ຂ່າວຫຼ້າສຸດ

ເພີ່ມທະວີການຊ່ວຍເຫຼືອ-ແລກປ່ຽນບົດຮຽນເຊິ່ງກັນ ແລະ ກັນ

1.017 16 ສ.ຫ. 2019 ຂ່າວໜ້າ​ໜຶ່ງ

    ສູນ​ກາງ​ແນວ​ລາວ​ສ້າງ​ຊາດ (ສນຊ) ຈັດ​ກອງ​ປະ­ຊຸມ​ພົບ​ປະ​ແລກ­ປ່ຽນ​ບັນ­ດາ​ການ­ຈັດ­ຕັ້ງ​ສັງ­ຄົມ ມູນ​ນິ­ທິ​ທົ່ວ​ນະ­ຄອນ­ຫຼວງ​ວຽງ​ຈັນ (ນວ) ຂຶ້ນ​ໃນ​ຕົ້ນ​ເດືອນ​ສິງ­ຫາ ຜ່ານ​ມາ ຢູ່ ສນຊ ໂດຍ​ເປັນ​ປະ­ທານ​ຂອງ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ ສນຊ ມີ​ທ່ານ ເຍ່ຍ​ເກີ​ຢາ ໜໍ​ຈໍ​ຈົງ​ຕົວ ຮອງ​ປະ­ທານ ສນຊ ທ່ານ ອຳ​ພາ ສິມ​ມະ​ລອນ ຫົວ­ໜ້າ​ກົມ​ພັດ­ທະ­ນາ ກະ­ຊວງ​ພາຍ​ໃນ ທ່ານ ບຸນ​ທ່ຽງ ຂຸນ​ສີ ປະ­ທານ​ແນວ​ລາວ​ສ້າງ​ຊາດ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ໄທ​ລໍ ຫວ່າ​ເຊັ້ງ ຫົວ­ໜ້າ​ກົມ​ຊັ້ນ​ຄົນ-ການ­ຈັດ­ຕັ້ງ​ສັງ­ຄົມ ກ່າວ​ວ່າ: ໄລ­ຍະ​ຜ່ານ​ມາ​ກົມ​ຊັ້ນ​ຄົນ-ການ­ຈັດ­ຕັ້ງ​ສັງ­ຄົມ ໄດ້​ປະ­ຕິ­ບັດ​ໜ້າ­ທີ່​ເປັນ​ເສ­ນາ​ທິ​ການ​ດ້ານ​ວິ­ຊາ​ການ​ວຽກ​ງານ​ການ­ຈັດ­ຕັ້ງ​ສັງ­ຄົມ​ໃຫ້​ຄະ­ນະ​ປະ­ຈຳ ສນຊ ເຊິ່ງ​ຍາມ​ໃດ​ພັກ-ລັດ­ຖະ­ບານ ແລະ ສນຊ ໄດ້​ໃຫ້​ຄວາມ​ສຳ­ຄັນ​ຊຸກ­ຍູ້​ການ­ຈັດ­ຕັ້ງ​ສັງ­ຄົມ ເຄື່ອນ​ໄຫວ​ຕາມ​ພາ­ລະ​ບົດ­ບາດ 1 ປີ­ຜ່ານ­ມາ​ບັນ­ດາ​ສະ­ມາ­ຄົມ ມູນ​ນິ­ທິ ລ້ວນ​ແຕ່​ໄດ້​ປະ­ກອບ­ສ່ວນ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໄດ້​ເປັນ​ຢ່າງ​ດີ ປັດ­ຈຸ­ບັນ​ທົ່ວ​ປະ­ເທດ​ມີ 167 ສະ­ມາ­ຄົມ ໃນ​ນີ້ ສະ­ມາ­ຄົມ​ທີ່​ຂຶ້ນ​ກັບ​ຂັ້ນ​ສູນ​ກາງ​ຄຸ້ມ​ຄອງ (ກະ­ຊວງ​ພາຍ​ໃນ) 46 ສະ­ມາ­ຄົມ 1 ກຸ່ມ​ການ​ຜະ­ລິດ ສະ­ມາ­ຄົມ​ທີ່​ຂຶ້ນ​ກັບ​ທ້ອງ­ຖິ່ນ​ຄຸ້ມ​ຄອງ (ແຂວງ ນວ) 109 ສະ­ມາ­ຄົມ ມີ 25 ມູນ​ນິ­ທິ ໃນ​ນີ້ ສູນ​ກາງ​ຄຸ້ມ​ຄອງ 18 ມູນ​ນິ­ທິ ແຂວງ ນວ ຄຸ້ມ​ຄອງ 7 ມູນ​ນິ­ທິ.

    ທ່ານ ໄຊ​ສົມ​ພອນ ພົມ­ວິ­ຫານ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ທີ່​ບັນ­ດາ​ສະ­ມາ­ຄົມ ມູນ​ນິ­ທິ ໄດ້​ປະ­ກອບ ສ່ວນ​ຢ່າງ​ຫ້າວ­ຫັນ​ໃນ​ການ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ທີ່​ພົບ​ໄພ­ພິ­ບັດ ມີ​ຫຼາຍ​ສະ­ມາ­ຄົມ ມູນ​ນິ­ທິ​ໄດ້​ຊ່ວຍ­ເຫຼືອ​ໃນ​ການ​ກໍ່­ສ້າງ ສ້ອມ­ແປງ​ໂຮງ­ຮຽນ ສຸກ­ສາ­ລາ ກໍ່­ສ້າງ​ນ້ຳ​ລິນ ນ້ຳ​ບາ​ດານ ຂົວ-ທາງ ສ້າງ​ອາ­ຊີບ ມອບ​ອຸ­ປະ­ກອນ​ການ​ຮຽນ ອຸ­ປະ­ກອນ​ກີ­ລາ ເຄື່ອງ­ນຸ່ງ​ຫົ່ມ ເຄື່ອງ​ບໍ­ລິ­ໂພກ ແລະ ອື່ນໆ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໃຫ້​ບັນ­ດາ​ປະ­ທານ ຮອງ​ປະ­ທານ ແລະ ຄະ­ນະ​ຂອງ​ສະ­ມາ­ຄົມ ມູ​ນິ­ທິ ກຳ​ແໜ້ນ​ແນວ­ທາງ​ນະ­ໂຍ­ບາຍ​ຂອງ​ພັກ ລະ ບຽບ​ກົດ­ໝາຍ​ຂອງ​ລັດ ແລະ ລະ­ບຽບ​ການ​ສະ­ເພາະ​ຂອງ​ຕົນ ເພື່ອ​ສຶກ​ສາ​ອົບ­ຮົມ​ແນວ​ຄິດ-ການ­ເມືອງ ເຜີຍ­ແຜ່ ແນະ­ນຳ​ສະ­ມາ­ຊິກ​ໃຫ້​ຮັບ​ຮູ້ ກຳ​ແໜ້ນ​ຢ່າງ​ເລິກ­ເຊິ່ງ ເພີ່ມ​ທະ­ວີ​ຄວາມ​ສາ­ມັກ­ຄີ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ແລກ­ປ່ຽນ​ບົດ­ຮຽນ ປະ­ສົບ​ການ​ນຳ​ກັນ ເພື່ອ​ເຮັດ​ໃຫ້​ຜູ້​ທີ່​ມີ​ປະ­ສົບ​ການ​ທີ່​ເຂັ້ມ­ແຂງ ຊ່ວຍ​ຜູ້​ທີ່​ກຳ­ລັງ​ກໍ່​ຮ່າງ​ສ້າງ​ຕົວ​ໃໝ່ ສືບ­ຕໍ່​ເຄື່ອນ​ໄຫວ ແລະ ກ້າວ​ເດີນ​ໄປ​ດ້ວຍ​ກັນ​ຢ່າງ​ໝັ້ນ­ຄົງ.

ຂ່າວທີ່ກ່ຽວຂ້ອງ