ຮົງ​ກົງ​ປະກາດ​ບ້ວງ​ເງິນ​ຊ່ວຍ​ເຫຼືອ​ທາງ​ດ້ານ​ເສດຖະກິດ

    ຂ່າວສານ​ຣອຍ​ເຕີ ລາຍ​ງານ​ວ່າ ເມື່ອ​ວັນ​ທີ 15 ສິງຫາ​ທີ່​ຜ່ານ​ມາ ອຳນາດ​ການ​ປົກຄອງ​ເຂດ​ບໍລິຫານ​ພິເສດ​ຮົງ​ກົງ (ຈີນ) ໄດ້​ປະກາດ​ບ້ວງ​ເງິນ​ຊ່ວຍເຫຼືອ​ເສດຖະກິດ ເປັນ​ມູນ​ຄ່າ​ກວ່າ 19 ຕື້​ໂດ​ລາ​ຮົງ​ກົງ (ເທົ່າ​ກັບ 2,44 ຕື້​ໂດ​ລາ​ສະຫະລັດ) ທ່າງ​ກາງ​ທີ່​ການ​ປະ​ທ້ວງ​ທາງ​ການເມືອງ ແລະ ສົງຄາມ​ການ​ຄ້າ ລະຫວ່າງ​ຈີນ ກັບ ສ ອາ​ເມ​ຣິ​ກາ ທີ່​ເພີ່ມ​ທະວີ​ຂຶ້ນ ພວມ​ເປັນ​ການ​ກະທົບ​ຕໍ່​ຮົງ​ກົງ.

    ແຜນການ​ດັ່ງກ່າວ​ຖືກ​ນຳ​ອອກ​ມາ​ປະກາດ ຫຼັງ​ຈາກ​ທີ່​ທາງ​ການ​ຮົງ​ກົງ ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ​ຍອດ​ຜະລິດ​ຕະ​ພັນ​ພາຍ​ໃນ (GDP) ຂອງ​ຮົງ​ກົງ ໃນ​ປີ 2019 ຈາກ​ລະດັບ​ເບື້ອງ​ຕົ້ນ 2-3% ລົງ​ມາ​ຍັງ​ເຫຼືອ 0-1%.

    ເຈົ້າ​ໜ້າທີ່​ຮົງ​ກົງ​ເວົ້າ​ວ່າ ມາດ​ຕະການ​ດັ່ງກ່າວ ປະກອບ​ມີ​ບັນດາ​ບ້ວງ​ຊ່ວຍເຫຼືອ​ບັນດາ​ວິ​ສາ​ຫະ​ກິດ​ທີ່​ມີ​ຄວາມ​ຫຍຸ້ງຍາກ.