ສຳເລັດແຂ່ງຂັນອ໊ອບໂຮດນາໆຊາດ ຊີງຂັນລັດຖະມົນຕີ ສສກ 2019

341 14 ສ.ຫ. 2019 ວົງຈອນກີລາ
ສຳເລັດແຂ່ງຂັນອ໊ອບໂຮດນາໆຊາດ ຊີງຂັນລັດຖະມົນຕີ ສສກ 2019

    ພິ­ທີ​ປິດ​ການ​ແຂ່ງ­ຂັນຂອງ​ການ​ແຂ່ງ­ຂັນ​ກີ­ລາ​ລົດ​ໃຫຍ່ ອ໊ອບ​ໂຣດ​ນາໆຊາດ ຊີງ​ຂັນ​ທ່ານ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ປະ­ຈຳ​ປີ 2019 ຈັດ​ຂຶ້ນ​ເມື່ອ​ວັນ​ທີ 11 ສິງ­ຫາ 2019 ຢູ່​ເຂດ​ເສດ­ຖະ­ກິດ​ສະ­ເພາະ ບຶງ​ທາດ­ຫຼວງ ນະ­ຄອນ­ຫຼວງ​ວຽງ​ຈັນ ໂດຍ​ມີທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ ກະ­ຊວງ ສສກ ມີ​ຮອງ​ຫົວ­ໜ້າ​ກົມ​ກີ­ລາ​ລະ­ດັບ​ສູງ ກະ­ຊວງ ສສກ ປະ­ທານ​ສະ­ຫະ­ພັນ​ກີ­ລາ​ລົດ​ໃຫຍ່ ແລະ ລົດ­ຈັກ​ແຫ່ງ​ຊາດ​ລາວ ຜູ້­ຕາງ­ໜ້າ​ບໍ­ລິ­ສັດ​ທີ່​ສະ­ໜັບ­ສະ­ໜູນ ບັນ­ດາ​ຄະ­ນະ​ນຳ ນັກ­ກີ­ລາ ແລະ ມວນ​ຊົນ​ເຂົ້າ​ຮ່ວມ.

    ໂອ­ກາດ​ດັ່ງ­ກ່າວ ທ່ານ ສົມ​ພອນ ສະ​ຫວັດ​ວິ​ພານ ປະ­ທານ​ສະ­ຫະ­ພັນ​ກີ­ລາ​ລົດ​ໃຫຍ່ ແລະ ລົດ­ຈັກ​ແຫ່ງ​ຊາດ​ລາວ ກໍ​ໄດ້​ໃຫ້​ສຳ­ພາດ​ໃນ​ການ​ແຂ່ງ­ຂັນ​ຄັ້ງ​ນີ້​ໃຫ້​ຊາບ​ວ່າ: ການ​ຈັດ​ແຂ່ງ­ຂັນ ໃນ​ຄັ້ງ​ນີ້ ກໍ​ສາ­ມາດ​ສຳ­ເລັດ​ຜ່ານ​ມາ​ໄດ້​ຢ່າງ​ລຸ​ລວງ ແລະ ໄປ​ຕາມ​ແຜນ­ທີ່​ວາງ​ໄວ້ ທັງ​ນີ້ ກໍ​ເພື່ອ​ເປັນ​ການ​ສົ່ງ­ເສີມ​ການ­ທ່ອງ­ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ​ປີ​ນີ້ ກໍ່​ແມ່ນ​ເປັນ​ການ­ທ່ອງ­ທ່ຽວ ລາວ-ຈີນ ເຜີຍ­ແຜ່​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ ເສີມ​ສ້າງການ​ກະ­ຕຸກ​ຊຸກ­ຍູ້ ໃຫ້​ແກ່​ການ​ຂະ­ຫຍາຍ­ຕົວ​ຂອງ​ຂົງ­ເຂດ​ອຸດ­ສາ­ຫະ­ກຳ​ລົດ­ຍົນ​ພາຍ​ໃນ​ປະ­ເທດ ກໍ​ຄື​ສົ່ງເສີມ​ເສດ­ຖະ­ກິດ​ສັງ­ຄົມ​ຂອງ​ຊາດ ແລະ ສ້າງ​ພື້ນ­ຖານ​ກີ­ລາ​ປະ­ເພດ​ນີ້​ໃຫ້​ເປັນ​ທີ່​ຮູ້­ຈັກ ແລະ ແຜ່​ຫຼາຍ.

    ສຳ­ລັບ​ການ​ແຂ່ງ­ຂັນ​ໃນ​ຄັ້ງ​ນີ້ ຈັດ​ຂຶ້ນ​ລະ­ຫວ່າງວັນ​ທີ 9-11 ສິງ­ຫານີ້ ມີ​ລົດ​ທັງ​ໝົດ 100 ຄັນ ທີ່​ມາ​ຈາກ 6 ປະ­ເທດ ປະ­ກອບ​ມີ ສສ ຫວຽດ­ນາມ ໄທ ມາ​ເລ​ເຊຍ ກຳ­ປູ­ເຈຍ ມຽນ​ມາ ແລະ ສປ ຈີນ ແຂ່ງ­ຂັນ​ກັນ​ທັງ​ໝົດ 7 ຮຸ່ນ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ: ຮຸ່ນ VIP ທີ 1 ທີມ​ວຽງ​ຈັນ ໂຮ​ຈິ​ສ​ຕິກ ຮຸ່ນ​ປີກ​ນົກ ທີ 1 ທີມ​ລຸ້ມ​ນ້ຳ​ພູ ອ໊ອບ​ໂຣດ ຊັນ 4x4 ປະ­ເທດ​ໄທ ຮັບ​ຂັນ​ພ້ອມ​ຫຼຽນ​ລາ­ງວັນ ແລະ ເງິນ­ສົດ 8 ລ້ານ​ກວ່າ​ກີບ ຮຸ່ນ​ຄານ​ແຂງ ທີ 1 ທີມ​ສະ­ຫະ­ພັນ​ກີ­ລາ​ລົດ​ໃຫຍ່-ລົດ­ຈັກ​ແຫ່ງ​ຊາດ​ລາວ (ລາ­ງວັນ​ໄດ້​ເທົ່າ​ກັບ​ຮຸ່ນ​ປີກ​ນົກ) ຮຸ່ນ​ທ່ຽວ​ປ່າ​ທົ່ວ​ໄປ ທີ 1 ທີມ NPV ມິດ­ຕະ­ພາບ ປະ­ເທດ​ໄທ (ລາ­ງວັນ​ໄດ້​ເທົ່າ​ກັບ​ຮຸ່ນ​ປີກ​ນົກ) ຮຸ່ນ​ທ່ຽວ​ປ່າ​ໂອ​ເພັນ ທີ 1 ທີມ​ພັດ​ທະ​ຍາ​ຄລັບ MP ຈະ­ເລີນ​ຍົນ Hi Winch ທີມ ປະ­ເທດ​ໄທ ຮັບ​ຂັນ​ພ້ອມ​ຫຼຽນ​ລາ­ງວັນ ແລະ ເງິນ­ສົດ 12 ລ້ານ​ກີບ ແລະ ຮຸ່ນ​ຊຸບ​ເປີ້​ໂອ​ເພັນ ທີ 1 ທີມ MT ຈະ­ເລີນ​ຍົນ ພັດ​ທະ​ຍາ​ຄລັບ ຊ່າງ​ຍັກ​ເຊີ​ວິດ ປະ­ເທດ​ໄທ​ຮັບ​ຂັນ​ລາ­ງວັນ ພ້ອມ​ຫຼຽນ​ລາ­ງວັນ ແລະ ເງິນ­ສົດ 12 ລ້ານ​ກີບ.

ຂ່າວທີ່ກ່ຽວຂ້ອງ