ຂ່າວຫຼ້າສຸດ

ສືບຕໍ່ພັດທະນານັກກີລາມວຍ ກຽມ ຊຽງຂວາງ ເກມ

799 16 ສ.ຫ. 2019 ວົງຈອນກີລາ
ສືບຕໍ່ພັດທະນານັກກີລາມວຍ ກຽມ ຊຽງຂວາງ ເກມ

    ສະ­ຫະ­ພັນ​ມວຍ​ລາວ ນະ­ຄອນ­ຫຼວງ​ວຽງ​ຈັນ ຈັດ​ກອງ​ປະ­ຊຸມ​ປືກ​ສາ​ຫາ​ເພື່ອ​ຫ້າງ​ຫາ​ກະ­ກຽມ​ຄວາມ​ພ້ອມ ຈະ​ຈັດ­ການ​ແຂ່ງ­ຂັນ​ຊົກ­ມວຍ​ມິດ­ຕະ­ພາບ ລະ­ຫວ່າງ ລາວ-ໄທ ແລະ ຕ່າງ​ຊາດ ເພື່ອ​ສ້າງ​ຄວາມ​ສະ­ໜຸກ​ສະ​ໜານ​ມ່ວນ­ຊື່ນ​ໃຫ້​ແຟນ​ພັນ​ແທ້​ມວຍ​ລາວ ກໍ​ຄື ພໍ່​ແມ່​ປະ­ຊາ­ຊົນ​ຊາວ​ລາວ ແລະ ແຂກ​ຕ່າງ​ດ້າວ​ທ້າວ​ຕ່າງ​ແດນ ໃນ​ງານ​ບຸນ​ປະ­ເພ­ນີ​ຂອງ​ຊາດ ໂດຍ​ສະ­ເພາະ​ແມ່ນ​ເປັນ​ການ​ພັດ­ທະ­ນາ ແລະ​ຄັດ​ເລືອກ​ນັກ​ມວຍ​ຜູ້​ທີ່​ມີ​ພອນ​ສະ­ຫວັນ​ດີ­ເດັ່ນ ກຽມ​ຕາງ­ໜ້າ​ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ​ງານ​ມະ​ຫະ ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 22 ມີ­ນາ ຫາ 1 ເມ­ສາ 2020.

    ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ມວຍ​ລາວ ມວຍ​ວູ​ຊູ ມວຍ​ປັນ​ຈັກ​ສີ​ລັດ ແລະ ມວຍ​ສາ­ກົນ ນະ­ຄອນ­ຫຼວງ​ວຽງ​ຈັນ ກ່າວ​ໃຫ້​ຮູ້​ວ່າ: ກອງ​ປະ­ຊຸມ​ໃນ​ຄັ້ງ​ນີ້ ກໍ​ເພື່ອ​ເປັນ​ການ​ປືກ​ສາ​ຫາ­ລື​ການ​ຫ້າງ​ຫາ​ກະ­ກຽມ​ຄວາມ​ພ້ອມ ຈະ​ຈັດ­ການ​ແຂ່ງ­ຂັນ​ຊົກ­ມວຍ ມິດ­ຕະ­ພາບ ລາວ-ໄທ ແລະ ຕ່າງ​ຊາດ ເພື່ອ​ສ້າງ​ຄວາມ​ສະ­ໜຸກ​ສະ​ໜານ​ມ່ວນ­ຊື່ນ​ໃຫ້​ແຟນ​ພັນ​ແທ້​ມວຍ​ລາວ ກໍ​ຄື ພໍ່​ແມ່​ປະ­ຊາ­ຊົນ​ຊາວ​ລາວ ໃນ​ງານ​ບຸນ​ປະ­ເພ­ນີ​ຂອງ​ຊາດ ເວົ້າ​ລວມ ເວົ້າ​ສະ­ເພາະ​ແມ່ນ​ງານ​ບຸນ​ຊວງ​ເຮືອ​ຍາວ​ປະ­ເພ­ນີ ທ່າ​ວັດ​ຈັນ ສະ­ຫຼອງ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ປະ­ຈຳ​ປີ 2019 ກາງ​ເດືອນ​ຕຸ­ລາ ແລະ ງານ​ບຸນ​ນະ ມັດ​ສະ­ການ​ພະ​ທາດ­ຫຼວງ​ວຽງ​ຈັນ ໃນ​ວັນ​ທີ 11 ພະ­ຈິກ 2019 ອີກ​ດ້ານ​ໜຶ່ງ​ກໍ​ເພື່ອ​ເປັນ​ການ​ກຳ­ນົດ​ໃຫ້​ແຕ່​ລະ​ສະ­ໂມ­ສອນ​ຄ້າຍ​ມວຍ​ອ້ອມ​ຂ້າງ 9 ຕົວ​ເມືອງ ໄດ້​ມີ​ການ​ສົ່ງ​ລາຍ​ຊື່​ນັກ​ມວຍ​ຂອງ​ຕົນ ໂດຍ​ສະ­ເພາະ​ຜູ້​ທີ່​ມີ​ຊື່​ສຽງ ທີ່​ໄປ​ແຂ່ງ­ຂັນ​ຢູ່​ສັງ­ວຽນ​ມວຍ​ປະ­ເທດ​ເພື່ອນ​ບ້ານ ເພື່ອ​ຈະ​ຂຶ້ນ​ແຜນ​ໃຫ້​ຂຶ້ນ​ສັງ­ວຽນ​ຊົກ​ເທິງ​ເວ­ທີ​ຂອງ​ພວກ​ເຮົາ ແນ­ໃສ່​ສ້າງ​ໃຫ້​ເຂົາ­ເຈົ້າ​ກາຍ­ເປັນ​ນັກ​ຊົກ​ມື​ອາ­ຊີບ ນອກ­ຈາກ​ນັ້ນ ກໍ​ເພື່ອ​ເປັນ​ການ​ສ້າງ​ຄວາມ​ສະ­ໜຸກ​ສະ​ໜານ​ມ່ວນ­ຊື່ນ​ໃຫ້​ແກ່​ກອງ​ເຊຍ​ຊາວ​ລາວ ແລະ ຊາວ​ຕ່າງ­ປະ­ເທດ​ໄດ້​ຊົມ ແລະ ເຊຍ​ການ​ແຂ່ງ­ຂັນ​ມວຍ​ຄູ່​ດຸ­ເດືອດ ທີ່​ພວກ​ເຮົາ​ຈະ​ຈັດ​ໃຫ້​ມີ​ຊົກ​ກັນ​ເຖີງ 4 ຄູ່ ໃນ​ທຸກໆ​ວັນ​ເສົາ ຂອງ​ແຕ່​ລະ​ອາ­ທິດ​ອີກ​ດ້ວຍ.

    ກອງ​ປະ­ຊຸມ​ໃນ​ຄັ້ງ​ນີ້ ຈັດ​ຂຶ້ນ​ເມື່ອ​ວັນ​ທີ 12 ສິງ­ຫາ 2019 ທີ່​ຫ້ອງ­ການ​ສະ­ຫະ­ພັນ​ມວຍ​ລາວ ນະ­ຄອນ­ຫຼວງ​ວຽງ​ຈັນ ໂດຍ​ການ​ເປັນ​ປະ­ທານ​ຂອງ​ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ມວຍ​ລາວ ມວຍ​ວູ​ຊູ ມວຍ​ປັນ​ຈັກ​ສີ​ລັດ ແລະ ມວຍ​ສາ­ກົນ ນະ­ຄອນ­ຫຼວງ​ວຽງ​ຈັນ ທັງ​ເປັນ​ປະ­ທານ​ສະ­ໂມ­ສອນ​ມວຍ​ຄຳ​ເສັງ ມີ​ບັນ­ດາ​ຄະ­ນະ​ປະ­ທານ ຄະ­ນະ​ຮັບ­ຜິດ­ຊອບ​ແຕ່​ລະ​ຄ້າຍ​ມວຍ  ຄະ­ນະ​ຮັບ­ຜິດ­ຊອບ​ຈັດ­ການ​ແຂ່ງ­ຂັນ ແລະ ຄະ­ນະ​ກຳ­ມະ­ການ​ຕັດ­ສິນ ເຂົ້າ​ຮ່ວມ​ຢ່າງ​ພ້ອມ­ພຽງ.

ຂ່າວທີ່ກ່ຽວຂ້ອງ