ຂ່າວຫຼ້າສຸດ

ພັກ INC ​ເລືອກ​ຕັ້ງ​ປະທານ​ຊົ່ວຄາວ

822 14 ສ.ຫ. 2019 ຂ່າວຕ່າງປະເທດ
ພັກ INC ​ເລືອກ​ຕັ້ງ​ປະທານ​ຊົ່ວຄາວ

    ເມື່ອ​ວັນ​ທີ 10 ສິງຫາ​ທີ່​ຜ່ານ​ມາ ຄະນະ​ກຳມະການ​ເຮັດ​ວຽກ (CWC) ຂອງ​ພັກ​ກອງ​ປະຊຸມ​ແຫ່ງ​ຊາດ​ອິນ​ເດຍ (INC) ໄດ້​ເລືອກ​ຕັ້ງ​ນາງ ໂຊ​ເນຍ ຄານ​ທີ (Sonia Gandhi) ເປັນ​ປະທານ​ຊົ່ວຄາວ​ຂອງ​ພັກ​ນີ້.

    ຕຳແໜ່ງ​ປະທານ INC ໄດ້​ຂາດ​ໄປ ຫຼັງ​ຈາກ​ທີ່​ທ່ານ ຣາ​ອູນ ຄານ​ທີ ລາ​ອອກ​ຈາກ​ຕຳແໜ່ງ ເມື່ອ​ວັນ​ທີ 25 ພຶດສະພາ​ທີ່​ຜ່ານ​ມາ ຍ້ອນ​ການ​ປະ​ລາ​ໄຊ​ຢ່າງ​ໜັກໜ່ວງ​ຂອງ​ພັກ ໃນ​ການ​ເລືອກ​ຕັ້ງ​ສະພາ​ຕ່ຳ.

    ການ​ທີ່​ນາງ ໂຊ​ເນຍ ຄານ​ທີ ກາຍເປັນ​ປະທານ​ຊົ່ວຄາວ​ນັ້ນ ເກີດ​ຂຶ້ນ​ທ່າມກາງ​ທີ່​ພາຍ​ໃນ INC ບໍ່​ເຫັນ​ພ້ອມ​ກັບ​ການ​ຄັດ​ເລືອກ​ຜູ້ນຳ​ຂອງ​ພັກ ທີ່​ບໍ່​ແມ່ນ​ຕະກຸນ ຄານ​ທີ. ກ່ອນ​ໜ້າ​ນັ້ນ ທ່ານ ຣາ​ອູນ ຄານ​ທີ ກໍ​ສະເໜີ​ບັນດາ​ການ​ນຳ​ສູງ​ສຸດ​ຂອງ​ພັກ ຄັດ​ເລືອກ​ເອົາ​ຜູ້​ສະໝັກ​ເລືອກ​ຕັ້ງ​ຜູ້​ໜຶ່ງ ທີ່ຢູ່​ນອກ​ຄອບຄົວ​ຂອງ​ຕົນ. ໃນ​ຂະນະ​ດຽວ​ກັນ ທ່ານ ຣາ​ອູນ ຄານ​ທີ ກໍ​ປະຕິເສດ​ຢ່າງ​ເດັດຂາດ ຕໍ່​ການ​ສະເໜີ​ໃຫ້​ທ່ານ​ກັບ​ຄືນ​ສູ່​ຕຳແໜ່ງ​ປະທານ​ພັກ INC.

    ໃນ​ການ​ປະຊຸມ​ເມື່ອ​ວັນ​ທີ 10 ສິງຫາ​ນັ້ນ CWC ໄດ້​ພິຈາລະນາ​ເຖິງ​ການ​ຄັດ​ເລືອກ​ເອົາ​ນາງ ປຣີ​ຢານ​ກາ ຄານ​ທີ ວາດ​ຣາ ຜູ້​ເປັນ​ນ້ອງ​ສາວ​ຂອງ​ທ່ານ ຣາ​ອູນ ຄານ​ທີ ເຂົ້າ​ສູ່​ຕຳແໜ່ງ​ດັ່ງກ່າວ ແຕ່​ໃນ​ທີ່​ສຸດ​ກໍ​ໄດ້​ເຫັນ​ພ້ອມ​ເລືອກ​ຕັ້ງ​ເອົາ​ນາງ ໂຊ​ເນຍ ຄານ​ທີ. ກົດ​ລະບຽບ​ຂອງ INC ລະບຸ​ວ່າ CWC ໄດ້​ຮັບ​ອະນຸຍາດ​ແຕ່ງຕັ້ງ​ປະທານ​ຊົ່ວຄາວ ໄປ​ຈົນ​ກວ່າ​ວ່າ​ຄະນະ​ກຳມະການ​ທົ່ວ​ປະເທດ​ຂອງ​ພັກ (AICC) ຈະ​ຄັດ​ເລືອ​ປະທານ​ຄົນ​ໃໝ່​ອອກ​ມາ.

    ນາງ ໂຊ​ເນຍ ຄານ​ທີ ເກີດ​ເມື່ອ​ປີ 1946 ເຄີຍ​ດຳລົງ​ຕຳແໜ່ງ​ປະທານ INC ແຕ່​ປີ 1998 ຮອດ​ປີ 2017 ກ່ອນ​ທີ່​ຈະ​ມອບ​ໃຫ້​ລູກ​ຊາຍ​ຂອງ​ນາງ ຄື​ທ່ານ ຣາ​ອູນ ຄານ​ທີ.

ຂ່າວທີ່ກ່ຽວຂ້ອງ