ຫາດຊາຍຟອງ ສຸມໃສ່ໂຄສະນາສຸຂະສຶກສາ ອະນາໄມ 5 ປ

433 13 ສ.ຫ. 2019 ຂ່າວໜ້າ​ໜຶ່ງ
ຫາດຊາຍຟອງ ສຸມໃສ່ໂຄສະນາສຸຂະສຶກສາ ອະນາໄມ 5 ປ

    ຫ້ອງ­ການ​ສາ­ທາ­ລະ­ນະ​ສຸກ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ລາຍ​ງານ​ໃຫ້​ຮູ້­ເມື່ອ​ບໍ່​ດົນ​ນີ້​ວ່າ: ຕາມ​ສະ­ຖິ­ຕິ​ປັດ­ຈຸ­ບັນ ໄດ້​ມີ​ຜູ້​ຕິດ­ເຊື້ອ​ພະ­ຍາດ​ໄຂ້­ເລືອດ­ອອກ​ເພີ່ມ​ຂຶ້ນ​ສູງ​ຈຳ­ນວນ 451 ກໍ­ລະ­ນີ ແລະ ພົບ​ວ່າ ບ້ານ​ທີ່​ມີ​ຄົນ​ເປັນ​ພະ­ຍາດ​ດັ່ງ­ກ່າວ​ຫຼາຍ​ກວ່າ​ໝູ່ ແມ່ນ​ບ້ານ​ດົງ​ຄຳ​ຊ້າງ ບ້ານ​ໜອງ​ໄຮ ແລະ ບ້ານ​ສົມ​ສະ­ໜຸກ ສ່ວນ​ບ້ານ​ຫາດ​ຊາຍ​ຂາວ​ມີ 13 ກໍ­ລະ­ນີ ໃນ​ນັ້ນ ແມ່ນ​ໄດ້​ມີ​ຜູ້​ເສຍ​ຊີ­ວິດ​ເພີ່ມ​ອີກ 1 ຄົນ ລວມ​ແລ້ວ​ມີ​ຜູ້​ເສຍ​ຊີ­ວິດ​ທັງ​ໝົດ 2 ຄົນ​ຢູ່​ບ້ານ​ດຽວ​ກັນ.

    ວັນ​ທີ 10 ສິງ­ຫາ 2019 ທາງ​ຄະ­ນະ​ແພດ​ໝໍ​ຈາກ​ຫ້ອງ­ການ​ສາ­ທາ­ລະ­ນະ​ສຸກ ປະ­ຈຳ­ເມືອງ​ຫາດ​ຊາຍ​ຟອງ ໄດ້​ສົມ­ທົບ​ກັບ​ອາ­ສາ​ສະ­ໝັກ (ອສບ) ຢູ່​ເຂດ​ບ້ານ​ຫາດ​ຊາຍ​ຂາວ ໂດຍ​ຮ່ວມ​ກັບ​ອຳ­ນາດ​ການ​ປົກ­ຄອງ​ບ້ານ​ດັ່ງ­ກ່າວ ລົງ​ຈັດ​ຕັ້ງ​ປະ­ຕິ­ບັດ​ວຽກ​ງານ​ໂຄ­ສະ­ນາ​ສຸ​ຂະ​ສຶກ​ສາ​ອະ­ນາ­ໄມ 5 ປ ຕ້ານ​ໄຂ້­ຍຸງ​ລາຍ ຂອງ​ກະ ຊວງ​ສາ­ທາ­ລະ­ນະ​ສຸກ ໃຫ້​ກັບ​ຊຸມ​ຊົນ ແລະ ພໍ່​ແມ່​ປະ­ຊາ­ຊົນ ເພື່ອ​ຊຸກ­ຍູ້​ໃຫ້​ເຂົາ­ເຈົ້າ​ເລັ່ງ​ສ້າງ​ຂະ​ບວນ​ການ​ປ້ອງ​ກັນ​ປາບ​ປາມ​ທຳ­ລາຍ​ແຫຼ່ງ​ເພາະ​ພັນ​ຂອງ​ໜອນ​ນ້ຳ​ຍຸງ​ລາຍ​ໃຫ້​ຫຼາຍ​ຂຶ້ນ ເພື່ອ​ເອົາ­ໃຈ­ໃສ່​ຄວບ​ຄຸມ ແລະ ຕັດ​ວົງ​ຈອນ​ຂອງ​ຍຸງ​ລາຍ​ບໍ່​ໃຫ້​ແຜ່​ຂະ­ຫຍາຍ​ພັນ​ເປັນ​ວົງ​ກວ້າງ ແລະ ເປັນ​ການ​ໂຄ­ສະ­ນາ​ປຸກ­ລະ­ດົມ​ສ້າງ​ໃຫ້​ເຂົາ­ເຈົ້າ​ເຫັນ​ໄດ້​ຄວາມ​ສຳ­ຄັນ ແລະ ອັນ­ຕະ­ລາຍ​ເຖິງ​ແກ່​ຊີ­ວິດ ຫາກ​ມີ​ການ​ຕິດ­ເຊື້ອ​ພະ­ຍາດ​ໄຂ້­ຍຸງ ແລະ ບໍ່​ໄດ້​ຮັບ​ການ​ປິ່ນ­ປົວ​ຢ່າງ​ທັນ​ເວ­ລາ.

    ພ້ອມ​ດຽວ​ກັນ ທາງ​ທີມ​ງານ​ຂອງ​ຄະ­ນະ (ອສບ) ກໍ​ໄດ້​ລົງ​ເລາະ​ຕິດ­ຕາມ​ຢູ່​ນຳ​ແຕ່​ລະ​ບັນ­ດາ​ຄົວ​ເຮືອນ​ພາຍ​ໃນ​ບ້ານ ແລະ ຈຸດ​ເປົ້າ​ໝາຍ​ຂອງ​ເຮືອນ​ທີ່​ມີ​ຄົນ​ເສຍ​ຊີ­ວິດ​ແລ້ວ ໂດຍ​ຫຼັກໆ​ແລ້ວ ອສບ ໄດ້​ນຳ­ພາ​ກວດ­ກາ​ໃນ​ບໍ­ລິ­ເວນ​ອ້ອມ​ຮອບ​ຢູ່​ຕາມ​ຂອບ​ຕາມ​ແຈ​ເຮືອນ​ຂອງ​ປະ­ຊາ­ຊົນ​ບ່ອນ​ລີ້​ລັບ​ປຽກ​ຊຸ່ມ ກະ​ປ໋ອງ ຖັງ​ຄຸ​ເກົ່າ ຢາງ​ຕີນ­ລົດ ແລະ ພາ­ຊະ­ນະ​ຕ່າງໆ​ທີ່​ມີ​ນ້ຳ​ອັ່ງ​ຂັງ​ຢູ່​ໃນ​ໄລ­ຍະ​ລະ­ດູ­ຝົນ​ນີ້ ເຊິ່ງ​ເປັນ​ບ່ອນ​ທີ່​ຍຸງ​ລາຍ​ມັກ​ມາ​ພັກ​ອາ­ໄສ​ວາງ​ໄຂ່​ໃສ່ ແລະ ນຳ​ເຊື້ອ​ພະ­ຍາດ​ມາ­ສູ່​ຄົນ ໃນ​ນີ້ ຜ່ານ​ການ​ຕິດ­ຕາມ​ເບິ່ງ (ອສບ) ກໍ​ພົບ​ສະ­ພາບ​ດັ່ງ­ກ່າວ​ຢູ່​ຫຼາຍ​ຄົວ​ເຮືອນ​ທີ່​ເຫັນ​ວ່າ​ຍັງ​ບໍ່​ທັນ​ໄດ້​ເອົາ­ໃຈ­ໃສ່​ປະ­ຕິ­ບັດ ຫຼັກ­ການ 5 ປ ເທົ່າ​ທີ່​ຄວນ ແລະ ເປັນ​ເຫດ​ເຮັດ​ໃຫ້​ຄົນ​ຕິດ­ເຊື້ອ​ພະ­ຍາດ​ໄດ້​ງ່າຍ ດັ່ງ­ນັ້ນ ອສບ ຈຶ່ງ​ໄດ້​ອະ­ທິ­ບາຍ​ແນະ­ນຳ​ວິ­ທີ​ຕ່າງໆ ເພື່ອ​ໃຫ້​ປະ­ຊາ­ຊົນ​ທຳ­ລາຍ​ແຫຼ່ງ​ທີ່­ຢູ່​ຂອງ​ຍຸງ​ລາຍ ແລະ ປ້ອງ​ກັນ​ບໍ່​ໃຫ້​ເປັນ​ໄຂ້­ເລືອດ­ອອກ​ແບບ​ງ່າຍໆ ຄື:ການ​ປະ­ຕິ­ບັດ 5 ປ ເປັນ​ປະ­ຈຳ ເທົ່າ​ນີ້​ແຕ່​ລະ​ຄອບ­ຄົວ​ກໍ​ຈະ​ບໍ່​ມີ​ຍຸງ​ລາຍ ແລະ ບໍ່​ເປັນ​ໄຂ້­ເລືອດ­ອອກ.

ຂ່າວທີ່ກ່ຽວຂ້ອງ