ເງິນ​ເດືອນ​ຢູ່​ໃນ​ອັງກິດ ​ເພີ່ມ​ຂຶ້ນ​ສູ່​ລະດັບ​ສູງ​ສຸດ​ໃນ​ຮອບ 11 ປີ

338 19 ສ.ຫ. 2019 ຂ່າວຕ່າງປະເທດ
 ເງິນ​ເດືອນ​ຢູ່​ໃນ​ອັງກິດ ​ເພີ່ມ​ຂຶ້ນ​ສູ່​ລະດັບ​ສູງ​ສຸດ​ໃນ​ຮອບ 11 ປີ

    ໃນ​ບົດ​ລາຍ​ງານ​ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 13 ສິງຫາ​ທີ່​ຜ່ານ​ມາ ຫ້ອງການ​ສະຖິຕິ​ແຫ່ງ​ຊາດ​ອັງກິດ (ONS) ໃຫ້​ຮູ້​ວ່າ ໃນ​ໄຕ​ມາດ 2/2019 ລາຍ​ຮັບ​ສະເລ່ຍ​ໃນ​ແຕ່​ລະ​ອາທິດ​ຂອງ​ປະຊາຊົນ​ອັງກິດ ເພີ່ມ​ຂຶ້ນ 3,9% ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ​ກາຍ ຊຶ່ງ​ນັບ​ວ່າ​ເປັນ​ລະດັບ​ເພີ່ມ​ຂຶ້ນ​ສູງ​ສຸດ ໃນ​ຮອບ 11 ປີ​ທີ່​ຜ່ານ​ມາ.

    ພວກ​ນັກ​ວິໄຈ​ເຫັນ​ວ່າ ເລື່ອງ​ດັ່ງກ່າວ​ຈະ​ເຮັດ​ຫຼຸດ​ຄວາມ​ເປັນ​ໄດ້ ທີ່​ທະນາຄານ​ກາງ​ອັງກິດ (BoE) ຈະ​ຕັດ​ຫຼຸດ​ອັດຕາ​ດອກ​ເບ້ຍ ຊຶ່ງ​ທີ່​ຜ່ານ​ມາ ໄດ້​ມີ​ການ​ຄາດ​ຄະເນ​ຕ່າງໆ​ນາໆອອກ​ມາ ກ່ຽວ​ກັບ​ຄວາມ​ເປັນ​ໄປ​ໄດ້​ທີ່​ວ່າ BoE ອາດ​ຈະ​ຕັດ​ຫຼຸດ​ອັດຕາ​ດອກ​ເບ້ຍ​ພື້ນຖານ ຈາກ​ລະດັບ 0,75% ໃນ​ປັດຈຸບັນ ຍ້ອນ​ຄວາມ​ບໍ່​ໝັ້ນຄົງ ທີ່​ພົວພັນ​ເຖິງ​ບັນຫາ​ອັງກິດ ຖອນ​ອອກ​ຈາກ​ສະຫະພາບ​ເອີ​ຣົບ (EU) ຫຼື​ທີ່​ເອີ້ນ​ວ່າ ເບຣ​ຊິດ (Brexit) ນັ້ນ​ພວມ​ກະທົບ​ຕໍ່​ປະລິມານ​ການ​ຜະລິດ​ທາງ​ດ້ານ​ເສດຖະກິດ​ຂອງ​ອັງກິດ.

    ONS ແຈ້ງ​ໃຫ້​ຮູ້ເມື່ອ​ອາທິດ​ທີ່​ຜ່ານ​ມາ​ວ່າ ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ພື້ນຖານ​ເສດຖະກິດ​ອັງກິດ ໃນ​ໄຕ​ມາດ 2/2019 ໄດ້​ຫຼຸດ​ລົງ 0,2% ຊຶ່ງ​ຕົ້ນຕໍ​ແມ່ນ​ເປັນ​ຍ້ອນ  Brexit. ເສດຖະກິດ​ຂອງ​ອັງກິດ ໄດ້​ຕ່າວ​ຫົວ​ລົງ ນັບ​ແຕ່​ໄດ້​ມີ​ການ​ຢັ່ງ​ສຽງ​ປະຊາ​ມະຕິ​ກ່ຽວ​ກັບ Brexit ເມື່ອ​ເດືອນ​ມິຖຸນາ ປີ 2016 ເປັນຕົ້ນ​ມາ ໂດຍ​ທີ່​ອັດຕາ​ສ່ວນ​ຄວາມ​ເຕີບ​ໂຕ​ປະຈຳ​ປີ ຫຼຸດ​ລົງ​ຈາກ​ກວ່າ 2% ໃນ​ເວລາ​ກ່ອນ​ການ​ຢັ່ງ​ສຽງ​ປະຊາ​ມະຕິ ລົງ​ມາ​ຢູ່​ທີ່ 1,4% ໃນ​ປີ 2018.

ຂ່າວທີ່ກ່ຽວຂ້ອງ