ຂ່າວຫຼ້າສຸດ

ນັກຮຽນໂຮງຮຽນວຽງສະຫວັນ ຍາດໄດ້ຄະແນນດີເລີດ 20 ຄົນ

886 16 ສ.ຫ. 2019 ຂ່າວໜ້າ​ໜຶ່ງ

    ພິ­ທີ​ສະ­ຫຼຸບ​ສົກ­ຮຽນ 2018-2019 ຂອງ​ໂຮງ­ຮຽນ​ອະ­ນຸ­ບານ-ປະ­ຖົມ-ມັດ­ທະ­ຍົມ​ສຶກ​ສາ​ສົມ­ບູນ​ວຽງ​ສະ­ຫວັນ ຈັດ​ຂຶ້ນ​ວັນ​ທີ 10 ສິງ­ຫາ 2019 ຢູ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ​ນາງ ວຽງ​ເພັດ ວຽງ​ສະ ຫວັນ ປະ­ທານ​ໂຮງ­ຮຽນ​ອະ­ນຸ­ບານ-ປະ­ຖົມ-ມັດ­ທະ­ຍົມ​ສຶກ​ສາ​ສົມ­ບູນ​ວຽງ​ສະ­ຫວັນ ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ສສກ ນວ) ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ວຽງ​ເພັດ ວຽງ​ສະ­ຫວັນ ກ່າວ​ວ່າ: ໂຮງ­ຮຽນ​ວຽງ​ສະ­ຫວັນ ເປັນ​ໂຮງ­ຮຽນ​ເອ­ກະ​ຊົນ ສ້າງ­ຕັ້ງ​ປີ 1991 ຢູ່​ບ້ານ​ໜອງ​ບອນ ເມືອງ​ໄຊ​ເສດ​ຖາ ນວ ມີ​ສາ­ຂາ​ຢູ່​ເມືອງ​ຫາດ​ຊາຍ​ຟອງ ນວ ແລະ ຢູ່​ເມືອງ​ສາ­ມັກ­ຄີ​ໄຊ ແຂວງ​ອັດ​ຕະ​ປື ສົກ­ຮຽນ 2018-2019 ມີ​ຄູ-ອາ­ຈານ 80 ຄົນ ຄູ​ປະ­ຈຳ­ການ 65 ຄົນ ໃນ​ນີ້ ມີ​ຄູ​ຮັບ​ເຊີນ 5 ຄົນ ເປັນ​ຄົນ​ຕ່າງ­ປະ­ເທດ 3 ຄົນ ມີ​ນັກ­ຮຽນ 2.017 ຄົນ ຍິງ 996 ຄົນ ຊັ້ນ​ອະ­ນຸ­ບານ 293 ຄົນ ຍິງ 143 ຄົນ ປະ ຖົມ 869 ຄົນ ຍິງ 407 ຄົນ ມັດ­ທະ­ຍົມ​ຕົ້ນ 645 ຄົນ ຍິງ 300 ຄົນ ມັດ­ທະ­ຍົມ​ປາຍ 244 ຄົນ ຍິງ 111 ຄົນ ຜ່ານ​ການ​ສອບ­ເສັງ​ສົກ­ຮຽນ 2018-2019 ໂຮງ­ຮຽນ​ພວກ​ເຮົາ​ສາ­ມາດ​ຍາດ​ໄດ້­ຜົນ​ງານ​ໂດດ​ເດັ່ນ​ເປັນ​ທີ່​ເພິ່ງ​ພໍ­ໃຈ ສະ­ແດງ​ອອກ​ຊັ້ນ ປ5 ນັກ­ຮຽນ​ມີ­ໜ້າ​ສອບ­ເສັງ 166 ຄົນ ເສັງ​ໄດ້ 100% ໃນ​ນີ້ ແຕ່​ລະ­ວິ​ຊາ​ໄດ້​ຄະ­ແນນ 7 ຂຶ້ນ​ໄປ 77 ຄົນ ເທົ່າ​ກັບ 46,39% ນັກ­ຮຽນ​ຄະ­ແນນ​ຕິດ​ອັນ​ດັບ 1-3 ຂອງ​ເມືອງ 7 ຄົນ ຊັ້ນ ມ4 108 ຄົນ ເສັງ​ໄດ້ 100% ໃນ​ນີ້ ແຕ່​ລະ­ວິ​ຊາ​ໄດ້​ຄະ­ແນນ 7 ຂຶ້ນ​ໄປ 61 ຄົນ ເທົ່າ​ກັບ 55,96% ແຕ່​ລະ­ວິ​ຊາ​ໄດ້​ຄະ­ແນນ 9 ຂຶ້ນ​ໄປ 16 ຄົນ ໄດ້​ຄະ­ແນນ​ອັນ​ດັບ 1 ຂອງ ນວ 1 ຄົນ ຊັ້ນ ມ7 ມີ​ນັກ­ຮຽນ 73 ຄົນ ເສັງ​ໄດ້ 100% ໃນ​ນີ້ ແຕ່​ລະ­ວິ​ຊາ​ໄດ້​ຄະ­ແນນ 7 ຂຶ້ນ​ໄປ 64 ຄົນ ເທົ່າ​ກັບ 87,67% ແຕ່​ລະ­ວິ​ຊາ ໄດ້​ຄະ­ແນນ 9 ຂຶ້ນ​ໄປ 4 ຄົນ ໄດ້​ຄະ­ແນນ​ອັນ​ດັບ 1 ນວ 1 ຄົນ ນອກ­ຈາກ​ການ​ຮຽນ-ການ​ສອນ​ແລ້ວ ຄູ-ອາ­ຈານ ແລະ ນັກ­ຮຽນ​ຍັງ​ເຂົ້າ​ຮ່ວມ​ກິດ­ຈະ­ກຳ​ຢູ່​ພາຍ​ໃນ ແລະ ຕ່າງ­ປະ­ເທດ ສາ­ມາດ​ຍາດ​ໄດ້​ຫຼຽນ ແລະ ການ​ຍ້ອງ­ຍໍ​ຈາກ​ຫຼາຍ​ລາຍ­ການ ເຊິ່ງ​ສົກ­ຮຽນ​ນີ້​ນັກ­ຮຽນ​ຊັ້ນ  ມ7 ໄດ້​ຮັບ​ທຶນ​ການ​ສຶກ​ສາ​ໄປ​ຮຽນ​ຕໍ່​ລະ­ດັບ​ປະ­ລິນ­ຍາ​ຕີ​ຢູ່​ຕ່າງ­ປະ­ເທດ ຈາກ​ບໍ­ລິ­ສັດ​ພີ​ອາ​ທີ່​ປຶກ­ສາ​ການ​ສຶກ​ສາ​ຈຳ­ກັດ 2 ທຶນ ສາ­ຂາ​ອັກ­ສອນ­ສາດ ພາ­ສາ​ຈີນ ຢູ່​ມະ­ຫາ­ວິ­ທະ­ຍາ­ໄລ​ຢຸນ​ນານ ສປ ຈີນ ທຶນ​ຈາກ​ສູນ​ພາ­ສາ​ຈີນ​ອຳ​ມະ​ລີ 4 ທຶນ ສາ­ຂາ​ອອກ​ແບບ​ໂປຣ​ແກມ​ມັລ​ຕີ​ມີ​ເດຍ ຢູ່​ມະ­ຫາ­ວິ­ທະ­ຍາ­ໄລ​ເສິນ​ຕູ 1 ສປ ຈີນ ທຶນ​ຈາກ​ສະ​ຖາ​ບັນ​ປັນ­ຍາ​ພິ​ວັດ 6 ທຶນ ສາ­ຂາ​ບໍ­ລິ­ຫານ​ທຸ­ລະ​ກິດ​ສະ­ໄໝ​ໃໝ່ ຢູ່​ບາງ­ກອກ ຣາ​ຊະ​ອາ­ນາ­ຈັກ​ໄທ.

    ຈາກ​ຜົນ­ງານ​ດັ່ງ­ກ່າວ ເຮັດ​ໃຫ້​ຄູ-ອາ­ຈານ​ໄດ້​ຮັບ​ການ​ຍ້ອງ­ຍໍ ໃນ​ນີ້ ມີ​ຜູ້­ອຳ­ນວຍ­ການ​ດີ­ເດັ່ນ 3 ຄົນ ຄູ​ເກ່ງ 10 ຄົນ ຄູ​ເດັ່ນ​ປະ­ເພດ 1 ຈຳ­ນວນ 41 ຄົນ ປະ­ເພດ 2 ຈຳ­ນວນ 17 ຄົນ ຄູ​ເຄື່ອນ​ໄຫວ​ດີ­ເດັ່ນ 17 ຄົນ ໄດ້​ຮັບ​ການ​ຍ້ອງ­ຍໍ​ຈາກ​ຫ້ອງ­ການ​ສຶກ​ສາ​ເມືອງ 12 ຄົນ ໄດ້​ຮັບ​ການ​ຍ້ອງ­ຍໍ​ຈາກ​ຫ້ອງ­ການ​ຊາວ​ໜຸ່ມ​ເມືອງ 25 ຄົນ.

ຂ່າວທີ່ກ່ຽວຂ້ອງ