ຕັງ​ຊາ​ນີ ​ໄວ້​ທຸກ​ລະດັບ​ຊາດ ຕໍ່​ຜູ້​​ເສຍ​ຊີວິດ​ຈາກ​ເຫດການ​ລົດ​ບັນທຸກ​ນ້ຳມັນ​ລະ​ເບີດ

514 12 ສ.ຫ. 2019 ຂ່າວຕ່າງປະເທດ
ຕັງ​ຊາ​ນີ ​ໄວ້​ທຸກ​ລະດັບ​ຊາດ ຕໍ່​ຜູ້​​ເສຍ​ຊີວິດ​ຈາກ​ເຫດການ​ລົດ​ບັນທຸກ​ນ້ຳມັນ​ລະ​ເບີດ

     ກົມ​ຖະແຫຼງ​ຂ່າວ ຂອງ​ຫ້ອງ​ວ່າການ​ປະທານາທິບໍດີ​ຕັງ​ຊາ​ນີ ແຈ້ງ​ໃຫ້​ຮູ້​ວ່າ ປະທານາທິບໍດີ​ຕັງ​ຊາ​ນີ ຈອນ ມາ​ກູ​ຟູ​ລີ ໄດ້​ປະກາດ​ໃຫ້​ໄວ້​ທຸກ​ລະດັບ​ຊາດ​ເປັນ​ເວລາ 3 ວັນ ເພື່ອ​ລ້ຳ​ລຶກ​ເຖິງ​ບັນດາ​ຜູ້​ໄດ້​ຮັບ​ເຄາະ​ຮ້າຍ ຈາກ​ເຫດການ​ລົດ​ບັນທຸກ​ນ້ຳມັນ​ລະເບີດ ທີ່​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 64 ຄົນ ແລະ ບາດເຈັບ​ອີກ 70 ຄົນ ຢູ່​ໃນ​ເຂດ ໂມ​ໂຣ​ໂກ​ໂນ ເມື່ອ​ວັນ​ທີ 10 ສິງຫາ​ນີ້.

   ໃນ​ຖະແຫຼງການ ທີ່​ມີ​ອອກ​ມາ​ໃນ​ຕອນ​ເຊົ້າ​ວັນ​ທີ 11 ສິງຫາ ກົມ​ຖະແຫຼງ​ຂ່າວ ຂອງ​ຫ້ອງ​ວ່າການ​ປະທານາທິບໍດີ​ຕັງ​ຊາ​ນີ ແຈ້ງ​ໃຫ້​ຮູ້​ວ່າ ການ​ໄວ້​ທຸກ​ເປັນ​ເວລາ 3 ວັນ ແມ່ນ​ແຕ່​ວັນ​ທີ 10-12 ສິງຫາ. ໃນ​ໄລຍະ​ເວລາ​ໄວ້​ທຸກ​ນັ້ນ ທົ່ວ​ປະເທດ​ຕັງ​ຊາ​ນີ ຈະ​ໄດ້​ຊັກ​ທຸງ​ລົງ​ເຄິ່ງ​ເສົາ ແລະ ງົດ​ການເຄື່ອນໄຫວ​ມ່ວນຊື່ນ ບັນເທີງ​ເບົາ​ສະໝອງ. ຖະແຫຼງການ​ກໍ​ໃຫ້​ຮູ້​ວ່າ ປະທານາທິບໍດີ ມາ​ກູ​ຟູ​ລີ ແຕ່ງຕັ້ງ​ໃຫ້​ນາຍົກລັດຖະມົນຕີ ໄປ​ຍັງ​ເຂດ​ທີ່​ເກີດ​ເຫດ​ດັ່ງກ່າວ ເພື່ອ​ເຂົ້າ​ຮ່ວມ​ພິທີ​ສົ່ງສະການ​ຜູ້​ເສຍ​ຊີວິດ ຊຶ່ງ​ຈັດ​ຂຶ້ນ​ໃນ​ວັນ​ທີ 11 ສິງຫາ.

     ກ່ອນ​ໜ້າ​ນັ້ນ ເມື່ອ​ວັນ​ທີ 10 ສິງຫາ ລົດ​ບັນທຸກ​ນ້ຳມັນ​ຄັນ​ໜຶ່ງ ໄດ້​ປະສົບ​ອຸບັດເຫດ​ພິກ​ຂວ້ຳ ໃນ​ເວລາ​ທີ່​ແລ່ນ​ຜ່ານ​ເຂດ ໂມ​ໂຣ​ໂກ​ໂຣ ທີ່ຢູ່​ຫ່າງ​ຈາກ​ນະຄອນຫຼວງ ດາ ແອ​​ສ ຊາ​ລາມ ຂອງ​ຕັງ​ຊາ​ນີ ປະມານ 200​ກມ ໄປ​ທາງ​ທິດຕາເວັນຕົກ ເຮັດ​ໃຫ້​ນ້ຳມັນ​ໄຫຼ​ອອກ​ມາ​ຈາກ​ລົດ ແລະ ເກີດ​ລະເບີດ ແລະ ໄຟ​ໄໝ້​ຂຶ້ນ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ ແລະ ບາດເຈັບ​ດັ່ງກ່າວ.

ຂ່າວທີ່ກ່ຽວຂ້ອງ