ຮຸ່ງອາລຸນ ຂົນສົ່ງດ່ວນ ບໍລິການຂົນສົ່ງວ່ອງໄວ ປອດໄພ

1.089 15 ສ.ຫ. 2019 ຂ່າວໜ້າ​ໜຶ່ງ
ຮຸ່ງອາລຸນ ຂົນສົ່ງດ່ວນ ບໍລິການຂົນສົ່ງວ່ອງໄວ ປອດໄພ

    ບໍ­ລິ­ສັດ​ຮຸ່ງ​ອາ​ລຸນ​ຂົນ­ສົ່ງ​ດ່ວນ ດຳ­ເນີນ​ທຸ­ລະ​ກິດ​ກ່ຽວ​ກັບ​ການ​ຂົນ­ສົ່ງ​ພັດ­ສະ­ດຸ​ທົ່ວ​ປະ­ເທດ ເພື່ອ​ຕອບ​ສະໜອງ​ການ­ຈຳ­ໜ່າຍ​ສິນ­ຄ້າ​ແບບ​ໃໝ່ ໂດຍ​ສະ­ເພາະ ສິນ­ຄ້າ​ພື້ນ​ບ້ານ ແລະ ສິນ­ຄ້າ​ໂອ​ດ໋ອບ ໃຫ້​ມີ​ຕະ­ຫຼາດ​ກວ້າງ​ຂຶ້ນ ຊ່ວຍ​ພັດ­ທະ­ນາ​ລະ­ບົບ​ຂົນ­ສົ່ງ​ໃຫ້​ມີ​ຄວມ​ສະ­ດວກ ວ່ອງ­ໄວ ປອດ​ໄພ ແລະ ລາ­ຄາ​ຍຸ­ຕິ​ທຳ.

    ທ່ານ ສີ​ສະ­ຫວັນ ມ່າ​ຢົງ​ເຊີນ ປະ­ທານ​ບໍ­ລິ­ສັດ​ຮຸ່ງ​ອາ​ລຸນ​ຂົນ­ສົ່ງ​ດ່ວນ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ເບື້ອງ​ຕົ້ນ​ຕົນ​ເລີ່ມ​ດຳ­ເນີນ​ທຸ­ລະ​ກິດ​ກ່ຽວ​ກັບ​ການ​ບໍ­ລິ­ການ​ຊິບ​ປິ້ງ (ທຸ­ລະ​ກິດ​ແບບ​ຄອບ­ຄົວ) ໂດຍ​ໄດ້​ນຳ​ເອົາ​ວິ­ທີ​ການ​ເຮັດ​ວຽກ​ແບບ​ໃໝ່​ມາ​ບໍ­ລິ­ຫານ​ຈັດ­ການ ເຮັດ​ໃຫ້​ບໍ­ລິ­ສັດ​ຂະ­ຫຍາຍ­ຕົວ​ຂຶ້ນ​ເລື້ອຍໆ ປະ­ທານ​ບໍ­ລິ­ສັດ (ພໍ່​ຂອງ​ຕົນ) ຈຶ່ງ​ໄດ້​ມອບ​ສິດ​ທັງ​ໝົດ​ໃຫ້​ຕົນ​ເປັນ​ຜູ້​ບໍ­ລິ­ຫານ ປັດ­ຈຸ­ບັນ​ມີ 4 ກິດ­ຈະ­ການ​ຫຼັກ ໃນ​ນີ້ 3 ກິດ­ຈະ­ການ​ແມ່ນ​ບໍ­ລິ­ສັດ​ຖື​ຮຸ້ນ 100% ຄື: ທຸ­ລະ​ກິດ​ທີ 1 ແມ່ນ​ບໍ­ລິ­ສັດ​ຮຸ່ງ​ອາ​ລຸນ​ຂາ​ອອກ-ຂາ​ເຂົ້າ ບໍ­ລິ­ການ​ຊິບ​ປິ້ງ​ສິນ­ຄ້າ​ຜ່ານ​ແດນ ແລະ ນຳ​ເຂົ້າ-ສົ່ງ​ອອກ ທຸ­ລະ​ກິດ​ທີ 2 ແມ່ນ​ຮ້ານ​ຂາຍ​ຄຳ​ຮຸ່ງ​ອາ​ລຸນ​ຢູ່​ແຂວງ​ບໍ່​ແກ້ວ ທຸ­ລະ​ກິດ​ທີ 3 ແມ່ນ​ບໍ­ລິ­ສັດ​ຮຸ່ງ​ອາ​ລຸນ​ຂົນ­ສົ່ງ​ດ່ວນ ສ່ວນ​ທຸ­ລະ​ກິດ​ທີ 4 ແມ່ນ​ຂາຍ­ເຄື່ອງ-ອຸ­ປະ­ກອນ​ກີ­ລາ (ສູນ​ຈຳ­ໜ່າຍ​ເຄື່ອງ​ກີ­ລາ EVO) ເຊິ່ງ​ບໍ­ລິ­ສັດ​ເປັນ​ຂາ​ຮຸ້ນ​ໃຫຍ່.

    ສະ­ເພາະ​ບໍ­ລິ­ສັດ​ຮຸ່ງ​ອາ​ລຸນ​ຂົນ­ສົ່ງ​ດ່ວນ ສ້າງ​ຂຶ້ນ​ຍ້ອນ​ເຫັນ​ການ​ຈະ­ເລີນ​ເຕີບ​ໂຕ​ຕາມ​ຍຸກ​ສະ­ໄໝ ສິນ­ຄ້າ​ອອນ​ລາຍ ແລະ ທຸ­ລະ​ກິດ​ອີ​ຄອມ​ເມີດ ກຳ­ລັງ​ເຕີບ​ໂຕ ຢູ່​ປະ­ເທດ​ເພື່ອນ​ບ້ານ​ກໍ​ຂະ­ຫຍາຍ­ຕົວ​ສູງ ເພື່ອ​ຕອບ​ສະ­ໜອງ​ສິນ­ຄ້າ​ອອນ​ລາຍ ການ​ຄ້າ-ຂາຍ​ແບບ​ໃໝ່ ພິ­ເສດ​ເພື່ອ​ກະ­ຈາຍ​ສິນ­ຄ້າ​ພາຍ​ໃນ ໂດຍ​ສະ­ເພາະ ສິນ­ຄ້າ​ພື້ນ​ບ້ານ ແລະ ສິນ­ຄ້າ​ໂອ​ດ໋ອບ ໃຫ້​ມີ​ຕະ­ຫຼາດ​ກວ້າງ ຍ້ອນ​ຕົນ​ເຫັນ​ວ່າ​ຕະ­ຫຼາດ​ພາຍ​ໃນ​ປະ­ເທດ​ຍັງ​ມີ​ຄວາມ​ຕ້ອງ ການ​ສູງ ພຽງ​ແຕ່​ລະ­ບົບ​ຂົນ­ສົ່ງ​ຍັງ​ບໍ່​ຕອບ​ສະ­ໜອງ ຈຶ່ງ​ບໍ່​ສາ­ມາດ​ຈຳ­ໜ່າຍ​ສິນ­ຄ້າ​ໄດ້​ເທົ່າ​ທີ່​ຄວນ ຫຼື ຂາຍ​ໄດ້​ກໍ​ມີ­ຄ່າ​ບໍ­ລິ­ການ​ສູງ ເຮັດ​ໃຫ້​ຜູ້​ຊື້​ປ່ຽນ​ໃຈ​ບໍ່​ຊື້ ພວກ​ເຮົາ​ຈຶ່ງ​ຕັດ­ສິນ​ໃຈ​ມີ​ສ່ວນ​ຮ່ວມ​ໃນ​ການ​ພັດ­ທະ­ນາ​ລະ­ບົບ​ຂົນ­ສົ່ງ​ໃຫ້​ມີ​ຄວມ​ສະ­ດວກ ວ່ອງ­ໄວ ປອດ​ໄພ ແລະ ລາ­ຄາ​ຍຸ­ຕິ​ທຳ.

    ຈາກ​ການ​ເປັນ​ບໍ­ລິ­ສັດ​ທີ່​ເຮັດ​ແທ້​ທຳ​ຈິງ​ໃນ​ການ​ປະ­ກອບ­ສ່ວນ​ດ້ານ​ທຸ­ລະ​ກິດ ເມື່ອ​ບໍ່​ດົນ​ມາ​ນີ້​ຕົນ​ກໍ​ໄດ້​ຮັບ 2 ລາ­ງວັນ ເພື່ອ​ເປັນ​ກຳ­ລັງ​ໃຈ ແລະ ສ້າງ​ຄວາມ​ເຊື່ອ​ໝັ້ນ​ໃຫ້​ຜູ້​ຊົມ­ໃຊ້ ເຊິ່ງ​ລາ­ງວັນ​ທຳ​ອິດ​ແມ່ນ​ລາ­ງວັນ​ນັກ​ທຸ ລະ​ກິດ​ໜຸ່ມ​ດີ­ເດັ່ນ​ຂອງ ສປປ ລາວ ແລະ ລາ­ງວັນ​ນັກ­ທຸ­ລະ­ກິດ​ໜຸ່ມ​ດີ­ເດັ່ນ​ຂອງ​ອາ​ຊຽນ.

    ຮຸ່ງ​ອາ​ລຸນ​ຂົນ­ສົ່ງ​ດ່ວນ ເປັນ​ບໍ­ລິ­ສັດ​ທີ່​ໃຫ້​ບໍ­ລິ­ການ​ຂົນ­ສົ່ງ​ເຄື່ອງ​ຂະ­ໜາດ​ນ້ອຍ ນ້ຳ­ໜັກ​ບໍ່​ເກີນ 50 ກິ​ໂລ​ເຊິ່ງ​ເໝາະ​ສົມ​ກັບ​ການ​ບໍ­ລິ­ການ​ກະ­ຈາຍ​ສິນ­ຄ້າ​ແບບ​ໄວ ຖືກ­ຕ້ອງ ແລະ ລາ­ຄາ​ປະ­ຢັດ ສະ­ນັ້ນ ລູກ​ຄ້າ​ທີ່​ຕ້ອງ ການ​ສາ­ມາດ​ຕິດ­ຕໍ່​ໄດ້ ໂອ­ກາດ​ນີ້ ກໍ​ຂໍ​ຝາກ​ເຖິງ​ພາກ​ລັດ​ຊ່ວຍ​ສະ­ໜັບ­ສະ­ໜູນ​ທຸ­ລະ​ກິດ​ດ້ານ​ການ​ຂົນ­ສົ່ງ ກໍ​ຄື ທຸ ລະ​ກິດ​ອື່ນໆ ໃຫ້​ຄົນ​ລາວ​ໄດ້​ມີ​ເວ­ທີ ກໍ​ຄື ໂອ­ກາດ​ສະ­ແດງ​ຜົນ­ງານ ແລະ ຕິດ­ຕາມ​ຜົນ­ງານ​ກ່ອນ ເພາະ​ໄວ​ໜຸ່ມ​ລາວ​ສ່ວນ​ໃຫຍ່​ກໍ​ມີ​ຄວາມ​ສາ­ມາດ ພຽງ​ແຕ່​ຂາດ​ໂອ­ກາດ​ໃນ​ການ­ສະ­ແດງ​ອອກ ເຊິ່ງ​ອາດ​ເກີດ​ຈາກ​ຕົນ​ເອງ ຫຼື ສະ­ພາບ​ແວດ​ລ້ອມ ສິ່ງ​ສຳ­ຄັນ​ແມ່ນ​ຢາກ​ໃຫ້​ຄົນ​ລາວ​ເຊື່ອ​ໝັ້ນ​ຄົນ​ລາວ ແລະ ໃຫ້­ການ​ສະ­ໜັບ­ສະ­ໜູນ ເພາະ​ການ​ສະ­ໜັບ­ສະ­ໜູນ​ຂອງ​ຄົນ​ລາວ​ເຮົາ​ເອງ​ຈະ​ຊ່ວຍ​ໃຫ້​ທຸ­ລະ​ກິດ​ນັ້ນໆ ຫຼື ທຸ­ລະ​ກິດ​ເກີດ​ໃໝ່ ມີ​ທ່າ­ແຮງ ແລະ ກ້າວ​ໄປ​ຂ້າງ​ໜ້າ​ຢ່າງ​ໝັ້ນ­ຄົງ.

ຂ່າວທີ່ກ່ຽວຂ້ອງ