ຂ່າວຫຼ້າສຸດ

ໂຄງການນຳຄວາມຍຸຕິທຳມາສູ່ແມ່ຍິງ ມີຫຼາຍກິດຈະກຳໄດ້ຮັບຜົນສຳເລັດ

437 19 ສ.ຫ. 2019 ຂ່າວໜ້າ​ໜຶ່ງ
ໂຄງການນຳຄວາມຍຸຕິທຳມາສູ່ແມ່ຍິງ ມີຫຼາຍກິດຈະກຳໄດ້ຮັບຜົນສຳເລັດ

    ກອງ​ປະ­ຊຸມ​ປະ​ເມີນ​ຜົນ ແລະ ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ “ນຳ​ຄວາມ​ຍຸ­ຕິ​ທຳ​ມາ­ສູ່​ແມ່­ຍິງ ທີ່​ຖືກ​ເຄາະ​ຮ້າຍ​ຈາກ​ການ​ໃຊ້​ຄວາມ​ຮຸນ​ແຮງ​ບົນ​ພື້ນ­ຖານ​ທາງ​ເພດ” ໄລ­ຍະ​ປີ 2017-2019 ຈັດ​ຂຶ້ນ​ວັນ​ທີ 16 ສິງ­ຫາ 2019 ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ (ນວ) ເປັນ​ປະ­ທານ​ຂອງ​ທ່ານ ນາງ ຄຳ​ໄພ ລັດ­ສະ­ໝີ ປະ­ທານ​ສະ­ຫະ­ພັນ​ແມ່­ຍິງ ນວ ຮອງ​ປະ­ທານ​ຄະ­ນະ​ກຳ­ມາ​ທິ​ການ​ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ ແລະ ແມ່-ເດັກ (ຄກມດ ນວ) ມີ​ທ່ານ ບຸນ​ວັນ ຈະ​ສົ໋ວ​ເກົ້າ ຮອງ​ເຈົ້າ­ເມືອງ​ໄຊ​ທາ­ນີ ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ວຽງ​ຄອນ ວໍ­ລະ​ວົງ ຫົວ­ໜ້າ​ໂຄງ­ການ​ດັ່ງ­ກ່າວ ໄດ້​ກ່າວ​ວ່າ: ໂຄງ­ການ​ດັ່ງ­ກ່າວ​ເປັນ​ໂຄງ­ການ​ຮ່ວມ​ມື​ລະ­ຫວ່າງ​ສະ­ມາ­ຄົມ​ເພື່ອ​ພັດ­ທະ­ນາ​ແມ່­ຍິງ ແລະ ການ​ສຶກ​ສາ​ກົດ­ໝາຍ ແລະ ອົງ­ການ BABSEACLE ຈັດ​ຕັ້ງ​ປະ­ຕິ­ບັດ​ກິດ­ຈະ­ກຳ​ຢູ່ 15 ບ້ານ​ເປົ້າ​ໝາຍ​ຂອງ​ເມືອງ​ໄຊ​ທາ­ນີ ພາຍ​ໃຕ້​ການ​ຊີ້​ນຳ​ໂດຍ​ກົງ​ຂອງ ຄກມດ ນວ ແລະ ໄດ້​ຮັບ​ການ​ສະ­ໜັບ­ສະ­ໜູນ​ທາງ​ດ້ານ​ງົບ­ປະ­ມານ​ຈາກ​ອົງ­ການ​ເຮວ​ວິດ​ຕັດ ເພື່ອ​ການ​ຮ່ວມ​ມື​ສາ­ກົນ​ປະ­ຈຳ​ລາວ ມູນ​ຄ່າ 228.700 ເອີ​ໂຣ ຫຼື ປະ­ມານ 2,2 ຕື້​ກີບ (ໄລ­ຍະ​ປີ 2016-2019) ຜ່ານ​ການ­ຈັດ­ຕັ້ງ​ປະ­ຕິ­ບັດ​ກິດ­ຈະ­ກຳ​ຫຼັກ​ຂອງ​ໂຄງ­ການ​ໄລ­ຍະ​ຜ່ານ​ມາ​ມີ​ຫຼາຍ​ໜ້າ​ວຽກ​ສຳ­ເລັດ ເປັນ­ຕົ້ນ ການ​ຈັດ​ເຝີກ​ອົບ​ຮົບ​ໃຫ້​ອາ­ສາ​ສະ­ໝັກ​ທາງ​ດ້ານ​ກົດ­ໝາຍ​ຂັ້ນ​ບ້ານ ການ​ຍົກ​ລະ­ດັບ​ສະ­ຕິ​ຄວາມ​ຕື່ນ​ຕົວ​ຂອງ​ປະ­ຊາ­ຊົນ​ຢູ່ 15 ບ້ານ​ເປົ້າ​ໝາຍ ໂດຍ​ຜ່ານ​ການ​ເຝິກ­ອົບ­ຮົມ​ແບບ​ມີ​ສ່ວນ​ຮ່ວມ ແລະ ການ​ອົບ­ຮົມ​ດ້ານ​ບົດ­ບາດ​ຍິງ-ຊາຍ ສົນ­ທິ­ສັນ­ຍາ​ຊີ​ດໍ ແລະ ຄວາມ​ຮຸນ​ແຮງ​ບົນ​ພື້ນ­ຖານ​ທາງ​ເພດ​ໃຫ້​ອຳ­ນາດ​ການ​ປົກ­ຄອງ 15 ບ້ານ ການ​ເສີມ​ຂະ­ຫຍາຍ​ຄວາມ​ສາ­ມາດ​ຂອງ​ພະ­ນັກ­ງານ​ປະ­ຈຳ​ສູນ​ໃນ​ການ​ຊ່ວຍ­ເຫຼືອ​ລ້າ​ທາງ​ດ້ານ​ກົດ­ໝາຍ ສຳ­ເລັດ​ການ​ນຳ​ໃຊ້​ລະ­ບົບ​ລາຍ​ງານ​ກ່ຽວ​ກັບ​ກໍ­ລະ­ນີ ຊ່ວຍ­ເຫຼືອ​ແມ່­ຍິງ​ໃຫ້​ນຳ​ເອົາ​ຄະ­ດີ​ສະ­ເໜີ​ຕໍ່​ສານ ລວມ​ທັງ​ການ​ສ້າງ​ລະ­ບົບ ແລະ ຂັ້ນ​ຕອນ​ໃນ​ການ​ດຳ­ເນີນ​ຄະ­ດີ ແລະ ປຶ້ມ​ຄູ່​ມື​ແນະ­ນຳ​ກ່ຽວ​ກັບ​ການ​ສະ­ກັດ​ກັ້ນ ແລະ ຕ້ານ​ການ​ໃຊ້​ຄວາມ​ຮຸນ​ແຮງ ພ້ອມ​ນັ້ນ​ໄດ້​ສ້າງ​ອາ­ສາ​ສະ­ໝັກ​ທາງ​ດ້ານ​ກົດ­ໝາຍ​ຂັ້ນ​ບ້ານ​ທັງ​ໝົດ 94 ຄົນ ຍິງ 47 ຄົນ ປັດ­ຈຸ­ບັນ​ມີ​ອາ­ສາ​ສະ­ໝັກ​ທີ່​ສືບ­ຕໍ່​ປະ­ຕິ­ບັດ​ໜ້າ­ທີ່ 60 ຄົນ ຍິງ 30 ຄົນ.

    ນອກ​ນັ້ນ ຍັງ​ໄດ້​ຈັດ​ກິດ­ຈະ­ກຳ​ໂຄ­ສະ­ນາ​ປູກ​ຈິດ​ສຳ­ນຶກ​ຂັ້ນ​ຊຸມ​ຊົນ ເຊັ່ນ: ການ­ສະ­ແດງ​ລະ­ຄອນ​ກ່ຽວ​ກັບ​ການ​ໃຊ້​ຄວາມ​ຮຸນ​ແຮງ​ຢູ່ 15 ບ້ານ   ຈັດ​ກິດ­ຈະ­ກຳ​ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ວັນ​ແມ່­ຍິງ​ສາ­ກົນ​ໄດ້ 6 ຄັ້ງ ມີ​ຜູ້​ເຂົ້າ​ຮ່ວມ​ຈາກ​ຊຸມ​ຊົນ 3.517 ເທື່ອ​ຄົນ ໃນ​ນີ້ ເປັນ​ເພດ​ຍິງ​ກວມ 85%  ໄດ້​ຍົກ​ລະ­ດັບ​ຄວາມ​ຮູ້​ຄວາມ​ສາ­ມາດ​ໃຫ້​ພະ­ນັກ­ງານ​ປະ­ຈຳ​ສູນ ກ່ຽວ​ກັບ​ເຕັກ­ນິກ​ການ​ໃຫ້​ຄຳ​ປືກ​ສາ ການ​ເກັບ​ກຳ​ຂໍ້​ມູນ ການ​ບໍ­ລິ­ການ​ດ້ວຍ​ຈິດ­ໃຈ​ອາ­ສາ ແລະ ເຕັກ­ນິກ​ໃນ​ການ​ເປັນ​ຜູ້​ອຳ­ນວຍ​ຄວາມ​ສະ­ດວກ ເພື່ອ​ເຮັດ​ໃຫ້​ປະ­ຊາ­ຊົນ​ມີ​ຄວາມ​ເພິ່ງ​ພໍ­ໃຈ ແລະ ເປັນ​ທີ່​ຊ່ວຍ­ເຫຼືອ​ໄດ້​ໃນ​ສັງ­ຄົມ.

ຂ່າວທີ່ກ່ຽວຂ້ອງ