6 ປະ​ເທດ​ສະມາຊິກ EU ​ເຫັນ​ດີ​ຮັບ​ເອົາ​ຜູ້​ຍ້າຍ​ຖິ່ນ​ຖານ​ຢູ່​ເທິງ​ກຳ​ປັ່ນ​ກູ້​ໄພ

272 19 ສ.ຫ. 2019 ຂ່າວຕ່າງປະເທດ
6 ປະ​ເທດ​ສະມາຊິກ EU ​ເຫັນ​ດີ​ຮັບ​ເອົາ​ຜູ້​ຍ້າຍ​ຖິ່ນ​ຖານ​ຢູ່​ເທິງ​ກຳ​ປັ່ນ​ກູ້​ໄພ

    ນາຍົກລັດຖະມົນຕີ ຈູ​ເຊບ ກົງ ຂອງ​ອີ​ຕາ​ລີ ແຈ້ງ​ໃຫ້​ຮູ້ເມື່ອ​ວັນ​ທີ 15 ສິງຫາ​ທີ່​​ຜ່ານ​ມາ​ວ່າ 6 ປະເທດ​ທີ່​ເປັນ​ສະມາຊິກ​ສະຫະພາບ​ເອີ​ຣົບ (EU) ໄດ້​ເຫັນ​ດີ​ຮັບ​ເອົາ​ຜູ້​ຍ້າຍ​ຖິ່ນ​ຖານ ປະມານ 150 ຄົນ ຢູ່​ເທິງ​ກຳປັ່ນ​ກູ້​ໄພ ໂອ​ເພນ ອາມ​​ສ (Open Arms) ທີ່​ພວມ​ຈອດ​ຢູ່​ໃກ້​ກັບ​ເກາະ ແລມ​ເປີ​ດູ​ຊາ ຂອງ​ອີ​ຕາ​ລີ.

    ໃນ​ຈົດໝາຍ​ທີ່​ສົ່ງ​ໄປ​ຍັງ​ທ່ານ ມັດ​ເຕ​ໂອ ຊານ​ວິ​ນີ ລັດຖະມົນຕີ​ກະຊວງ​ພາຍ​ໃນ​ອີ​ຕາ​ລີ ນັ້ນ ນາຍົກລັດຖະມົນຕີ ກົງ ໃຫ້​ຮູ້​ວ່າ ປະເທດ​ຕ່າງໆ ອັນ​ປະກອບ​ດ້ວຍ ຝຣັ່ງ ເຢຍ​ລະ​ມັນ ຣູ​ມາ​ນີ ປອກ​ຕຸຍ​ການ ແອັດ​ສະ​ປາຍ ແລະ  ລຸກ​ຊຳ​ບວກ ໄດ້​ແຈ້ງ​ໃຫ້​ຮູ້​ເຖິງ “ຄວາມ​ພ້ອມ​ໃນ​ການ​ຮັບ​ເອົາ​ຜູ້​ຍ້າຍ​ຖິ່ນ​ຖານ.”

    ກຳປັ່ນ​ຄົ້ນ​ຫາ ກູ້​ໄພ Open Arms ຂອງ​ອົງການ​ມະນຸດສະທຳ Proactiva ຂອງ​ແອັດ​ສະ​ປາຍ ໄດ້​ຕົກ​ຄ້າງ​ຢູ່​ໃນ​ທະເລ​ເມ​ດີ​ເຕ​ຣາ​ເນ ເປັນ​ເວລາ​ເກືອບ​ສອງ​ອາທິດ ຫຼັງ​ຈາກ​ທີ່​ລັດຖະມົນຕີ​ກະຊວງ​ພາຍ​ໃນ​ຂອງ​ອີ​ຕາ​ລີ ມີ​ຄຳ​ສັ່ງ​ຫ້າມ​ອອກ​ມາ​ເມື່ອ​ຕົ້ນ​ເດືອນ​ສິງຫາ​ນີ້ ກ່ຽວ​ກັບ​ການ​ບໍ່​ອະນຸຍາດ​ໃຫ້​ກຳປັ່ນ​ກູ້​ໄພ​ຜູ້​ຍ້ານ​ຖິ່ນ​ຖານ​ເຂົ້າ​ທຽບ​ທ່າ. ຄຳ​ສັ່ງ​ຫ້າມ​ດັ່ງກ່າວ ລະບຸ​ວ່າ ກຳປັ່ນ Open Arms ອາດ​ຈະ​ຖືກ​ປັບ​ໃໝ 1 ລ້ານ​ເອີ​ໂຣ (ເທົ່າ​ກັບ​ກວ່າ 1 ລ້ານ​ໂດ​ລາ​ສະຫະລັດ) ຖ້າ​ຫາກ​ກະທຳ​ການ​ລະເມີດ.

    ເມື່ອ​ວັນ​ທີ 13 ສິງຫາ​ທີ່​ຜ່ານ​ມາ ອົງການ​ຂ້າ​ຫຼວງ​ໃຫຍ່ ຂອງ​ສະຫະ​ປະຊາ​ຊາດ ກ່ຽວ​ກັບ​ຜູ້​ລີ້​ໄພ (UNHCR) ໄດ້​ຮຽກຮ້ອງ​ໄປ​ຍັງ​ບັນດາ​ປະເທດ​ສະມາຊິກ EU ໃຫ້​ຮັບ​ເອົາ​ຜູ້​ຍ້າຍ​ຖິ່ນ​ຖານ 500 ຄົນ ທີ່​ຫາ​ກໍ​ໄດ້​ຮັບ​ການ​ຊ່ວຍເຫຼືອ ແຕ່​ຍັງ​ຖືກ​ຕິດ​ຄ້າງ​ຢູ່​ໃນ​ທະເລ​ເມ​ດີ​ເຕ​ຣາ​ເນ ທ່າມກາງ​ທີ່​ເອີ​ຣົບ ຍັງ​ບໍ່​ບັນລຸ​ຄວາມ​ເປັນ​ເອກະ​ພາບ​ກັນ ກ່ຽວ​ກັບ​ການ​ວ່າ​ປະເທດ​ໃດ​ຈະ​ຮັບ​ເອົາ​ຜູ້​ຍ້າຍ​ຖິ່ນ​ຖານ​ເຫຼົ່ານັ້ນ.

    ນອກຈາກ​ຜູ້​ລີ້​ໄພ​ຢູ່​ເທິງ​ກຳປັ່ນ Open Arms ດັ່ງກ່າວ​ແລ້ວ ຍັງ​ມີ​ຜູ້​ຍ້າຍ​ຖິ່ນ​ຖານ​ອີກ 356 ຄົນ ຕິດ​ຄ້າງ​ຢູ່​ເທິງ​ກຳປັ່ນ Ocean Viking ໂດຍ​ແມ່ນ​ສອງ​ອົງການ​ເພື່ອ​ມະນຸດສະທຳ​ຂອງ​ຝຣັ່ງ ໄດ້ແກ່ ອົງການ​ທ່ານໝໍ​ໄຮ້​ພົມ​ແດນ (MSF) ແລະ ອົງການ SOS ເມ​ດີ​ເຕ​ຣາ​ເນ ເປັນ​ຜູ້​ຮັບຜິດຊອບ​ກຳປັ່ນ​ນັ້ນ.

    ໃນ​ຂະນະ​ດຽວ​ກັນ UNHCR ລາຍ​ງານ​ວ່າ ນັບ​ແຕ່​ຕົ້ນ​ປີ​ນີ້​ເປັນຕົ້ນ​ມາ ມີ​ຜູ້​ເສຍ​ຊີວິດ ຫຼື​ຫາຍ​ສາບ​ສູນ​ປະມານ 600 ຄົນ ຢູ່​ໃນ​ເຂດ​ທະເລ ລະຫວ່າງ​ລີ​ບີ ກັບ​ອີ​ຕາ​ລີ.

 

ຂ່າວທີ່ກ່ຽວຂ້ອງ