ສົ່ງເສີມການເຂົ້າເຖິງການຮັກສາສຸຂະພາບຕາ

592 13 ສ.ຫ. 2019 ຂ່າວໜ້າ​ໜຶ່ງ
ສົ່ງເສີມການເຂົ້າເຖິງການຮັກສາສຸຂະພາບຕາ

    ກະ­ຊວງ​ສາ­ທາ­ລະ­ນະ​ສຸກ ແລະ ມູນ​ນິ​ທີ​ເຟຣດ​ຮາ​ໂລ ຈັດ​ພິ­ທີ​ເຊັນ​ສັນ­ຍາ​ຮ່ວມ​ມື​ກ່ຽວ​ກັບ​ໂຄງ­ການ​ເປີດ​ກວ້າງ ຮັກ­ສາ​ສຸ­ຂະ­ພາບ​ຕາ​ແບບ​ຍືນ​ຍົງ ໃນ​ວັນ​ທີ 8 ສິງ­ຫາ 2019 ທີ່​ກະ­ຊວງ​ສາ­ທາ­ລະ­ນະ​ສຸກ ລະ­ຫວ່າງ ທ່ານ ບົວ​ຂັນ ພະ​ຄຸນ​ທອງ ຮອງ​ຫົວ­ໜ້າ​ກົມ​ປິ່ນ­ປົວ ແລະ ຟື້ນ​ຟູ​ໜ້າ­ທີ່​ການ​ກະ­ຊວງ​ສາ­ທາ­ລະ­ນະ​ສຸກ ແລະ ທ່ານ ຟຸກ ຫງຽນ ທັນ phuc Huyn Tan ຜູ້­ອຳ­ນວຍ­ການ​ມູນ​ນິ​ທີ​ເຟຣດ​ຮາ​ໂລ ປະ­ຈຳ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້ ໂດຍ​ມີ​ທ່ານ ບຸນ​ໜັກ ໄຊ­ຊະ­ນະ​ສົງ­ຄາມ ຫົວ­ໜ້າ​ກົມ​ຟື້ນ​ຟູ​ໜ້າ­ທີ່​ການ ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

    ໂຄງ­ການ​ເປີດ​ກວ້າງ​ຮັກ­ສາ​ສຸ­ຂະ­ພາບ​ຕາ​ແບບ​ຍືນ​ຍົງ ເປັນ​ໂຄງ­ການ​ພາກ​ຂະ­ຫຍາຍ​ໄລ­ຍະ 2 ແຕ່​ປີ (2019-2020) ພາຍ­ຫຼັງ​ທີ່​ໄດ້​ສຳ­ເລັດ​ໂຄງ­ການ​ໄລ­ຍະ I ເຊິ່ງ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ປີ 2015-2018 ໂດຍ​ຈະ​ຈັດ​ຕັ້ງ​ປະ­ຕິ­ບັດ​ປິ່ນ­ປົວ​ຮັກ­ສາ​ສຸ­ຂະ­ພາບ​ຕາ ເຊັ່ນ: ແກ່ນ​ຕາ​ຂຸ້ນ ຊີ້ນ​ຕາ​ປົ່ງ ສາຍ­ຕາ​ບົກ​ຜ່ອງ ຢູ່​ໃນ 10 ແຂວງ ຄື: ຜົ້ງ​ສາ­ລີ ຫຼວງ​ນ້ຳ​ທາ ບໍ່​ແກ້ວ ອຸ­ດົມ​ໄຊ ຫຼວງ​ພະ​ບາງ ໄຊ​ຍະ​ບູ​ລີ ວຽງ​ຈັນ ບໍ​ລິ​ຄຳ​ໄຊ ຄຳ​ມ່ວນ ແລະ ສາ­ລະ​ວັນ ນອກ­ຈາກ​ນີ້ ໂຄງ­ການ​ດັ່ງ­ກ່າວ​ຍັງ​ໄດ້​ສົ່ງ­ເສີມ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ປັບ­ປຸງ​ໂຄງ​ລ່າງ​ພື້ນ­ຖານ ແລະ ອຸ­ປະ­ກອນ​ການ​ແພດ ການ​ຄວບ​ຄຸມ­ພະ​ຍາດ ການ​ສຳ​ຫຼວດ ແລະ ຄົ້ນ­ຄວ້າ ເປັນ­ຕົ້ນ.

    ໃນ​ໂອ­ກາດ​ນີ້ ທ່ານ​ນາງ ສຸ​ພອນ​ສາ ໄຊ​ປັນ­ຍາ ຫົວ­ໜ້າ​ມູນ​ນິ­ທິ ເຟຣດ​ຮາ​ໂລ ປະ­ຈຳ​ລາວ ໄດ້​ໃຫ້​ຮູ້​ວ່າ: ພະ­ຍາດ​ແກ່ນ​ຕາ​ຂຸ້ນ ແມ່ນ​ການ​ສູນ​ເສຍ​ຄວາມ​ໃສ​ຂອງ​ແກ່ນ​ຕາ ເທື່ອ​ລະ​ໜ້ອຍ​ແລ້ວ​ເຮັດ​ໃຫ້​ສາຍ­ຕາ​ຄ່ອຍໆ​ມົວ​ລົງ ຈົນ​ເປັນ­ຕາ​ບອດ​ໄດ້ ເຊິ່ງ​ໄລ­ຍະ​ຜ່ານ​ມາ ມູນ​ນິ­ທິ​ເຟຣດ​ຮາ​ໂລ ສາ­ມາດ​ປິ່ນ­ປົວ​ຄົນ​ເຈັບ​ໄດ້ 40.000 ຄົນ/ປີ ໃນ​ນັ້ນ ໄດ້​ປິ່ນ­ປົວ​ພະ­ຍາດ​ຕາ​ຂຸ້ນ​ໄດ້ 1.400 ຄົນ ຕໍ່​ປະ­ຊາ­ກອນ 1 ລ້ານ​ຄົນ ແລະ ອີກ 20.000 ຄົນ ຍັງ​ບໍ່​ທັນ​ໄດ້​ຮັບ​ການ​ປິ່ນ­ປົວ​ຈາກ​ພະ­ຍາດ​ຕາ​ຂຸ້ນ ແຕ່​ເຖິງ​ແນວ­ໃດ​ກໍ​ຕາມ ມູນ​ນິ­ທິ ເຟຣດ​ຮາ​ໂລ ໄດ້​ສົມ­ທົບ​ກັບ​ກະ­ຊວງ​ສາ​ທາ​ໃນ​ການ​ຂະ­ຫຍາຍ​ການ​ບໍ­ລິ­ການ ໃນ​ການ​ເຂົ້າ​ເຖິງ​ຄົນ​ເຈັບ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ