ຂ່າວຫຼ້າສຸດ

ໂທລະພາບນະຄອນຫຼວງ ຈະເລີ່ມທົດລອງອອກອາກາດໄວໆນີ້

753 16 ສ.ຫ. 2019 ຂ່າວໜ້າ​ໜຶ່ງ
ໂທລະພາບນະຄອນຫຼວງ ຈະເລີ່ມທົດລອງອອກອາກາດໄວໆນີ້

    ພິ­ທີ​ເຊັນ​ສັນ­ຍາ​ນຳ​ໃຊ້​ດາວ​ທຽມ​ລາວ ໃນ​ການ​ສົ່ງ​ສັນ­ຍານ​ໂທລະ­ພາບ​ລະ­ຫວ່າງ​ສະ­ຖາ­ນີ​ໂທລະ­ພາບ​ນະ­ຄອນຫຼວງ​ວຽງ​ຈັນ (ນວ) ແລະ ບໍ­ລິ­ສັດ ດາວ​ທຽມ​ລາວ​ເອ​ເຊຍ​ປາ​ຊີ​ຟິກ ຈຳ­ກັດ ຈັດ​ຂຶ້ນ​ວັນ​ທີ 15 ສິງ­ຫາ 2019 ທີ່​ສະ­ຖາ­ນີ​ວິ­ທະ­ຍຸ-ໂທລະ­ພາບ ນວ ຮ່ວມ​ລົງ​ນາມ ລະ­ຫວ່າງ ທ່ານ ສົມ​ປະ­ສົງ ສົມ​ພັກ­ດີ ຜູ້­ອຳ­ນວຍ­ການ​ສະ­ຖາ­ນີ​ວິ­ທະ­ຍຸ-ໂທລະ­ພາບ ນວ ແລະ ທ່ານ ຕິງ​ຍົງ​ບິງ ອຳ­ນວຍ​ການ​ໃຫຍ່​ບໍ­ລິ­ສັດ ດາວ​ທຽມ​ລາວ ເອ​ເຊຍ​ປາ​ຊີ​ຟິກ ຈຳ­ກັດ ມີ​ທ່ານ ຄຳ​ຄູນ ໃບ​ລາ​ຕຣີ ຮອງ​ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ນວ ທ່ານ ຄຳ​ປະ­ດິດ ເຂັມ​ມາ­ນິດ ເຈົ້າ­ເມືອງ​ໄຊ​ທາ­ນີ ຜູ້­ຕາງ­ໜ້າ​ກະ­ຊວງ ຖວ​ທ ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ສື່­ສານ ພ້ອມ​ດ້ວຍ​ພະ­ແນກ­ການ​ອ້ອມ​ຂ້າງ ຄະ­ນະ​ອຳ­ນວຍ​ການ ແລະ ພະ­ນັກ­ງານ​ທີ່​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

    ທ່ານ ສົມ​ປະ­ສົງ ສົມ​ພັກ­ດີ ກ່າວ​ວ່າ: ສະ­ຖາ­ນີ​ໂທລະ­ພາບ ນວ ເປັນ​ສະ­ຖາ­ນີ​ໂທລະ­ພາບ​ດາວ​ທຽມ​ສ້າງ​ຂຶ້ນ​ປີ 2013 ເພື່ອ​ໃຫ້​ອອກ​ອາ­ກາດ​ທ່ວງ​ທັນ​ຕາມ​ກຳ­ນົດ​ເວ­ລາ ຈຶ່ງ​ໄດ້​ເຊັນ​ສັນ­ຍາ​ນຳ​ໃຊ້​ດາວ​ທຽມ​ດັ່ງ­ກ່າວ​ຂຶ້ນ​ເປັນ​ການ​ກະ­ຈາຍ​ການ​ອອກ​ອາ­ກາດ ເຊິ່ງ​ຄາດ​ວ່າ​ຈະ​ທົດ​ລອງ​ອອກ​ອາ­ກາດ​ໃນ​ວັນ​ທີ 23 ສິງ­ຫາ 2019 ເພື່ອ​ເປັນ​ຂອງ­ຂວັນ​ໂອ­ກາດ​ວັນ​ຢຶດ​ອຳ­ນາດ 23 ສິງ­ຫາ ຄົບ­ຮອບ 44 ປີ ໂດຍ​ຈະ​ອອກ​ອາ­ກາດ​ໃນ​ຊ່ອງ 9 ແລະ ເບື້ອງ​ຕົ້ນ​ຈະ​ອອກ​ອາ­ກາດ​ໂດຍ​ການ​ຈຶ້ງ​ໂລ​ໂກ້​ເພື່ອ​ໃຫ້​ຜູ້​ຊົມ​ຮັບ​ຮູ້​ວ່າ​ໄດ້​ດຳ­ເນີນ​ການ​ກະ­ກຽມ​ອອກ​ອາ­ກາດ​ເປັນ​ທີ່​ຮຽບ​ຮ້ອຍ​ແລ້ວ ຫຼັງ​ຈາກ​ນັ້ນ ຈະ​ກະ­ກຽມ​ຜະ­ລິດ​ລາຍ­ການ​ຕ່າງໆ ແລະ ຄາດ​ວ່າ​ຈະ​ອອກ​ອາ­ກາດ​ຢ່າງ​ເຕັມ​ຮູບ​ແບບ​ໃນ​ທ້າຍ​ປີ 2019.

    ບໍ­ລິ­ສັດ​ດາວ​ທຽມ​ລາວ​ເອ​ເຊຍ​ຈຳ­ກັດ ເປັນ​ບໍ­ລິ­ສັດ​ທີ່​ດຳ­ເນີນ​ທຸ­ລະ​ກິດ​ດ້ານ​ບໍ­ລິ­ການ​ດາວ​ທຽມ LAOSAT-1 ແລະ ໃຫ້​ບໍ­ລິ­ການ​ເຊົ່າ​ຊ່ອງ​ສັນ­ຍານ​ດາວ​ທຽມ ເຊິ່ງ​ມີ​ຄວາມ​ພ້ອມ​ດ້ານ​ເຕັກ­ນິກ ແລະ ມີ​ຄວາມ​ສາ­ມາດ​ຕອບ​ສະ­ໜອງ​ອຸ­ປະ­ກອນ​ຮັບ​ໃຊ້​ຕ່າງໆ ໃຫ້​ໄດ້​ຕາມ​ຄວາມ​ຕ້ອງ­ການ​ຂອງ​ສະ­ຖາ­ນີ​ວິ­ທະ­ຍຸ-ໂທລະ­ພາບ ນວ ເຂົ້າ​ໃນ​ການ​ດຳ­ເນີນ​ງານ​ຂອງ​ຕົນ ເພື່ອ​ຮັບ​ໃຊ້​ເຂົ້າ​ໃນ​ການ​ເຊື່ອມ​ສັນ­ຍານ​ໂທລະ­ພາບ ໃນ​ການ​ອອກ​ຂ່າວ​ທັງ​ພາຍ​ໃນ ແລະ ຕ່າງ­ປະ­ເທດ ໃຫ້​ປະ­ສົບ​ຜົນ­ສຳ­ເລັດ ແລະ ໄດ້​ຮັບ​ໝາກ­ຜົນ​ດັ່ງ​ທີ່​ກຳ­ນົດ​ໄວ້.

ຂ່າວທີ່ກ່ຽວຂ້ອງ