ຂ່າວຫຼ້າສຸດ

ມີ​ຄົນ​ເສຍ​ຊີວິດ ​ແລະ ​ ສັດລ້ຽງ​ຕາຍ​ ຍ້ອນ​ຟ້າຜ່າ ຢູ່​ໃນ​ຫວຽດນາມ

630 14 ສ.ຫ. 2019 ຂ່າວຕ່າງປະເທດ
ມີ​ຄົນ​ເສຍ​ຊີວິດ ​ແລະ ​ ສັດລ້ຽງ​ຕາຍ​ ຍ້ອນ​ຟ້າຜ່າ ຢູ່​ໃນ​ຫວຽດນາມ

   ເຈົ້າ​ໜ້າທີ່​ຫ້ອງການ​ກະສິກຳ ແລະ ພັດທະນາ​ຊົນນະບົດ ໃນ​ເມືອງ ຈາມ​ເຕົາ ທີ່​ຂຶ້ນ​ກັບ​ແຂວງ​ອຽນ​ບ້າຍ (ພາກ​ເໜືອ​ຫວຽດນາມ) ແຈ້ງ​ໃຫ້​ຮູ້​ວ່າ ໄດ້​ເກີດ​ມີ​ກໍລະນີ​ການ​ເສຍ​ຊີວິດ 3 ຄົນ ຊຶ່ງ​ເປັນ​ສະມາຊິກ​ໃນ​ຄອບຄົວ​ດຽວ​ກັນ ຈາກ​ການ​ທີ່​ຖືກ​ຟ້າຜ່າ ໃນ​ເວລາ​ທີ່​ພວກ​ເຂົາ​ພວມ​ໄປ​ທຳ​ການ​ຜະລິດ​ຢູ່​ໃນ​ໄຮ່. ເຫດການ​ດັ່ງກ່າວ ເກີດ​ຂຶ້ນ​ໃນ​ວັນ​ທີ 11 ສິງຫາ​ນີ້ ໃນ​ຂະນະ​ທີ່​ເກີດ​ຝົນຕົກ​ໜັກ ແລະ ຟ້າຜ່າ ຊຶ່ງ​ໃນ​ຈຳນວນ​ຜູ້​ເສຍ​ຊີວິດ​ນັ້ນ ມີ​ເດັກນ້ອຍ ອາຍຸ 4 ເດືອນ ລວມ​ຢູ່​ນຳ​ຜູ້​ໜຶ່ງ.

    ກ່ອນ​ໜ້າ​ນີ້ ເຈົ້າ​ໜ້າທີ່ ໃນ​ເມືອງ ເວິນ​ໂດ່ນ ແຂວງ​ກວາງ​ນິງ (ພາກ​ເໜືອ​ຫວຽດນາມ) ແຈ້ງ​ໃຫ້​ຮູ້​ວ່າ ເມື່ອ​ວັນ​ທີ 29 ກໍລະກົດ​ທີ່​ຜ່ານ​ມາ ໄດ້​ເກີດ​ເຫດການ​ຟ້າຜ່າ​ຊາວ​ປະມົງ​ຜູ້​ໜຶ່ງ​ຈົນ​ເສຍ​ຊີວິດ ໃນ​ຂະນະ​ທີ່​ເຂົາ​ນຳ​ເອົາ​ເຮືອ​ເຂົ້າ​ຝັ່ງ ເພື່ອ​ກັບ​ຄືນ​ສູ່​ເຮືອນ ຫຼັງ​ຈາກ​ທີ່​ໄດ້​ໄປ​ຫາ​ປາ​ຢູ່​ໃນ​ທະເລ.

    ໃນ​ຂະນະ​ດຽວ​ກັນ ຂໍ້​ມູນ​ຈາກ​ຄະນະ​ກຳມະການ​ປະຊາຊົນ​ຕາແສງ​ຈີ​ເລ ເມືອງ ເກ້​ຟອງ ແຂວງ ເງ້​ອານ (ພາກ​ກາງ​ຫວຽດນາມ) ໃຫ້​ຮູ້​ວ່າ ໃນ​ວັນ​ທີ 28 ແລະ  29 ກໍລະກົດ​ທີ່​ຜ່ານ​ມາ ຢູ່​ໃນ​ທ້ອງຖິ່ນ​ດັ່ງກ່າວ ໄດ້​ເກີດ​ຝົນຕົກ ເຮັດ​ໃຫ້​ງົວ​ຝູງ​ໜຶ່ງ ຖືກ​ຟ້າຜ່າ​ຕາຍ​ໄປ 11 ໂຕ. ກ່ອນ​ໜ້າ​ນັ້ນ ຫຼັງ​ຈາກ​ທີ່​ໄດ້​ນັບ​ເບິ່ງ​ແລ້ວ ປະຊາຊົນ​ໃນ​ຕາແສງ​ດັ່ງກ່າວ ພົບ​ວ່າ​ຝູງ​ງົວ​ທີ່​ລ້ຽງ​ປ່ອຍ​ນັ້ນ ຂາດ​ຫາຍ​ໄປ ຈຶ່ງ​ພາກັນ​ຊອກ​ຫາ ແລ້ວ​ກໍ​ພົບ​ເຫັນ​ມີ​ງົວ​ຕາຍ​ໄປ 11 ໂຕ ໂດຍ​ທີ່​ອຳນາດ​ການ​ປົກຄອງ​ທ້ອງຖິ່ນ ແລະ ປະຊາຊົນ ກຳນົດ​ໄດ້​ວ່າ​ສາເຫດ​ທີ່​ເຮັດ​ໃຫ້​ງົວ​ຕາຍ ແມ່ນ​ເປັນ​ຖືກ​ຍ້ອນ​ຟ້າຜ່າ.

ຂ່າວທີ່ກ່ຽວຂ້ອງ