ສື່ມວນຊົນ ແລະ ການພິມຈໍາໜ່າຍ ເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບ

505 14 ສ.ຫ. 2019 ຂ່າວໜ້າ​ໜຶ່ງ
ສື່ມວນຊົນ ແລະ ການພິມຈໍາໜ່າຍ ເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບ

    ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ຈັດ​ພິ­ທີ​ໂຮມ​ຊຸມ­ນຸມ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ສື່​ມວນ​ຊົນ​ແຫ່ງ​ຊາດ ແລະ ການ​ພິມ​ຈຳ­ໜ່າຍ​ລາວ ຄົບ­ຮອບ 69 ປີ (13/8/1950-13/8/2019) ຂຶ້ນ​ວັນ​ທີ 13 ສິງ­ຫາ 2019 ຢູ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ມີ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ ກະ ຊວງ ຖວ​ທ ພ້ອມ​ດ້ວຍ​ຄະ­ນະ​ພັກ ຄະ­ນະ​ນຳ ອະ­ດີດ​ການ​ນຳ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສະ­ຫວັນ​ຄອນ ຣາ​ຊ​ມຸນ​ຕຣີ ຮອງ​ລັດ­ຖະ­ມົນ­ຕີ ກະ­ຊວງ ຖວ​ທ ກ່າວ​ວ່າ: 1 ປີ­ຜ່ານ­ມາ ພວກ​ເຮົາ​ໄດ້​ປະ­ຕິ­ບັດ​ໜ້າ­ທີ່​ຢ່າງ​ຕັ້ງ­ໜ້າ ທັງ​ສະ­ຕິ​ປັນ­ຍາ ແລະ ເຫື່ອ­ແຮງ ໃນ​ການ​ໂຄ­ສະ­ນາ​ເຜີຍ­ແຜ່​ຜົນ­ສຳ­ເລັດ​ແຕ່​ລະ​ໄລ­ຍະ​ແຫ່ງ​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ປຸກ­ລະ­ດົມ​ຈິດ­ໃຈ​ຮັກ​ຊາດ ຮັກ​ລະ­ບອບ ໃໝ່ ແລະ ຄວາມ​ເປັນ​ເຈົ້າ​ຕົນ​ເອງ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ພາຍ​ໃຕ້​ການ​ຊີ້​ນຳ-ນຳ­ພາ​ຂອງ​ພັກ ທີ່​ໄດ້​ນຳ­ພາ​ຢ່າງ​ໃກ້­ຊິດ​ໃນ​ການ​ຄຸ້ມ​ຄອງ​ລົງ­ທຶນ​ຢ່າງ​ຫຼວງ­ຫຼາຍ​ໃສ່​ການ​ພັດ­ທະ­ນາ​ສື່​ມວນ​ຊົນ ແລະ ການ​ພິມ​ຈຳ­ໜ່າຍ ເພາະ​ເປັນ​ອາ­ວຸດ​ອັນ​ແຫຼມ​ຄົມ ເປັນ​ກຳ­ລັງ​ຍູ້​ດັນ​ເຮັດ​ໃຫ້​ສັງ­ຄົມ​ມີ​ການ​ພັດ­ທະ­ນາ ແລະ ຂະ­ຫຍາຍ­ຕົວ​ຂຶ້ນ​ເລື້ອຍໆ ເຊິ່ງ​ສາ­ມາດ​ຕີ​ລາ­ຄາ​ໄດ້​ວ່າ: ສື່​ມວນ​ຊົນ ແລະ ການ​ພິມ​ຈຳ­ໜ່າຍ​ລາວ ໄດ້​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ດ້ານ​ປະ­ລິ­ມານ ແລະ ຄຸນ​ນະ​ພາບ ໂດຍ​ມີ​ໂຄງ​ລ່າງ​ພື້ນ­ຖານ​ທີ່​ໄດ້​ຮັບ​ການ​ພັດ­ທະ­ນາ​ໄປ​ສູ່​ຄວາມ​ທັນ​ສະ­ໄໝ ແລະ ຄ່ອຍ​ຫັນ​ຈາກ​ລະ­ບົບ​ອາ­ນາ​ລ໊ອກ​ໄປ​ສູ່​ລະ­ບົບ​ດີ​ຈີ​ຕອນ​ໄດ້​ໂດຍ​ພື້ນ­ຖານ ອັນ​ພົ້ນ​ເດັ່ນ​ແມ່ນ​ການ​ນຳ​ໃຊ້​ເຄື່ອ​ຄ່າຍ​ອິນ​ເຕີ​ເນັດ​ໃນ​ການ​ສະ­ໜອງ​ຂໍ້​ມູນ​ຂ່າວ­ສານ ສາ­ລະ​ຄວາມ​ຮູ້ ສາ­ລະ​ບັນ­ເທີງ​ໃຫ້​ເປົ້າ​ໝາຍ ເພື່ອ​ຮັບ​ໃຊ້​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຢ່າງ​ວ່ອງ­ໄວ ອຸ­ດົມ­ສົມ­ບູນ​ຕາມ​ທິດ​ສີ­ຂຽວ ແລະ ຍືນ​ຍົງ ຂະ­ນະ​ດຽວ​ກັນ​ບຸ​ຄະ­ລາ​ກອນ​ສື່​ມວນ​ຊົນ ແລະ ການ​ພິມ​ຈຳ­ໜ່າຍ ກໍ​ໄດ້​ຮັບ​ການ​ຍົກ​ລະ­ດັບ​ຕໍ່​ເນື່ອງ​ທັງ​ພາຍ​ໃນ ແລະ ຕ່າງ­ປະ­ເທດ ເຮັດ​ໃຫ້​ເນື້ອ​ໃນ​ສາ­ລະ​ຕ່າງໆ​ທັງ​ສື່​ສິ່ງ​ພິມ ເອ​ເລັກ​ໂຕຣ​ນິກ ສື່​ອອນ​ລາຍ ຟິມ​ຮູບ­ເງົາ​ປະ­ເພດ​ຕ່າງໆ ຜະ­ລິດ​ຕະ​ພັນ​ສິ່ງ​ພິມ​ທຸກ​ປະ­ເພດ​ໄດ້​ຮັບ​ການ​ພັດ­ທະ­ນາ ຜະ­ລິດ​ຕະ​ພັນ​ສື່​ມວນ​ຊົນ​ທຸກ​ປະ­ເພດ ແລະ ຜະ­ລິດ​ຕະ​ພັນ​ສື່​ສິ່ງ​ພິມ​ທັງ​ໝົດ ມີ​ເນື້ອ​ໃນ​ສ່ອງ​ແສງ​ສະ­ພາບ​ການ​ພັດ­ທະ­ນາ​ທຸກ​ດ້ານ ແລະ ການ​ປົກ​ປັກ​ຮັກ­ສາ​ມູນ​ມໍ­ລະ­ດົກ ຄ່າ​ນິ­ຍົມ​ວັດ­ທະ­ນະ­ທຳ​ຂອງ​ຊາດ​ເພີ່ມ​ຂຶ້ນ​ເລື້ອຍໆ ທຽບ­ໃສ່​ປີ­ຜ່ານ­ມາ ເຊິ່ງ​ສະ­ແດງ​ໃຫ້​ເຫັນ​ໄດ້​ຜົນ­ສຳ­ເລັດ​ໃນ​ການ​ປະ­ຕິ­ບັດ​ແນວ­ທາງ​ນະ­ໂຍ­ບາຍ​ຂອງ​ພັກ ກົດ­ໝາຍ​ຂອງ​ລັດ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ໂດຍ​ສະ­ເພາະ ການ​ປະ­ຕິ­ບັດ​ໂຄງ­ການ​ພັດ­ທະ­ນາ ການ​ຜະ­ລິດ​ເປັນ​ສິນ­ຄ້າ​ຂອງ​ປະ­ຊາ­ຊົນ ແລະ ການ​ປະ­ກອບ​ທຸ­ລະ​ກິດ​ຂະ­ໜາດ​ຕ່າງໆ.

    ຄຽງ​ຄູ່​ກັບ​ຜົນ­ງານ​ດັ່ງ­ກ່າວ ພວກ​ເຮົາ​ກໍ​ມີ​ຂໍ້​ຫຍຸ້ງ­ຍາກ ແລະ ສິ່ງ​ທ້າ​ທາຍ​ຕ່າງໆ​ທີ່​ຈະ​ຕ້ອງ​ພ້ອມ​ກັນ​ປັບ­ປຸງ​ແກ້​ໄຂ ເປັນ­ຕົ້ນ ການ​ສ້າງ​ລາຍ​ຮັບ​ວິ­ຊາ​ການ​ຂອງ​ສື່​ມວນ​ຊົນ​ມີ​ທ່າ​ອ່ຽງ​ຫຼຸດ​ລົງ​ເລື້ອຍໆ ເນື່ອງ​ຈາກ​ສັງ­ຄົມ​ຫັນ​ໄປ​ບໍ­ລິ­ໂພກ​ຂໍ້​ມູນ​ຂ່າວ­ສານ ແລະ ການ​ໃຊ້​ບໍ­ລິ­ການ​ສື່​ອອນ​ລາຍ ງົບ­ປະ­ມານ​ໃນ​ການ​ສົ່ງ­ເສີມ​ວິ­ຊາ​ການ​ມີ​ຈຳ­ກັດ ວິ­ຊາ​ການ​ດ້ານ​ສື່​ມວນ​ຊົນ​ບໍ່​ພຽງ­ພໍ​ຕາມ​ຄວາມ​ຕ້ອງ­ການ ໂຄງ​ລ່າງ​ພື້ນ­ຖານ ພາ­ຫະ­ນະ ແລະ ອຸ­ປະ­ກອນ​ຮັບ​ໃຊ້​ສ່ວນ​ໃຫຍ່​ເກົ່າ​ແກ່ ແລະ ເປ່​ເພ່ ການ​ດຳ­ເນີນ​ການ​ຄຸ້ມ​ຄອງ​ສື່​ແບບ​ໃໝ່​ໃຫ້​ເຂົ້າ​ສູ່​ກົດ­ໝາຍ​ສື່​ມວນ​ຊົນ ໂດຍ​ສະ ເພາະ ເນື້ອ​ໃນ​ຂໍ້​ມູນ​ຂ່າວ­ສານ​ຢູ່​ໃນ​ສັງ­ຄົມ​ອອນ​ລາຍ​ຍັງ​ເປັນ​ສິ່ງ​ທ້າ​ທາຍ​ຫຼາຍ ແລະ ພົບ​ຂໍ້​ຫຍຸ້ງ­ຍາກ​ສົມ­ຄວນ ເຊິ່ງ​ຈະ​ຕ້ອງ​ເພີ່ມ​ທະ­ວີ​ການ​ສຶກ​ສາ​ອົບ­ຮົມ​ທົ່ວ​ສັງ­ຄົມ​ໃຫ້​ເຂົ້າ­ໃຈ​ຄຸນ​ປະ­ໂຫຍດ ແລະ ຜົນ​ເສຍ​ຂອງ​ການ​ນຳ​ໃຊ້​ສື່ ດັ່ງ­ກ່າວ ຄວາມ​ເປັນ​ເຈົ້າ​ການ ແລະ ສະ­ດຸ້ງ​ໄວ​ໃນ​ການ​ຕອບ​ໂຕ້​ການ​ໂຄ­ສະ­ນາ​ບິດ​ເບືອນ ໃສ່​ຮ້າຍ​ປ້າຍ​ສີ​ຂອງ​ອິດ​ທິ​ກຳ­ລັງ​ປໍ​ລະ​ປັກ ແລະ ກຸ່ມ​ຄົນ​ບໍ່​ດີ ຊັກ​ຊ້າ ເຊິ່ງ​ໃນ​ສະ­ເພາະ​ໜ້າ ແລະ ຍາວ​ນານ​ພວກ​ເຮົາ​ຕ້ອງ​ເລັ່ງ​ສູ້​ຊົນ​ພັດ­ທະ­ນາ​ສື່​ມວນ​ຊົນ ແລະ ການ​ພິມ​ຈຳ­ໜ່າຍ​ໃຫ້​ມີ​ຄຸນ​ນະ​ພາບ ທັນ​ສະ­ໄໝ ຖືກ­ຕ້ອງ ຊັດ​ເຈນ ທັນ​ເຫດ­ການ ໜ້າ​ເຊື່ອ​ຖື ມີ​ຄວາມ​ຮັບ­ຜິດ­ຊອບ ແລະ ເປັນ​ເວ­ທີ​ຂອງ​ມະ­ຫາ­ຊົນ ພາຍ​ໃຕ້​ການ​ນຳ­ພາ​ຂອງ​ພັກ ແລະ ເຊື່ອມ​ໂຍງ​ກັບ​ສາ­ກົນ ສືບ­ຕໍ່​ປັບ­ປຸງ ແລະ ພັດ­ທະ­ນາ​ການ​ນຳ​ສະ­ເໜີ​ບົດ-ຂ່າວ ຜ່ານ​ຄຣິບ​ວີ​ດີ​ໂອ ລາຍ​ງານ​ສົດ​ຜ່ານ​ລະ­ບົບ​ອອນ​ລາຍ​ໃຫ້​ຫຼາຍ​ຂຶ້ນ ປົກ​ຄຸມ​ເອົາ​ເວ­ທີ​ໜ້າ​ຂ່າວ​ທຸກ​ປະ­ເພດ​ທີ່​ມີ​ຢູ່​ໃນ​ລະ­ບົບ​ດີ​ຈີ​ຕອນ ແລະ ອື່ນໆ.

    ທ່ານ ບໍ່​ແສງ​ຄຳ ວົງ​ດາ­ລາ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ທີ່​ຍາດ​ມາ​ໄດ້ ພ້ອມ​ທັງ​ໄດ້​ເນັ້ນ​ໜັກ​ໃຫ້​ສື່​ມວນ​ຊົນ ແລະ ການ​ພິມ​ຈຳ­ໜ່າຍ​ເອົາ­ໃຈ­ໃສ່​ບາງ​ວຽກ ເປັນ­ຕົ້ນ ເອົາ­ໃຈ­ໃສ່​ວຽກ​ງານ​ການ­ເມືອງ-ແນວ​ຄິດ​ໃຫ້​ດີ ແລະ ທົ່ວ​ເຖິງ​ໃນ​ຖັນ​ແຖວ​ນັກ­ຮົບ​ສື່​ມວນ​ຊົນ ແລະ ພິມ​ຈຳ­ໜ່າຍ ສືບ­ຕໍ່​ຢຶດ​ໝັ້ນ​ທັດ­ສະ­ນະ​ຫຼັກ​ໝັ້ນ​ການ­ເມືອງ​ທີ່​ໜັກ​ແໜ້ນ ເຊື່ອມ​ຊຶມ ແລະ ເຊື່ອ​ໜັ້ນ​ຕໍ່​ແນວ­ທາງ​ນະ­ໂຍ­ບາຍ​ຂອງ​ພັກ ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ວິ­ໄສ​ທັດ 2030 ຍຸດ​ທະ​ສາດ​ຮອດ​ປີ 2025 ແລະ ແຜນ​ພັດ­ທະ­ນາ​ວຽກ​ງານ ຖວ​ທ ສປປ ລາວ 2016-2020 ໃຫ້​ປາ ກົດ​ຜົນ​ເປັນ​ຈິງ ດ້ວຍ​ການ​ຫັນ​ແຜນ​ຍຸດ​ທະ​ສາດ​ດັ່ງ­ກ່າວ ໃຫ້​ເປັນ​ແຜນ​ປະ­ຈຳ​ປີ​ທີ່​ແທດ­ເໝາະ​ກັບ​ຄວາມ​ເປັນ​ຈິງ ສືບ­ຕໍ່​ໂຄ­ສະ­ນາ​ເຜີຍ­ແຜ່​ຜ່ານ​ສື່​ມວນ​ຊົນ ແລະ ການ​ພິມ​ຈຳ­ໜ່າຍ​ກ່ຽວ​ກັບ​ຂະ​ບວນ​ການ​ຕ່າງໆ​ຮັບ​ໃຊ້​ໃຫ້­ການ​ກະ ກຽມ​ກອງ​ປະ­ຊຸມ​ໃຫຍ່ ຄັ້ງ​ທີ XI ຂອງ​ພັກ ປີ​ທ່ອງ​ທ່ຽວ ລາວ-ຈີນ 2019 ກະ­ກຽມ​ມະ​ຫະ​ກຳ​ກີ­ລາ​ແຫ່ງ​ຊາດ​ຢູ່​ແຂວງ​ຊຽງ​ຂວາງ ການ​ສະ­ເຫຼີມ­ສະ­ຫຼອງ​ທົ່ງ​ໄຫ​ຫີນ​ຊຽງ​ຂວາງ ເຂົ້າ​ເປັນ​ມໍ­ລະ­ດົກ​ໂລກ ປັບ­ປຸງ​ກົດ­ໝາຍ ແລະ ສ້າງ​ນິ­ຕິ​ກຳ​ລຸ່ມ​ກົດ­ໝາຍ​ໃຫ້​ພຽງ­ພໍ ສອດ­ຄ່ອງ ແລະ ຮັດ­ກຸມ ໃນ​ສະ­ພາບ​ລາຍ​ຮັບ​ວິ­ຊາ​ການ​ຈາກ​ສື່​ມວນ​ຊົນ​ນັບ​ມື້​ນັບ​ຫຼຸດ​ລົງ​ນີ້ ຈະ​ຕ້ອງ​ໄດ້​ຮີບ​ຮ້ອນ​ເອົາ­ໃຈ­ໃສ່​ຄົ້ນ­ຄວ້າ​ວິ­ໄຈ ແລະ ຊອກ​ຫາ​ວິ­ທີ​ການ​ໃໝ່​ໃນ​ການ​ຊອກ​ຫາ​ແຫຼ່ງ​ລາຍ​ຮັບ​ວິ­ຊາ​ການ​ຈາກ​ສື່​ມວນ​ຊົນ ແລະ ການ​ພິມ​ຈຳ­ໜ່າຍ ລວມ​ທັງ​ການ​ໃຊ້​ຈ່າຍ​ວຽກ​ງານ​ໃຫ້​ມີ​ຄວາມ​ຄ່ອງ​ຕົວ ຖືກ­ຕ້ອງ​ສອດ­ຄ່ອງ​ກັບ​ລະ­ບຽບ​ກົດ­ໝາຍ​ໃຫ້​ໄດ້​ໂດຍ​ໄວ ຫຼື ຫັນ​ໄປ​ສູ່​ການ​ກຸ້ມ​ຕົນ​ເອງ ແລະ ເອົາ­ໃຈ­ໃສ່​ກໍ່­ສ້າງ​ພະ­ນັກ­ງານ​ໜຸ່ມ​ນ້ອຍ ສືບ​ທອດ​ປ່ຽນ​ແທນ ໃຫ້​ຮັບ­ປະ­ກັນ​ດ້ານ​ທັດ­ສະ­ນະ​ຫຼັກ​ໝັ້ນ ຄຸນ​ທາດ​ການ­ເມືອງ ແລະ ວິ­ຊາ​ສະ­ເພາະ​ໃຫ້​ເຂັ້ມ­ແຂງ ເພື່ອ​ເຮັດ​ໜ້າ­ທີ່​ສຳ­ຄັນ​ທີ່ ພັກ-ລັດ ມອບ​ໝາຍ​ໃຫ້.

ຂ່າວທີ່ກ່ຽວຂ້ອງ