ຂ່າວຫຼ້າສຸດ

ຮ່ວມມືກັນສ້າງບ່ອນບໍລິການປຶ້ມອອນລາຍ

478 19 ສ.ຫ. 2019 ຂ່າວໜ້າ​ໜຶ່ງ
ຮ່ວມມືກັນສ້າງບ່ອນບໍລິການປຶ້ມອອນລາຍ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ຮ່ວມ​ມື ສ້າງ​ບ່ອນ​ບໍ­ລິ­ການ​ປຶ້ມ​ອອນ​ລາຍ E-book store ລະ­ຫວ່າງ​ສະ​ຖາ​ບັນ​ເຕັກ​ໂນ​ໂລ​ຊິ ຄອມ​ພິວ​ເຕີ ແລະ ເອ​ເລັກ​ໂຕຣ​ນິກ ແລະ ບໍ­ລິ­ສັດ​ເອ​ເລ​ເມັນ ເພ​ເມັນ ໂຊ​ລູ​ຊັນ ລາວ​ຈຳ­ກັດ ຈັດ​ຂຶ້ນ​ໃນ​ວັນ​ທີ 14 ສິງ­ຫາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ຮ່ວມ​ລົງ​ນາມ​ຂອງ​ທ່ານ ວິ­ລະ​ສັກ ອິນ​ທະ​ປະ​ຖາ ຫົວ­ໜ້າ​ສະ​ຖາ​ບັນ​ເຕັກ​ໂນ​ໂລ​ຊິ ຄອມ​ພິວ​ເຕີ ແລະ ເອ​ເລັກ​ໂຕຣ​ນິກ ແລະ ທ່ານ Alexey Vegman ປະ­ທານ​ບໍ­ລິ­ສັດ​ເອ​ເລ​ເມັນ ເພ​ເມັນ ໂຊ​ລູ​ຊັນ ລາວ​ຈຳ­ກັດ ມີ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ພ້ອມ​ດ້ວຍ​ຄະ­ນະ​ນຳ​ກະ­ຊວງ ແລະ ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ວິ­ລະ​ສັກ ອິນ​ທະ​ປະ​ຖາ ກ່າວ​ວ່າ: ໃນ​ໄລ­ຍະ​ຜ່ານ​ມາ ສະ​ຖາ​ບັນ​ພວກ​ເຮົາ ໄດ້​ມີ​ຜົນ­ສຳ­ເລັດ​ໃນ​ການ​ຄົ້ນ­ຄວ້າ​ໂປ​ແກຼມ e-book ແລະ ກໍ​ໄດ້​ປະ­ຍຸກ​ໃຊ້​ໄດ້​ຮັບ​ຜົນ​ເປັນ​ຢ່າງ​ດີ ເພື່ອ​ເປັນ​ການ​ຕໍ່​ຍອດ​ໂຄງ­ການ ແລະ ເປັນ​ການ​ຍາດ​ແຍ່ງ​ການ​ລົງ­ທຶນ​ກັບ​ພາກ​ເອ­ກະ​ຊົນ ສະ​ຖາ​ບັນ​ໄດ້​ຮ່ວມ​ກັບ ບໍ­ລິ­ສັດ​ເອ​ເລ​ເມັນ ເພ​ເມັນ ໂຊ​ລູ​ຊັນ ລາວ​ຈຳ­ກັດ ໃນ​ການ​ຄົ້ນ­ຄວ້າ ຮ່ວມ​ມື​ດ້ານ​ການ​ສ້າງ​ຖານ​ຂໍ້​ມູນ​ໜັງ­ສື​ແບບ​ເອ​ເລັກ​ໂຕຣ​ນິກ ຫລື e-book ທີ່​ມີ​ຢູ່​ແລ້ວ ໃຫ້​ໃຫຍ່ ແລະ ຫຼາຍ​ຂຶ້ນ.

    ບໍ­ລິ­ສັດ​ເອ​ເລ​ເມັນ ເພ​ເມັນ ໂຊ​ລູ​ຊັນ ລາວ​ຈຳ­ກັດ ເປັນ​ບໍ­ລິ­ສັດ​ທີ່​ມີ​ຄວາມ​ຊຳ­ນານ​ງານ​ໃນ​ການ​ດຳ­ເນີນ​ທຸ­ລະ​ກິດ ດ້ານ​ການ​ບໍ­ລິ­ການ​ດ້ານ​ເຕັກ​ໂນ​ໂລ​ຊີ ຂໍ້​ມູນ​ຂ່າວ­ສານ ເອ​ເລັກ​ໂຕຣ​ນິກ ແລະ ລະ­ບົບ​ອັດ­ຕະ­ໂນ­ມັດ ທີ່​ມີ​ປະ­ສົບ​ການ ແລະ ຄວາມ​ຊຳ­ນານ​ຢູ່​ຕ່າງ­ປະ­ເທດ​ມາ​ກ່ອນ ເປັນ­ຕົ້ນ ແມ່ນ​ປະ­ເທດ ຣັດ​ເຊຍ  ໄທ ນອກ​ນີ້ ຍັງ​ມີ​ຊ່ຽວ­ຊານ​ວິ­ຊາ​ການ​ດ້ານ​ໄອ​ຊີ​ທີ ເພື່ອ​ສ້າງ​ຜະ­ລິດ​ຕະ​ພັນ ແລະ ພັດ­ທະ­ນາ​ການ​ຂຽນ​ຊອບ​ແວ​ຕ່າງໆ ບໍ່​ວ່າ​ຈະ​ເປັນ ແອັບ​ພີ​ເຄ​ຊັນ​ເທິງ​ມື​ຖື ຫຼື ຊອບ​ແວ​ຄອມ​ພິວ​ເຕີ ແລະ ເຄື່ອງ​ອຸ­ປະ­ກອນ ເອ​ເລັກ​ໂຕຣ​ນິກ ນອກ­ຈາກ​ນັ້ນ ບໍ­ລິ­ສັດ​ຍັງ​ມີ​ຈຸດ­ປະ­ສົງ​ເພື່ອ​ສົ່ງ­ເສີມ​ການ​ລົງ­ທຶນ​ໃຫ້​ກັບ​ທຸ­ລະ​ກິດ​ລະ­ດັບ startup ແລະ SME  ທີ່​ມີ​ໂຄງ­ການ​ທຸ­ລະ​ກິດ​ທີ່​ໜ້າ​ສົນ­ໃຈ​ໃນ​ການ​ຄ້າ ລະ­ຫວ່າງ ປະ­ເທດ​ໄທ ແລະ ປະ­ເທດ​ລາວ ໂດຍ​ມີ​ຈຸດ­ປະ­ສົງ​ໃນ​ການ​ສະ­ໜັບ­ສະ­ໜູນ​ທາງ​ດ້ານ​ການ​ລົງ­ທຶນ​ໃນ​ດ້ານ​ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ ເພື່ອ​ເປັນ​ການ​ສົ່ງ­ເສີມ​ການ​ພັດ­ທະ­ນາ ເສດ­ຖະ­ກິດ-ສັງ­ຄົມ.

    ການ​ຮ່ວມ​ມື​ໃນ​ຄັ້ງ​ນີ້ ແມ່ນ​ເພື່ອ​ຮ່ວມ​ກັນ​ສ້າງ​ລະ­ບົບ E-Book ໃຫ້​ກາຍ­ເປັນ E-Book Store ຫຼື ຮ້ານ​ຂາຍ​ປຶ້ມ​ອອນ​ລາຍ ແລະ ແບບ​ລະ­ບົບ​ເອ​ເລັກ​ໂຕຣ​ນິກ​ໄດ້ ໂດຍ​ການ​ນຳ​ໃຊ້​ເຕັກ​ໂນ​ໂລ​ຊີ ແບບ​ໃໝ່ ທີ່​ນຳ​ໃຊ້​ຜ່ານ​ແອບ​ພິ​ເຄ​ຊັນ​ເທິງ​ໂທລະ­ສັບ​ມື​ຖື (Mobile Application) ລະ­ບົບ​ເວັບ​ໄຊ ແລະ ລະ­ບົບ​ເຄື່ອງ​ເອ​ເລັກ​ໂຕຣ​ນິກ ເຊິ່ງ​ກິດ­ຈະ­ກຳ​ທີ່​ຈະ​ມີ​ການ​ຮ່ວມ​ມື​ກັນ ຄື: ຮ່ວມ​ມື​ກັບ​ສູນ​ບໍ­ລິ­ການ ວິ­ຊາ​ການ ສະ​ຖາ​ບັນ ເຕັກ​ໂນ​ໂລ​ຊີ ຄອມ​ພິວ​ເຕີ ແລະ ເອ​ເລັກ​ໂຕຣ​ນິກ ເພື່ອ​ພັດ­ທະ­ນາ​ໂຄງ­ການ E-Book ໃຫ້​ກາຍ­ເປັນ​ຫ້ອງ​ສະ­ໝຸດ ແບບ​ເອ​ເລັກ​ໂຕຣ​ນິກ ຮ່ວມ​ກັນ​ສ້າງ​ບົດ​ຄວາມ E-Book ແລະ ສ້າງ​ບ່ອນ​ໃຫ້​ບໍ­ລິ­ການ ເຊົ່າ ແລະ ຂາຍ​ປຶ້ມ​ແບບ​ເອ​ເລັກ​ໂຕຣ​ນິກ (E-Book Store) ໃຫ້​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ຮ່ວມ​ມື​ກັນ​ສ້າງ ແລະ ພັດ­ທະ­ນາ​ລະ­ບົບ (Platform) ໃນ​ການ​ໃຫ້​ບໍ­ລິ­ການ​ດ້ານ E-Book ເທິງ​ມື​ຖື Smart phone tablet ແລະ ຄອມ​ພິວ​ເຕີ ສອງ​ຝ່າຍ​ເຫັນ​ດີ​ຮ່ວມ​ມື​ກັນ​ທາງ​ດ້ານ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແບບ​ໄລ­ຍະ​ສັ້ນ ໂດຍ​ຮູບ​ການ ຈັດ​ເຝິກ­ອົບ­ຮົມ ສຳ​ມະ​ນາ ໃນ​ແຕ່​ລະ​ກິດ­ຈະ­ກຳ​ທີ່​ຮ່ວມ​ມື​ນຳ​ກັນ.

ຂ່າວທີ່ກ່ຽວຂ້ອງ