ຂ່າວຫຼ້າສຸດ

ມອບ-ຮັບໜ້າທີ່ຫົວໜ້າຫ້ອງການ ຄບຕ

857 16 ສ.ຫ. 2019 ຂ່າວໜ້າ​ໜຶ່ງ
ມອບ-ຮັບໜ້າທີ່ຫົວໜ້າຫ້ອງການ ຄບຕ

    ພິ­ທີ​ມອບ-ຮັບ​ໜ້າ­ທີ່ ລະ­ຫວ່າງ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ຜູ້​ເກົ່າ ແລະ ທ່ານ ບຸນ​ຈັນ ແກ້ວ​ສີ​ທຳ​ມະ ຮອງ​ຫົວ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ ມາ​ເປັນ​ຫົວ­ໜ້າ​ຫ້ອງ­ການ ຄບຕ ຜູ້​ໃໝ່ ຈັດ​ຂຶ້ນ​ວັນ​ທີ 15 ສິງ ຫາ 2019 ຢູ່​ຫ້ອງ­ການ ຄບຕ ມີ​ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຫົວ­ໜ້າ ຮອງ​ຫົວ­ໜ້າ​ພະ​ແນກ ຂະ­ແໜງ ກອງ ຄບຕ ປະ­ຈຳ­ເມືອງ ແລະ ພະ­ນັກ­ງານ​ເຂົ້າ​ຮ່ວມ.

    ໂອ­ກາດ​ນີ້ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ໄດ້​ຂຶ້ນ​ຜ່ານ​ຜົນ­ງານ​ການ­ເຄື່ອນ­ໄຫວ​ວຽກ​ງານ​ຕະ­ຫຼອດ​ໄລ­ຍະ​ປະ­ຕິ­ບັດ ໜ້າ­ທີ່ 3 ປີ​ທີ່​ໄດ້​ເອົາ­ໃຈ­ໃສ່​ວຽກ​ອະ­ນາ­ໄມ ຮັກ­ສາ​ຄວາມ​ສະ­ອາດ ເປັນ­ຕົ້ນ ວຽກ​ງານ​ອະ­ນາ­ໄມ​ຕາມ​ເສັ້ນ­ທາງ​ຫຼັກ​ໃນ​ຕົວ​ເມືອງ 22 ເສັ້ນ ທີ່​ມີ​ຄວາມ​ຍາວ 90.212 ແມັດ ໃນ​ນີ້ ຈັດ​ພະ­ນັກ­ງານ​ປັດ­ກວາດ 57 ຄົນ (1 ຄົນ​ຮັບ­ຜິດ­ຊອບ 800 ແມັດ​ຕໍ່​ວັນ) ແລະ ນຳ​ໃຊ້​ກົນ​ຈັກ​ເຂົ້າ​ໃນ​ການ​ບົວ­ລະ­ບັດ​ຮັກ­ສາ​ເປັນ​ປະ­ຈຳ​ທຸກ​ວັນ ແຕ່ 7:00-15:00 ໂມງ (ຍົກ­ເວັ້ນ​ວັນ​ອາ­ທິດ) ແຕ່​ຍ້ອນ​ງົບ­ປະ­ມານ​ມີ​ຈຳ­ກັດ ສາ­ມາດ​ປະ­ຕິ­ບັດ​ວຽກ​ປັດ­ກວາດ​ສາຍ​ທາງ​ໄດ້​ທັງ​ໝົດ 14 ເສັ້ນ ຍາວ 45.600 ແມັດ ສ່ວນ​ເສັ້ນ­ທາງ​ທີ່​ເຫຼືອ​ໄດ້​ໃຊ້​ກຳ­ລັງ​ຂອງ​ມວນ​ຊົນ ແລະ ກຳ­ລັງ​ຕະ­ລຸມ­ບອນ​ລົງ​ແກ້​ໄຂ​ເປັນ​ບາງ​ຄັ້ງ​ຄາວ ນອກ​ນີ້ ໄດ້​ເອົາ­ໃຈ­ໃສ່​ວຽກ​ງານ​ອະ ນາ​ໄມ​ຄອງ​ລະ­ບາຍ​ນ້ຳ ວຽກ​ບໍ­ລິ­ການ​ຂົນ­ສົ່ງ​ຂີ້​ເຫຍື້ອ ວຽກ​ຂະ​ບວນ​ການ​ລວມ ວຽກ​ປະ­ດັບ​ປະ­ດາ ວຽກ​ຮ່ວມ​ມື​ກັບ​ໂຄງ­ການ ແລະ ອື່ນໆ ສ່ວນ​ໜ້າ​ວຽກ​ທີ່​ຈະ​ຕ້ອງ​ໄດ້​ສຸມ​ໃສ່​ໃນ​ສະ­ເພາະ​ໜ້າ ແຕ່​ນີ້​ຮອດ​ທ້າຍ​ປີ 2019 ໂດຍ​ສະ­ເພາະ ຄວາມ​ຮັບ​ຜິດ ຊອບ ຮັກ­ສາ​ຄວາມ​ສະ­ອາດ​ຈົບ­ງາມ ເພື່ອ​ກຽມ​ຮັບ​ຕ້ອນ​ປະ­ທາ­ນາ­ທິ­ບໍ­ດີ ສ ເກົາ­ຫຼີ ທີ່​ຈະ​ມາ​ຢ້ຽມ­ຢາມ​ລາວ ກອງ​ປະ­ຊຸມ​ວຽກ​ງານ​ທ່ອງ​ທ່ຽວ​ເຈົ້າ​ນະ­ຄອນ 5 ປະ­ເທດ​ລຸ່ມ​ແມ່­ນ້ຳ​ຂອງ ງານ​ປະ­ເພ­ນີ​ບຸນ­ຊ່ວງ­ເຮືອ ບຸນ­ທາດ­ຫຼວງ ພິ­ເສດ ເລີ່ມ​ແຕ່​ເດືອນ​ສິງ­ຫາ​ກ້າວ​ສູ່​ລະ­ດູ­ຝົນ ບັນ­ຫາ​ນ້ຳ​ຖ້ວມ​ຂັງ​ຕາມ​ເສັ້ນ­ທາງ ງ່າ­ໄມ້​ຫັກ​ລົ້ມ​ຕາມ​ເສັ້ນ­ທາງ​ຕ່າງໆ​ຕ້ອງ​ໄດ້​ເປັນ​ເຈົ້າ​ການ​ແກ້​ໄຂ​ຢ່າງ​ຕັ້ງ­ໜ້າ ລວມ​ທັງ​ວຽກ​ງານ​ວິ­ຊາ​ສະ­ເພາະ​ຂອງ​ຫ້ອງ­ການ ຄບຕ.

    ຕອນ​ທ້າຍ ທ່ານ ອາດ​ສະ­ພັງ​ທອງ ສີ​ພັນ​ດອນ ໄດ້​ກ່າວ​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຜົນ­ງານ​ທີ່​ທ່ານ​ຫົວ­ໜ້າ​ຫ້ອງ ການ ຄບຕ ຜູ້​ເກົ່າ ພ້ອມ​ດ້ວຍ​ຄະ­ນະ​ຍາດ​ມາ​ໄດ້​ໃນ​ໄລ­ຍະ​ຜ່ານ​ມາ ຖື​ເປັນ​ບົດ­ຮຽນ ແລະ ປະ­ສົບ​ການ​ຫຼາຍ​ດ້ານ​ທີ່​ເຕັມ​ໄປ​ດ້ວຍ​ຂໍ້​ສະ­ດວກ ແລະ ຂໍ້​ຫຍຸ້ງ­ຍາກ ສິ່ງ​ທ້າ​ທາຍ​ຫຼາຍ​ດ້ານ​ທີ່​ຈະ​ຕ້ອງ​ພ້ອມ​ກັນ​ສືບ­ຕໍ່ ໂດຍ​ສະ­ເພາະ ຫົວ­ໜ້າ​ຫ້ອງ­ການ ຄບຕ ຜູ້​ໃໝ່ ເຖິງ​ວ່າ​ຈະ​ມີ​ປະ­ສົບ​ການ​ຫຼາຍ​ດ້ານ​ໃນ​ໄລ­ຍະ​ຜ່ານ​ມາ ແຕ່​ສິ່ງ​ສຳ­ຄັນ​ທີ່​ຈະ​ຕ້ອງ​ພ້ອມ​ກັນ​ເອົາ­ໃຈ­ໃສ່​ສືບ­ຕໍ່​ຄື​ການ​ປະ­ສານ​ສົມ­ທົບ​ແໜ້ນ ເຮັດ​ວຽກ​ເປັນ​ໝູ່​ຄະ­ນະ ສ້າງ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ໃຫ້​ສູງ ເພື່ອ​ພ້ອມ​ກັນ​ປະ­ຕິ­ບັດ​ໜ້າ­ທີ່​ວຽກ​ງານ ພ້ອມ​ທັງ​ເອົາ­ໃຈ­ໃສ່​ສືບ­ຕໍ່​ສຶກ​ສາ​ອົບ­ຮົມ​ແນວ​ຄິດ-ການ­ເມືອງ​ໃຫ້​ສະ­ມາ­ຊິກ​ພັກ ແລະ ພະ­ນັກ­ງານ​ຂຸດ​ຄົ້ນ​ທ່າ­ແຮງ​ບົ່ມ​ຊ້ອນ ຫົວ ຄິດ​ປະ­ດິດ​ສ້າງ ເພື່ອ​ສຸມ​ໃສ່​ການ​ພັດ­ທະ­ນາ ແກ້​ໄຂ​ຈຸດ​ອ່ອນ ຂໍ້­ຄົງ­ຄ້າງ ໂດຍ​ສະ­ເພາະ ຫາງ​ສຽງ​ຈົ່ມ​ວ່າ​ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ສັງ­ຄົມ​ໃຫ້​ໄດ້​ຮັບ​ການ​ແກ້​ໄຂ​ເປັນ​ກ້າວໆ.

ຂ່າວທີ່ກ່ຽວຂ້ອງ