5 ປະ​ເທດ ​ອອກ​ຖະ​ແຫຼ​​ງ​ການ​ຮ່ວມ​ກ່ຽວ​ກັບ​ການ​ຢຸດ​ຍິງ​ຢູ່​ໃນ​ລີ​ບີ

1.010 14 ສ.ຫ. 2019 ຂ່າວຕ່າງປະເທດ
5 ປະ​ເທດ ​ອອກ​ຖະ​ແຫຼ​​ງ​ການ​ຮ່ວມ​ກ່ຽວ​ກັບ​ການ​ຢຸດ​ຍິງ​ຢູ່​ໃນ​ລີ​ບີ

    ເມື່ອ​ວັນ​ທີ 11 ສິງຫາ​ທີ່​ຜ່ານ​ມາ ສ ອາ​ເມ​ຣິ​ກາ ອັງກິດ ຝຣັ່ງ ອີ​ຕາ​ລີ ແລະ  ສະຫະລັດ ອາ​ຣັບ ເອ​ມີ​ເຣດ (UAE) ໄດ້​ອອກ​ຖະແຫຼງການ​ຮ່ວມ ໂດຍ​ຮຽກຮ້ອງ​ໄປ​ຍັງ​ຝ່າຍ​ຕ່າງໆ​ທີ່​ເຂົ້າ​ຮ່ວມ​ການ​ພິພາດ​ຢູ່​ໃນ​ປະເທດ​ລີ​ບີ ໃຫ້​ຢຸດ​ຍິງ​ທັນທີ ແລະ ເປີດ​ການ​ສືບສວນ​ສອບ​ສວນ​ກ່ຽວ​ກັບ​ກັບ​ເຫດການ​ໂຈມ​ຕີ​ເມື່ອ​ບໍ່​ດົນ​ມາ​ນີ້ ທີ່​ນະຄອນ​ເບນ​ກາ​ຊີ ທີ່​ໄດ້​ສົ່ງ​ຜົນ​ໃຫ້​ເຈົ້າ​ໜ້າທີ່​ຂອງ​ສະຫະ​ປະຊາ​ຊາດ ເສຍ​ຊີວິດ 3 ຄົນ (ກ່ອນ​ໜ້າ​ນັ້ນ​ມີ​ລາຍ​ງານ​ຜູ້​ເສຍ​ຊີວິດ​ທີ່ 2 ຄົນ).

    ຖະແຫຼງການ​ຮ່ວມ​ດັ່ງກ່າວ ລະບຸ​ວ່າ ທັງ​ຫ້າ​ປະເທດ ກ່າວ​ປະນາມ​ຢ່າງ​ແຂງແຮງ​ຕໍ່​ເຫດການ​ໂຈມ​ຕີ ທີ່​ເກີດ​ຂຶ້ນ​ເມື່ອ​ວັນ​ທີ 10 ສິງຫາ ຢູ່​ທີ່​ນະຄອນ ເບນ​ກາ​ຊີ ພ້ອມ​ທັງ​ເນັ້ນ​ໜັກ​ວ່າ ຕ້ອງ​ໄດ້​ພິສູດ​ໃຫ້​ເຫັນ​ທັນທີ ກ່ຽວ​ກັບ​ສະພາບ ກໍ​ຄື​ກຳນົດ​ເຖິງ​ຊື່​ສຽງ​ຂອງ​ຜູ້​ກໍ່​ເຫດ ທີ່​ປະຕິບັດ​ການ​ໂຈມ​ຕີ ແລະ ນຳ​ເອົາ​ບັນດາ​ເປົ້າ​ໝາຍ​ຜູ້​ກໍ່​ເຫດ​ມາ​ລົງໂທດ. ຖະແຫຼງການ​ຮ່ວມ​ນັ້ນ ກໍ​ໄດ້​ຢືນຢັນ​ອີກ​ເທື່ອ​ໜຶ່ງ ເຖິງ​ການ​ສະໜັບສະໜູນ​ຂອງ ສ ອາ​ເມ​ຣິ​ກາ ອັງກິດ ຝຣັ່ງ ອີ​ຕາ​ລີ ແລະ  UAE ທີ່​ມີ​ຕໍ່​ພາລະກິດ​ຂອງ​ຄະນະ​ສະຫະ​ປະຊາ​ຊາດ ຢູ່​ໃນ​ລີ​ບີ.

    ໃນ​ປັດຈຸບັນ​ນີ້ ນະຄອນ​ເບນ​ກາ​ຊີ ຢູ່​ພາຍ​ໃຕ້​ການ​ຄວບ​ຄຸມ​ຂອງ​ກອງ​ກຳລັງ ທີ່​ຂະໜານ​ນາມ​ດ້ວຍ​ຕົນ​ເອງ​ວ່າ​ເປັນ​ກອງທັບ​ແຫ່ງ​ຊາດ​ລີ​ບີ (LNA) ພາຍ​ໃຕ້​ການ​ນຳພາ​ຂອງ​ນາຍ​ພົນ ຄາ​ລີ​ຟາ ຮາ​​ຟ​ຕາ. ນັບ​ແຕ່​ຕົ້ນ​ເດືອນ​ເມສາ​ປີ​ນີ້​ເປັນຕົ້ນ​ມາ LNA ໄດ້​ດຳເນີນ​ການ​ໂຈມ​ຕີ​ຫຼາຍ​ເທື່ອ ເພື່ອ​ຍາດ​ເອົາ​ສິດ​ຄວບ​ຄຸມ​ນະຄອນຫຼວງ ຕຣີ​ໂປ​ລີ ຈາກ​ລັດຖະບານ​ສາມັກຄີ​ແຫ່ງ​ຊາດ (GNA) ຂອງ​ລີ​ບີ ທີ່​ໄດ້​ຮັບ​ການ​ຮັບ​ຮູ້​ຈາກ​ສາກົນ.

    ອົງການ​ອະນາໄມ​ໂລກ (WHO) ໃຫ້​ຮູ້​ວ່າ ການ​ຍິງ​ຕໍ່ສູ້​ຢູ່​ໃນ​ລີ​ບີ ນັບ​ແຕ່​ເດືອນ​ເມສາ​ເປັນຕົ້ນ​ມາ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 1.000 ກວ່າ​ຄົນ ບາດເຈັບ 5.700 ຄົນ ແລະ ມີ 120.000 ກວ່າ​ຄົນ ຕ້ອງ​ອົບ​ພະ​ຍົບ​ໜີ​ໄພ​ຮຸນ​ແຮງ.

ຂ່າວທີ່ກ່ຽວຂ້ອງ