ຂ່າວຫຼ້າສຸດ

ທລຍ ປະເມີນຜົນການຕິດຕາມກວດກາໂຄງການ

735 19 ສ.ຫ. 2019 ຂ່າວໜ້າ​ໜຶ່ງ

    ໃນ​ວັນ​ທີ 13-16 ສິງ­ຫາ 2019 ກອງ​ທຶນ​ຫຼຸດ­ຜ່ອນ​ຄວາມ­ທຸກ​ຍາກ (ທລຍ) ຈັດ​ກອງ​ປະ­ຊຸມ​ວຽກ​ງານ​ຕິດ­ຕາມ​ແລະ ປະ​ເມີນ​ຜົນ​ຂຶ້ນ​ທີ່​ຫ້ອງ­ການ ທລຍ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ຈິດ ທະ­ວີ​ໃສ ຜູ້­ອຳ­ນວຍ­ການ​ບໍ­ລິ­ຫານ ທລຍ ມີ 4 ຂະ­ແໜງ­ການ​ຈາກ​ກະ­ຊວງ​ທີ່​ກ່ຽວ­ຂ້ອງ ໜ່ວຍ​ງານ​ຂອງ ທລຍ ແລະ ພະ­ນັກ­ງານ​ຕິດ­ຕາມ​ປະ​ເມີນ​ຜົນ​ຈາກ 10 ເປົ້າ​ໝາຍ​ຂອງ ທລຍ ເຂົ້າ​ຮ່ວມ.

    ຕະ­ຫຼອດ​ໄລ­ຍະ 3 ປີ (2017-2019) ຂະ­ແໜງ​ຕິດ­ຕາມ​ປະ​ເມີນ​ຜົນ​ສາ­ມາດ​ປະ​ເມີນ​ຜົນ­ສຳ­ເລັດ​ຂອງ 21 ຕົວ​ຊີ້​ບອກ​ຕົວ­ຢ່າງ​ຄື: ຕົວ​ຊີ້​ບອກ​ຕາງ­ໜ້າ​ຄົວ​ເຮືອນ​ໃນ​ບ້ານ​ເຂົ້າ​ຮ່ວມ​ຄັດ​ເລືອກ​ໂຄງ­ການ​ຍ່ອຍ​ຄາດ­ໝາຍ 75% ປະ­ຕິ ບັດ​ໄດ້ 87,8% ການ​ເຊື່ອມ​ສານ​ແຜນ​ກຸ່ມ​ບ້ານ​ຂອງ ທລຍ ເຂົ້າ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ ຄາດ­ໝາຍ 75% ປະ­ຕິ­ບັດ​ໄດ້ 80,6% ໂຄງ­ການ​ຍ່ອຍ​ທີ່​ມີ​ຄຸນ​ນະ​ພາບ​ດ້ານ​ວິ­ຊາ​ການ​ສູງ ຄາດ­ໝາຍ 85% ປະ­ຕິ­ບັດ​ໄດ້ 92% ຜູ້​ໄດ້​ຮັບ​ຜົນ​ປະ­ໂຫຍດ​ມີ​ຄວາມ​ເພິ່ງ​ພໍ­ໃຈ​ກັບ​ຂະ​ບວນ​ການ​ວາງ​ແຜນ​ແບບ​ມີ​ສ່ວນ​ຮ່ວມ​ທີ່​ສະ­ໜັບ­ສະ­ໜູນ​ໂດຍ ທລຍ ຄາດ­ໝາຍ 80% ປະ­ຕິ­ບັດ​ໄດ້ 95% ແມ່­ຍິງ​ມີ​ສ່ວນ​ຮ່ວມ​ໃນ​ການ​ຄັດ​ເລືອກ​ໂຄງ­ການ​ຍ່ອຍ​ທັງ​ໝົດ 1.169 ໂຄງ­ການ ຄາດ­ໝາຍ 90% ປະ­ຕິ­ບັດ​ໄດ້ 93% ຊົນ­ເຜົ່າ​ເຂົ້າ​ຮ່ວມ​ການ​ຄັດ​ເລືອກ​ໂຄງ­ການ​ຍ່ອຍ ຄາດ­ໝາຍ 70% ປະ­ຕິ­ບັດ​ໄດ້ 84% ໂຄງ­ການ​ຍ່ອຍ​ທີ່​ຍັງ​ນຳ​ໃຊ້​ເປັນ​ປົກ­ກະ­ຕິ ປີ 2012-2018 ມີ 2.482 ໂຄງ­ການ​ໃນ​ຈຳ­ນວນ​ທັງ​ໝົດ 2.613 ໂຄງ­ການ​ຍ່ອຍ ຄາດ­ໝາຍ 80% ປະ­ຕິ­ບັດ​ໄດ້ 94,98% ສ່ວນ​ຕົວ​ຊີ້​ວັດ​ຂໍ້​ຂ້ອງ​ໃຈ ແລະ ຂໍ້​ຂັດ​ແຍ່ງ​ທີ່​ໄດ້​ບັນ­ທຶກ ແລະ ໄດ້​ຮັບ​ການ​ແກ້​ໄຂ​ຕາມ​ຂັ້ນ​ຕອນ​ຄາດ­ໝາຍ 90% ປະ­ຕິ­ບັດ​ໄດ້ 100%.

    ທ່ານ ຈິດ ທະ­ວີ​ໃສ ກ່າວ​ວ່າ: ວຽກ​ງານ​ຕິດ­ຕາມ​ປະ​ເມີນ​ຜົນ​ເປັນ​ວຽກ​ງານ​ໃຈ­ກາງ​ໃນ​ການ​ຕີ​ລາ­ຄາ​ຜົນ​ໄດ້​ຮັບ​ທາງ​ດ້ານ​ປະ­ລິ­ມານ ແລະ ຄຸນ​ນະ​ພາບ​ຂອງ ທລຍ ທັງ​ເປັນ​ເຄື່ອງ­ມື​ທີ່​ສຳ­ຄັນ​ໃນ​ການ​ຕິດ­ຕາມ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ ທລຍ ທີ່​ໄດ້​ດຳ­ເນີນ​ການ​ໄປ​ຕາມ​ຄູ່​ມື​ຈັດ​ຕັ້ງ​ປະ­ຕິ­ບັດ​ຂອງ​ໂຄງ­ການ ໂຄງ­ການ​ຍ່ອຍ​ຕ່າງໆ​ກໍ່­ສ້າງ​ໄດ້​ມາດ­ຕະ­ຖານ​ຕາມ​ແບບ ມີ​ຄວາມ​ໂປ່ງ​ໃສ ເວົ້າ​ລວມ​ແລ້ວ ເປັນ​ຜູ້​ຕິດ­ຕາມ​ກວດ­ກາ-ປະ​ເມີນ​ຜົນ​ຂອງ​ແຕ່​ລະ​ໜ້າ​ວຽກ​ທີ່​ນອນ​ໃນ​ຮອບ​ວຽນ​ຈັດ​ຕັ້ງ​ປະ­ຕິ­ບັດ​ຂອງ​ໂຄງ­ການ​ຍ່ອຍ ແລະ ໃຫ້​ຄຳ​ຄິດ​ຄຳ​ເຫັນ​ຄວນ​ມີ​ການ​ປັບ­ປຸງ​ໃນ­ຕໍ່­ໜ້າ​ເພື່ອ​ໃຫ້ ທລຍ ດຳ­ເນີນ​ວຽກ​ໄປ​ຢ່າງ​ມີ​ແບບ­ແຜນ​ທີ່​ດີ.

ຂ່າວທີ່ກ່ຽວຂ້ອງ