ເດືອນ​ກໍລະກົດ​ປີ​ນີ້​ເປັນ​ເດືອນ​ທີ່​ຮ້ອນ​ທີ່​ສຸດ​ໃນ​ປະຫວັດສາດ

287 19 ສ.ຫ. 2019 ຂ່າວຕ່າງປະເທດ
ເດືອນ​ກໍລະກົດ​ປີ​ນີ້​ເປັນ​ເດືອນ​ທີ່​ຮ້ອນ​ທີ່​ສຸດ​ໃນ​ປະຫວັດສາດ

     ອົງການ​ຄຸ້ມ​ຄອງ​ຮ່ວງ​ອາກາດ ແລະ ມະຫາ​ສະໝຸດ​ແຫ່ງ​ຊາດ ສ ອາ​ເມ​ຣິ​ກາ (NOAA) ແຈ້ງ​ໃຫ້​ຮູ້ເມື່ອ​ວັນ​ທີ 15 ສິງຫາ​ທີ່​ຜ່ານ​ມາ​ວ່າ  ລະດັບ​ອຸ່ນ​ຫະ​ພູມ​ທີ່​ແທກ​ໄດ້​ໃນ​ເດືອນ​ກໍລະກົດ ປີ 2019 ໄດ້​ຮັບ​ການ​ຢັ້ງຢືນ​ວ່າ ເປັນ​ເດືອນ​ທີ່​ຮ້ອນ​ທີ່​ສຸດ​ໃນ​ທົ່ວ​ໂລກ ໂດຍ​ຜ່ານ​ນັ້ນ​ກໍ​ເປັນ​ການ​ຢັ້ງຢືນ​ຜົນ​ຂອງ​ການ​ຕິດຕາມ​ມາ​ກ່ອນ​ໜ້າ​ນັ້ນ​ຂອງ​ສະຫະພາບ​ເອີ​ຣົບ (EU).

    NOAA ໃຫ້​ຮູ້​ວ່າ ໃນ​ເດືອນ​ກໍລະກົດ​ປີ​ນີ້ ສ່ວນ​ໃຫຍ່​ຂອງ​ໜ່ວຍ​ໂລກ ໄດ້​ຜ່ານ​ຜ່າ​ສະພາບ​ອາກາດ​ຮ້ອນ​ອົບເອົ້າ​ຢ່າງ​ບໍ່​ເຄີຍ​ເຫັນ​ມາ​ກ່ອນ ໃນ​ເມື່ອ​ວ່າ​ອຸ່ນ​ຫະ​ພູມ​ເພີ່ມ​ຂຶ້ນ​ສູ່​ລະດັບ​ສູງ​ໃໝ່ ໃນ​ເດືອນ​ທີ່​ຮ້ອນ​ທີ່​ສຸດ​ເທົ່າ​ທີ່​ໄດ້​ຮັບ​ການ​ຢັ້ງຢືນ​ມາ. ອຸ່ນ​ຫະ​ພູມ​ໂດຍ​ສະເລ່ຍ​ໃນ​ເດືອນ​ກໍລະກົດ ສູງ​ກວ່າ 0,95 ອົງສາ C ເມື່ອ​ທຽບໃສ່​ລະດັບ​ສະເລ່ຍ​ຂອງ​ສະຕະວັດ​ທີ 20 ຄື​ຢູ່​ທີ່ 15,8 ອົງສາ C ເຮັດ​ໃຫ້​ມັນ​ກາຍເປັນ​ເດືອນ​ກໍລະກົດ​ທີ່​ຮ້ອນ​ທີ່​ສຸດ ນັບ​ແຕ່​ປີ 1880 ເປັນຕົ້ນ​ມາ.

    ກ່ອນ​ໜ້າ​ນີ້ ພວກ​ນັກວິທະຍາສາດ​ຢັ້ງຢືນ​ວ່າ ເດືອນ​ທີ່​ຮ້ອນ​ທີ່​ສຸດ​ແມ່ນ​ເດືອນ​ກໍລະກົດ ປີ 2016. NOAA ເຫັນ​ວ່າ 9/10 ຂອງ​ເດືອນ​ກໍລະກົດ​ທີ່​ຮ້ອນ​ທີ່​ສຸດ ເກີດ​ຂຶ້ນ​ນັບ​ແຕ່​ປີ 2005 ເປັນຕົ້ນ​ມາ ໃນ​ນັ້ນ ຮ້ອນ​ທີ່​ສຸດ​ແມ່ນ​ຫ້າ​ປີ​ມໍ່ໆມານີ້.

ຂ່າວທີ່ກ່ຽວຂ້ອງ