ມອບ-ຮັບໜ້າທີ່ຫົວໜ້າພະແນກ ຖວທ ນວ

1.209 15 ສ.ຫ. 2019 ຂ່າວໜ້າ​ໜຶ່ງ
ມອບ-ຮັບໜ້າທີ່ຫົວໜ້າພະແນກ ຖວທ ນວ

    ພິ­ທີ​ມອບ-ຮັບ​ໜ້າ­ທີ່​ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ)  ຜູ້​ເກົ່າ ທ່ານ ຄຳ​ປະ­ດິດ ເຂັມ​ມາ­ນິດ ແລະ ຜູ້​ໃໝ່ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຈັດ​ຂຶ້ນ​ວັນ​ທີ 14 ສິງ­ຫາ 2019 ທີ່​ພະ​ແນກ ຖວ​ທ ນວ ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເລ­ຂາ​ຄະ­ນະ​ພັກ ຮອງ​ເຈົ້າ​ຄອງ​ນະ­ຄອນ ຫຼວງ​ວຽງ​ຈັນ ຫົວ­ໜ້າ ຮອງ​ຫົວ­ໜ້າ​ພະ​ແນກ ຫົວ­ໜ້າ​ສູນ ກອງ​ວິ­ຊາ​ການ ຫ້ອງ­ການ ຖວ​ທ ເມືອງ ແຂກ​ຖືກ​ເຊີນ ແລະ ພະ­ນັກ­ງານ​ເຂົ້າ​ຮ່ວມ.

    ໃນ​ພິ­ທີ ທ່ານ​ນາງ ດຳ​ດວນ ຈັນ­ທະ​ວົງ ຮອງ​ຫົວ­ໜ້າ​ຄະ­ນະ​ຈັດ​ຕັ້ງ ນວ ໄດ້​ຜ່ານ​ມະ­ຕິ​ຕົກ­ລົງ​ຂອງ​ເຈົ້າ​ຄອງ ນວ ວ່າ​ດ້ວຍ​ການ​ຍົກ­ຍ້າຍ ແລະ ແຕ່ງ­ຕັ້ງ​ພະ­ນັກ­ງານ ໂດຍ​ແຕ່ງ­ຕັ້ງ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ໄປ​ຮັບ​ໜ້າ­ທີ່​ໃໝ່ ເປັນ​ເຈົ້າ­ເມືອງ​ໄຊ​ທາ­ນີ ແລະ ແຕ່ງ­ຕັ້ງ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ມາ​ຮັບ​ໜ້າ­ທີ່​ໃໝ່ ເປັນ​ຫົວ­ໜ້າ​ພະ​ແນກ ຖວ​ທ ນວ.

    ໂອ­ກາດ​ນີ້ ທ່ານ ຄຳ​ປະ­ດິດ ເຂັມ​ມາ­ນິດ ໄດ້​ຂຶ້ນ​ຜ່ານ​ຜົນ­ງານ​ການ­ເຄື່ອນ­ໄຫວ​ວຽກ​ງານ​ຕະ­ຫຼອດ​ໄລ­ຍະ​ປະ­ຕິ­ບັດ​ໜ້າ­ທີ່ 10 ກວ່າ​ປີ ໃນ 3 ໜ້າ​ວຽກ ຄື: ວຽກ​ງານ​ຖະ​ແຫຼວງ​ຂ່າວ ວຽກ​ງານ​ວັດ­ທະ­ນະ­ທຳ ແລະ ວຽກ​ງານ​ທ່ອງ​ທ່ຽວ ຮ່ວມ​ກັບ​ຄະ­ນະ​ພັກ ຄະ­ນະ​ນຳ ພະ​ແນກ ສູນ ແລະ ກອງ​ວິ­ຊາ​ການ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ຍາດ​ແຍ່ງ​ຜົນ­ງານ​ມາ​ໄດ້​ຫຼາຍ​ດ້ານ ໂດຍ​ສະ­ເພາະ ວຽກ​ງານ​ຖະ­ແຫຼງ​ຂ່າວ​ໃນ​ການ​ປະ­ຕິ­ບັດ​ໜ້າ­ທີ່​ເປັນ​ກະ­ບອກ​ສຽງ​ໃຫ້​ແກ່​ອົງ­ຄະ​ນະ​ພັກ ນວ ຜ່ານ​ສື່​ຕ່າງໆ​ອອກ​ສູ່​ສັງ­ຄົມ ຈຳ­ນວນ​ຄອບ­ຄົວ ແລະ ບ້ານ​ວັດ­ທະ­ນະ­ທຳ​ເພີ່ມ​ຂຶ້ນ ປັດ­ຈຸ­ບັນ​ມີ​ຄອບ­ຄົວ​ວັດ­ທະ­ນະ­ທຳ 138.897 ຄອບ­ຄົວ ໃນ 159.519 ຄອບ­ຄົວ​ທົ່ວ ນວ ເທົ່າ​ກັບ 86,95% ບ້ານ​ວັດ­ທະ­ນະ­ທຳ 463 ບ້ານ ໃນ 481 ບ້ານ​ທົ່ວ ນວ ເທົ່າ​ກັບ 96,25%.

    ໂອ­ກາດ​ນີ້ ທ່ານ ສີ​ຫຸນ ສິດ­ທິ​ລື​ໄຊ ໄດ້​ກ່າວ​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຜົນ­ງານ​ທີ່​ທ່ານ​ຫົວ­ໜ້າ​ພະ​ແນກ ຖວ​ທ ນວ ຜູ້​ເກົ່າ ພ້ອມ​ດ້ວຍ​ຄະ­ນະ ທີ່​ຍາດ​ມາ​ໄດ້​ໃນ​ໄລ­ຍະ​ຜ່ານ​ມາ ຖື​ເປັນ​ບົດ­ຮຽນ ແລະ ປະ­ສົບ​ການ​ຫຼາຍ​ດ້ານ ເຊິ່ງ​ເຕັມ​ໄປ​ດ້ວຍ​ຂໍ້​ສະ­ດວກ ແລະ ຂໍ້​ຫຍຸ້ງ­ຍາກ ສິ່ງ​ທ້າ​ທາຍ​ຫຼາຍ​ດ້ານ ທີ່​ຈະ​ຕ້ອງ​ພ້ອມ​ກັນ​ສືບ­ຕໍ່ ໂດຍ​ສະ­ເພາະ ຫົວ­ໜ້າ​ພະ​ແນກ ຖວ​ທ ນວ ຜູ້​ໃໝ່ ເຖິງ​ວ່າ​ຈະ​ມີ​ປະ­ສົບ​ການ​ຫຼາຍ​ດ້ານ​ໃນ​ໄລ­ຍະ​ຜ່ານ​ມາ ແຕ່​ສິ່ງ​ສຳ­ຄັນ​ທີ່​ຈະ​ຕ້ອງ​ພ້ອມ​ກັນ​ເອົາ­ໃຈ­ໃສ່​ສືບ­ຕໍ່​ຄື​ການ​ປະ­ສານ​ສົມ­ທົບ​ແໜ້ນ ເຮັດ​ວຽກ​ເປັນ​ໝູ່​ຄະ­ນະ ສ້າງ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ໃຫ້​ສູງ ເພື່ອ​ພ້ອມ​ກັນ​ປະ­ຕິ­ບັດ​ໜ້າ­ທີ່​ວຽກ​ງານ ພ້ອມ​ທັງ​ເອົາ­ໃຈ­ໃສ່​ສືບ­ຕໍ່​ສຶກ​ສາ​ອົບ­ຮົມ​ການ­ເມືອງ-ແນວ​ຄິດ​ໃຫ້​ສະ­ມາ­ຊິກ​ພັກ ແລະ ພະ­ນັກ­ງານ ຂຸດ​ຄົ້ນ​ທ່າ­ແຮງ​ບົ່ມ​ຊ້ອນ ຫົວ­ຄິດ​ປະ­ດິດ​ສ້າງ ເພື່ອ​ສຸມ​ໃສ່​ການ​ພັດ­ທະ­ນາ ແກ້​ໄຂ​ຈຸດ​ອ່ອນ ຂໍ້­ຄົງ­ຄ້າງ ໂດຍ​ສະ­ເພາະ ຫາງ​ສຽງ​ຈົ່ມ​ວ່າ ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ສັງ­ຄົມ​ໃຫ້​ໄດ້​ຮັບ​ການ​ແກ້​ໄຂ​ເປັນ​ກ້າວໆ ສືບ­ຕໍ່​ປະ­ຕິ­ບັດ​ແຜນ​ພັດ­ທະ­ນາ​ວຽກ​ງານ ຂະ­ແໜງ ຖວ​ທ ຕິດ​ພັນ​ກັບ​ຂະ​ບວນ​ການ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ວຽກ​ງານ 6 ສ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ນວ ກໍ​ຄື ແຫ່ງ​ຊາດ ໃຫ້​ບັນ­ລຸ​ໄດ້​ຕາມ​ຈຸດ­ປະ­ສົງ​ລະ­ດັບ​ຄາດ­ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ