ຂ່າວຫຼ້າສຸດ

ມວສ-ອົງການ HF ຮ່ວມມືຍົກລະດັບດ້ານວິຊາການແພດ

484 19 ສ.ຫ. 2019 ຂ່າວໜ້າ​ໜຶ່ງ
ມວສ-ອົງການ HF ຮ່ວມມືຍົກລະດັບດ້ານວິຊາການແພດ

    ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ ສຸ­ຂະ­ພາບ (ມວ​ສ) ແລະ ອົງ­ການ Health Fontiers (HF) ໄດ້​ຮ່ວມ​ມື​ກັນ​ທາງ​ດ້ານ​ວິ­ຊາ​ການ​ແພດ​ມາ​ແຕ່​ປີ 1991 ເປັນ­ຕົ້ນ​ມາ ເຊິ່ງ​ເປັນ​ໄລ­ຍະ​ທຳ​ອິດ​ແຕ່​ປີ (1991-2002) ເຊິ່ງ​ແຕ່​ລະ​ປີ​ຈະ​ມີ​ການ​ເຊັນ​ບົດ​ທຶກ​ຮ່ວມ​ມື​ກັນ ເປັນ​ແຕ່​ໄລ­ຍະ ຈາກ 1 ປີ ເປັນ 3 ປີ ຈົນ​ເຖິງ 2008 ຈາກ​ນັ້ນ​ມາ​ການ​ເຊັນ​ບົດ​ບັນ​ທຶນ​ຮ່ວມ​ມື​ໄດ້​ເພີ່ມ​ໄລ­ຍະ​ເວ­ລາ​ຈາກ 3 ປີ ເປັນ 5 ປີ (2008-2013 ແລະ 2013-2018).

    ທ່ານ​ນາງ ໂມ­ລີ​ນາ ຈູມ​ມະ­ນີ​ວົງ ຮອງ​ຫົວ­ໜ້າ​ຫ້ອງ­ການ​ບໍ­ລິ­ຫານ ມວ​ສ ແຈ້ງ​ໃຫ້​ຊາບ​ວ່າ: ການ​ຮ່ວມ​ມື​ໄລ­ຍະ​ຜ່ານ​ມາ ມີ​ຈຸດ­ປະ­ສົງ​ເພື່ອ​ຍົກ​ລະ­ດັບ​ຄວາມ​ຮູ້ ຄວາມ​ສາ­ມາດ ແລະ ທັກ​ສະ​ໃນ​ຂົງ­ເຂດ​ການ​ແພດ​ເດັກ ໂດຍ​ຈັດ­ການ​ອົບ­ຮົມ​ໄລ­ຍະ​ສັ້ນ ໃຫ້​ແກ່​ທ່ານ­ໝໍ ແລະ ຄູ-ອາ­ຈານ​ສອນ ນັບ​ແຕ່​ປີ 1997 ມວ​ສ ແລະ ອົງ­ການ HF ໄດ້​ພັດ­ທະ­ນາ​ຫຼັກ­ສູດ​ການ​ຮຽນ-ການ​ສອນ ລະ­ດັບ​ແພດ​ຊ່ຽວ­ຊານ​ຂັ້ນ 1 ຂຶ້ນ ໂດຍ​ເລັ່ງ​ໃສ່​ການ​ຍົກ​ລະ­ດັບ​ແພດ​ປະ​ລິນ ຍາ​ຕີ​ທົ່ວ​ປະ­ເທດ ໃຫ້­ການ​ເປັນ​ແພດ​ຊ່ຽວ­ຊານ​ຂັ້ນ 1 ສາ­ຂາ ກຸມ­ມານ​ເວດ​ສາດ (ແພດ​ປິ່ນ­ປົວ​ພະ­ຍາດ​ເດັກ) ໃນ​ປີ 2002 ໄດ້​ພັດ­ທະ­ນາ​ຫຼັກ­ສູດ​ການ​ຮຽນ-ການ​ສອນ ລະ­ດັບ​ແພດ​ຊ່ຽວ­ຊານ ຂັ້ນ 1 ສາ­ຂາ​ອາ­ຍຸ​ລະ​ສາດ (ແພດ​ປິ່ນ­ປົວ​ພະ­ຍາດ​ພາຍ​ໃນ) ໃນ​ປີ 2007 ໄດ້​ກໍ່­ສ້າງ​ແພດ​ຊ່ຽວ­ຊານ​ອາ­ຍຸ​ລະ​ສາດ ຂັ້ນ 2 ແລະ 2012 ແພດ​ຊ່ຽວ­ຊານ​ກຸມ­ມານ​ເວດ​ສາດ ຂັ້ນ 2 ເຊິ່ງ​ແມ່ນ​ການ​ຍົກ​ລະ­ດັບ​ແພດ​ຊ່ຽວ­ຊານ ຂັ້ນ 1 ໃຫ້­ການ​ເປັນ​ແພດ​ຊ່ຽວ­ຊານ ຂັ້ນ 2 ໃນ​ປີ 2017 ມວ​ສ ແລະ ອົງ­ການ​ດັ່ງ­ກ່າວ​ໄດ້​ສ້າງ​ແພດ​ຊ່ຽວ­ຊານ ຂັ້ນ 1 ສາ­ຂາ​ການ​ແພດ​ສຸກ​ເສີນ ເຊິ່ງ​ປັດ​ຈຸ ບັນ​ກຳ­ລັງ​ຮຽນ​ຢູ່.

    ມາ​ຮອດ​ປັດ­ຈຸ­ບັນ ມວ​ສ ແລະ ອົງ­ການ HF ສາ­ມາດ​ສ້າງ​ພະ­ນັກ­ງານ​ແພດ​ຊ່ຽວ­ຊານ​ກຸມ­ມານ​ເວດ​ສາດ ຂັ້ນ 1 ໄດ້ 120 ຄົນ ແລະ ແພດ​ຊ່ຽວ­ຊານ ຂັ້ນ 2 ໄດ້ 9 ຄົນ ແພດ​ຊ່ຽວ­ຊານ​ອາ­ຍຸ​ລະ​ສາດ ຂັ້ນ 1 ໄດ້ 103 ຄົນ ແລະ ແພດ​ຊ່ຽວ­ຊານ ຂັ້ນ 2 ໄດ້ 16 ຄົນ ບັນ­ດາ​ແພດ​ຈຳ­ນວນ​ດັ່ງ­ກ່າວ​ໄດ້​ບັນ­ຈຸ​ສັບ​ຊ້ອນ​ໄປ​ໃນ​ຂອບ​ເຂດ​ທົ່ວ​ປະ­ເທດ ແລະ ປະ­ຕິ­ບັດ​ໜ້າ­ທີ່​ຕາມ​ວິ­ຊາ​ສະ­ເພາະ​ທີ່​ຕົນ​ຮຽນ​ມາ.

    ເພື່ອ​ສືບ­ຕໍ່​ຜົນ­ງານ​ດັ່ງ­ກ່າວ ມວ​ສ ກັບ ອົງ­ການ HF ໄດ້​ຮ່ວມ​ມື​ກັນ​ຕໍ່​ອີກ​ໄລ­ຍະ 5 ປີ 2019-2024 ເພື່ອ​ເລັ່ງ​ໃສ່​ການ​ຍົກ​ສູງ​ຄວາມ​ຮູ້​ຄວາມ​ສາ­ມາດ ແລະ ທັກ​ສະ​ຂອງ​ແພດ​ປະ­ລິນ­ຍາ​ຕີ​ທົ່ວ​ປະ­ເທດ​ໃຫ້­ການ​ເປັນ​ແພດ​ຊ່ຽວ ຊານ ຂັ້ນ 1 ແລະ ແພດ​ຊ່ຽວ­ຊານ ຂັ້ນ 2 ສາ­ຂາ ກຸມ­ມານ​ແວດ​ສາດ ອາ­ຍຸ​ລະ​ສາດ ແລະ ການ​ແພດ​ສຸກ​ເສີນ ເພື່ອ​ຮັບ​ໃຊ້​ປິ່ນ­ປົວ​ຕາມ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ສັງ­ຄົມ.

    ພິ­ທີ​ລົງ​ນາມ​ຈັດ​ຂຶ້ນ​ວັນ​ທີ 15 ສິງ­ຫາ 2019 ທີ່ ມວ​ສ ລະ­ຫວ່າງ ທ່ານ ພູ­ທອນ ວັງ​ກອນ​ວິ­ໄລ ອະ­ທິ­ການ​ບໍ­ດີ ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ ສຸ­ຂະ­ພາບ ແລະ ທ່ານ​ນາງ ຄຼິດ​ສ​ຕີນ ຕໍ​ຈິ​ເຊນ (Kristine TORJESEN) ປະ­ທານ​ອົງ­ການ HF ພ້ອມ​ດ້ວຍ​ບັນ­ດາ​ທ່ານ ຄະ­ນະ­ບໍ­ດີ ແລະ ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ