ຂ່າວຫຼ້າສຸດ

ມອບ-ຮັບໜ້າທີ່ເຈົ້າເມືອງໄຊທານີ

853 16 ສ.ຫ. 2019 ຂ່າວໜ້າ​ໜຶ່ງ
ມອບ-ຮັບໜ້າທີ່ເຈົ້າເມືອງໄຊທານີ

    ເພື່ອ​ເປັນ​ການ​ກະ­ກຽມ​ໃຫ້​ແກ່​ກອງ​ປະ­ຊຸມ​ສາມ​ຂັ້ນ ໃນ​ການ​ຄັດ​ເລືອກ​ບຸ​ຄະ­ລາ​ກອນ​ເຂົ້າ​ໃນ​ຕຳ­ແໜ່ງ​ງານ​ຕ່າງໆ ໃຫ້​ມີ​ຄວາມ​ແທດ­ເໝາະ​ກັບ​ວຽກ​ງານ​ໃນ​ແຕ່​ລະ​ໄລ­ຍະ ໃນ​ວັນ​ທີ 15 ສິງ­ຫາ 2019 ທີ່​ສະ­ໂມ­ສອນ​ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ໄດ້​ມີ​ພິ­ທີ​ມອບ-ຮັບ​ໜ້າ­ທີ່​ເຈົ້າ­ເມືອງ​ໄຊ​ທາ­ນີ​ຜູ້​ເກົ່າ ທ່ານ ຈັນ­ທະ​ລາ ອິນ​ທະ­ລັງ​ສີ ແລະ ຜູ້​ໃໝ່ ທ່ານ ຄຳ​ປະ­ດິດ ເຂັມ​ມາ­ນິດ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ມີ​ຫົວ­ໜ້າ ຮອງ​ຫົວ­ໜ້າ​ພະ​ແນກ​ກ່ຽວ­ຂ້ອງ ນວ ການ​ນຳ​ເມືອງ ແລະ ບ້ານ​ອ້ອມ​ຂ້າງ.

    ການ​ແຕ່ງ­ຕັ້ງ​ເຈົ້າ­ເມືອງ​ໄຊ​ທາ­ນີ​ຜູ້​ໃໝ່​ຄັ້ງ​ນີ້ ອີງ­ໃສ່​ຂໍ້​ຕົກ­ລົງ​ຂອງ​ທ່ານ​ເຈົ້າ​ຄອງ ນວ ວ່າ​ດ້ວຍ​ການ​ຍົກ­ຍ້າຍ ແລະ ແຕ່ງ­ຕັ້ງ ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນວ ມາ​ຮັບ​ໜ້າ­ທີ່​ໃໝ່ ເປັນ​ເຈົ້າ­ເມືອງ​ໄຊ​ທາ­ນີ ຜູ້​ໃໝ່ ແລະ ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ​ຜູ້​ເກົ່າ ພັກ­ຜ່ອນ​ເຂົ້າ​ຮັບ​ເບ້ຍ​ບຳ­ນານ.

    ໂອ­ກາດ​ນີ້ ທ່ານ ຈັນ­ທະ​ລາ ອິນ​ທະ­ລັງ​ສີ ໄດ້​ລາຍ​ງານ​ສະ­ພາບ​ພົ້ນ​ເດັ່ນ​ຂອງ​ການ​ຊີ້​ນຳ-ນຳ­ພາ​ຈັດ​ຕັ້ງ​ປະ­ຕິ­ບັດ​ວຽກ​ງານ​ໃນ​ແຕ່​ລະ​ຂົງ­ເຂດ ໄດ້​ຕັ້ງ­ໜ້າ​ຊຸກ­ຍູ້​ການ​ຜະ­ລິດ​ຂອງ​ປະ­ຊາ­ຊົນ​ຢູ່​ແຕ່​ລະ​ບ້ານ ເພື່ອ​ຜະ­ລິດ​ເປັນ​ສິນ­ຄ້າ ບົນ​ພື້ນ­ຖານ​ສ້າງ​ປະ­ຖົມ​ປັດ​ໄຈ​ໃຫ້​ແກ່​ການ​ພັດ­ທະ­ນາ​ເມືອງ​ໄຊ​ທາ­ນີ ຕາມ​ທິດ​ການ​ຜະ­ລິດ​ກະ­ສິ­ກຳ​ສະ­ອາດ​ຕິດ​ພັນ​ກັບ​ອຸດ­ສາ­ຫະ­ກຳ ແລະ ການ­ທ່ອງ­ທ່ຽວ ຜັນ​ຂະ­ຫຍາຍ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ຂອງ​ເມືອງ​ໄປ​ຕາມ​ທິດ​ທີ່​ກຳ­ນົດ​ໄວ້ ເສດ​ຖະ ກິດ​ຂະ­ຫຍາຍ­ຕົວ​ໄປ​ຕາມ​ກົນ​ໄກ​ເສດ­ຖະ­ກິດ​ຕະ­ຫຼາດ ແລະ ການ​ຫັນ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ ສະ­ແດງ​ອອກ​ໂຄງ­ການ​ປະ­ກອບ​ເສດ­ຖະ­ກິດ​ມີ​ການ​ຂະ­ຫຍາຍ­ຕົວ​ໃນ​ຈັງ­ຫວະ 10,7% ລວມ​ຍອດ​ຜະ­ລິດ​ຕະ​ພັນ​ພາຍ​ໃນ​ບັນ­ລຸ 5.621 ຕື້​ກີບ ສະ­ເລ່ຍ​ລາຍ​ຮັບ​ຕໍ່​ຫົວ​ຄົນ 30 ລ້ານ​ກີບ​ຕໍ່​ປີ ໃນ​ນີ້ ຂະ­ແໜງ​ອຸດ­ສາ­ຫະ­ກຳ​ກວມ 43,54% ຂອງ GDP ເພີ່ມ​ຂຶ້ນ 1,25% ຂະ­ແໜງ​ກະ­ສິ­ກຳ-ປ່າ­ໄມ້ 14,01% ຂອງ GDP ຫຼຸດ​ລົງ 1,01% ຂະ­ແໜງ​ບໍ­ລິ­ການ​ກວມ 32,45% ຂອງ GDP ເພີ່ມ​ຂຶ້ນ 0,26% ການ​ລົງ­ທຶນ​ຈາກ​ງົບ­ປະ­ມານ​ຂອງ​ລັດ ນັບ​ແຕ່​ປີ 2015-2018 ປະ­ຕິ­ບັດ​ໄດ້ 60 ໂຄງ­ການ ມູນ​ຄ່າ 46,97 ຕື້​ກີບ ສະ­ເພາະ​ແຜນ­ການ​ລົງ­ທຶນ​ຂອງ​ລັດ​ປີ 2019 ໄດ້​ຮັບ​ອະ­ນຸ­ມັດ 59 ໂຄງ­ການ ມູນ​ຄ່າ 7,02 ຕື້​ກີບ ສັງ​ລວມ​ແຜນ­ການ​ລົງ­ທຶນ​ຂອງ​ລັດ​ປີ 2020 ຂອງ​ເມືອງ​ມີ​ທັງ​ໝົດ 80 ໂຄງ­ການ ມູນ​ຄ່າ 10,28 ຕື້​ກີບ ເກັບ​ລາຍ​ຮັບ​ໄດ້ 162,18 ຕື້​ກີບ ທຽບ­ໃສ່​ແຜນ­ການ 5 ປີ ປະ­ຕິ­ບັດ​ໄດ້ 79,37%.

    ຕອນ​ທ້າຍ​ພິ­ທີ ທ່ານ​ເຈົ້າ​ຄອງ ນວ ໄດ້​ໂອ້​ລົມ ກ່ອນ​ອື່ນ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ການ​ຊີ້​ນຳ-ນຳ­ພາ​ໃນ​ໄລ­ຍະ​ຜ່ານ​ມາ​ຂອງ​ທ່ານ​ເຈົ້າ­ເມືອງ​ໄຊ​ທາ­ນີ​ຜູ້​ເກົ່າ ແລະ ໃຫ້​ທິດ​ຊີ້​ນຳ​ທ່ານ​ເຈົ້າ­ເມືອງ​ໄຊ​ທາ­ນີ​ຜູ້​ໃໝ່ ໃຫ້​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ VI ຂອງ​ອົງ­ຄະ​ນະ​ພັກ ນວ ໃຫ້​ບັນ­ລຸ​ຕາມ​ຈຸດ­ປະ­ສົງ​ຄາດ­ໝາຍ​ທີ່​ວາງ​ໄວ້ ວຽກ​ອັນ​ທີ່​ຮີບ​ດ່ວນ​ໃຫ້​ສືບ­ຕໍ່​ດຳ­ເນີນ​ກອງ​ປະ­ຊຸມ​ໃຫຍ່​ຂອງ​ໜ່ວຍ​ພັກ​ຂັ້ນ​ບ້ານ ແລະ ຫ້ອງ­ການ​ອ້ອມ​ຂ້າງ​ເມືອງ​ໃຫ້​ສຳ­ເລັດ​ຕາມ​ຄາດ­ໝາຍ ເພື່ອ​ຄັດ​ເລືອກ​ເອົາ​ບຸ​ຄະ­ລາ​ກອນ​ເຂົ້າ​ຮ່ວມ​ກອງ​ປະ­ຊຸມ​ໃຫຍ່ ຄັ້ງ​ທີ VII ຂອງ​ອົງ­ຄະ​ນະ​ພັກ​ເມືອງ​ໄຊ​ທາ­ນີ​ທີ່​ຈະ​ຈັດ​ຂຶ້ນ​ໃນ​ປີ 2020.

ຂ່າວທີ່ກ່ຽວຂ້ອງ