີ່​ເດີນ­ທາງ​ມາ​ຢ້ຽມ­ຢາມ​ລາວ ແລະ ເຮັດ​ວຽກ​ກັບ​ຫ້ອງ​ວ່າ­ການ​ສູນ​ກາງ​ພັກ ປະ­ຊາ­ຊົນ ປະ­ຕິ ວັດ​ລາວ ໃນ​ວັນ​ທີ 16-18 ສິງ­ຫາ​ນີ້.

    ໂອ­ກາດ​ນີ້ ສະ­ຫາຍ​ເລ­ຂາ­ທິ­ການ​ໃຫຍ່ ໄດ້​ກ່າວ​ສະ­ແດງ​ຄວາມ​ຕ້ອນ­ຮັບ ແລະ ຕີ​ລາ­ຄາ​ສູງ​ຕໍ່​ຄະ­ນະ​ຜູ້​ແທນ​ທີ່​ໄດ້​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ​ຄັ້ງ​ນີ້ ຈະ​ເປັນ​ການ​ປະ­ກອບ­ສ່ວນ​ເພີ່ມ​ພູນ​ຄູນ​ສ້າງ​ສາຍ​ພົວ ພັນ​ມິດ­ຕະ­ພາບ​ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ­ດ້ານ ລະ­ຫວ່າງ ສອງ​ພັກ ສອງ​ລັດ ແລະ ປະ ຊາ​ຊົນ​ສອງ​ຊາດ ໂດຍ​ສະ­ເພາະ ສອງ​ຫ້ອງ​ວ່າ­ການ​ສູນ​ກາງ​ພັກ ລາວ ແລະ ຫວຽດ­ນາມ ທີ່​ມີ​ມູນ­ເຊື້ອ​ມາ​ແຕ່​ດົນ​ນານ​ແລ້ວ​ນັ້ນ​ໃຫ້​ເກີດ​ດອກ​ອອກ​ຜົນ​ຢ່າງ​ບໍ່​ຢຸດ​ຢັ້ງ ພິ­ເສດ ການ​ເດີນ­ທາງ​ມາ​ຢ້ຽມ­ຢາມ​ລາວ​ຂອງ​ຄະ­ນະ​ຜູ້​ແທນ​ຄັ້ງ​ນີ້​ຢູ່​ໃນ​ໄລ­ຍະ​ທີ່​ສອງ​ພັກ-ສອງ​ລັດ ກໍ​ຄື ປະ­ຊາ­ຊົນ​ສອງ​ຊາດ​ພວມ​ອອກ­ແຮງ​ແຂ່ງ­ຂັນ​ກັນ​ສ້າງ​ຜົນ­ງານ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ຕົນ ເປັນ​ການ​ປະ­ກອບ­ສ່ວນ​ກະ­ຕຸກ​ຊຸກ­ຍູ້​ຄວາມ​ສາ­ມັກ­ຄີ​ຮັກ­ແພງ ໄດ້​ຮັບ​ການ​ເສີມ​ຂະ­ຫຍາຍ​ຍິ່ງ​ຂຶ້ນ ພ້ອມ​ນີ້ ສະ­ຫາຍ​ເລ­ຂາ­ທິ­ການ​ໃຫຍ່​ຍັງ​ໄດ້​ຊຸກ­ຍູ້​ໃຫ້​ສອງ​ຝ່າຍ​ສືບ­ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ໃຫ້​ແໜ້ນ​ແຟ້ນ ແລະ ຊ່ວຍ­ເຫຼືອ​ເຊິ່ງ​ກັນ ແລະ ກັນ ອວຍ­ພອນ​ໃຫ້​ຄະ­ນະ​ຜູ້​ແທນ​ຈົ່ງ​ປະ­ສົບ​ຜົນ ສຳ­ເລັດ​ໃນ​ການ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ ອວຍ­ພອນ​ໃຫ້​ສາຍ​ພົວ­ພັນ​ຮ່ວມ​ມື​ມິດ­ຕະ­ພາບ ແລະ ຄວາມ​ສາ­ມັກ­ຄີ​ພິ­ເສດ ລະ­ຫວ່າງ ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ​ຈົ່ງ​ຍືນ​ຍົງ​ທະ​ນົງ​ແກ່ນ​ຕະ­ຫຼອດ​ກາ­ລະ​ນານ. 

    ສະ­ຫາຍ ຫງວ​ຽນ ວັນ ເນນ ໄດ້​ສະ­ແດງ​ຄວາມ​ຂອບ­ໃຈ​ມາ​ຍັງ​ສະ­ຫາຍ​ເລ­ຂາ­ທິ­ການ​ໃຫຍ່​ທີ່​ໃຫ້­ການ​ຕ້ອນ ຮັບ​ຢ່າງ​ອົບ​ອຸ່ນ ເຮັດ​ໃຫ້­ການ​ຢ້ຽມ­ຢາມ​ຄັ້ງ​ນີ້​ເຕັມ​ໄປ​ດ້ວຍ​ໄມ­ຕີ​ຈິດ​ມິດ­ຕະ­ພາບ​ອັນ​ດູດ­ດື່ມ ແລະ ມີ​ຄວາມ​ໝາຍ​ສຳ­ຄັນ​ຍິ່ງ ພ້ອມ​ນີ້ ຍັງ​ໄດ້​ລາຍ​ງານ​ໂດຍ​ຫຍໍ້​ກ່ຽວ​ກັບ​ການ​ພົບ​ປະ​ແລກ­ປ່ຽນ ແລະ ຕີ​ລາ­ຄາ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ​ຮ່ວມ​ມື​ປີ 2017-2019 ແລະ ທິດ​ທາງ​ແຜນ­ການ​ຮ່ວມ​ມື ປີ 2019-2020 ລະ­ຫວ່າງ​ສອງ​ຫ້ອງ­ການ​ສູນ​ກາງ​ພັກ ເຊິ່ງ​ທັງ​ສອງ​ຝ່າຍ​ຕົກ­ລົງ​ກັນ​ເປັນ​ເອ­ກະ​ພາບ​ສືບ­ຕໍ່​ເພີ່ມ​ທະ­ວີ​ການ­ເຄື່ອນ­ໄຫວ​ພົບ​ປະ​ຢ້ຽມ­ຢາມ​ລະ ຫວ່າງ​ການ​ນຳ​ຂັ້ນ​ສູງ​ຂອງ​ສອງ​ຫ້ອງ​ວ່າ­ການ​ສູນ​ກາງ​ພັກ​ເປັນ​ປົກ­ກະ­ຕິ ສືບ­ຕໍ່​ຊຸກ­ຍູ້​ຢ່າງ​ແຂງ­ແຮງ​ການ­ຈັດ­ຕັ້ງ​ປະ ຕິ​ບັດ​ຕົວ​ຈິງ ໂດຍ​ສະ­ເພາະ ການ​ເປັນ​ເສ­ນາ​ທິ​ການ​ໃຫ້​ສອງ​ຫ້ອງ​ວ່າ­ການ​ສູນ​ກາງ​ພັກ ບັນ­ດາ​ໜ້າ​ວຽກ​ທີ່​ໄດ້​ເປັນ​ເອ­ກະ​ພາບ​ກັນ ພ້ອມ​ທັງ​ສ້າງ​ເງື່ອນ­ໄຂ​ໃຫ້​ແກ່​ການ​ແລກ­ປ່ຽນ​ບົດ­ຮຽນ ແລະ ເຝິກ­ອົບ­ຮົມ​ດ້ານ​ວິ­ຊາ​ການ​ດ້ານ​ຕ່າງໆ​ໃຫ້​ເຂົ້າ​ສູ່​ລວງ​ເລິກ ແລະ ຫຼາຍ​ຂຶ້ນ ໂດຍ​ລົງ​ເລິກ​ລະ­ອຽດ​ຕາມ​ຫົວ­ຂໍ້​ວິ­ຊາ​ສະ­ເພາະ.

    ໃນ​ວັນ​ດຽວ​ກັນ​ນີ້ ສະ­ຫາຍ ຫງວ​ຽນ ວັນ ເນນ ພ້ອມ​ຄະ­ນະ​ຍັງ​ໄດ້​ຮ່ວມ​ພົບ​ປະ​ກັບ​ສະ­ຫາຍ ຄຳ​ພັນ ພົມ​ມະ​ທັດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຫ້ອງ​ວ່າ­ການ​ສູນ​ກາງ​ພັກ ພ້ອມ​ຄະ­ນະ​ທີ່​ຫ້ອງ​ວ່າ­ການ​ສູນ​ກາງ​ພັກ (ຫຼັກ 6) ເພື່ອ​ທົບ​ທວນ­ຄືນ​ຜົນ­ສຳ­ເລັດ​ການ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ຝ່າຍ​ໃນ​ໄລ­ຍະ​ຜ່ານ​ມາ ແລະ ປຶກ­ສາ​ຫາ­ລື​ແຜນ­ການ ການ​ຮ່ວມ​ມື​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ