ສົ່ງເສີມການລ້ຽງລູກດ້ວຍນົມແມ່

658 14 ສ.ຫ. 2019 ຂ່າວໜ້າ​ໜຶ່ງ
ສົ່ງເສີມການລ້ຽງລູກດ້ວຍນົມແມ່

    ອົງ​ການ­ຈັດ­ຕັ້ງ​ທາງ​ສັງ­ຄົມ​ເພື່ອ​ໂພ­ຊະ​ນາ​ການ (SUN CSA) ຮ່ວມ​ກັບ​ກະ­ຊວງ​ສາ­ທາ­ລະ­ນະ​ສຸກ ຈັດ​ພິ­ທີ​ສະ­ເຫຼີມ­ສະ­ຫຼອງ​ສັບ­ປະ­ດາ​ສາ­ກົນ​ແຫ່ງ​ການ​ລ້ຽງ​ລູກ​ດ້ວຍ​ນົມ​ແມ່ ປະ­ຈຳ​ປີ 2019 ຂຶ້ນ​ໃນ​ວັນ​ທີ 12 ສິງ­ຫາ 2019 ທີ່​ໂຮງ­ແຮມ​ລາວ​ພລາ​ຊາ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ເພັງ ພິ­ລາ​ວັນ ຫົວ­ໜ້າ​ກົມ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ກະ­ຊວງ​ສາ­ທາ­ລະ­ນະ​ສຸກ ທ່ານ​ນາງ ຈັນ​ສີ ພິມ​ມະ​ຈັນ ປະ­ທານ​ສະ­ມາ­ຄົມ​ສົ່ງ­ເສີມ​ສຸ­ຂະ­ພາບ​ຄອບ­ຄົວ ທ່ານ​ນາງ ເຄລີ່ ຄຳ​ພູ­ໄຊ ຊ່ຽວ­ຊານ​ດ້ານ​ສຸ­ຂະ­ພາບ ອົງ­ການ​ຊ່ວຍ­ເຫຼືອ​ເດັກ ປະ­ທານ SUN CSA ພ້ອມ​ດ້ວຍ​ຂະ­ແໜງ­ການ​ກ່ຽວ­ຂ້ອງ.

    ການ​ລ້ຽງ​ລູກ​ດ້ວຍ​ນົມ​ແມ່​ມີ​ຄວາມ​ສຳ­ຄັນ​ຕໍ່​ລູກ ໂດຍ​ສະ­ເພາະ ໄລ­ຍະ 1.000 ມື້​ທຳ​ອິດ​ຂອງ​ຊີ­ວິດ​ເດັກ­ນ້ອຍ ເຊິ່ງ​ຈະ​ເຮັດ​ໃຫ້​ສຸ­ຂະ­ພາບ​ເຂົາ­ເຈົ້າ​ແຂງ­ແຮງ​ໃນ​ໄລ­ຍະ​ຍາວ ເຊິ່ງ 1.000 ມື້​ທຳ​ອິດ​ແມ່ນ​ເລີ່ມ​ຈາກ​ມື້​ທີ່​ແມ່​ຖື­ພາ ແລະ ສືບ​ເນື່ອງ​ຈົນ​ຮອດ​ອາ­ຍຸ 2 ປີ ການ​ເລີ່ມ​ໃຫ້​ລູກ​ກິນ​ນົມ​ຕັ້ງ­ແຕ່​ຫົວ­ທີ (ທັນ­ທີ​ພາຍ​ໃນ 1 ຊົ່ວ­ໂມງ​ທຳ​ອິດ) ເຮັດ​ໃຫ້​ເດັກ​ແຂງ­ແຮງ ແລະ ມີ​ສຸ­ຂະ­ພາບ​ທີ່​ດີ​ໃນ​ໄລ­ຍະ​ຍາວ ໂດຍ​ນ້ຳ​ນົມ​ເຫຼືອງ ຫຼື ນ້ຳ​ນົມ​ທຳ​ອິດ​ແມ່ນ​ອຸ­ດົມ​ໄປ​ດ້ວຍ​ສານ​ອາ­ຫານ ແລະ ປົກ​ປ້ອງ​ເດັກ​ຈາກ​ການ​ເຈັບ­ເປັນ ການ​ລ້ຽງ​ດ້ວຍ​ນົມ​ແມ່​ພຽງ​ຢ່າງ​ດຽວ​ຈົນ​ເດັກ​ອາ­ຍຸ​ຮອດ 6 ເດືອນ​ແມ່ນ​ມີ​ຄວາມ​ສຳ­ຄັນ​ຢ່າງ​ຍິ່ງ ເຊິ່ງ​ນົມ​ແມ່​ປະ­ກອບ​ດ້ວຍ​ສານ​ອາ­ຫານ​ທັງ​ໝົດ​ທີ່​ເດັກ​ຕ້ອງ­ການ​ໃນ​ໄລ­ຍະ 6 ເດືອນ​ທຳ​ອິດ.

    ອີງ​ຕາມ​ການ​ສຳ​ຫຼວດ​ຕົວ​ຊີ້​ວັດ​ດັດ​ສະ​ນີ​ໝາຍ​ແຫ່ງ​ຊາດ​ເມື່ອ​ປີ 2017 ອັດ­ຕາ​ການ​ລ້ຽງ​ລູກ​ດ້ວຍ​ນົມ​ແມ່​ຢູ່​ລາວ​ແມ່ນ​ຍັງ​ຕ່ຳ ມີ​ພຽງ 50% ຂອງ​ແມ່​ທີ່​ເລີ່ມ​ໃຫ້​ລູກ​ກິນ​ນົມ​ແມ່​ໃນ​ຊົ່ວ­ໂມງ​ທຳ​ອິດ​ຫຼັງ​ເກີດ ນອກ­ຈາກ​ນີ້ ຍັງ​ມີ​ພໍ່​ແມ່​ຫຼາຍ​ຄົນ​ທີ່​ເອົາ​ນົມ​ຜົງ ແລະ ນົມ​ປຸງ​ແຕ່ງ​ໃຫ້​ເດັກ­ນ້ອຍ​ກິນ ເຊິ່ງ​ນົມ​ເຫຼົ່າ­ນັ້ນ​ບໍ່​ມີ​ຄຸນ​ປະ­ໂຫຍດ​ຫຼາຍ​ຕໍ່​ສຸ­ຂະ­ພາບ​ຂອງ​ເດັກ​ເທົ່າ​ນົມ​ແມ່ ແລະ ມີ​ຄວາມ​ສ່ຽງ​ໃນ​ການ​ເຈັບ­ເປັນ​ໄດ້​ງ່າຍ​ອີກ​ດ້ວຍ.

ຂ່າວທີ່ກ່ຽວຂ້ອງ