ຂ່າວຫຼ້າສຸດ

ນັກກີລາດຶງເຊືອກລາວ ກຽມຮ່ວມຊີງແຊັມອາຊຽນ-ອາຊີ

664 15 ສ.ຫ. 2019 ວົງຈອນກີລາ
ນັກກີລາດຶງເຊືອກລາວ ກຽມຮ່ວມຊີງແຊັມອາຊຽນ-ອາຊີ

    ນັກ­ກີ­ລາ​ດຶງ­ເຊືອກ​ທີມ​ຊາດ​ລາວ ທັງ​ປະ­ເພດ​ຍິງ-ຊາຍ ກຽມ​ເດີນ­ທາງ​ເຂົ້າ​ຮ່ວມ ການ​ແຂ່ງ­ຂັນ​ກີ­ລາ ດຶງ­ເຊືອກ​ຊີງ​ແຊັມ​ອາ​ຊຽນ ແລະ ອາ­ຊີ ປະ­ຈຳ​ປີ 2019 ຢູ່​ແຂວງ​ອາ​ຍຸດ​ທະ​ຍາ ປະ­ເທດ​ໄທ ເປັນ ເຈົ້າ­ພາບ ລະ­ຫວ່າງ​ວັນ​ທີ 13-16 ກັນ­ຍາ 2019.

     ອີງ​ຕາມ​ການ​ລາຍ​ງານ​ຂອງ​ທ່ານ ໄຕ­ລັດ ພຸດ​ທະ​ພົງ ຮອງ​ປະ­ທານ​ສະ­ຫະ­ພັນ​ກີ­ລາ​ດຶງ­ເຊືອກ ແຫ່ງ​ຊາດ​ລາວ ໃຫ້​ຮູ້​ວ່າ: ຕາມ​ຄຳ​ເຊີນ​ຂອງ​ສະ­ຫະ­ພັນ​ດຶງ­ເຊືອກ​ແຫ່ງ​ອາ​ຊຽນ ແລະ ສະ­ຫະ­ພັນ​ດຶງ ເຊືອກ​ອາ­ຊີ ເຊື້ອ​ເຊີນ​ມາ​ຍັງ​ສະ­ຫະ­ພັນ​ດຶງ​ເຊືອ​ແຫ່ງ​ຊາດ​ລາວ ເພື່ອ​ເຂົ້າ​ຮ່ວມ​ການ​ແຂ່ງ­ຂັນ​ຄັ້ງ​ນີ້ ໂດຍ​ມີ​ນັກ­ກີ­ລາ​ດຶງ­ເຊືອກ​ລະ­ດັບ​ອາ​ຊຽນ​ເຂົ້າ​ຮ່ວມ​ທັງ​ໝົດ 9 ທີມ ແລະ ລະ­ດັບ​ອາ­ຊີ ເຂົ້າ​ຮ່ວມ​ທັງ​ໝົດ 19 ທີມ ສຳ­ລັບ​ການ​ເຝິກ­ຊ້ອມ​ຂອງ​ທີມ​ນັກ­ກີ­ລາ​ລາວ ແມ່ນ​ເຝິກ­ຊ້ອມ​ມາ​ຢ່າງ​ຕໍ່​ເນື່ອງ​ຕັ້ງ­ແຕ່​ເດືອນ​ມິ­ຖຸ­ນາ 2019 ເປັນ­ຕົ້ນ​ມາ ຢູ່​ໂຮງ­ຮຽນ​ມັດ­ທະ­ຍົມ​ສຶກ​ສາ​ສົມ­ບູນ​ວຽງ​ຈັນ (ມສ ວຽງ​ຈັນ).

    ພາຍ­ຫຼັງ​ໄດ້​ມີ​ການ​ເຝິກ­ຊ້ອມ​ມາ​ໄດ້​ໄລ­ຍະ​ໜຶ່ງ ເຫັນ​ວ່າ​ນັກ­ກີ­ລາ​ພວກ​ເຮົາ​ມີ​ການ​ເຝິກ­ຊ້ອມ​ເຕັມ­ທີ່ ທັງ​ປະ­ເພດ​ຍິງ-ຊາຍ ແລະ ພວກ​ເຮົາ​ຈະ​ສູ້​ຊົນ​ພາ​ນັກ­ກີ­ລາ​ຜ່ານ​ເຂົ້າ​ໄປ​ໃນ​ຮອບ​ຊີງ​ຊະ­ນະ​ເລີດ ໃນ​ລະ ດັບ​ອາ​ຊຽນ ສ່ວນ​ໃນ​ລະ­ດັບ​ອາ­ຊີ ພວກ​ເຮົາ​ກໍ​ຕັ້ງ​ຄວາມ​ຫວັງ​ທີ່​ຈະ​ຜ່ານ​ເຂົ້າ​ເຖິງ​ຮອບ 4 ທີມ​ສຸດ​ທ້າຍ ທັງ​ປະ­ເພດ​ຍິງ-ຊາຍ.

ຂ່າວທີ່ກ່ຽວຂ້ອງ