ຢູ-18 ລາວ ຖືກ ອິນໂດເນເຊຍ ແຊງຊະນະທ້າຍເກມ

    ການ​ແຂ່ງ­ຂັນ​ເຕະ­ບານ​ຊາຍ ຮຸ່ນ​ອາ­ຍຸ​ບໍ່​ເກີນ 18 ປີ ຊີງ​ແຊັມ​ອາ​ຊຽນ 2019 ທີ່​ນະ­ຄອນ​ໂຮ່​ຈີ​ມິງ ສສ ຫວຽດ­ນາມ ຂຸນ​ພົນ​ນັກ­ກີ­ລາ​ບານ­ເຕະ​ຊາຍ ຢູ-18 ປີ ທີມ​ຊາດ​ລາວ ລົງ​ແຂ່ງ­ຂັນ​ນັດ​ທີ 3 ຂອງ​ກຸ່ມ A ໃນ​ວັນ​ທີ 12 ສິງ­ຫາ 2019 ພົບ​ກັບ ອິນ​ໂດ​ເນ​ເຊຍ ອະ­ດີດ​ແຊັມ ປີ 2013 ເຊິ່ງ​ທີມ​ຊາດ​ຕ້ອງ­ການ​ຊະ­ນະ​ເພື່ອ​ລຸ້ນ​ເຂົ້າ​ຮອບ​ຕໍ່​ໄປ ຂະ­ນະ​ທີ່ ອິນ​ໂດ​ເນ​ເຊຍ ຜົນ­ງານ​ເດັ່ນ​ຊະ­ນະ​ມາ 3 ນັດ​ລວດ ຂໍ​ພຽງ​ສະ ເໝີ​ເຂົ້າ​ຮອບ.

    ນັດ​ນີ້ ທີມ​ຊາດ​ລາວ ວາງ​ແຜນ​ຫຼິ້ນ​ໄດ້​ຢ່າງ​ຮັດ­ກຸມ ແລະ ສາ­ມາດ​ສວຍ­ໂອ­ກາດ​ຂຶ້ນ​ນຳ​ກ່ອນ​ຈາກ ອາ​ລຸນ​ໄນ ລຸນ​ລາ­ສີ ກອງ​ກາງ​ດາວ​ຮຸ່ງ​ຈາກ​ສະ­ໂມ­ສອນ ລາວ​ໂຕ​ໂຢ​ຕ້າ ເອັຟ​ຊີ ນາ­ທີໆ 70 ແຕ່​ຖືກ​ອິນ​ໂດ​ເນ​ເຊຍ ຍິງ​ແຊງ​ສອງ​ປະ­ຕູ​ປະ­ຕູ​ຈາກ BAGUS KAHFI ນາ­ທີໆ 82 ແລະ ການ​ສະ­ກັດ​ບານ​ເຂົ້າ​ປະ­ຕູ​ຕົນ​ເອງ​ຂອງ ອາ​ນຸ​ລັກ ວັນ­ນະ​ລາດ ນາ­ທີໆ 90+1 ທ້າຍ​ເກມ​ນັກ​ເຕະ​ທັງ​ສອງ​ທີມ​ມີ​ການ​ປະ​ທະ​ກັນ ແຕ່​ກຳ­ມະ­ການ​ສາ­ມາດ​ຄວມ​ຄຸມ​ເຫດ­ການ​ໄວ້​ໄດ້ ຈົບ​ເກມ ອິນ​ໂດ​ເນ​ເຊຍ ຊະ­ນະ ລາວ ຫວຸດ​ຫວິດ 1-0 ສ່ວນ​ຜົນ​ອີກ​ສອງ​ຄູ່​ໃນ​ກຸ່ມ​ດຽວ​ກັນ ບຣູ​ໄນ ເສຍ​ໃຫ້ ມຽນ​ມາ 0-1 ແລະ ຕີ​ມໍ ເລັດ​ເຕ ຊະ­ນະ ຟີ​ລິບ​ປິນ 5-2.

    ສະ­ຫຼຸບ​ຕາ­ຕະ­ລາງ​ຄະ­ແນນ​ຜ່ານ​ໄປ 4 ນັດ ທຸກ​ທີມ​ໃນ​ກຸ່ມ​ນີ້: ອິນ​ໂດ​ເນ​ເຊຍ ແລະ ມຽນ​ມາ ມີ 12 ຄະ­ແນນ ເຂົ້າ​ຮອບ 4 ທີມ​ສຸດ​ທ້າຍ​ແນ່­ນອນ​ແລ້ວ ສ່ວນ ລາວ ແລະ ຕີ​ມໍ ເລັດ​ເຕ ມີ 6 ຄະ­ແນນ​ເທົ່າ​ກັນ ບຣູ​ໄນ ແລະ ຟີ​ລິບ​ປິນ ຍັງ​ບໍ່​ມີ​ຄະ­ແນນ ຕົກ​ຮອບ​ທັງ 4 ທີມ ເຊິ່ງ ຢູ-18 ທີມ​ຊາດ​ລາວ ຕົກ​ຮອບ​ແບ່ງ​ກຸ່ມ​ຊີງ​ແຊັມ​ອາ​ຊຽນ 4 ປີ​ຕິດ­ຕໍ່​ກັນ.