ຂ່າວຫຼ້າສຸດ

ເສດ​ຖະ​ກິດ​ຈີນ​ສາ​ມາດ​ຕ້ານ​ທານ​ຜົນ​ກະ​ທົບ​ຈາກ​ພາຍ​ນອກ​ໄດ້

211 19 ສ.ຫ. 2019 ຂ່າວຕ່າງປະເທດ
ເສດ​ຖະ​ກິດ​ຈີນ​ສາ​ມາດ​ຕ້ານ​ທານ​ຜົນ​ກະ​ທົບ​ຈາກ​ພາຍ​ນອກ​ໄດ້

    ເມື່ອ​ວັນ​ທີ 14 ສິງຫາ​ທີ່​ຜ່ານ​ມາ ອົງການ​ສະຖິຕິ​ແຫ່ງ​ຊາດ​ຈີນ ໄດ້​ເປີດເຜີຍ​ຕົວ​ເລກ​ຂໍ້​ມູນ​ດ້ານ​ເສດຖະກິດ​ໃນ 7 ເດືອນ​ຕົ້ນ​ປີ​ນີ້ ໂດຍ​ສະແດງ​ໃຫ້​ເຫັນ​ວ່າ ເສດຖະກິດ​ຈີນ​ຍັງ​ສາມາດ​ຮັກສາ​ໃຫ້​ຢູ່​ໃນ​ລະດັບ​ທີ່​ເໝາະ​ສົມ ສາມາດ​ຮັກສາ​ທ່ວງ​ທ່າ​ແຫ່ງ​ການ​ພັດທະນາ​ຢ່າງ​ໝັ້ນ​ທ່ຽງ​ໄດ້​ໂດຍ​ລວມ ແລະ ມີ​ຄວາມ​ຄືບ​ໜ້າ​ຢ່າງ​ໝັ້ນ​ທ່ຽງ.

    ພາຍ​ໃຕ້​ສະພາບ​ການ​ທີ່ ສ ອາ​ເມ​ຣິ​ກາ ເຮັດ​ໃຫ້​ຄວາມ​ຂັດ​ແຍ້ງ​ດ້ານ​ການ​ຄ້າ​ນັບ​ມື້​ນັບ​ຮຸນ​ແຮງ​ຂຶ້ນ ແລະ ຄວາມ​ບໍ່​ແນ່ນອນ​ຈາກ​ພາຍ​ນອກ​ກໍ​ເພີ່ມ​ຂຶ້ນ ແຕ່​ເສດຖະກິດ​ຈີນ​ຍັງ​ມີ​ຄວາມ​ສາມາດ​ຕ້ານທານ​ອັນ​ໃຫຍ່​ຫຼວງ ຊຶ່ງ​ໄດ້​ສະແດງ​ໃຫ້​ເຫັນ​ເຖິງ​ຄວາມ​ສຸຂຸມ​ທຸ່ນ​ທ່ຽງ ແລະ ຄວາມ​ເຊື່ອ​ໝັ້ນ​ຕໍ່​ພາຍ​ໃນ. ສິ່ງ​ທີ່​ໜ້າ​ສົນໃຈ​ແມ່ນ ໃນ 7 ເດືອນ​ຕົ້ນ​ປີ​ນີ້ ໂຄງ​ປະກອບ​ເສດຖະກິດ​ຈີນ ໄດ້​ສືບຕໍ່​ປັບປຸງ​ໃຫ້​ດີ​ຂຶ້ນ​ເປັນ​ກ້າວໆ ມີ​ຈຸດ​ພົ້ນ​ເດັ່ນ​ນັບ​ມື້​ນັບ​ເພີ່ມ​ຂຶ້ນ.

     ໃນ 7 ເດືອນ​ຕົ້ນ​ປີ​ນີ້ ການ​ລົງທຶນ​ຕົວ​ຈິງ​ຂອງ​ຕ່າງປະເທດ​ຢູ່​ໃນ​ຈີນ ໄດ້​ເພີ່ມ​ຂຶ້ນ 7,3% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ​ກາຍ ໃນ​ນັ້ນ ການ​ລົງທຶນ​ຕ່າງປະເທດ​ຕົວ​ຈິງ​ໃນ​ພາກ​ອຸດສາຫະກຳ​ເຕັກ​ໂນ​ໂລ​ຊີ​ສູງ ໄດ້​ເພີ່ມ​ຂຶ້ນ 43,1% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ​ກາຍ ຊຶ່ງ​ສະແດງ​ໃຫ້​ເຫັນ​ວ່າ ຈີນ​ໄດ້​ປັບປຸງ​ສະພາບ​ແວດ​ລ້ອມ​ດ້ານ​ການ​ດຳເນີນ​ທຸລະ​ກິດ​ໃຫ້​ດີ​ຂຶ້ນ​ຢ່າງ​ບໍ່​ຢຸດ​ຢັ້ງ ເພີ່ມ​ທະວີ​ການ​ປົກ​ປ້ອງ​ຊັບ​ສິນ​ທາງ​ປັນຍາ ແລະ  ຈີນ​ຍັງ​ແມ່ນ​ຈຸດໝາຍ​ປາຍທາງ​ຂອງ​ການ​ລົງທຶນ​ທີ່​ໄດ້​ຮັບ​ຄວາມ​ນິຍົມ​ຊົມ​ຊອບ​ຫຼາຍ​ຈາກ​ນັກ​ລົງທຶນ​ຕ່າງປະເທດ​ຢູ່​ຄືເກົ່າ.

ຂ່າວທີ່ກ່ຽວຂ້ອງ