ເບິ່ງບ້ານເຂົາເອົາບົດຮຽນ 15-08-2019

337 15 ສ.ຫ. 2019 ຫົວຂໍ້ຂ່າວອື່ນໆ

    ໃນ​ຄໍ​ລຳ​ນີ້ ທ່ານ​ຈະ​ໄດ້​ຮູ້​ກັບ​ມາດ​ຕະ­ການ​ລົງ­ໂທດ​ໃນ​ຄະ­ດີ​ຂ້າ​ຄົນ​ຕາຍ ທີ່ ສ ເກົາ­ຫຼີ ເລື່ອງ ປາ​ກິດ​ສະ­ຖານ​ຫ້າມ​ນັກ​ການ­ເມືອງ​ນຳ​ໃຊ້​ສື່​ມວນ​ຊົນ ແລະ ຂ່າວ​ນະ­ໂຍ­ບາຍ​ບໍ­ລິ­ການ​ລົດ​ໂດຍ­ສານ​ສຳ­ລັບ​ຜູ້​ເຖົ້າ ທີ່ ຍີ່­ປຸ່ນ.

    ທີ່ ສ ເກົາ­ຫຼີ: ໃນ​ກາງ​ປີ 2015 ລັດ​ຖະ​ສະ­ພາ ສ ເກົາ­ຫຼີ ໄດ້​ລົງ­ມະ­ຕິ​ດ້ວຍ​ສຽງ​ສ່ວນ​ຫຼາຍ ເພື່ອ​ຮັບ­ຮອງ​ເອົາ​ກົດໝາຍ​ອາ­ຍາ​ສະ­ບັບ​ປັບ­ປຸງ ຂໍ້​ກຳ­ນົດ​ທີ່​ໄດ້​ຮັບ​ການ​ປັບ­ປຸງ​ນັ້ນ​ໄດ້​ແກ້​ມາດ­ຕາ​ທີ່​ເວົ້າ​ກ່ຽວ​ກັບ​ໂທດ​ໃນ​ຄະ­ດີ​ຄາ­ຕະ­ກຳ ຊຶ່ງ​ຖື​ວ່າ​ເປັນ​ການ​ກະ­ທຳ​ຜິດ​ທາງ​ອາ­ຍາ​ຂັ້ນ​ຮ້າຍ​ແຮງ ກົດ­ໝາຍ​ສະ­ບັບ​ປັບ­ປຸງ​ໄດ້​ກຳ­ນົດ​ໂທດ​ຄະ­ດີ​ຄາ­ຕະ­ກຳ​ຄົນ​ອື່ນ​ໂດຍ​ເຈ­ຕະ­ນາ ແລະ ວາງ​ແຜນ​ໄວ້​ລ່ວງ​ໜ້າ ຈາກ​ຕິດ​ຄຸກ 25 ປີ​ໃນ​ເມື່ອ​ກ່ອນ ເປັນ​ໂທດ​ຈຳ​ຄຸກ​ຕະ­ຫຼອດ​ຊີ­ວິດ ສ່ວນ​ການ​ເຮັດ​ໃຫ້​ຄົນ​ອື່ນ​ເສຍ​ຊີ­ວິດ​ຍ້ອນ​ຄວາມ​ປະ­ໝາດ ແລະ ຍ້ອນ​ອຸ­ບັດ­ເຫດ​ນັ້ນ ບໍ່​ພົວ­ພັນ​ກັບ​ມາດ­ຕາ​ທີ່​ກ່າວ​ມາ​ຂ້າງ​ເທິງ​ນີ້ ຫາກ​ຢ້ອນ​ຫຼັງ​ຄືນ​ໄປ​ໃນ​ອະ­ດີດ ກໍ​ຈະ​ເຫັນ​ວ່າ ການ​ກຳ­ນົດ​ໂທດ​ຂ້າ​ຄົນ​ອື່ນ​ດ້ວຍ​ເຈດ​ຕະ​ນາ ແລະ ມີ​ການ​ວາງ​ແຜນ​ໄວ້​ລ່ວງ​ໜ້າ​ນັ້ນ ໄດ້​ຮັບ​ການ​ປັບ­ປຸງ​ເປັນ​ແຕ່​ລະ​ໄລ­ຍະ ເຊັ່ນ: ໃນ​ເບື້ອງ​ຕົ້ນ ໄດ້​ກຳ­ນົດ​ໂທດ​ຕັດ​ອິດ­ສະ­ຫຼະ­ພາບ 15 ປີ ຕໍ່​ມາ​ໃນ​ປີ 2007 ໄດ້​ປັບ​ຂຶ້ນ​ເປັນ​ໂທດ​ຕິດ​ຄຸກ 25 ປີ ແລະ ໃນ​ປີ 2016 ໄດ້​ປັບ​ຂຶ້ນ​ເປັນ​ໂທດ​ຕິດ​ຄຸກ​ຕະ­ຫຼອດ​ຊີ­ວິດ.

    ທີ່ ປາ​ກິດ​ສະ­ຖານ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 11 ເດືອນ​ກໍ­ລະ­ກົດ​ປີ​ນີ້​ໃຫ້​ຮູ້​ວ່າ ທາງ​ການ​ປະ­ເທດ​ປາ​ກິດ​ສະ­ຖານ ໄດ້​ອອກ​ຄຳ​ສັ່ງ​ຕັດ​ສິດ​ການ​ເຂົ້າ​ເຖິງ​ສື່​ມວນ​ຊົນ​ໂດຍ​ບັນ­ດາ​ນັກ​ການ­ເມືອງ​ທີ່​ມີ​ຄະ­ດີ ຫຼື ກຳ­ລັງ​ຢູ່​ໃນ​ຂະ​ບວນ​ການ​ຕັດ­ສິນ ໝາຍ​ຄວາມ​ວ່າ ບັນ­ດາ​ນັກ​ການ­ເມືອງ​ທີ່​ມີ​ຄະ­ດີ​ຄວາມ​ຜິດ ຫຼື ພວມ​ຢູ່​ໃນ​ໄລ­ຍະ​ຖືກ​ຕັດ­ສິນ​ຄະ­ດີ​ຄວາມ​ຜິດ​ນັ້ນ​ຈະ​ບໍ່​ມີ​ສິດ​ນຳ​ໃຊ້​ການ​ບໍ­ລິ­ການ​ສື່​ມວນ​ຊົນ ເພື່ອ​ສະ­ແດງ​ທັດ​ສະ​ນາ ຫຼື ຄຳ​ຄິດ​ຄຳ​ເຫັນ​ຕ່າງໆ​ຂອງ​ພວກ​ຕົນ ສ່ວນ​ທາງ​ເບື້ອງ​ສື່​ມວນ​ຊົນ​ເອງ​ກໍ​ຖືກ​ຫ້າມ​ບໍ່​ໃຫ້​ສຳ­ພາດ ຫຼື ໃຫ້​ສິດ​ພວກ​ນັກ​ການ­ເມືອງ​ທີ່​ຕິດ​ຄະ­ດີ​ຖານ​ມີ​ຄວາມ​ຜິດ ສະ­ແດງ​ຄວາມ​ຄິດ​ເຫັນ​ຜ່ານ​ສື່​ມວນ​ຊົນ ທ່ານ​ນາ­ຍົກ ອິມ​ຣານ ຄານ ໄດ້​ເວົ້າ​ກ່ຽວ​ກັບ​ບັນ­ຫາ​ນີ້​ວ່າ “ບັນ­ດາ​ນັກ​ການ­ເມືອງ​ທີ່​ມີ​ຄວາມ​ຜິດ​ຖານ​ໄດ້​ປຸ້ນ​ຊາດ ເຮັດ​ໃຫ້​ປະ­ເທດ​ຊາດ​ຫຼົ້ມ­ຈົມ​ນັ້ນ ບໍ່​ສົມ­ຄວນ​ໄດ້​ຮັບ​ຄຳ​ສັນ­ລະ­ເສີນ (ດ້ວຍ​ການ​ໃຫ້​ສິດ​ອອກ​ຂ່າວ) ບໍ່​ມີ​ປະ­ເທດ​ປະ­ຊາ­ທິ­ປະ­ໄຕ​ໃດ​ດອກ​ໃນ​ໂລກ​ນີ້ ທີ່​ອະ­ນຸ­ຍາດ​ພວກ​ນີ້​ຖືກ​ຈັບ​ກຸມ​ໃນ​ຄະ­ດີ​ສໍ້​ລາດ​ບັງ​ຫຼວງ​ມີ​ຄຳ​ເຫັນ​ສຳ­ພາດ ຫຼື ນຳ​ໃຊ້​ເວ­ທີ​ສື່​ມວນ​ຊົນ...”.

    ທີ່ ຍີ່­ປຸ່ນ: ມີ​ຂ່າວ​ດີ​ສຳ­ລັບ​ຜູ້​ເຖົ້າ​ຊາວ​ຍີ່­ປຸ່ນ ກ່ຽວ​ກັບ​ແຜນ​ພັດ­ທະ­ນາ​ລົດ­ໄຟ​ຟ້າ​ຄວາມ​ໄວ​ຊ້າ​ສຳ­ລັບ​ຜູ້­ໂດຍ­ສານ​ອາ­ຍຸ​ສູງ ຂ່າວ​ບອກ​ວ່າ ໂຄງ­ການ​ລົດ​ໂດຍ­ສານ​ໄຟ­ຟ້າ​ສຳ­ລັບ​ຜູ້​ເຖົ້າ​ນີ້​ໄດ້​ຮັບ​ເງິນ​ກ້ອນ​ໜຶ່ງ​ໃນ​ຈຳ­ນວນ 400 ລ້ານ​ເຢັນ ຈາກ​ງົບ­ປະ­ມານ​ປະ­ຈຳ​ປີ​ນີ້ ລົດ­ໄຟ​ຟ້າ​ສະ­ເພາະ​ກິດ​ນີ້​ຈະ​ຮັບ​ໃຊ້​ຄົນ​ໂດຍ­ສານ​ຜູ້​ເຖົ້າ​ເວ­ລາ​ຕ້ອງ­ການ​ໄປ​ຈັບ​ຈ່າຍ​ຊື້​ສິນ­ຄ້າ​ຕາມ​ຮ້ານ​ຕ່າງໆ ແລະ ໄປ​ໂຮງ­ພະ­ຍາ­ບານ ແລະ ສະ­ຖານ­ທີ່​ຈຳ­ເປັນ​ອື່ນໆ ທາງ​ການ​ຍີ່­ປຸ່ນ ເຊື່ອ​ວ່າ ການ​ໃຫ້​ບໍ­ລິ­ການ​ໂດຍ­ສານ​ດັ່ງ­ກ່າວ ຈະ​ຊ່ວຍ​ຊຸກ­ຍູ້​ໃຫ້​ພວກ​ຜູ້​ເຖົ້າ​ໝົດ​ພາ­ລະ​ໃນ​ການ​ຂັບ​ລົດ​ເອົາ​ເອງ ຊຶ່ງ​ອາດ​ມີ​ຄວາມ​ສ່ຽງ​ເກີດ​ອຸ­ບັດ­ເຫດ​ສູງ ໂຄງ­ການ​ລົດ­ໄຟ​ຟ້າ​ຄວາມ​ໄວ​ຊ້າ (ບໍ່​ເກີນ 20 ກິ­ໂລ­ແມັດ/ໂມງ) ນີ້ ຈະ​ຜ່ານ​ການ​ທົດ​ລອງ​ແລ່ນ​ຢູ່​ບາງ​ເຂດ​ດັ່ງ­ນີ້: ເມືອງ​ອິ​ວາ​ກິ ແລະ ລິ​ຕາ​ເຕະ ທີ່ ຟູ​ກູ​ຊິ​ມະ ແລະ ໃນ​ບັນ­ດາ​ຕົວ​ເມືອງ​ໃນ​ເທ­ສະ​ບານ​ນະ­ຄອນ​ໂອ­ຊາ​ກະ ຊິ​ມາ​ເນະ ຮີ​ໂຣ​ຊິ​ມະ ກາ​ກາ​ວະ ແລະ ໂອ​ອິ​ຕະ.

ຂ່າວທີ່ກ່ຽວຂ້ອງ